Vaqtli matbuot hamda kitob nashrchiligining moddiy - texnika bazasini mustahkamlash, bozor iqtisodiyotiga o‘tish sharoitida ijtimoiy ahamiyatga molik nashrlarni chop etish uchun zarur sharoit yaratish maqsadida Vazirlar Mahkamasi qaror qiladi:

1. 1992-yil vaqtli matbuot nashrlarining qimmatlashgani munosabati bilan sarf-xarajatni qoplash uchun ajratilgan qo‘shimcha mablag‘ni taqsimlash bo‘yicha komissiya takliflari ilovaga muvofiq tasdiqlansin.

2. O‘zbekiston Respublikasi Aloqa vazirligi 1992-yilda vaqtli matbuotni tarqatish ishlarini 1991-yil obuna kompaniyasi davridagi miqdorda tashkil qilsin.

“O‘zbekiston havo yo‘llari” aviakompaniyasi va O‘rta Osiyo temir yo‘l boshqarmasi 1992-yilda o‘tgan yilga nisbatan vaqtli matbuotni yetkazib berish va tarqatishga ko‘paygan xarajatni boshqa xildagi xizmatlarga tariflarni oshirish hisobidan tashkil etsin.

3. O‘zbekiston Respublikasining taraqqiyot istiqbolini belgilash qo‘mitasi, O‘zbekiston Respublikasi Moliya vazirligi 1992-yilning ikkinchi yarmida zarur asbob-uskuna, texnika, televideoapparatlar, ehtiyot qismlar olish uchun:

O‘zbekiston Respublikasi davlat matbuot qo‘mitasiga 2 mln, “Sharq” konserniga 2,5 mln erkin almashtiriladigan valyuta ajratsin;

O‘zbekiston Respublikasi davlat teleradio kompaniyasiga 2,178 mln, O‘zbekiston milliy axborot agentligiga 1 mln erkin almashtiriladigan valyuta ajratishni va uni tegishli miqdordagi so‘m bilan qoplashni ta’minlasin;

ikki oy muddat ichida mahalliy xom ashyodan qog‘oz ishlab chiqarish imkoniyatlarini o‘rganib chiqsin va respublikada sellyuloza qog‘oz hamda karton tayyorlash sanoatini rivojlantirish bo‘yicha takliflar kiritsin.

4. “O‘zshartnomasavdo” Rossiya Federatsiyasi bilan amaldagi davlatlararo shartnomaga muvofiq ajratilgan kvotalar bo‘yicha qog‘oz, karton va muqovalash materiallarini O‘zbekiston Respublikasi Davlat matbuot qo‘mitasi, “Sharq” nashriyot-matbaachilik konserni va “Kamalak” nashriyot-ishlab chiqarish birlashmasi, Toshkent kartografiya fabrikasiga muntazam yetkazib tursin.

5. O‘zbekiston Respublikasi Prezidenti huzuridagi Vazirlar Mahkamasi kompleks rahbarlarining vazirliklarda va muassasalarda gazeta va jurnallar tahririyatlariga homiylik qilish haqidagi takliflari ma’qullansin.

6. Vazirliklar, muassasalar, konsernlar, korxonalar, tashkilotlar va jamoat tashkilotlari va Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga poligrafiya korxonalariga, nashriyotlarga, gazetalar va jurnallarning tahririyatlariga va kitob savdosi muassasalariga odam yashamaydigan binolarni ijaraga berayotganda ijara haqini amortizatsiya normalari va binolarni saqlash xarajatlarini qoplash qiymatini qayta tiklash uchun zarur bo‘lgan summadan hisoblab chiqarilgan miqdorda undirish taklif etilsin.

7. Ushbu qarorning bajarilishini nazorat qilish madaniyat, matbuot va turizm kompleksi (o‘rtoq E. Samandarov)ga topshirilsin.