“O‘zbekiston — 2030” strategiyasida belgilangan maqsadlarga erishish yo‘lida keng ko‘lamli tarkibiy islohotlarni o‘z vaqtida va sifatli amalga oshirish uchun xorijiy ekspertlar ko‘magining muvofiqligini va ta’sirchanligini ta’minlash maqsadida:

1. Davlat organlari va tashkilotlari tarkibiy islohotlarni samarali amalga oshirish uchun malakali xorijiy konsultant va ekspertlarni, shu jumladan, xalqaro moliya institutlari va xorijiy hukumat moliya tashkilotlarini hamda konsalting kompaniyalarini (keyingi o‘rinlarda — xorijiy konsultant va ekspertlar) o‘z mablag‘lari yoki budjet mablag‘lari hisobidan jalb etish huquqiga ega ekanligi ma’lumot uchun qabul qilinsin.

2. Davlat organlari va tashkilotlari (keyingi o‘rinlarda — buyurtmachi tashkilot) tomonidan xorijiy konsultant va ekspertlarni jalb etish jarayonini muvofiqlashtiruvchi organ etib Strategik islohotlar agentligi belgilansin.

3. Shunday tartib o‘rnatilsinki, unga ko‘ra:

a) xorijiy konsultant va ekspertlar ular bilan buyurtmachi tashkilot hamda Strategik islohotlar agentligi o‘rtasida tuziladigan uch tomonlama shartnoma asosida jalb qilinadi. Bunda:

xorijiy konsultant va ekspertlar bilan shartnoma bir yilgacha bo‘lgan muddatga tuziladi va ushbu muddat keyinchalik uzaytirilishi mumkin;

shartnomada xorijiy konsultant va ekspertlar tomonidan amalga oshirilishi lozim bo‘lgan vazifalar (texnik topshiriq shaklida) hamda erishiladigan individual maqsadli ko‘rsatkichlar (KPI) aks ettiriladi;

buyurtmachi tashkilot har oy xorijiy konsultant va ekspertlar tomonidan amalga oshirilgan ishlar va ko‘rsatilgan xizmatlar to‘g‘risida dalolatnoma tuzadi. Bunda xorijiy konsultant va ekspertlar tomonidan jami amalga oshirilgan ishlar va ko‘rsatilgan xizmatlar to‘g‘risida yakuniy dalolatnoma Strategik islohotlar agentligi bilan kelishilgan holda imzolanadi;

b) xorijiy konsultant va ekspertlar quyidagi asosiy talablarga muvofiq bo‘lishi lozim:

iqtisodiyot, ijtimoiy soha va boshqa ahamiyatga ega bo‘lgan yo‘nalishlarni isloh qilish bo‘yicha bilim, malaka va zarur ko‘nikmalarga ega bo‘lishi;

nufuzli xalqaro tashkilotlar yoki xorijiy davlatlarning ilg‘or korxona va tashkilotlarida ish tajribasiga ega bo‘lishi;

xorijiy tillarni (ingliz, rus va boshqalar) zarur darajada bilishi.

Bunda buyurtmachi tashkilot tomonidan xorijiy konsultant va ekspertlarga nisbatan qo‘shimcha talablar belgilanishi mumkin;

v) buyurtmachi tashkilot tomonidan xorijiy konsultant va ekspertlarni jalb qilish qonunchilikda belgilangan xarid qilish tartib-taomillariga muvofiq amalga oshiriladi; O‘zbekiston Respublikasi Prezidentining 2024-yil 4-martdagi “O‘zbekiston — 2030” strategiyasida belgilangan asosiy yo‘nalishlar bo‘yicha islohotlarni amalga oshirishning 2024-yildagi ustuvor chora-tadbirlari to‘g‘risida”gi PQ-109-son qarorida belgilangan chora-tadbirlar rejasini amalga oshirishga jalb qilinayotgan xorijiy konsultant va ekspertlar bundan mustasno;

g) xorijiy konsultant va ekspertlar tomonidan amalga oshirilgan ishlar va ko‘rsatilgan xizmatlar har oyda buyurtmachi tashkilot tomonidan ommaviy axborot vositalari, ijtimoiy tarmoqlar va o‘zining rasmiy veb-saytida yoritib boriladi, ular ishtirokida joriy masalalarni muhokama qilish va hal qilishning maqbul yo‘llarini aniqlash uchun muntazam ravishda uchrashuvlar tashkil qilinadi hamda tegishli takliflar tayyorlanadi;

d) xorijiy konsultant va ekspertlarni davlat fuqarolik xizmati lavozimlariga tayinlash va lavozimidan ozod qilish davlat fuqarolik xizmati to‘g‘risidagi qonunchilikka muvofiq amalga oshiriladi.

Ushbu band talablari Markaziy bank, tibbiyot muassasalari hamda tibbiyot va farmatsevtika sohasida kadrlar tayyorlovchi ta’lim muassasalariga nisbatan tatbiq etilmaydi.

4. Strategik islohotlar agentligi (B. Raxmatov):

Hisob palatasi (A. Boboyev) bilan birgalikda bir oy muddatda davlat organlari va tashkilotlari bilan xorijiy konsultant va ekspertlar o‘rtasida tuzilgan shartnomalarni qayta ko‘rib chiqsin, ularni mazkur qaror talablariga asosan o‘zgartirish (bekor qilish) bo‘yicha taklif kiritsin;

Raqamli texnologiyalar vazirligi (Sh. Shermatov) bilan birgalikda 2024-yil 1-iyulga qadar xorijiy konsultant va ekspertlarning yagona elektron reyestrini shakllantirsin va uning muntazam ravishda yangilab borilishini ta’minlasin;

ikki hafta muddatda xorijiy konsultant va ekspertlar bilan yangi tartibda tuziladigan shartnomaning namunasini ishlab chiqsin hamda vazirlik va idoralarga taqdim qilsin;

mazkur qaror talablari yuzasidan vazirlik va idoralarga muntazam ravishda tushuntirish ishlarini olib borsin.

5. Tarkibiy islohotlarni samarali amalga oshirish uchun xorijiy konsultant va ekspertlarni jalb qilish tartibi to‘g‘risidagi nizom ilovaga muvofiq tasdiqlansin.

Bunda xalqaro moliya institutlari va xorijiy hukumat moliya tashkilotlari ishtirokidagi loyihalarni amalga oshirish uchun xorijiy konsultant va ekspertlarni jalb etish tegishli tashkilotlarning qoida va talablariga muvofiq amalga oshiriladi.

6. Mazkur qarorning ijrosini nazorat qilish O‘zbekiston Respublikasi Bosh vaziri A.N. Aripov hamda O‘zbekiston Respublikasi Prezidentining maslahatchisi B.M. Mavlonov zimmasiga yuklansin.

1. Mazkur Nizom O‘zbekiston Respublikasining davlat organlari va tashkilotlariga tarkibiy islohotlarni samarali amalga oshirish uchun o‘z mablag‘lari yoki budjet mablag‘lari hisobidan xorijiy konsultant va ekspertlar, xalqaro tashkilotlar, xalqaro moliyaviy institutlar hamda konsalting kompaniyalarni (keyingi o‘rinlarda — xorijiy konsultant va ekspertlar) jalb etish; ularning faoliyati samaradorligining eng muhim ko‘rsatkichlarini (KPI) belgilash va tizimli monitoringini yuritish tartibini belgilaydi.

Ushbu Nizom talablari Markaziy bankka nisbatan tatbiq etilmaydi.

2. Xalqaro moliya institutlari va xorijiy hukumat davlat moliya tashkilotlari ishtirokidagi loyihalarni amalga oshirish uchun xorijiy konsultant va ekspertlarni jalb etish tegishli tashkilotlarning qoida va talablariga muvofiq amalga oshiriladi.

3. Ushbu Nizomda quyidagi asosiy tushunchalardan foydalaniladi:

buyurtmachi tashkilot — xorijiy konsultant va ekspertlarni jalb qiladigan va faoliyati samaradorligining eng muhim ko‘rsatkichlarini (KPI) hamda moddiy rag‘batlantirish miqdorini belgilaydigan, respublika hududida boshqa zarur shart-sharoitlarni yaratib beradigan hamda ular faoliyatining uzluksizligini ta’minlaydigan O‘zbekiston Respublikasidagi davlat organi va/yoki tashkiloti;

dalolatnoma — shartnoma shartlarida belgilangan vazifalarning xorijiy konsultant va ekspertlar tomonidan vijdonan, o‘z vaqtida va sifatli bajarilganligini tasdiqlovchi, xorijiy konsultant va ekspert hamda buyurtmachi tashkilot tomonidan imzolanadigan hujjat;

xorijiy konsultant va ekspertlar — xalqaro moliya institutlari va xorijiy hukumat davlat moliya tashkilotlari, yetakchi xorijiy konsalting kompaniyalari, ilmiy-tadqiqot tashkilotlari, tahlil markazlari va “aql markazlari” hamda zamonaviy bilim va zarur professional tajribaga ega bo‘lgan xorijiy davlatlar fuqarolari va/yoki fuqaroligi bo‘lmagan shaxslar;

shartnoma — xorijiy konsultant va ekspertlar hamda buyurtmachi tashkilot tomonidan mazkur xorijiy konsultant va ekspertlarni jalb qilish maqsadga muvofiqligi, kompetensiyalariga oid talablar, ularning vazifalari, talab qilinadigan xizmatlar ro‘yxati, kutilayotgan natijalar, xizmatlarni moliyalashtirish manbalari va hajmi, xizmatlarni sotib olishning rejalashtirilgan tartib-taomillari va boshqalar to‘g‘risidagi ma’lumotlar tahlili asosida tayyorlanadigan hamda xorijiy konsultant va ekspertlar, buyurtmachi tashkilot hamda O‘zbekiston Respublikasi Prezidenti huzuridagi Strategik islohotlar agentligi (keyingi o‘rinlarda — Strategik islohotlar agentligi) o‘rtasida tuziladigan uch tomonlama shartnoma;

zarur shart-sharoitlar — buyurtmachi tashkilot tomonidan xorijiy konsultant va ekspertlar bilan tuzilgan shartnomada belgilangan muddat davomida ularga ko‘rsatiladigan tibbiy hamda transport xizmatlari, farzandlarining maktabgacha ta’lim muassasalarida tarbiyalanishi, umumiy o‘rta ta’lim va/yoki oliy ta’lim muassasasida tahsil olishi, uy-joy ijarasi xarajatlarining to‘liq yoki bir qismi qoplab berilishi (ijtimoiy paket);

Strategik islohotlar agentligi — davlat organlari va tashkilotlari tomonidan xorijiy konsultant va ekspertlarni jalb etish jarayonini muvofiqlashtiruvchi organ.

4. Buyurtmachi tashkilot xorijiy konsultant va ekspertlarni to‘liq stavkada yoki ma’lum bir loyihani bajarish muddatiga belgilangan xodimlar soni doirasida yoki qo‘shimcha ravishda jalb etadi.

5. Xorijiy konsultant va ekspertlar bilan tuzilgan shartnoma bir yilgacha bo‘lgan muddatga tuziladi va ushbu muddat keyinchalik uzaytirilishi mumkin. Bunda shartnomada xorijiy konsultant va ekspertlar tomonidan amalga oshirilishi lozim bo‘lgan vazifalar (texnik topshiriq shaklida) hamda erishiladigan individual maqsadli ko‘rsatkichlar (KPI) (keyingi o‘rinlarda — KPI) aks ettiriladi.

6. Buyurtmachi tashkilot har oy xorijiy konsultant va ekspertlar tomonidan amalga oshirilgan ishlar va ko‘rsatilgan xizmatlar to‘g‘risida dalolatnoma tuzadi. Bunda xorijiy konsultant va ekspertlar tomonidan jami amalga oshirilgan ishlar va ko‘rsatilgan xizmatlar to‘g‘risida yakuniy dalolatnoma Strategik islohotlar agentligi bilan kelishilgan holda imzolanadi.

7. O‘zbekiston Respublikasining Soliq kodeksiga muvofiq xorijiy konsultant va ekspertlarning mehnatiga to‘lanadigan har oylik moddiy rag‘batlantirish to‘lovlaridan belgilangan tartibda ajratmalar va soliqlar to‘lab boriladi.

8. Xorijiy konsultant va ekspertlarni moddiy rag‘batlantirish va ularga zarur shart-sharoitlar yaratish buyurtmachi tashkilot tomonidan amalga oshiriladi.

9. Xorijiy konsultant va ekspertlarni davlat fuqarolik xizmati lavozimlariga tayinlash va lavozimdan ozod qilish qonunchilikda belgilangan tartibda amalga oshiriladi.

10. Quyidagilar xorijiy konsultant va ekspertlarga qo‘yiladigan asosiy talablar hisoblanadi:

a) xorijiy tillarni (ingliz, rus va boshqalar) zarur darajada bilish;

b) ijtimoiy soha, iqtisodiyot va boshqa ahamiyatga ega bo‘lgan yo‘nalishlarni isloh qilish bo‘yicha bilim, malaka va zarur ko‘nikmalarga ega bo‘lish;

v) nufuzli xalqaro tashkilotlar yoki xorijiy davlatlarning ilg‘or korxona va tashkilotlarida ish tajribasiga ega bo‘lish.

Buyurtmachi tashkilot xorijiy konsultant va ekspertlarga nisbatan qo‘shimcha talablar ham qo‘yishi mumkin.

11. Xorijiy konsultant va ekspertlarni moddiy rag‘batlantirish va ularga zarur shart-sharoitlar yaratish bilan bog‘liq mablag‘larni shakllantirish manbalari quyidagilar hisoblanadi:

O‘zbekiston Respublikasi Vazirlar Mahkamasining zaxira jamg‘armasi mablag‘lari;

O‘zbekiston Respublikasi Tiklanish va taraqqiyot jamg‘armasi mablag‘lari;

vazirlik, idora va tashkilotlarning budjetdan tashqari jamg‘armalari mablag‘lari;

boshqa xalqaro tashkilot va xalqaro moliya institutlarining mablag‘lari, ya’ni grantlar hamda beg‘araz texnik ko‘maklar;

jismoniy va yuridik shaxslarning homiylik mablag‘lari;

qonunchilik hujjatlari bilan taqiqlanmagan boshqa manbalar.

12. Xorijiy konsultant va ekspertlar uchun ajratiladigan mablag‘larning daromad va xarajatlari Iqtisodiyot va moliya vazirligi huzuridagi G‘aznachilik xizmati qo‘mitasida ochiladigan alohida shaxsiy g‘azna hisobvarag‘ida yuritiladi.

13. Xorijiy konsultant va ekspertlarni loyihaga jalb qilishning maqsadga muvofiqligini tasdiqlash uchun buyurtmachi tashkilot Strategik islohotlar agentligiga quyidagi hujjatlarni taqdim etadi:

a) buyurtmachi tashkilot birinchi rahbarining xulosasi;

b)tarjimai hol (SV-ma’lumotnoma), ma’lumotnoma va amaliyot portfoliosi;

v) diplomlar va boshqa tegishli sertifikatlarining nusxasi;

g) o‘tgan yillarda bajarilgan va amalga oshirilayotgan loyihaga taalluqli ishlar va loyihalar haqida ma’lumot;

d) xorijiy konsultant va ekspertlar jalb etilgan loyihani amalga oshirish rejasi yoki to‘liq stavkada jalb etilsa, ushbu sohani rivojlantirish bo‘yicha takliflar (shu jumladan, kutilayotgan natijalarning O‘zbekiston Respublikasini strategik rivojlantirish dasturlari hamda maqsadlariga ta’sirining tahlili);

e) oldingi ish joyi rahbariyatidan yoki loyiha tashabbuskoridan tavsiyanoma;

j) buyurtmachi tashkilot tomonidan xorijiy konsultant va ekspertlarni ishga jalb etish yuzasidan belgilangan tartibda ruxsat etilganligi to‘g‘risida rasmiy hujjatlarning nusxalari.

14. KPIni belgilash va baholash jarayoni uch bosqichda amalga oshiriladi va bunda buyurtmachi tashkilot tomonidan quyidagilar inobatga olinadi:

a) 1-bosqich. Ko‘rsatkichlar va baholash mezonlarini ishlab chiqish:

loyihaga jalb etilgan xorijiy konsultant va ekspertlar faoliyati har oylik vazifalarining aniq ro‘yxati ishlab chiqiladi;

tegishli soha yoki loyihaning strategik maqsadlarini shartnoma amal qilish muddati davomida o‘lchash mumkin bo‘lgan aniq ko‘rsatkichlar (shu jumladan, buyurtmachi tashkilot xodimlarini “kouching” qilish) belgilanadi;

belgilangan vazifalarni bajarish hamda strategik maqsadlarga erishish uchun zarur moliyaviy, texnik va inson resurslari hisob-kitoblarining (keyingi o‘rinlarda — zarur resurslar) buyurtmachi tashkilot imkoniyatlariga mosligi asoslantiriladi;

b) 2-bosqich. Muntazam ko‘mak va monitoring:

buyurtmachi tashkilotning birinchi rahbari tomonidan har oy kamida bir marta xorijiy konsultant va ekspert (yoki uning vakili) bilan yuzma-yuz suhbat o‘tkazish orqali:

xorijiy konsultant va ekspertning zarur resurslar bilan ta’minlanganlik holati bo‘yicha muntazam monitoring olib boriladi;

1-bosqichda belgilangan oylik vazifalarga va strategik maqsadlarga ko‘zda tutilmagan qo‘shimcha o‘zgartirishlarning KPIga ta’siri tahlil qilinadi;

byurokratik yoki boshqa sabablar tufayli yuzaga kelgan vaziyatlar tezkorlik bilan hal etiladi;

v) 3-bosqich. Baholash:

xorijiy konsultant va ekspertlar tomonidan 1-bosqichda belgilangan vazifalar va strategik maqsadlarga erishish bo‘yicha rejalarning ijrosi hamda KPIga erishish hisoboti har chorakda taqdim etiladi;

hisobot buyurtmachi tashkilot tomonidan aniq natijalarga tayangan holda quyidagi mezonlar asosida baholanadi, ya’ni samaradorlikning yig‘ma ko‘rsatkichi:

50 foizdan kam bo‘lsa — qoniqarsiz. Bunday holda xorijiy konsultant va ekspertlar bilan tuzilgan shartnoma bekor qilinadi;

50 foizdan 70 foizgacha bo‘lsa — past daraja. Bunday holda xorijiy konsultant va ekspertlardan ko‘rsatkichlarini yaxshilash uchun aniq rejalar talab qilinadi va buning uchun uch oy muddat beriladi;

70 foizdan 85 foizgacha bo‘lsa — o‘rta daraja. Bunday holda xorijiy konsultant va ekspertlarning to‘liq salohiyatini ro‘yobga chiqarish uchun zarur resurslar qayta ko‘rib chiqiladi;

85 foizdan 100 foizgacha bo‘lsa — yuqori daraja. Bunda xorijiy konsultant va ekspertlarni rag‘batlantirish uchun buyurtmachi tashkilot tomonidan taklif kiritilishi mumkin.

Buyurtmachi tashkilot tomonidan har chorakda xorijiy konsultant va ekspertlarni baholash natijalari bo‘yicha hisobotni Strategik islohotlar agentligiga taqdim etiladi. Mazkur hisobot xorijiy konsultant va ekspertning shaxsiy yig‘majildida umumlashtirib boriladi.

15. Xorijiy konsultant va ekspertlar moddiy rag‘batlantirish miqdori har yili aniq ish hajmiga qarab, buyurtmachi tashkilot tomonidan qayta ko‘rib chiqilishi mumkin.

16. Buyurtmachi tashkilot quyidagi huquqlarga ega:

xorijiy konsultant va ekspertlarni jalb qilish;

xorijiy konsultant va ekspertlarni moddiy rag‘batlantirish miqdorini belgilash va uni qayta ko‘rib chiqish, monitoring natijalari bo‘yicha xorijiy konsultant va ekspertlarni loyihani amalga oshirishga muvofiqligi to‘g‘risida qaror qabul qilish;

xorijiy konsultant va ekspertlar uchun aniq ko‘rsatkichlar va maqsadlarni, shu jumladan, KPIni belgilash;

xorijiy konsultant va ekspertlarning mehnat faoliyatini doimiy kuzatib borish.

17. Buyurtmachi tashkilot quyidagi majburiyatlarga ega:

shartnomada belgilangan qoidalarga rioya etish;

xorijiy konsultant va ekspertlarga yuklangan vazifalarni bajarish uchun zarur resurslar va shart-sharoitlarni yaratish;

har oyda xorijiy konsultant va ekspertlar tomonidan bajarilgan ishlar to‘g‘risida ma’lumotlarni yagona elektron reyestriga kiritish va uni muntazam ravishda yangilab borilishini ta’minlash.

18. Buyurtmachi tashkilot tomonidan shartnomada belgilangan moddiy rag‘batlantirish to‘lovlaridan tashqari boshqa har qanday to‘lovlar amalga oshirishga yo‘l qo‘yilmaydi.

19. Xorijiy konsultant va ekspertlar quyidagi huquqlarga ega:

o‘zlariga yuklangan vazifalarni bajarish uchun buyurtmachi tashkilotdan zarur shart-sharoitlar yaratib berishini talab qilish;

o‘zlariga yuklangan vazifalarni bajarish uchun buyurtmachi tashkilotdan zarur ma’lumotlarni olish.

20. Xorijiy konsultant va ekspertlar quyidagi majburiyatlarga ega:

shartnomada ko‘zda tutilgan barcha majburiyatlarni shartnoma shartlari va muddatlariga muvofiq vijdonan va samarali bajarish;

har oyda buyurtmachi tashkilotga hisobotlarni taqdim etish;

shartnoma shartlariga to‘liq rioya qilish.

21. Shartnomaning amal qilish muddati davomida va u bekor qilinganidan so‘ng xorijiy konsultant va ekspertlar o‘z faoliyati davomida olgan ma’lumotlarga, shu jumladan, buyurtmachi tashkilotdan yoki boshqa idoralardan olgan ma’lumotlarga nisbatan konfidensiallikni saqlashga majburdir.

Xorijiy konsultant va ekspertlar to‘g‘ridan-to‘g‘ri yoki bilvosita buyurtmachi tashkilot va Strategik islohotlar agentligining yozma ruxsatisiz uchinchi shaxslarga bunday ma’lumotlarni oshkor qilishiga yo‘l qo‘yilmaydi.

22. Shartnoma imzolangandan so‘ng xorijiy konsultant va ekspertlar qonunchilik hujjatlarida belgilangan tartibda O‘zbekiston Respublikasi hududida mehnat faoliyatini amalga oshirish huquqini beruvchi tasdiqnoma olishi lozim.

23. Ushbu Nizom talablarining buzilishida aybdor bo‘lgan shahslar qonunchilik hujjatlarida belgilangan tartibda javob beradilar.