1.1. Mazkur Nizom O‘zbekiston Respublikasi bojxona kodeksining 38-moddasiga muvofiq ishlab chiqilgan.

Davlat foydasiga voz kechish shunday rejimki, bunda shaxs tovarlarga nisbatan boj, soliqlar va iqtisodiy siyosat choralari qo‘llanilmagan holda ulardan davlat foydasiga voz kechadi.

1.2. Tovarlarni davlat foydasiga voz kechish bojxona rejimiga joylashtirishga bojxona organining ruxsati bilan yo‘l qo‘yiladi.

1.3. Tovarlardan davlat foydasiga voz kechish ushbu Nizomga muvofiq davlatning xarajatlar qilishiga sabab bo‘lmaydi.

1.4. Davlat foydasiga voz kechish bojxona rejimini tanlagan shaxs, agar qonunlarda boshqa holatlar nazarda tutilmagan bo‘lsa, O‘zbekiston Respublikasi bojxona organlarining tovarlarni davlat foydasiga voz kechish rejimi ostida joylashtirilishiga oid ruxsatnomasi olinganidan keyin mazkur rejimni boshqasiga o‘zgartirish huquqiga ega emas.

1.5. Tovarlardan davlat foydasiga voz kechgan shaxs ularni bojxona organi tomonidan belgilanadigan joyga yetkazib berilishi bo‘yicha barcha xarajatlarni o‘zi qoplaydi.

2.1. Davlat foydasiga voz kechish bojxona rejimiga quyidagilar joylashtirilishi mumkin:

O‘zbekiston Respublikasi bojxona chegarasidan haqiqatda kesib o‘tgan olib kirilayotgan tovarlar;

O‘zbekiston Respublikasi bojxona hududiga olib kirilgan va o‘zga bojxona rejimiga joylashtirilgan tovarlar;

bojxona deklaratsiyasi topshirilgan yoki shaxsning maqsadini tatbiq etish bilan bevosita ularni olib chiqib ketishga bog‘liq o‘zga xil harakatlar amalga oshirilgan olib chiqib ketilayotgan tovarlarga nisbatan;

2.2. Quyidagilarga davlat foydasiga voz kechish bojxona rejimida joylashtirilishiga yo‘l qo‘yilmaydi:

O‘zbekiston Respublikasiga olib kirilishi, O‘zbekiston Respublikasidan olib chiqib ketilishi taqiqlangan tovarlarga;

O‘zbekiston Respublikasi hududida erkin muomalada bo‘lishi uchun yoki reimport bojxona rejimiga muvofiq chiqarilgan tovarlarga.

2.3. Bojxona organi quyidagi hollarda davlat foydasiga voz kechish bojxona rejimida tovarlarni joylashtirishga oid ruxsatnomani taqdim etishdan bosh tortishi mumkin:

agar tovarlarning davlat foydasiga voz kechish bojxona rejimida joylashtirilishi davlat uchun qandaydir bir xarajatlarni keltirib chiqarishi mumkin bo‘lsa;

agar tovarlar bahosi ularni sotish bilan bog‘liq bojxona organining xarajatlarini qoplay olmasa;

agar tovarlarning bojxona organlari tomonidan sotilishi cheklangan bo‘lsa;

bojxona organida davlat foydasiga voz kechish davlat manfaatlariga ziyon yetkazishi mumkin bo‘lishiga yetarlicha asoslari bo‘lgan boshqa hollarda.

2.4. Tovarlarni olib o‘tayotgan shaxs yoki bo‘lmasa bojxona brokerining arizasiga ko‘ra tovarlar davlat foydasiga voz kechish bojxona rejimida joylashtirilishi mumkin.

Har qanday uchinchi shaxslar oldida davlat foydasiga voz kechish bojxona rejimiga oid arizaning haqqoniyligi uchun javobgarlik deklarant zimmasiga yuklatiladi.

Bojxona organlari deklarant davlat foydasiga voz kechgan tovarlarga nisbatan uchinchi shaxslarning hech qanday mulkiy talablarini qondirmaydilar.

2.5. Tovarlarni davlat foydasiga voz kechish bojxona rejimida joylashtirishga ruxsat berish to‘g‘risidagi qarorni Qoraqalpog‘iston Respublikasi, viloyatlar, Toshkent shahri bo‘yicha DBQ boshqarmasi ixtisoslashtirilgan bojxona majmuining boshlig‘i yoki uning o‘rnini bosuvchi shaxs qabul qiladi.

2.6. Bojxona organi muvofiqlik sertifikati mavjudligi sharoitida zarur hollarda, boshqa davlat organlarida sertifikatlash yoki nazorat qilinishi lozim bo‘lgan transport vositalari tovarlariga nisbatan veterinariya, fitosanitariya, ekologiya va davlat nazoratining boshqa turlaridan o‘tkazilishi chog‘ida davlat foydasiga voz kechish bojxona rejimida tovarlarni joylashtirishga ruxsatnoma beradi.

2.7. Bojxona organlari tovarlar tashuvchisi, omborxona sohibiga yoki boshqa shaxslarga ushbu tovarlar davlat foydasiga voz kechish bojxona rejimida joylashtirilguniga qadar tovarlarni tashish, saqlash, yuklarga oid va boshqa operatsiyalarni o‘tkazish bilan bog‘liq har qanday xarajatlarni to‘laydilar.

3.1. Davlat foydasiga voz kechish bojxona rejimida joylashtiriladigan tovarlarni bojxonada rasmiylashtirishi, tovarlar faoliyat ko‘rsatadigan mintaqasida bo‘lgan bojxona organida amalga oshiriladi.

3.2. Tovarlarni davlat foydasiga voz kechish bojxona rejimida joylashtirilishi chog‘ida bojxona organiga deklarant tomonidan quyidagi hujjatlar taqdim etiladi:

1-ilovaga muvofiq to‘ldirilgan bojxona yuk deklaratsiyasi;

shaxsning 2-ilovaga muvofiq yozilgan arizasi;

3-ilovaga muvofiq tuzilgan davlat foydasiga voz kechish bojxona rejimida joylashtirilgan tovarlarni topshirish dalolatnomasi;

majburan sertifikatlanadigan tovarlarga nisbatan - sertifikat;

boshqa davlat organlarining, agar tovarlar ushbu organlar nazoratiga olingan bo‘lsa, ruxsatnomasi;

tovarlarga bo‘lgan yuk va tovarlarga oid hujjatlar (yukxatlar, konosamentlar, spetsifikatsiyalar, hisobvaraq-fakturalar va sh.k.);

bojxona rasmiylashtirishi va bojxona nazoratining o‘tkazilishi uchun zarur bo‘lgan boshqa hujjatlar.

3.3. Bojxona organiga shaxsning tovarlarni davlat foydasiga voz kechish bojxona rejimida joylashtirish to‘g‘risidagi arizasini taqdim etish, agar garovga beruvchi garov to‘g‘risidagi shartnomada garov sifatida berilgan tovarlarning davlat foydasiga voz kechish bojxona rejimida joylashtirish to‘g‘risida aytib o‘tgan bo‘lsa, garov vositasi bo‘lib hisoblanadigan tovarlarga nisbatan talab qilinmaydi. Garovga beruvchining shartnomada shunday ta’kidlangan arizasi ariza shakli bo‘lib hisoblanadi, ko‘rsatilgan shartnoma xulosasi esa bojxona organi tomonidan tovarlarni davlat foydasiga voz kechish bojxona rejimida joylashtirishga oid ushbu organning ruxsatnomasi sifatida ko‘rib chiqiladi.

4.1. Bojxona organlariga tovarlarni davlat foydasiga voz kechish bojxona rejimida joylashtirishga ruxsatnomani taqdim etilishi chog‘ida ushbu tovarlarga nisbatan bojxona to‘lovlarini to‘lanishi uchun berilgan bank kafolati o‘z kuchini yo‘qotadi.

Agar bu garov shartnomasida ko‘zda tutilgan bo‘lsa, bojxona to‘lovlarini to‘lanishini ta’minlovchi garov shartnomasi bo‘yicha garovga oid huquqiy munosabatlar to‘xtatiladi.

4.2. Tovarlarni davlat foydasiga voz kechish bojxona rejimida joylashtirish chog‘ida to‘lovchiga quyidagilar qaytariladi.

bojxona organining depozitiga bojxona to‘lovlarining to‘lanishini ta’minlovchi sifatida kiritilgan summalar;

tovarlarni bojxona hududida qayta ishlash bojxona rejimida joylashtirish chog‘ida to‘langan import bojlari va soliqlarning summalari;

tovarlarni bojxona hududidan tashqarida qayta ishlash bojxona rejimida joylashtirish chog‘ida to‘langan eksport bojlari summalari;

tovarlarni, eksport bojxona rejimida joylashtirish chog‘ida va O‘zbekiston Respublikasi bojxona hududidan vaqtincha olib chiqib ketish chog‘ida agar tovarlar O‘zbekiston Respublikasi bojxona hududidan haqiqatda olib chiqib ketilmagan bo‘lsa, to‘langan eksport bojlarining summalari.

Davlat foydasiga voz kechish bojxona rejimida vaqtinchalik olib kirilgan tovarlarni joylashtirish chog‘ida to‘langan import bojlari va soliqlar summalari qaytarilmaydi.

4.3. Shaxs tomonidan bojxona organiga davlat foydasiga voz kechish bojxona rejimida joylashtirilgan tovarlarni berish chog‘ida dalolatnoma ikki nusxada (3-ilova) tuziladi. Bunday dalolatnomalarning blankalari qat’iy hisobot hujjatlari bo‘lib hisoblanadi. Ko‘rsatilgan dalolatnomaning bir nusxasi tovarlarni davlat foydasiga voz kechish rejimida, joylashtirishga ruxsatnomani bergan bojxona organida saqlanadi. Dalolatnomaning ikkinchi nusxasi tovarlardan davlat foydasiga voz kechgan shaxsga topshiriladi.

4.4. Shaxs davlat foydasiga voz kechgan tovarlarni tasarruf etish bojxona qonun hujjatlariga muvofiq amalga oshiriladi.

Tovarlarni davlat foydasiga voz kechish bojxona rejimida joylashtirish chog‘ida deklarant tomonidan bojxona deklaratsiyasining quyidagi ustunlari to‘ldiriladi:

1, 2, 3, 4, 5, 6, 8, 11, 12, 13, 14, 15, 15a, 16, 18, 19, 22, 23, 24, 25, 26, 31, 32, 33, 34, 35, 37, 38, 40, 41, 42, 44, 45, 46, 50, 54, D, S ustun 2-bandi.

2, 3, 4, 5, 6, 8, 11, 12, 13, 14, 15, 15a, 16, 18, 19, 22, 23, 24, 25, 26, 32, 33, 34, 35, 37, 38, 41, 42, 45, 46, 54, D ustunlar, S-ustunning 2-bandi erkin muomala uchun chiqarish bojxona rejimida joylashtiriladigan tovarlarga oid bojxona yuk deklaratsiyasini to‘ldirish qoidalariga muvofiq to‘ldiriladi.

1, 40, 44, 50-ustunlarning to‘ldirilishi quyidagi muhim jihatlarga ega:

1-ustun “Deklaratsiya turi”.

O‘zbekiston Respublikasi bojxona hududiga olib kiriladigan yoki ushbu hududga olib kirilgan va boshqa bojxona rejimida joylashtirilgan tovarlarni davlat foydasiga voz kechish bojxona rejimida joylashtirish chog‘ida ustunning birinchi kichik qismida "IM", olib chiqib ketilayotgan tovarlar va transport vositalarida esa - “EK” ko‘rsatiladi.

Ikkinchi kichik qismida esa asosiy bojxona rejimining kodi - 75 ko‘rsatiladi.

Ustunning uchinchi kichik qismi to‘ldirilmaydi.

40-“Umumiy deklaratsiya/avvalgi hujjat” ustuni.

Oldin o‘zga bojxona rejimida joylashtirilgan tovarlarning davlat foydasiga voz kechish bojxona rejimida joylashtirish chog‘ida ustunda tovarlarning o‘zga bojxona rejimida joylashtirilishiga asos bo‘lgan BYuD raqami ko‘rsatiladi.

44-“Qo‘shimcha axborot/taqdim etiladigan hujjatlar” ustuni.

Ustunda (har bir rekvizitlarni yangi satrdan boshlagan holda va ularning har biriga tartib raqamini qo‘ygan holda) quyidagilar ko‘rsatiladi:

2 - transport hujjati (tovarlarga doir yuk va tovarga ilova qilinuvchi hujjatlar), yukxatlar, konosamentlar, spetsifikatsiyalar, hisobvaraq-fakturalar va sh.k.)ning raqami va sanasi;

3 - shaxsning tovarlarni davlat foydasiga voz kechish bojxona rejimiga joylashtirish to‘g‘risidagi arizasining raqami va sanasi yoki bo‘lmasa garov to‘g‘risidagi shartnomaning raqami va sanasi;

4 - o‘zga davlat organlarining (ularning nomlari ko‘rsatilgan holdagi), agar tovar ushbu organlar nazorati ostiga olingan bo‘lsa, ruxsatnomalari raqami va sanasi;

5 - davlat foydasiga voz kechish bojxona rejimida joylashtirilgan tovarlarni topshirish dalolatnomasining raqami va sanasi;

50-ustun “Ishonch bildirilgan” shaxs.

Ustunda tovarni davlat foydasiga voz kechish bojxona rejimida rasmiylashtirishga rozilik bildirgan rahbarning yoki o‘zga vakolatli shaxsning lavozimi, ismi sharifi, uning imzosi ko‘rsatiladi.