O‘zbekiston Respublikasi Prezidentining “O‘zbekiston Respublikasi Yer resurslari davlat qo‘mitasini tashkil etish to‘g‘risida” 1998-yil 24-iyuldagi PF-2059-son Farmonini ro‘yobga chiqarish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Yer resurslari davlat qo‘mitasi to‘g‘risidagi nizom 1-ilovaga muvofiq;

O‘zbekiston Respublikasi Yer resurslari davlat qo‘mitasi markaziy apparati tuzilmasi (2-ilova) va shtatdagi xodimlar soni (xizmat ko‘rsatuvchi xodimlardan tashqari) 40 nafar etib;

Yer resurslari hududiy boshqarmasi va tuman xizmatining namunaviy tuzilmalari 3 va 4-ilovalarga muvofiq tasdiqlansin.

O‘zbekiston Respublikasi Yer resurslari davlat qo‘mitasi raisiga zarur hollarda Qo‘mita markaziy apparati va unga qarashli hududiy organlarning tasdiqlangan tuzilmalariga xodimlarning belgilangan soni va ish haqi fondi doirasida o‘zgartirishlar kiritish huquqi berilsin.

2. O‘zbekiston Respublikasi Yer resurslari davlat qo‘mitasiga Qo‘mita raisining ikki nafar o‘rinbosari, shu jumladan bir nafar birinchi o‘rinbosari bo‘lishiga ruxsat etilsin. O‘zbekiston Respublikasi Yer resurslari davlat qo‘mitasining hay’ati tarkibi yetti kishidan iborat etib belgilansin.

Belgilansinki:

O‘zbekiston Respublikasi Yer resurslari davlat qo‘mitasi raisi va uning o‘rinbosarlari maqomiga ko‘ra tegishli ravishda vazirga, vazirning birinchi o‘rinbosariga va vazir o‘rinbosariga tenglashtiriladi;

O‘zbekiston Respublikasi Yer resurslari davlat qo‘mitasining raisi ayni paytda O‘zbekiston Respublikasi Yerdan foydalanish va uni muhofaza qilishni nazorat qilish bosh davlat inspektori, uning o‘rinbosarlari esa, tegishli ravishda bosh davlat inspektorining o‘rinbosarlari hisoblanadilar;

Qoraqalpog‘iston Respublikasi Yer resurslari boshqarmasi boshlig‘i Qoraqalpog‘iston Respublikasi Vazirlar Kengashi bilan viloyatlar yer resurslari boshqarmalari boshliqlari esa viloyat hokimliklari bilan kelishilgan holda O‘zbekiston Respublikasi Yer resurslari davlat qo‘mitasi tomonidan;

yer resurslari tuman xizmatlari boshliqlari tuman hokimliklari bilan kelishilgan holda Qoraqalpog‘iston Respublikasi Yer resurslari boshqarmasi, viloyatlar yer resurslari boshqarmalari tomonidan tayinlanadilar.

Qoraqalpog‘iston Respublikasi yer resurslari boshqarmasi boshlig‘i, yer resurslari viloyat boshqarmalari va tuman xizmatlari boshliqlari ayni paytda tegishli hududlarda yerdan foydalanish va uni muhofaza qilishni nazorat qilish davlat inspektorlari hisoblanadilar;

Yer resurslari davlat qo‘mitasi markaziy apparati faoliyatini mablag‘ bilan ta’minlash respublika budjeti mablag‘lari hisobiga, yer resurslari hududiy boshqarmalari va tuman xizmatlarini mablag‘ bilan ta’minlash esa mablag‘ mahalliy budjet mablag‘lari va ularning xo‘jalik faoliyati daromadlari hisobiga amalga oshiriladi.

3. O‘zbekiston Respublikasi Yer resurslari davlat qo‘mitasi:

ikki hafta muddatda yer resurslari viloyat boshqarmasi va tuman xizmati to‘g‘risidagi namunaviy nizomlarni ishlab chiqsin va tasdiqlasin;

Qoraqalpog‘iston Respublikasi Vazirlar Kengashi, viloyatlar va tumanlar hokimliklari bilan birgalikda hududiy boshqarmalar va xizmatlarini tashkil etish, ularni joylashtirish, aloqa, asbob-uskunalar, texnik vositalar va avtotransport bilan ta’minlash yuzasidan tashkiliy chora-tadbirlarni amalga oshirsin;

O‘zbekiston Respublikasi Mehnat vazirligi va Moliya vazirligi bilan Qo‘mita markaziy apparati va uning hududiy organlari xodimlarining Yagona tarif setkasi bo‘yicha mehnatga haq to‘lash razryadlarini kelishib olsin.

4. Belgilansinki:

O‘zbekiston Respublikasi Yer resurslari davlat qo‘mitasi yer tuzish, yer monitoringini amalga oshirish va davlat yer kadastrini yuritish bo‘yicha bosh buyurtmachi hisoblanadi;

“O‘zdaverloyiha” davlat ilmiy-loyihalashtirish instituti bosh loyihalovchi — dastlabki loyiha, loyiha ishlari, qishloq xo‘jaligi ahamiyatiga ega bo‘lgan rejalashtirish-kartografiya materiallarini tayyorlash va nashr etish hamda davlat yer tuzish, yer monitoringi va davlat yer kadastriga bog‘liq boshqa izlanishlarning bajaruvchisi hisoblanadi;

Tuproqshunoslik va agrokimyo instituti tuproq unumdorligini saqlab qolish, oshirish va qayta tiklash bilan bog‘liq tuproqshunoslik bo‘yicha ilmiy ishlarning, boshqa tadqiqotlar va izlanishlarning bajaruvchisi hisoblanadi;

“O‘zgeodezkadastr” bosh boshqarmasi belgilangan tartibda O‘zbekiston Respublikasi Yer resurslari davlat qo‘mitasini yer resurslarini o‘rganish, yer tuzish, yer monitoringini va davlat yer kadastrini yuritish bilan bog‘liq maxsus tadqiqotlar va izlanishlarni, loyihalash hamda boshqa ishlarni amalga oshirish uchun zarur bo‘lgan aerokosmik suratga olish materiallari, turli masshtabdagi xarita-kartografiya asoslari, topografiya ishlari va ma’lumotlari bilan ta’minlaydi;

O‘zbekiston Respublikasi Yer resurslari davlat qo‘mitasi belgilangan tartibda “O‘zgeodezkadastr” bosh boshqarmasini Davlat kadastrlari yagona tizimini yuritishni ta’minlash uchun qishloq joylardagi yerlar davlat kadastrini yuritish bilan bog‘liq materiallar bilan ta’minlaydi.

5. O‘zbekiston Respublikasi Moliya vazirligi respublika budjetida va mahalliy budjetlarda:

yer tuzishni amalga oshirish, yer monitoringini, davlat yer kadastrini yuritish va tuproqshunoslik tadbirlarini mablag‘ bilan ta’minlash uchun mablag‘larni nazarda tutsin. 1998-yilda mablag‘ bilan ta’minlash Qishloq va suv xo‘jaligi vazirligiga ushbu maqsadlar uchun budjet ko‘rsatkichlarida nazarda tutilgan mablag‘lar doirasida amalga oshirilsin;

O‘zbekiston Respublikasi Qishloq va suv xo‘jaligi vazirligining Yer tuzish va yerdan foydalanishni nazorat qilish davlat inspeksiyasiga ega bo‘lgan yer tuzish va yerdan foydalanish bosh boshqarmasining berilayotgan xodimlari soni, ish haqi fondi va boshqa xarajatlarini hisobga olgan holda O‘zbekiston Respublikasi Yer resurslari davlat qo‘mitasi va uning bo‘linmalari xarajatlariga mablag‘ ajratishni nazarda tutsin;

O‘zbekiston Respublikasi Yer resurslari davlat qo‘mitasiga uchta yengil avtomobil xarajatlariga limit ajratsin. “Toshshaharyo‘lovchitrans” davlat uyushmasi transport xizmati ko‘rsatishni ta’minlasin.

6. Belgilab qo‘yilsinki, qishloq xo‘jaligi va o‘rmon xo‘jaligi ishlab chiqarishi nobudgarchiligini qoplashdan tushadigan mablag‘lar O‘zbekiston Respublikasi Yer resurslari davlat qo‘mitasi, Qoraqalpog‘iston Respublikasi Yer resurslari boshqarmasi va viloyat boshqarmalarining maxsus schyotlariga tushadi hamda ulardan O‘zbekiston Respublikasi Yer kodeksining 88-moddasiga muvofiq yangi yerlarni o‘zlashtirish va sug‘oriladigan yerlarni kompleks rekonstruksiya qilish, tuproq unumdorligini oshirish, kollektor-drenaj tarmoqlarini qurish va qayta qurish choralarini va o‘rmonlar ahvolini yaxshilashga yo‘naltirilgan boshqa tadbirlarni amalga oshirish uchun qat’iy maqsadli foydalaniladi.

Yer resurslari davlat qo‘mitasi O‘zbekiston Respublikasi Moliya vazirligi, Qoraqalpog‘iston Respublikasi Vazirlar Kengashi va viloyat hokimliklari bilan birgalikda qishloq xo‘jaligi va o‘rmon xo‘jaligi ishlab chiqarishi nobudgarchiligini qoplashdan tushadigan mablag‘larni jamlash va undan foydalanish tartibini bir oy muddatda ishlab chiqsin va Vazirlar Mahkamasiga taqdim etsin.

7. Tuproqshunoslik va agrokimyo instituti xodimlar soni va mablag‘ bilan ta’minlash hajmi, shuningdek Toshkent shahar, Qamarniso ko‘chasi, 3-uyda joylashgan binolar kompleksi, inshootlar, asbob-uskunalar bilan O‘zbekiston Respublikasi Fanlar akademiyasi balansidan O‘zbekiston Respublikasi Yer resurslari davlat qo‘mitasi balansiga berilsin.

8. O‘zbekiston Respublikasi Yer resurslari davlat qo‘mitasi Oliy va o‘rta maxsus ta’lim vazirligi bilan birgalikda zarur miqdorda yer tuzish mutaxassislari, tuproqshunoslar, xarita tuzuvchilar tayyorlash yuzasidan bir oy muddatda Vazirlar Mahkamasiga taklif kiritsin.

9. O‘zbekiston Respublikasi Yer resurslari davlat qo‘mitasi markaziy apparati Toshkent shahar, Chilonzor tumani, Cho‘ponota ko‘chasi, “M” mavzesidagi “O‘zdaverloyiha” instituti binosiga joylashtirilsin.

10. O‘zbekiston Pochta va telekommunikatsiyalar agentligi bir oy muddatda O‘zbekiston Respublikasi Yer resurslari davlat qo‘mitasi markaziy apparatini zarur aloqa vositalari, shu jumladan uchta hukumat aloqasi telefoni bilan ta’minlasin.

11. Adliya vazirligi, tegishli vazirliklar va idoralar ikki hafta muddatda amaldagi me’yoriy hujjatlarni va nizomlarni mazkur qarorga muvofiqlashtirsinlar.

12. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari I. H. .Jo‘rabekov zimmasiga yuklansin.

1. O‘zbekiston Respublikasi Yer resurslari davlat qo‘mitasi (Yer resurslari davlat qo‘mitasi) yer munosabatlarini tartibga solish, yer tuzishni, yer monitoringini tashkil etish, davlat yer kadastrini yuritish, yerdan foydalanish va uni muhofaza qilishni nazorat qilish sohasidagi davlat boshqaruvi organi hisoblanadi.

2. O‘zbekiston Respublikasi Yer resurslari davlat qo‘mitasi o‘z faoliyatida O‘zbekiston Respublikasi qonunlariga, O‘zbekiston Respublikasi Oliy Majlisi qarorlariga, O‘zbekiston Respublikasi Prezidentining farmonlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga hamda mazkur Nizomga amal qiladi.

3. O‘zbekiston Respublikasi yer resurslari davlat qo‘mitasining o‘z vakolatlari doirasida qabul qilinadigan qarorlari barcha yuridik va jismoniy shaxslar tomonidan bajarilishi majburiydir.

4. O‘zbekiston Respublikasi Yer resurslari davlat qo‘mitasi xalqaro tashkilotlarda yer masalalari bo‘yicha O‘zbekiston Respublikasi manfaatlarini ifodalaydi.

5. O‘zbekiston Respublikasi Yer resurslari davlat qo‘mitasi yuridik shaxs hisoblanadi, bank muassasalarida hisob-kitob schyotlariga ega bo‘ladi.

6. Quyidagilar O‘zbekiston Respublikasi Yer resurslari davlat qo‘mitasining asosiy vazifalari va faoliyati yo‘nalishlari hisoblanadi:

yer resurslaridan oqilona foydalanishga yo‘naltirilgan yagona davlat siyosatini amalga oshirish, O‘zbekiston Respublikasining Yer kodeksiga va yer to‘g‘risidagi boshqa qonun hujjatlariga rioya etilishini nazorat qilish, davlat boshqaruvi organlari, yuridik va jismoniy shaxslarning yerlardan foydalanish, tuproq unumdorligini saqlab qolish, oshirish va tiklash sohasidagi faoliyatini muvofiqlashtirish;

bozor iqtisodiyotini rivojlantirish, qishloqda mulkdorlar sinfini shakllantirish ehtiyojlariga muvofiq yer munosabatlarini tartibga solish tizimini takomillashtirish yuzasidan takliflar tayyorlash;

yer tuzish, yerdan foydalanish va uni muhofaza qilish, yer resurslarini baholashni hisobga olib borish, qulay ekologik muhitni yaratish va tabiiy manzaralarni yaxshilashni takomillashtirishga yo‘naltirilgan chora-tadbirlar kompleksini ishlab chiqish va amalga oshirish;

yer fondi holatini kuzatish, o‘zgarishlarni o‘z vaqtida aniqlash, yerlarni baholash, salbiy jarayonlarning oldini olish va ularning oqibatlarini bartaraf etish maqsadida yer monitoringini amalga oshirish;

davlat yer kadastrini tashkil etish va yuritish, yerga egalik huquqini ro‘yxatdan o‘tkazish, davlat boshqaruvi organlarini, yuridik va jismoniy shaxslarni yerning tabiiy, xo‘jalik va huquqiy rejimi, yerlarning toifalari, sifat tavsiflari, joylashgan o‘rni va yer uchastkalarining o‘lchamlari, ularning yer egalari, yerdan foydalanuvchilar, ijarachilar va mulkdorlar bo‘yicha taqsimlanishi to‘g‘risidagi ishonchli ma’lumotlar va hujjatlar bilan ta’minlash;

yerdan foydalanish va uni muhofaza qilish ustidan davlat nazoratini tashkil etish va amalga oshirish, yuridik va jismoniy shaxslar, boshqaruv organlari, mahalliy hokimiyat organlari tomonidan qonun hujjatlariga rioya qilinishini ta’minlash, yo‘l qo‘yilayotgan qonun buzilishlarini bartaraf etish va aybdor shaxslarni javobgarlikka tortish bo‘yicha o‘z vaqtida choralar ko‘rish;

yer fondidan foydalanishni yaxshilash, tuproq unumdorligini saqlab qolish, oshirish va tiklash Milliy dasturini ishlab chiqish va amalga oshirish;

yer resurslarining ahvoli to‘g‘risida har yillik Milliy hisobot tuzish;

yer munosabatlari sohasida yagona ilmiy-texnika siyosatini o‘tkazish, yer tuzishni, davlat yer kadastrini yuritishning eng yangi jahon texnologiyalarini o‘rganish va joriy etish hamda Yer resurslari davlat qo‘mitasi tashkilotlarini zamonaviy texnika vositalari va asbob-uskunalar bilan jihozlash;

“O‘zgeodezkadastr” bosh boshqarmasi bilan birgalikda viloyatlar, tumanlar, shaharlar, qishloqlar va ovullar ma’muriy chegaralarini belgilash (aniqlashtirish) ishlarini tashkil etish va o‘tkazish;

yer tuzish, davlat yer kadastri va tuproqshunoslik sohasi mutaxassislarini tayyorlash va ularning malakasini oshirishni tashkil etish;

yer resurslarini boshqarish, tuproq unumdorligini oshirish tizimini takomillashtirish, Vatanimiz yutuqlarini chet ellarda targ‘ib qilish maqsadida xorijiy mamlakatlar bilan aloqalarni rivojlantirish chora-tadbirlarini amalga oshirish;

yer resurslaridan foydalanish maqsadli dasturlari bo‘yicha xorijiy kompaniyalar, firmalar, ilmiy markazlar bilan hamkorlik qilish.

7. O‘zbekiston Respublikasi Yer resurslari davlat qo‘mitasi quyidagi huquqlarga ega:

er monitoringi, davlat yer kadastrini yuritish, yer uchastkalariga huquqlarni, servitutlar to‘g‘risidagi bitimlarni ro‘yxatdan o‘tkazish, tuproq unumdorligini saqlab qolish, yer resurslarini hisobga olish, yerdan foydalanish va uning muhofaza etilishi ustidan nazorat qilish, shuningdek Yer resurslari davlat qo‘mitasiga yuklangan vazifalarning bajarilishini ta’minlovchi boshqa maqsadlar uchun zarur bo‘lgan yer tuzish, tuproq, geobotanika, topografiya, kartografiya va yerni baholash ishlari bo‘yicha me’yoriy hujjatlarni ishlab chiqish va o‘z vakolatlari doirasida tasdiqlash;

yuridik va jismoniy shaxslardan yerlardan foydalanish va ularni muhofaza qilish masalalari bo‘yicha zarur axborotlarni so‘rash va tekin olish, tuproq kadastr ma’lumotlariga muvofiqligini aniqlash uchun tuproqni analiz qilish;

hay’at majlislarida davlat boshqaruvi organlari, korxonalar, tashkilotlar va muassasalar rahbarlarining yerlardan oqilona foydalanish va ularni muhofaza qilish masalalari bo‘yicha hisobotlarini eshitish;

yerlardan oqilona foydalanish va ularni muhofaza qilish masalalari bo‘yicha tekshirishlar o‘tkazish, davlat boshqaruvi organlari, yuridik va jismoniy shaxslar tomonidan bajarilishi majburiy bo‘lgan yer to‘g‘risidagi qonun hujjatlarining buzilishi sabablari va sharoitlarini bartaraf etishga yo‘naltirilgan yozma ko‘rsatmalar berish;

aybdor mansabdor shaxslarni va fuqarolarni ma’muriy javobgarlikka tortish, yer to‘g‘risidagi qonun hujjatlarini buzish oqibatida yetkazilgan zararni qoplash to‘g‘risida da’vo qilish, tegishli korxonalarga va tashkilotlarga hamda huquqni muhofaza qilish organlariga shaxslarni javobgarlikka tortish uchun taqdimnomalar yuborish;

er to‘g‘risidagi qonun hujjatlarini buzish hollari aniqlangan taqdirda mahalliy hokimiyat davlat organlariga yer uchastkalarini olib qo‘yish, shu jumladan yer ijarasi shartnomasini muddatidan oldin bekor qilish, shuningdek yerdan foydalanishni cheklash va to‘xtatib qo‘yish to‘g‘risida materiallar taqdim etish;

yerlardan foydalanish va ularni muhofaza qilish masalalarini birgalikda ishlab chiqish uchun boshqa vazirliklar, idoralar, Qoraqalpog‘iston Respublikasi Vazirlar Kengashi, hokimliklar, muassasalar va tashkilotlar mutaxassislarini belgilangan tartibda jalb qilish.

8. Yer resurslari davlat qo‘mitasi o‘z ishini kollegiallik, yakka boshchilik va markazlashtirilgan rahbarlikni uyg‘unlashtirish asosida tashkil etadi.

9. O‘zbekiston Respublikasi Yer resurslari davlat qo‘mitasiga O‘zbekiston Respublikasi Konstitutsiyasiga muvofiq O‘zbekiston Respublikasi Prezidenti tomonidan tayinlanadigan, keyinchalik O‘zbekiston Respublikasi Oliy Majlisi tomonidan tasdiqlanadigan rais boshchilik qiladi.

O‘zbekiston Respublikasi Yer resurslari davlat qo‘mitasi raisi ayni paytda Yerdan foydalanish va uni muhofaza qilishni nazorat qilish bosh davlat inspektori hisoblanadi.

10. Yer resurslari davlat qo‘mitasi raisining ikki nafar o‘rinbosari, shu jumladan bir nafar birinchi o‘rinbosari bo‘ladi.

Yer resurslari davlat qo‘mitasi raisining o‘rinbosarlari O‘zbekiston Respublikasi Vazirlar Mahkamasi tomonidan tayinlanadilar.

O‘zbekiston Respublikasi Yer resurslari davlat qo‘mitasi raisining o‘rinbosarlari ayni paytda Yerdan foydalanish va uni muhofaza qilishni nazorat qilish bosh davlat inspektorining o‘rinbosarlari hisoblanadilar.

11. Yer resurslari davlat qo‘mitasi tarkibiga:

Qoraqalpog‘iston Respublikasi Yer resurslari boshqarmasi;

viloyatlar yer resurslari boshqarmalari;

tuman yer resurslari xizmatlari;

“O‘zdaverloyiha” yer tuzish davlat ilmiy-loyihalashtirish instituti;

Tuproqshunoslik va agrokimyo instituti kiradi.

12. Qoraqalpog‘iston Respublikasi Yer resurslari boshqarmasi, yer resurslari viloyat boshqarmalari, tuman xizmatlari faoliyat ko‘rsatayotgan tegishli yer tuzish xizmatlari negizida tashkil etiladi.

13. Qoraqalpog‘iston Respublikasi Yer resurslari boshqarmasi, yer resurslari viloyat boshqarmalari, tuman xizmatlari O‘zbekiston Respublikasi Yer resurslari davlat qo‘mitasiga bo‘ysunadi hamda Qoraqalpog‘iston Respublikasi Vazirlar Kengashiga va viloyatlar hokimliklariga hisob beradi.

14. Qoraqalpog‘iston Respublikasi Yer resurslari boshqarmasi boshlig‘i Qoraqalpog‘iston Respublikasi Vazirlar Kengashi bilan, viloyatlar yer resurslari boshqarmalari boshliqlari esa viloyatlar hokimliklari bilan kelishilgan holda O‘zbekiston Respublikasi Yer resurslari davlat qo‘mitasi tomonidan tayinlanadilar.

Qoraqalpog‘iston Respublikasi Yer resurslari boshqarmasi, viloyatlar yer resurslari boshqarmalari boshliqlari ayni paytda tegishli hududlarda yerdan foydalanish va uni muhofaza etishni nazorat qilish davlat inspektorlari hisoblanadilar.

15. Yer resurslari tuman xizmatlari boshliqlari tuman hokimliklari bilan kelishilgan holda Qoraqalpog‘iston Respublikasi Yer resurslari boshqarmasi, viloyatlar yer resurslari boshqarmalari tomonidan tayinlanadilar.

Yer resurslari tuman xizmatlari boshliqlari ayni paytda tuman hududida yerdan foydalanish va uni muhofaza etishni nazorat qilish davlat inspektorlari hisoblanadilar.

16. “O‘zdaverloyiha” yer tuzish davlat ilmiy-loyihalashtirish institutining bosh direktori va Tuproqshunoslik va agrokimyo institutining direktori O‘zbekiston Respublikasi Vazirlar Mahkamasi bilan kelishilgan holda O‘zbekiston Respublikasi Yer resurslari davlat qo‘mitasi tomonidan tayinlanadilar.

17. Yer resurslari davlat qo‘mitasida Yer resurslari davlat qo‘mitasi raisi — hay’at raisi, uning o‘rinbosarlari va Yer resurslari davlat qo‘mitasining boshqa rahbar xodimlaridan iborat tarkibda hay’at tuziladi. Hay’at a’zolarining soni va shaxsiy tarkibi O‘zbekiston Respublikasi Vazirlar Mahkamasi tomonidan tasdiqlanadi.

Hay’at qarorlari, qoidaga ko‘ra, Yer resurslari davlat qo‘mitasi raisining buyruqlari bilan ro‘yobga chiqariladi.

Yer resurslari davlat qo‘mitasi raisi bilan hay’at a’zolari o‘rtasida kelishmovchiliklar kelib chiqqan taqdirda Yer resurslari davlat qo‘mitasi o‘z qarorini hayotga tatbiq etadi, vujudga kelgan kelishmovchiliklar to‘g‘risida Vazirlar Mahkamasiga axborot beradi, hay’at a’zolari, o‘z navbatida, o‘z fikrini O‘zbekiston Respublikasi Vazirlar Mahkamasiga bildirishlari mumkin.

18. Yer resurslari davlat qo‘mitasi, zarurat bo‘lganda, boshqa vazirliklar va idoralar bilan birgalikda qarorlar, buyruqlar, yo‘riqnomalar qabul qiladi.

19. Yer resurslari davlat qo‘mitasi raisi:

Yer resurslari davlat qo‘mitasi faoliyatiga rahbarlik qiladi, O‘zbekiston Respublikasining davlat organlarida va boshqa organlarida va tashkilotlarida, shuningdek xalqaro tashkilotlarda Yer resurslari davlat qo‘mitasi nomidan vakillik qiladi;

o‘z vakolatlari doirasida buyruqlar chiqaradi, yo‘riqnomalarni, normalarni, qoidalarni va boshqa normativ hujjatlarni tasdiqlaydi, ko‘rsatmalar beradi va ularning bajarilishi ustidan nazoratni tashkil etadi;

xodimlarning belgilangan soni doirasida Yer resurslari davlat qo‘mitasi markaziy apparati, unga qarashli Qoraqalpog‘iston Respublikasi Yer resurslari boshqarmasi, yer resurslari viloyat boshqarmalari, tuman xizmatlari shtat jadvalini tasdiqlaydi;

Yer resurslari davlat qo‘mitasi markaziy apparati xodimlarini belgilangan tartibda lavozimga tayinlaydi va lavozimdan ozod qiladi;

Yer resurslari davlat qo‘mitasi tarkibiy bo‘linmalari rahbarlari va apparati xodimlarining javobgarlik darajasini belgilaydi, belgilangan tartibda ularni rag‘batlantirish va jazolash choralarini ko‘radi;

Yer resurslari davlat qo‘mitasi huzurida ilmiy-texnika kengashini tashkil etadi, uning tarkibini belgilaydi hamda kengash to‘g‘risida nizomni tasdiqlaydi;

Yer resurslari davlat qo‘mitasi tarkibiga kiruvchi tashkilotlar va hududiy organlar ustav (nizom)larini tasdiqlaydi;

Yer resurslari davlat qo‘mitasini, uning tarkibiy bo‘linmalarini, tashkilotlarini va ilmiy-ishlab chiqarish dasturlarini mablag‘ bilan ta’minlash masalalarini hal qiladi;

moliyaviy-xo‘jalik faoliyat tahlilini, pul mablag‘lari va moddiy boyliklar saqlanishi ustidan nazoratni tashkil etadi;

tejamkorlik rejimiga rioya etilishini, to‘g‘ri va ishonchli hisob-kitob va hisobot yuritilishini ta’minlaydi.

20. Yer resurslari davlat qo‘mitasi markaziy apparati faoliyatini mablag‘ bilan ta’minlash respublika budjeti mablag‘lari hisobiga, yer resurslari hududiy boshqarmalari va tuman xizmatlarini mablag‘ bilan ta’minlash esa mahalliy budjetlar mablag‘lari va ularning xo‘jalik faoliyatidan olinadigan daromadlar hisobiga amalga oshiriladi.

21. O‘zbekiston Respublikasi yer resurslari davlat qo‘mitasi O‘zbekiston Respublikasi Davlat gerbi tasvirlangan, o‘z nomi davlat tilida yozilgan muhrga, tegishli shtamplarga va blanklarga ega bo‘ladi.