Ushbu Qonunning maqsadi davlat ijtimoiy sug‘urtasi sohasidagi munosabatlarni tartibga solishdan iborat.

Ushbu Qonunning amal qilishi sug‘urta va davlat tibbiy sug‘urtasi, shuningdek ishlab chiqarishdagi baxtsiz hodisalardan va kasb kasalliklaridan majburiy davlat ijtimoiy sug‘urtasi bilan bog‘liq munosabatlarga nisbatan tatbiq etilmaydi.

Davlat ijtimoiy sug‘urtasi to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining davlat ijtimoiy sug‘urtasi to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

davlat ijtimoiy sug‘urtasi — sug‘urta hodisalari yuzaga kelganda sug‘urtalangan shaxslarning daromadlari yo‘qolishining oldini olishga qaratilgan davlat kafolatlari tizimi;

davlat ijtimoiy sug‘urtasi subyektlari — sug‘urtalovchi, sug‘urta qildiruvchilar va sug‘urtalangan shaxslar;

davlat ijtimoiy sug‘urtasi bo‘yicha to‘lovlar — sug‘urta hodisasi yuzaga kelganda sug‘urtalangan shaxsga jamg‘arma mablag‘lari hisobidan amalga oshiriladigan nafaqalar tarzidagi to‘lovlar;

jamg‘arma — O‘zbekiston Respublikasi Prezidenti huzuridagi Ijtimoiy himoya milliy agentligining (bundan buyon matnda Ijtimoiy himoya milliy agentligi deb yuritiladi) Davlat ijtimoiy sug‘urta jamg‘armasi bo‘lib, u O‘zbekiston Respublikasi respublika budjeti mablag‘lari, sug‘urta badallari va boshqa manbalar hisobidan shakllantiriladi, yuridik shaxs maqomiga ega bo‘ladi, sug‘urtalangan shaxsga sug‘urta hodisasi yuzaga kelganda davlat ijtimoiy sug‘urtasi bo‘yicha to‘lovlarni moliyalashtirish uchun mo‘ljallangan bo‘ladi;

sug‘urtalovchi — Ijtimoiy himoya milliy agentligining jamg‘armasi;

sug‘urta staji — sug‘urtalangan shaxs uchun sug‘urta badallarini to‘lash amalga oshirilgan davr;

sug‘urtalangan shaxs — sug‘urta hodisalaridan davlat ijtimoiy sug‘urtasi orqali himoyalangan jismoniy shaxs;

sug‘urta qildiruvchi — sug‘urta hodisalari yuzaga kelganda sug‘urtalangan shaxsning himoya qilinishini ta’minlash maqsadida ijtimoiy soliq va (yoki) sug‘urta badallari to‘laydigan shaxs.

Davlat ijtimoiy sug‘urtasining asosiy prinsiplari qonuniylik, umuminsoniylik, tenglik, moliyaviy barqarorlik va hisobdorlikdan iboratdir.

Fuqarolarga nisbatan davlat ijtimoiy sug‘urtasining amal qilishi majburiy yoki ixtiyoriy asosda amalga oshiriladi.

Davlat ijtimoiy sug‘urtasi quyidagilarga nisbatan majburiy asosda amalga oshiriladi:

mehnat faoliyatini mehnat shartnomalari asosida amalga oshiradigan fuqarolarga (bundan dehqon xo‘jaligining ixtisoslashuviga qarab, muayyan ishni bajarish uchun mehnat shartnomasi shartlari asosida vaqtinchalik (mavsumiy) asosda jalb etiladigan boshqa shaxslar mustasno), yuridik shaxslarning rahbarlari sifatida faoliyatni amalga oshiradigan fuqarolarga;

yuridik yoki jismoniy shaxslar bilan tuzilgan fuqarolik-huquqiy xususiyatga ega shartnomalar asosida xizmatlar ko‘rsatish, ishlarni bajarish yoki intellektual mulk obyektlarini yaratish bo‘yicha ishlarni bajaradigan fuqarolarga.

Davlat ijtimoiy sug‘urtasi quyidagilarga nisbatan ixtiyoriy asosda amalga oshiriladi:

o‘zini o‘zi band qilgan shaxslarga;

dehqon xo‘jaligining a’zolariga va dehqon xo‘jaligining ixtisoslashuviga qarab, muayyan ishni bajarish uchun mehnat shartnomasi shartlari asosida vaqtinchalik (mavsumiy) asosda jalb etiladigan boshqa shaxslarga;

shaxsiy tomorqa yer uchastkalarida band bo‘lgan yoki mazkur maydonda chorvachilik (qoramol, qo‘ylar, echkilar, otlar va boshqalar), issiqxona xo‘jaligi, parrandachilik (tovuqlar, bedanalar, kurkalar, g‘ozlar, o‘rdaklar), quyonchilik, asalarichilik, baliqchilik, bog‘dorchilik, limonchilik, gulchilik bilan shug‘ullanadigan shaxsiy tomorqa yer uchastkalarining egalari yoki ularning oila a’zolari bo‘lgan fuqarolarga (ularga tegishli bo‘lgan tomorqa yer uchastkasining maydonidan yoki ular tomonidan parvarish qilinayotgan uy hayvonlari va parrandalarning sonidan qat’i nazar);

O‘zbekiston Respublikasining davlat organlari va boshqa tashkilotlari tomonidan chet davlatlarda tashkil etilgan (ochilgan) savdo uylarida, vakolatxonalarda (shu jumladan yuridik shaxs tashkil etmagan holda), tashkilotlarda ishlaydigan O‘zbekiston Respublikasi fuqarolariga;

chet elda yollanib ishlaydigan O‘zbekiston Respublikasi fuqarolariga;

O‘zbekiston Respublikasi hududida doimiy yashovchi hamda O‘zbekiston Respublikasi hududida daromad keltiradigan faoliyatni amalga oshiradigan chet el fuqarolariga va fuqaroligi bo‘lmagan shaxslarga;

ishlamaydigan fuqarolarga, ular uchun sug‘urta badali eri (xotini) tomonidan to‘langanda;

yuridik shaxslarning muassislari (ishtirokchilari) sifatida daromadlar oladigan fuqarolarga;

yakka tartibdagi tadbirkorlarga, shu jumladan “Hunarmand” uyushmasining a’zolari bo‘lgan hunarmandchilik faoliyati subyektlariga;

faoliyatni yuridik shaxs tashkil etmagan holda, oilaviy tadbirkorlik shaklida amalga oshiradigan oila a’zolariga;

dehqon xo‘jaligining boshlig‘iga;

qonunchilikka muvofiq soliqni hisoblab chiqarish va ushlab qolish majburiyati zimmasiga yuklatilmagan ish beruvchidan daromadlar oladigan fuqarolarga.

Majburiy yoki ixtiyoriy asosda davlat ijtimoiy sug‘urtasi bilan sug‘urtalangan shaxslar teng huquq va majburiyatlarga ega bo‘ladi.

Harbiy xizmatchilarning, ichki ishlar organlarining, O‘zbekiston Respublikasi Milliy gvardiyasining boshliqlar va oddiy askarlar tarkibidan bo‘lgan shaxslarning, sudyalarning va prokuratura organlarining martaba darajalariga (harbiy unvonlarga) ega bo‘lgan xodimlarining ijtimoiy sug‘urta ta’minoti alohida qonunchilik bilan belgilanadi.

Davlat ijtimoiy sug‘urtasi bo‘yicha munosabatlar quyidagi hollarda yuzaga keladi:

a) sug‘urta qildiruvchilarda:

ijtimoiy soliqni to‘lovchilar uchun — ijtimoiy soliqni to‘lash bo‘yicha majburiyat yuzaga kelgan paytdan e’tiboran;

davlat ijtimoiy sug‘urtasi majburiy qilinishi lozim bo‘lgan shaxslar uchun — daromad hisoblangan paytdan e’tiboran;

davlat ijtimoiy sug‘urtasi ixtiyoriy qilinishi mumkin bo‘lgan shaxslar uchun — sug‘urta badallari to‘langan paytdan e’tiboran.

Bunda, agar sug‘urta qildiruvchi o‘zi uchun sug‘urta badalini to‘lasa, u davlat ijtimoiy sug‘urtasi bo‘yicha sug‘urtalangan shaxs sifatida munosabatlarga kirishadi.

b) sug‘urtalovchida — sug‘urta qildiruvchi ro‘yxatga olingan paytdan e’tiboran;

v) sug‘urtalangan shaxslarda:

majburiy davlat ijtimoiy sug‘urtasi bilan sug‘urtalangan shaxslar uchun — daromad hisoblangan paytdan e’tiboran;

ixtiyoriy davlat ijtimoiy sug‘urtasi bilan sug‘urtalangan shaxslar uchun — sug‘urta badallari to‘langan paytdan e’tiboran.

Sug‘urtalovchining sug‘urtalangan shaxsga davlat ijtimoiy sug‘urtasi bo‘yicha to‘lovlarni amalga oshirish majburiyatining yuzaga kelishi sug‘urta hodisasi deb hisoblanadi.

Sug‘urta hodisalari jumlasiga quyidagilar kiradi:

kasallik munosabati bilan vaqtincha mehnatga layoqatsizlik;

homiladorlik va tug‘ish;

ishni yoki daromadni yo‘qotish.

Sug‘urta hodisalari yuzaga kelganda sug‘urtalangan shaxslarga va (yoki) ularning oila a’zolariga davlat ijtimoiy sug‘urtasi bo‘yicha quyidagi to‘lovlar amalga oshiriladi:

vaqtincha mehnatga layoqatsizlik nafaqasi;

homiladorlik va tug‘ish nafaqasi;

ishdan bo‘shatish nafaqasi.

Sug‘urtalangan shaxslar quyidagi huquqlarga ega:

davlat ijtimoiy sug‘urtasi bo‘yicha to‘lovlarni o‘z vaqtida olish;

o‘z huquqlarini shaxsan, o‘zining vakili orqali yoki sud tartibida himoya qilish;

sug‘urtalovchi va sug‘urta qildiruvchi to‘g‘risida ma’lumotlar olish;

sug‘urtalovchidan davlat ijtimoiy sug‘urtasi masalalari bo‘yicha normativ-huquqiy hujjatlar va sug‘urtalangan shaxslarga to‘lanadigan davlat ijtimoiy sug‘urtasi bo‘yicha to‘lovlar miqdorlari to‘g‘risida axborotni bepul olish.

Sug‘urtalangan shaxslar sug‘urta hodisasidan kelib chiqqan holda, davlat ijtimoiy sug‘urtasi bo‘yicha to‘lovni tayinlash va amalga oshirish uchun asos bo‘ladigan tegishli ishonchli ma’lumotlarni o‘z ichiga olgan hujjatlarni sug‘urtalovchiga o‘z vaqtida taqdim etishi shart.

Sug‘urtalovchi quyidagi huquqlarga ega:

sug‘urta hodisasi yuzaga kelganda, zaruratga qarab, sug‘urta hodisasi yuzaga kelganligini tekshirish;

sug‘urta badallarini hisobga olish va to‘lash bo‘yicha hujjatlarni (yoki elektron ma’lumotlarni), shuningdek davlat ijtimoiy sug‘urtasi bo‘yicha to‘lovlarni amalga oshirish bilan bog‘liq hujjatlarni tekshirish;

sug‘urtalangan shaxsni identifikatsiya qilish, sug‘urta stajini va sug‘urta badalining miqdorini aniqlash, sug‘urta hodisasi yuzaga kelganligini tasdiqlash uchun zarur bo‘lgan sug‘urtalangan shaxs to‘g‘risidagi ma’lumotlarni olish, shu jumladan boshqa davlat organlari bilan elektron axborot almashinuvi orqali olish;

ushbu Qonunning 18 va 19-moddalarida belgilangan hollarda davlat ijtimoiy sug‘urtasi bo‘yicha to‘lovlarni to‘xtatib turish, qayta tiklash va tugatish;

o‘z huquqlarini himoya qilish va yetkazilgan zararning o‘rnini qoplash to‘g‘risidagi da’volar, shu jumladan sug‘urtalangan shaxs tomonidan taqdim etilgan ishonchsiz yoki soxta hujjatlar (ma’lumotlar) asosida davlat ijtimoiy sug‘urtasi bo‘yicha to‘lovlar tayinlanganligi munosabati bilan qilingan xarajatlarning o‘rnini qoplash haqidagi da’volar bilan sudga murojaat qilish.

Sug‘urtalovchi:

davlat ijtimoiy sug‘urtasi bo‘yicha to‘lovlar uchun sug‘urta badallarini jamg‘arib borishi;

faoliyati to‘g‘risidagi axborotni o‘zining rasmiy veb-saytida joylashtirishi;

davlat ijtimoiy sug‘urtasi bo‘yicha to‘lovlarning o‘z vaqtida tayinlanishini va belgilangan miqdorlarda to‘lanishini ta’minlashi;

sug‘urta badallari va to‘lovlarining hisobini yuritishi;

sug‘urta badallarini to‘lagan shaxslarning davlat ijtimoiy sug‘urtasini amalga oshirishi;

sug‘urta qildiruvchilarni ro‘yxatdan o‘tkazishni va hisobdan chiqarishni amalga oshirishi;

sug‘urta qildiruvchilarning va sug‘urtalangan shaxslarning, jamg‘arma tushumlari va xarajatlarining yagona hisobini yuritishi, shuningdek sug‘urtalangan shaxslarning personallashtirilgan hisobi uchun taqdim etilgan ma’lumotlarning to‘g‘riligini boshqa davlat organlari bilan elektron axborot almashinuvi orqali tekshirishi;

sug‘urta qildiruvchilar va sug‘urtalangan shaxslar uchun davlat ijtimoiy sug‘urtasi bo‘yicha tushuntirish ishlarini olib borishi, shu jumladan sug‘urta badallarining va davlat ijtimoiy sug‘urtasi bo‘yicha amalga oshirilgan to‘lovlarning hisobi yuzasidan shaxsga doir ma’lumotlarni, mazkur to‘lovlar bo‘yicha murojaat qilish va ularni tayinlash tartibi to‘g‘risidagi ma’lumotlarni taqdim etishi shart.

Sug‘urta qildiruvchilar quyidagi huquqlarga ega:

sug‘urtalovchidan davlat ijtimoiy sug‘urtasi masalalari bo‘yicha normativ-huquqiy hujjatlar va sug‘urtalangan shaxslarga davlat ijtimoiy sug‘urtasi bo‘yicha amalga oshiriladigan to‘lovlar miqdorlari to‘g‘risidagi axborotni bepul olish;

o‘z huquqlarini himoya qilish yoxud davlat ijtimoiy sug‘urtasi bo‘yicha to‘lov tayinlanishining to‘g‘riligini qayta ko‘rib chiqish uchun Ijtimoiy himoya milliy agentligiga yoki sudga murojaat qilish.

Sug‘urta qildiruvchilar:

sug‘urtalovchidan ro‘yxatdan o‘tishi va hisobdan chiqishi;

sug‘urta badallarini o‘z vaqtida va belgilangan stavkalar bo‘yicha to‘lashi;

davlat ijtimoiy sug‘urtasi bo‘yicha to‘lovlarga taalluqli bo‘lgan hujjatlarni tekshirish uchun Ijtimoiy himoya milliy agentligiga taqdim etishi shart.

Davlat ijtimoiy sug‘urtasi mablag‘lari sug‘urtalovchi tomonidan quyidagilar hisobiga shakllantiriladi:

ijtimoiy soliqning bir qismi;

sug‘urta badallari;

O‘zbekiston Respublikasining respublika budjeti mablag‘lari;

jamg‘armaning vaqtincha bo‘sh turgan mablag‘larini depozitlarga joylashtirishdan olinadigan daromadlar;

qonunchilik hujjatlarida taqiqlanmagan boshqa tushumlar.

Davlat ijtimoiy sug‘urtasi mablag‘lari jamg‘armada jamlanadi.

Sug‘urta badali sug‘urtalangan shaxs uchun jamg‘armaga amalga oshiriladigan ajratma yoki to‘lov hisoblanadi.

Sug‘urta badali majburiy davlat ijtimoiy sug‘urtasi bilan qamrab olinadigan fuqarolar uchun O‘zbekiston Respublikasining Davlat budjeti to‘g‘risidagi O‘zbekiston Respublikasi Qonuni bilan belgilangan miqdorlarda jismoniy shaxslardan olinadigan daromad solig‘ining bir qismi hisobidan, ixtiyoriy davlat ijtimoiy sug‘urtasi bilan qamrab olinadigan fuqarolar uchun minimal miqdori qonunchilik hujjatlari bilan belgilanadigan to‘lov hisobidan shakllantiriladi.

Jismoniy shaxslarga qonunchilik hujjatlariga muvofiq hisoblangan mehnatga haq to‘lash tarzidagi barcha daromadlar sug‘urta badallarini hisoblash obyektidir.

Sug‘urta badali stavkasi sug‘urta badallarini hisoblash obyektining summasiga nisbatan foizli nisbatda hisoblanadi.

Sug‘urta badallari hisobini yuritish tartibi O‘zbekiston Respublikasi Vazirlar Mahkamasi tomonidan belgilanadi.

Sug‘urta badallarini to‘lovchilar deb quyidagilar e’tirof etiladi:

majburiy davlat ijtimoiy sug‘urtasi bilan sug‘urtalangan shaxslar;

ixtiyoriy davlat ijtimoiy sug‘urtasi bilan sug‘urtalangan shaxslar.

Qonunchilik hujjatlari bilan ayrim shaxslarni yoki shaxslar toifalarini sug‘urta badallarini to‘lashdan ozod etish yoki ularga imtiyozlar berish taqiqlanadi.

Jamg‘armaning daromadlari va xarajatlari prognozini tuzishda hamda davlat ijtimoiy sug‘urtasi bo‘yicha to‘lovlarni o‘z vaqtida amalga oshirish uchun jamg‘arma budjeti taqchilligining prognoz xavflari yuzaga kelganda, O‘zbekiston Respublikasi Iqtisodiyot va moliya vazirligi sug‘urtalovchining asoslangan talabnomasi asosida navbatdagi moliya yili uchun O‘zbekiston Respublikasining Davlat budjeti to‘g‘risidagi qonun loyihasini ishlab chiqishda, davlat budjeti taqchilligining cheklangan miqdorini hisobga olgan holda, davlat ijtimoiy sug‘urtasi bo‘yicha to‘lovlarni ta’minlash imkonini beradigan, O‘zbekiston Respublikasining respublika budjetidan jamg‘armaga budjetlararo transfertlar ajratilishini nazarda tutadi.

Jamg‘arma budjeti sug‘urtalovchi tomonidan ishlab chiqiladi va O‘zbekiston Respublikasining Davlat budjeti to‘g‘risidagi O‘zbekiston Respublikasi Qonuni bilan tasdiqlanadi.

Jamg‘arma mablag‘lari davlat ijtimoiy sug‘urtasi bo‘yicha to‘lovlarni, shu jumladan mazkur to‘lovlarni amalga oshirish bilan bog‘liq xarajatlarni moliyalashtirishga sarflanadi.

Tasdiqlangan budjet ko‘rsatkichlarining bajarilishi sug‘urtalovchi va uning hududiy bo‘linmalari, tuman (shahar) “Inson” ijtimoiy xizmatlar markazlari tomonidan ta’minlanadi.

Jamg‘arma budjetining muayyan moliya yilidagi ijrosi to‘g‘risidagi hisobotlar O‘zbekiston Respublikasi Iqtisodiyot va moliya vazirligiga taqdim etiladi.

Jamg‘armaning joriy hisobot yilida foydalanilmay qolgan mablag‘lari olib qo‘yilmaydi va keyingi yilga o‘tkaziladi.

Davlat ijtimoiy sug‘urtasi bo‘yicha to‘lovlarni olishga bo‘lgan huquq sug‘urta badallarining to‘lanishiga qarab yuzaga keladi.

Davlat ijtimoiy sug‘urtasi bo‘yicha to‘lovlar qonunchilik hujjatlarida belgilangan miqdorlarda va tegishli davrlar uchun tayinlanadi.

Davlat ijtimoiy sug‘urtasi bo‘yicha to‘lovlarni tayinlash va amalga oshirish tartibi, shu jumladan davlat ijtimoiy sug‘urtasi bo‘yicha eng kam sug‘urta staji hamda to‘lovlarni amalga oshirish muddatlari O‘zbekiston Respublikasi Vazirlar Mahkamasi tomonidan belgilanadi.

Davlat ijtimoiy sug‘urtasi bo‘yicha to‘lovlarni ishdan bo‘shatish nafaqasi tarzida tayinlash sug‘urtalangan shaxsning murojaati asosida, vaqtinchalik mehnatga layoqatsizlik nafaqalari hamda homiladorlik va tug‘ish nafaqalari tarzida esa sug‘urtalangan shaxsning murojaati talab etilmagan holda (proaktiv shaklda) amalga oshiriladi.

Davlat ijtimoiy sug‘urtasi bo‘yicha to‘lovlarni tayinlash uchun murojaat sug‘urtalangan shaxs tomonidan quyidagicha amalga oshiriladi:

sug‘urtalovchiga bevosita yoki ish beruvchi orqali;

maxsus davlat axborot tizimlari orqali elektron tarzda.

Sug‘urtalangan shaxsning murojaati talab etilmagan holda (proaktiv shaklda) tayinlanadigan davlat ijtimoiy sug‘urtasi bo‘yicha to‘lovlar yuzasidan sug‘urta hodisasi yuzaga kelganda sug‘urtalangan shaxs to‘g‘risidagi ma’lumotlar sug‘urtalovchiga Ijtimoiy himoya milliy agentligining axborot tizimi orqali taqdim etiladi.

Davlat ijtimoiy sug‘urtasi bo‘yicha to‘lovlar quyidagi hollarda keyingi oyning birinchi sanasidan e’tiboran to‘xtatib turiladi:

sug‘urtalangan shaxs yoki uning qonuniy vakili davlat ijtimoiy sug‘urtasi bo‘yicha to‘lovlarni to‘xtatib turish haqida murojaat qilganda;

sug‘urtalangan shaxs qonunda belgilangan tartibda bedarak yo‘qolgan deb topilganda;

qonunchilikda belgilangan boshqa hollarda.

Davlat ijtimoiy sug‘urtasi bo‘yicha to‘lov sug‘urta hodisasi tasdiqlangan taqdirda, davlat ijtimoiy sug‘urtasi bo‘yicha to‘lovning to‘xtatib turilishiga sabab bo‘lgan holatlar bartaraf etilganligini tasdiqlovchi axborot tizimlaridan olingan hujjatlarga va (yoki) ma’lumotlarga asosan qayta tiklanadi.

Davlat ijtimoiy sug‘urtasi bo‘yicha to‘lovlar quyidagi hollarda tugatiladi:

sug‘urtalangan shaxs vafot etganda yoki sud qarori bilan vafot etgan deb e’lon qilinganda. Bunda davlat ijtimoiy sug‘urtasi bo‘yicha to‘lov sug‘urtalangan shaxs vafot etgan yoki vafot etgan deb e’lon qilingan oydan keyingi oyning birinchi sanasidan e’tiboran tugatiladi;

sug‘urtalangan shaxs O‘zbekiston Respublikasining fuqaroligidan chiqqanda yoki O‘zbekiston Respublikasining fuqaroligini yo‘qotganda;

sug‘urtalangan shaxs yoki uning qonuniy vakili davlat ijtimoiy sug‘urtasi bo‘yicha to‘lovni tugatish to‘g‘risida murojaat qilganda. Bunda davlat ijtimoiy sug‘urtasi bo‘yicha to‘lov murojaat berilgan oydan keyingi oyning birinchi sanasidan e’tiboran tugatiladi;

davlat ijtimoiy sug‘urtasi bo‘yicha to‘lovni tayinlash to‘g‘risida qaror qabul qilish uchun asos bo‘lib xizmat qilgan hujjatlarning (ma’lumotlarning) ishonchsizligi yoki soxta ekanligi aniqlanganda. Bunda davlat ijtimoiy sug‘urtasi bo‘yicha to‘lov tayinlangan kundan e’tiboran tugatilgan hisoblanadi va to‘langan mablag‘lar sug‘urtalangan shaxs tomonidan qaytariladi.

Davlat ijtimoiy sug‘urtasi sohasidagi nizolar qonunchilikda belgilangan tartibda hal etiladi.

Davlat ijtimoiy sug‘urtasi to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

O‘zbekiston Respublikasining 2022-yil 28-oktabrda qabul qilingan O‘RQ-798-sonli Qonuni bilan tasdiqlangan O‘zbekiston Respublikasining Mehnat kodeksi (O‘zbekiston Respublikasi Oliy Majlisi palatalarining Axborotnomasi, 2022-yil, 10-songa ilova; 2023-yil, № 4, 265-modda, № 11, 923-modda; 2024-yil, № 2, 111-modda, № 7, 627-modda, № 9, 964-modda; 2025-yil № 2, 193-modda, № 6, 730-modda) 399-moddasining matnidagi “davlat ijtimoiy sug‘urta” degan so‘zlar “O‘zbekiston Respublikasi Iqtisodiyot va moliya vazirligi huzuridagi budjetdan tashqari Pensiya jamg‘armasi” degan so‘zlar bilan almashtirilsin.

O‘zbekiston Respublikasi Prezidenti huzuridagi Ijtimoiy himoya milliy agentligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

ushbu Qonun 12-moddasining beshinchi qismida nazarda tutilgan sug‘urta badallari hisobini yuritish tartibini ushbu Qonun rasmiy e’lon qilingan kundan e’tiboran uch oy ichida belgilasin;

ushbu Qonun 16-moddasining uchinchi qismida nazarda tutilgan davlat ijtimoiy sug‘urtasi bo‘yicha to‘lovlarni tayinlash va amalga oshirish tartibini, shu jumladan davlat ijtimoiy sug‘urtasi bo‘yicha eng kam sug‘urta stajini hamda to‘lovlarni amalga oshirish muddatlarini ushbu Qonun rasmiy e’lon qilingan kundan e’tiboran uch oy ichida belgilasin;

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun 2026-yil 1-yanvardan e’tiboran kuchga kiradi.