Oʻzbekiston Respublikasi Prezidentining 2005-yil 11-avgustdagi PQ-154-son qarorini bajarish yuzasidan Vazirlar Mahkamasi qaror qiladi:

1. Quyidagilar:

gʻoʻza defoliatsiyasini oʻtkazishni tashkil qilish boʻyicha Respublika ekspert komissiyasi tarkibi 1-ilovaga muvofiq;

gʻoʻza defoliatsiyasi oʻtkazilishini nazorat qilish va sifatini aniqlash tartibi toʻgʻrisidagi nizom 2-ilovaga muvofiq tasdiqlansin.

2. Respublika ekspert komissiyasi (Ismoilov):

uch kun muddatda Qoraqalpogʻiston Respublikasi, viloyatlar va tumanlarda ana shunday ekspert komissiyalari tuzilishini taʼminlasin;

joylarda gʻoʻzani defoliatsiya qilish tadbirlarining butun kompleksi oʻtkazilishini tashkil etsin;

gʻoʻzani defoliatsiya qilishga tayyorgarlik koʻrish va uni oʻtkazishning borishi, defoliatsiyani oʻtkazish uchun jalb etilgan texnikadan samarali foydalanilishi yuzasidan kundalik monitoring oʻrnatsin.

gʻoʻza defoliatsiyasining borishi toʻgʻrisida Vazirlar Mahkamasiga muntazam ravishda axborot berib borilsin.

3. Mazkur qarorning bajarilishini nazorat qilish Oʻzbekiston Respublikasi Qishloq va suv xoʻjaligi vaziri S.U. Ismoilov zimmasiga hamda Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.

1. Mazkur Nizom Oʻzbekiston Respublikasi Prezidentining 2005-yil 11-avgustdagi PQ-154-son qaroriga muvofiq ishlab chiqilgan va 2005-yilda gʻoʻza defoliatsiyasi oʻtkazilishini tizimli nazorat qilishni tashkil etish va uning sifatini aniqlash tartibini belgilaydi.

2. Gʻoʻza defoliatsiyasi oʻtkazilishini nazorat qilish, ishlatiladigan eritma tayyorlash va defoliantlarni qoʻllashning belgilangan normalariga rioya qilish uchun har bir viloyat va tumanda hokim boshchiligida, Qishloq va suv xoʻjaligi vazirligi, Respublika oʻsimliklarni himoya qilish va agrokimyo markazi, “Oʻzpaxtasanoat” uyushmasi, Oʻzbekiston “Sifat” markazi hamda “Qishloqxoʻjalikkimyo” hududiy aksiyadorlik jamiyatlarining mutaxassislari ishtirokida ekspert komissiyalari tashkil etiladi.

3. 2005-yil 20-avgustgacha tuman hokimi tomonidan ekspert komissiyasi bilan kelishgan holda, Oʻzbekiston Respublikasi Prezidentining 2005-yil 11-avgustdagi PQ-154-son qarori bilan tasdiqlangan muddatlardan kelib chiqib joylardagi harorat sharoitlarini, gʻoʻzaning yetilish davri, navi va boshqa xususiyatlarini hisobga olgan holda har bir qishloq xoʻjaligi korxonasi boʻyicha gʻoʻza defoliatsiyasini oʻtkazish muddatlari tasdiqlanadi.

4. Tuman ekspert komissiyasi tomonidan 2005-yil 22-avgustgacha gʻoʻza defoliatsiyasini oʻtkazishda qatnashuvchi mutaxassislarga texnikani tayyorlash, dalalarni tanlash, ishlatiladigan eritmalar tayyorlashga, defoliantlarni solish normalariga qoʻyiladigan talablar, ulardan foydalanish, xavfsizlik qoidalari, signal beruvchilar ishini tashkil etish va boshqa chora-tadbirlar boʻyicha yoʻl-yoʻriqlar beriladi va ular ushbu ishlarga oʻqitiladi.

5. Har kuni defoliatsiya oʻtkazilishidan oldin qishloq xoʻjaligi hududiy organlari hamda “Qishloqxoʻjalikkimyo” hududiy aksiyadorlik jamiyatlari mutaxassislari tomonidan mexanizatorlar, samolyot ekipaji va signal beruvchilarga dalalarning relyefi, konturi va boshqa xususiyatlarini hisobga olgan holda agrotexnika tadbirlarini sifatli oʻtkazish boʻyicha yoʻl-yoʻriqlar beriladi.

6. Tayyorlangan defoliantning ishlatiladigan eritmasidan foydalanishdan oldin oʻsimliklarni himoya qilish va agrokimyo markazi, shuningdek “Oʻzstandart” agentligi organlari mutaxassislari tomonidan majburiy tartibda ishlatiladigan eritmaning sifati va uning qoʻyiladigan talablarga muvofiqligi tezkor tahlil qilinadi. Eritmaning jihozlanmagan joylarda va mutaxassislar ishtirokisiz tayyorlanishiga yoʻl qoʻyilmaydi.

7. Tuman ekspert komissiyasi tomonidan kun mobaynida defoliatsiyani oʻtkazish tanlab tekshiriladi, amalga oshirilgan ishlar sifatiga, ishlatiladigan eritma tayyorlashning toʻgʻriligiga va uni qoʻllash normalariga baho beriladi. gʻoʻza defoliatsiyasini oʻtkazishda qoʻpol kamchiliklar aniqlangan taqdirda ekspert komissiyasi tomonidan agrotexnika tadbirlarini oʻz vaqtida oʻtkazish uchun, kamchiliklarni bartaraf etish boʻyicha mutaxassislar jalb etilgan holda, shoshilinch chora-tadbirlar koʻriladi.

8. Tuman ekspert komissiyasi tomonidan defoliatsiya belgilangan muddatlarda va hajmda oʻtkazilishining kundalik monitoringi belgilanadi, bunda jalb etilgan texnika (purkagichlar va samolyotlar)dan samarali foydalanilishi qatʼiy nazorat qilinadi.

9. Nazarda tutilgan jadvaldan orqada qolish holatlari aniqlangan taqdirda mavjud resurslar safarbar qilingan, texnika va boshqalardan yanada samarali foydalanilgan holda qoloqlikni tugatish boʻyicha qoʻshimcha chora-tadbirlar koʻriladi.

10. Defoliatsiya oʻtkazilgandan keyin bir hafta muddatda tuman ekspert komissiyasi tomonidan har bir konturda amalga oshirilgan agrotexnika tadbirining sifati aniqlanadi. Bunda quyidagilar hisobga olinadi:

defoliatsiyani oʻtkazish muddatlariga va dalalar konturi toʻliq qamrab olinishiga rioya qilish;

defoliant sarflash normasi va uning foydalaniladigan turi;

gʻoʻza barglarining bir tekis toʻkilishi foizi (kamida 75%).

11. Defoliatsiyani oʻtkazish shartlari va amalga oshirilgan ishlar sifatini baholash qishloq xoʻjaligi korxonalari bilan tegishli shartnomalar tuzishda qatʼiy belgilab qoʻyiladi.

12. Viloyat ekspert komissiyasi gʻoʻza defoliatsiyasini oʻtkazish va uning sifati ustidan umumiy nazoratni amalga oshiradi, tasdiqlangan muddatlardan orqada qolishni bartaraf etishga doir zarur tashkiliy chora-tadbirlar koʻradi, joylarda texnikadan samarali foydalanilishi nazorat qilinishini taʼminlaydi, defoliatsiyani oʻtkazish jarayonida paydo boʻladigan kompleks masalalarni, shu jumladan moddiy-texnik va moliyaviy taʼminlash masalalarini tezkor hal etadi hamda amalga oshirilgan ishlar toʻgʻrisida har kuni Respublika ekspert komissiyasiga axborot beradi.

13. Gʻoʻzani defoliatsiya qilishga tayyorgarlik koʻrish va uni oʻtkazishning borishi toʻgʻrisidagi hisobot tizimi quyidagi tartib boʻyicha amalga oshiriladi: tuman ekspert komissiyasi — viloyat ekspert komissiyasi — Respublika ekspert komissiyasi — Oʻzbekiston Respublikasi Vazirlar Mahkamasi.

14. Mazkur Nizomning amalga oshirilishini nazorat qilish Oʻzbekiston Respublikasi Qishloq va suv xoʻjaligi vaziri zimmasiga yuklanadi.