Respublikamizda yerlardan oqilona va samarali foydalanishni tashkil etish, sohada taʼsirchan nazoratni taʼminlash hamda yer resurslari, geodeziya, kartografiya va davlat kadastri sohasidagi munosabatlarni tartibga solish borasida bir qator ishlar amalga oshirilgan.

Shu bilan birga, bugungi kunda sohada oʻz yechimini kutayotgan masalalar ham mavjud.

Xususan, Oʻzbekistonda 44,8 mln gektar yer maydoni, 8,3 mln. bino va inshootlarning mulk sifatidagi bozor bahosi hisoblanmagan.

Mavjud bino va inshootlarning shartli kadastr qiymati 70 mlrd dollarini tashkil etsa-da, aslida ularning haqiqiy bozor bahosi bundan ancha koʻpdir.

Qayd etish joizki, mamlakatimizda erga boʻlgan huquqni tasdiqlovchi hujjatlari toʻliq boʻlmagan, hujjatdagi va amaldagi maydoni bir-biridan farq qiladigan, ilgari doimiy foydalanish uchun ajratilgan qishloq xoʻjaligiga moʻljallangan yerlardan qonunchilikda belgilangan tartibda foydalanilmayotgan 286,2 ming gektar yer maydoni mavjud boʻlib, mazkur holatlar joylarda masalani oʻrganishni hamda yer munosabatlarini tartibga solishni talab etmoqda.

Yuqoridagilardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Hududlarda erga boʻlgan huquqni tasdiqlovchi hujjatlari toʻliq boʻlmagan, hujjatdagi va amaldagi maydoni bir-biridan farq qiladigan, doimiy foydalanish uchun ajratilgan qishloq xoʻjaligiga moʻljallangan yerlardan foydalanish holatini oʻrganish maqsadida xalq deputatlari tuman (shahar) Kengashlariga:

joriy yilning 22-dekabriga qadar har bir tuman (shahar) kesimida 1-ilovadagi* namunaga muvofiq mahalliy Kengashlar deputatlaridan iborat tarkibda hududiy ishchi guruhlarni tuzish;

qishloq xoʻjaligiga moʻljallangan yerdan foydalanish samaradorligini ishchi guruhlar tomonidan ikki oylik reja asosida oʻrganish;

oʻrganishlar yakunlaridan kelib chiqib, har bir yer uchastkasi boʻyicha tuman (shahar) hokimi va yerdan foydalanuvchi oʻrtasida ijara shartnomasini tuzish (ijara shartnomasiga oʻzgartirish va qoʻshimchalar kiritish) yoki yer uchastkasini zaxiraga qaytarish choralarini koʻrish masalasini xalq deputatlari tuman (shahar) Kengashlari sessiyalarida koʻrib chiqish tavsiya etilsin.

2. Ishchi guruh erga boʻlgan huquqni tasdiqlovchi hujjatlari toʻliq boʻlmagan, hujjatdagi va amaldagi maydoni bir-biridan farq qiladigan, doimiy foydalanish uchun ajratilgan qishloq xoʻjaligiga moʻljallangan yerlardan foydalanish holatini oʻrganish ishlarini 2-ilovaga* muvofiq sxema asosida tashkil etsin.

3. Hududlarda tuzilgan ishchi guruhlarga amaliy yordam koʻrsatish maqsadida Oʻzbekiston Respublikasi Oliy Majlisi Qonunchilik palatasi deputatlari hamda Oʻzbekiston Respublikasi Oliy Majlisi Senati aʼzolari 3-ilovaga* muvofiq hududlarga masʼul etib biriktirilsin.

Hududlarga biriktirilgan Qonunchilik palatasi deputatlari va Senat aʼzolarining aholi va tadbirkorlik subyektlari oʻrtasida tushuntirish ishlarini tashkil etishi hamda xalq deputatlari tuman (shahar) Kengashlari sessiyalarida ishtirok etishi belgilansin.

4. Oʻzbekiston Respublikasi Oliy Majlisi Senatining Hududiy vakillik organlari faoliyatini oʻrganish markazi:

erga boʻlgan huquqni tasdiqlovchi hujjatlari toʻliq boʻlmagan, hujjatdagi va amaldagi maydoni bir-biridan farq qiladigan va ilgari doimiy foydalanish uchun ajratilgan qishloq xoʻjaligiga moʻljallangan yerlardan qonunchilikda belgilangan tartibda foydalanish holatlarini oʻrganishda mahalliy Kengashlarga koʻmaklashsin;

amalga oshirilgan ishlar yuzasidan doimiy monitoring olib borsin;

2024-yil 5-martga qadar oʻrganish natijalari yuzasidan maʼlumotlarni umumlashtirsin hamda Senatning Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi bilan birgalikda Oʻzbekiston Respublikasi Oliy Majlisi Senatiga kiritsin.

5. Oʻzbekiston Respublikasi Qishloq xoʻjaligi vazirligi hamda Iqtisodiyot va moliya vazirligi huzuridagi Kadastr agentligi hududlarda ishchi guruhlar ishini sifatli tashkil etish hamda ularni tegishli maʼlumotlar bilan taʼminlashda amaliy yordam bersin.

6. Oʻzbekiston Respublikasi Oliy Majlisi palatalarining Agrar va suv xoʻjaligi masalalari qoʻmitalari hududlarda erga boʻlgan huquqni tasdiqlovchi hujjatlari toʻliq boʻlmagan, hujjatda va amaldagi maydoni bir-biridan farq qiladigan, doimiy foydalanish uchun ajratilgan qishloq xoʻjaligiga moʻljallangan yerlardan foydalanish holatini oʻrganish natijalari boʻyicha 2024-yilning 10-martiga qadar axborot tayyorlasin hamda Oliy Majlis palatalari Kengashlariga kiritsin.

7. Mazkur Qoʻshma qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev hamda Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov zimmasiga yuklatilsin.

8. Ushbu Qoʻshma qaror qabul qilingan kundan eʼtiboran kuchga kiradi.