Pul muomalasini barqarorlashtirish, iste’mol bozorini to‘ldirish, eksport samaradorligini oshirish va shu asosda O‘zbekiston Respublikasi milliy valyutasi xarid qobiliyatining barqarorligini ta’minlash maqsadida Vazirlar Mahkamasi qaror qiladi:

1. Quyidagilar:

respublika iste’mol bozorini iste’mol tovarlari bilan to‘ldirish dasturi 1-ilovaga* muvofiq;

pul kredit siyosatini mustahkamlashning asosiy yo‘nalishlari 2-ilovaga* muvofiq;

O‘zbekiston Respublikasi eksportining samaradorligini oshirish dasturi 3-ilovaga* muvofiq tasdiqlansin.

2. 1994-yilda tovarlar (ishlar, xizmatlar) eksporti hajmlarini qo‘shimcha ravishda ko‘paytirish bo‘yicha vazirliklar, idoralar, uyushmalar, birlashmalar va korxonalarning takliflari 4-ilovaga* muvofiq qabul qilinsin.

3. Tashqi iqtisodiy aloqalar vazirligi Moliya vazirligi birgalikda xorijiy firmalar bilan tuziladigan shartnomalar bo‘yicha to‘lov muddatini o‘n ikki oyga surib, konsignatsiya (vositachilik) asosida 105 mln. AQSh dollari miqdorida respublikaga oziq-ovqat va nooziq-ovqat mahsulotlari yetkazib berish uchun mablag‘larning manbalarini izlab topsin.

Moliya vazirligi va “O‘zulgurjibirjasavdo” “O‘zbeksavdo” uyushmasiga respublika tashqarisidan oziq-ovqat mahsulotlari sotib olish uchun hukumatlararo bitimlar bo‘yicha kliring schyotlariga tushadigan mablag‘lar hisobidan Rossiya Federatsiyasining 50 mlrd rublini (har oyda 10 mlrd rubldan) ajratib bersinlar.

4. O‘zbekiston Respublikasi Davlat soliq qo‘mitasi, “O‘zbeksavdo” uyushmasi, O‘zbekbirlashuv, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari me’yorlangan mahsulot sotish borasida o‘rnatilgan tartib hamda chakana savdo bilan shug‘ullanuvchi barcha yuridik shaxslardan soliq undirib olinishi ustidan qattiq nazoratni ta’minlasinlar.

5. O‘zbekiston Respublikasi Davlat soliq qo‘mitasi budjetga va budjetdan tashqari jamg‘armalarga soliqlar hamda boshqa majburiy to‘lovlar tushishi yuzasidan belgilangan topshiriqlar so‘zsiz bajarilishini ta’minlasin. Soliqlarni to‘lash qoidalarini buzganlik yoki uni to‘lashdan bo‘yin tovlaganlikning har bir fakti bo‘yicha materiallar (prokuratura organlariga topshirilsin).

Respublika bosh prokuroriga kelib tushgan materiallar o‘z vaqtida va to‘liq ko‘rib chiqilishi ustidan qattiq nazorat o‘rnatilishini ta’minlash, tizim xodimlarining bu boradagi shaxsiy javobgarligini oshirish taklif etilsin.

6. Soliq organlari xodimlarining va mahalliy hokimiyat organlari rahbarlarining mehnatiga haq to‘lash shartlari davlat budjeti hamda mahalliy budjetga soliqlar tushishiga oid majburiyatlarning bajarilishiga bevosita bog‘liq qilib qo‘yilsin.

O‘zbekiston Respublikasi Moliya vazirligi va Davlat soliq qo‘mitasi ikki hafta muddatda yuqorida ko‘rsatilgan toifadagi xodimlarga sarflanadigan xarajatlarni pul bilan ta’minlash tartibini belgilasinlar, soliqlarning ko‘zda tutilgan tushumlari bajarilmagan taqdirda ularni qisqartirishni nazarda tutsinlar.

7. Belgilab qo‘yilsinki, mulkchilik shakllaridan va kimga bo‘ysunishidan qat’i nazar, har bir korxona, tashkilot hamda muassa:

asosiy faoliyat bo‘yicha operatsiyalarni amalga oshirish uchun faqat bitta xizmat ko‘rsatuvchi bankda hisob-kitob (joriy) va budjet schyotini ochishi mumkin;

respublika hududidagi banklarda valyuta schyotlarini ochish chog‘ida korxona bir hafta muddatda tegishli soliq idoralariga u haqda axborot berishi shart.

Soliq organlari tomonidan soliq organini xabardor qilmasdan hisob-kitob (joriy, valyuta, ssuda, depozit va boshqa) schyotlari ochish holatlari aniqlangan taqdirda korxonalar, tashkilotlar va muassasalarning rahbarlariga nisbatan O‘zbekiston Respublikasining qonun hujjatlarida ko‘zda tutilgan moliyaviy va ma’muriy jazo choralari qo‘llaniladi.

8. Korxonalar, muassasalar va tashkilotlarning chet el banklarida belgilangan tartibda ruxsat etilmagan xorijiy valyuta tushumini saqlashlari valyuta tushumini yashirish deb hisoblansin.

Valyuta tushumlarini chet el banklarida yashirish faktlari aniqlanganda O‘zbekiston Respublikasi Davlat soliq qo‘mitasi yashirilgan valyuta mablag‘larining jami miqdorini olib qo‘yish hamda xorijiy valyuta bilan, xorijiy valyuta yetishmaganda esa — foydani yashirish fakti aniqlangan kundagi Markaziy bank kursi bo‘yicha milliy valyuta bilan xuddi shuncha miqdordagi mablag‘ni jarima tariqasida respublika budjetiga o‘tkazish ko‘rinishida moliyaviy jazo chorasi qo‘llasin.

9. Davlat mulki obyektlarini sotib olish chog‘ida xususiylashtiriladigan mulkning sotib olinadigan ulushidan kamida 30 foizini dastlabki badal tarzida to‘lash sharti bilan to‘lov muddatini uzaytirish bir yilgacha cheklansin.

10. Respublikaning ustuvor sohalarida investitsiya loyihalarini amalda oshirayotgan tashkilotlarni davlat tomonidan qo‘llab-quvvatlash maqsadida xorijiy kreditlardan samarali foydalanish bo‘yicha 5-ilovaga* muvofiq tarkibda Idoralararo komissiya tuzilsin. Idoralararo komissiya zimmasiga:

bir hafta muddatda komissiya to‘g‘risidagi nizom loyihasini Vazirlar Mahkamasiga taqdim etish;

xarajatlar qoplanishini yuksak darajada ta’minlaydigan hamda respublikaning eksport imkoniyatini kengaytirishga va iste’mol bozorini to‘ldirishga qaratilgan birinchi galdagi investitsiya loyihalari ro‘yxatini bir oy muddatda aniqlash va tasdiqlash uchun Vazirlar Mahkamasiga taqdim etish vazifasi topshirilsin.

11. Vazirlar Mahkamasining 1994-yil 23-fevraldagi 88-son qarorining fermerlar, kichik korxonalar, kooperativlar naqd pulga kichik hajmli texnika, mineral o‘g‘it va urug‘lik sotib olishlari uchun ularga kreditlar berish haqidagi 11-bandining amal qilishi o‘z kuchini yo‘qotgan deb hisoblansin.

12. O‘zbekiston Respublikasi Adliya vazirligi manfaatdor vazirliklar va idoralar bilan birgalikda Hukumatning ilgari qabul qilingan qarorlarini ushbu qarorga muvofiqlashtirish to‘g‘risidagi takliflarni ikki hafta muddatda Vazirlar Mahkamasiga kiritsin.

13. Mazkur qarorning bajarilishini nazorat qilish Bosh vazir o‘rinbosarlari zimmasiga yuklansin. Ushbu qarorning qanday amalga oshirilayotganligi yilning har choragida respublika Hukumati majlisida ko‘rib chiqilsin.