Vazirlar Mahkamasi qaror qiladi:

1. Quyidagilar:

Respublika epidemiyaga qarshi kurashish favqulodda komissiyasi tarkibi 1-ilovaga* muvofiq;

Respublika epidemiyaga qarshi kurashish favqulodda komissiyasi to‘g‘risidagi Nizom 2-ilovaga muvofiq tasdiqlansin.

2. O‘zbekiston SSR Ministrlar Sovetining “Epidemiyaga qarshi kurash respublika favqulodda komissiyasi to‘g‘risidagi Nizomni tasdiqlash haqida” 1990-yil 19-yanvardagi 41-son qarori, Vazirlar Mahkamasining 1991-yil 25-dekabrdagi 314-son va 1992-yil 15-apreldagi 189-son qarorlari o‘z kuchini yo‘qotgan deb hisoblansin.

1. Respublika epidemiyaga qarshi kurashish favqulodda komissiyasi:

yuqumli kasalliklarni profilaktika qilish, ushbu kasalliklar epidemiyalarining (VICH infeksiyani (SPID), vabo, gripp va boshqalarning) odamlar o‘rtasida tarqalishiga yo‘l qo‘ymaslik va bartaraf etish, oziq-ovqatlardan ommaviy ravishda zaharlanish hollarining oldini olish tadbirlarini ishlab chiqadi hamda davlat hokimiyati va boshqaruvi organlari, mulkchilik shaklidan qat’iy nazar, xo‘jalik yurituvchi subyektlar, jamoat tashkilotlari orqali amalga oshiradi;

vazirliklar va idoralar, joylardagi davlat hokimiyati organlari, xo‘jalik yurituvchi subyektlar, jamoat tashkilotlarining insonning yuqumli kasalliklari epidemiyalarining, oziq-ovqatlardan ommaviy ravishda zaharlanishi hollarining oldini olishga, tarqalishiga yo‘l qo‘ymaslikka va ularni bartaraf etishga qaratilgan faoliyatini muvofiqlashtirib boradi;

ichimlik suv bilan ta’minlashni tashkil etish hamda kommunal va idoraviy suv quvurlaridagi, ichimlik suv bilan ta’minlashning markazlashtirilmagan manbalaridagi ichimlik suv sifatini oshirish tadbirlari ustidan nazoratni ta’minlaydi;

viloyatlarning epidemiyaga qarshi kurashish favqulodda komissiyalari faoliyatiga uslubiy rahbarlik qiladi va uni muvofiqlashtirib boradi, zaruriyat bo‘lganda ularga yuqumli kasalliklarning oldini olish va ularni kamaytirish tadbirlarini bajarishda amaliy yordam ko‘rsatadi.

2. Respublika epidemiyaga qarshi kurashish favqulodda komissiyasi jamoatchilik asosida faoliyat ko‘rsatadi hamda Komissiya raisi, rais o‘rinbosari, mas’ul kotibi va a’zolaridan iborat tarkibda tuziladi.

Komissiya tarkibi O‘zbekiston Respublikasi Vazirlar Mahkamasi tomonidan tasdiqlanadi.

Komissiya tarkibiga O‘zbekiston Respublikasi vazirliklari va idoralari, boshqa manfaatdor tashkilotlar, korxonalar va muassasalar vakillari kiritiladi.

3. Respublika epidemiyaga qarshi kurashish favqulodda komissiyasiga odamlar o‘rtasida yuqumli kasalliklarning oldini olish va ularni yo‘qotish, aholini yaxshi sifatli ichimlik suv bilan ta’minlash tadbirlarini ishlab chiqish hamda amalga oshirish, aholi yashaydigan joylarni kanalizatsiya tarmoqlari bilan ta’minlash va sanitariya jihatidan tozalash, vazirliklar va idoralar, tashkilotlar va muassasalarning, shuningdek, viloyatlar epidemiyaga qarshi kurashish komissiyalarining ushbu masalalar bo‘yicha faoliyatiga uslubiy rahbarlik qilish va uni muvofiqlashtirib borish;

Vazirlar Mahkamasini yuqumli kasalliklarning ommaviy ravishda tarqalishi va aholi o‘rtasida oziq-ovqatlardan zaharlanish hollari hamda ularni bartaraf etish chora-tadbirlari to‘g‘risida xabardor qilish vazifalari yuklanadi.

Komissiya yuqumli kasalliklar tarqalgani va oziq-ovqatlardan ommaviy ravishda zaharlanish hollari qayd etilgan taqdirda:

korxonalar, birlashmalar va tashkilotlar mablag‘larini epidemiyaga qarshi aniq tadbirlarni bajarish uchun jalb qiladi va ularni amalga oshirish uchun mas’ul shaxslarni tayinlaydi;

quyidagilarni amalga oshiradi;

atrof muhitni, markazlashtirilgan suv manbalarini va ochiq suv havzalarini, oziq-ovqat mahsulotlarini maqsadli tekshiruvdan o‘tkazish hamda infeksiya tarqalishiga sabab bo‘lgan suv va oziq-ovqatlar sotilishiga yo‘l qo‘ymaslik chora-tadbirlarini ko‘radi;

kuchli ichak kasalliklariga chalingan bemorlarni jadal aniqlaydi va statsionar davolashga joylashtiradi;

gigiyena bo‘yicha o‘qitishni hamda uy-joy-kommunal xo‘jaligi, go‘sht, sut va oziq-ovqat sanoati, savdo va umumiy ovqatlanish, qishloq xo‘jaligi, ijtimoiy ta’minot, qurilish va transport, sog‘liqni saqlash tashkilotlari, muassasalari va korxonalari hamda boshqa vazirliklar va idoralar xodimlari tomonidan bajariladigan sanitariya normalari va qoidalariga amal qilish tadbirlarini tashkil etadi;

sanitariya jihatidan yaxshi bo‘lmagan hududda yashovchi aholini yaxshi sifatli ichimlik suv bilan to‘liq ta’minlashga qaratilgan sanitariya-kommunal va tibbiy tadbirlar kompleksini amalga oshirish, shuningdek, aholi punktlarini kanalizatsiya tarmoqlari bilan ta’minlash, ochiq suv havzalariga oqiziladigan oqova suvlarni puxta tozalash va zararsizlantirish, hududlarni xo‘jalik-maishiy axlatlardan doimiy ravishda tozalash, axlatxonalarni zarur tartibda saqlash, oziq-ovqat mahsulotlari ishlab chiqaradigan va sotadigan korxonalarda sanitariya rejimiga rioya qilinishi ustidan nazoratni ta’minlaydi;

kasallik tarqalgan joylarda shoshilinch yalpi profilaktika o‘tkazishning maqsadga muvofiqligi to‘g‘risida qaror qabul qiladi;

joylardagi davlat hokimiyati organlari va tegishli xizmatlar orqali suvdan xo‘jalik-ichimlik va madaniy-maishiy maqsadlarda foydalanish bo‘yicha cheklash tadbirlarini amalga oshiradi;

mas’ul shaxslarning epidemiyaga qarshi tadbirlarning bajarilishi to‘g‘risidagi axborotlarini muntazam ravishda eshitadi va ularning natijalari bo‘yicha tashkiliy va amaliy qarorlar qabul qiladi;

yuqumli kasalliklar tarqalishi yoki oziq-ovqatdan ommaviy zaharlanish hollarining sabablari va ularni bartaraf etish natijalari to‘g‘risidagi barcha materiallarni ko‘rib chiqadi, ushbu kasalliklarning paydo bo‘lishiga yoki zaharlanishlarga sababchi shaxslarni aniqlaydi.

Aholi o‘rtasida alohida xavfli kasalliklarga chalinishlar qayd etilgan taqdirda Komissiya zarur hollarda qo‘shimcha ravishda quyidagilarni amalga oshiradi:

infeksiya paydo bo‘lgan joylarda karantin-cheklash chora-tadbirlarini yoki karantinni joriy etish va bekor qilish;

infeksiya manbaini yo‘qotish bo‘yicha muvaqqat qo‘mitani va uning ish rejasini tasdiqlash;

infeksiya manbaini bartaraf etish chora-tadbirlari amalga oshirilishining borishi to‘g‘risidagi masalani muntazam ravishda eshitish va uning natijalari bo‘yicha zarur qarorlar qabul qilish.

4. Respublika epidemiyaga qarshi kurashish favqulodda komissiyasi quyidagi huquqlarga ega:

ommaviy yuqumli kasalliklar va odamlarning oziq-ovqatdan zaharlanishi hollari to‘g‘risida vazirliklar va idoralardan axborotlar olish;

korxonalar, tashkilotlar va muassasalarda yuqumli kasalliklar va ovqatdan zaharlanishning oldini olish ishlarining ahvolini tekshirish;

odamlar o‘rtasida yuqumli kasalliklar tarqalishining oldini olish maqsadida korxonalar, tashkilotlar, muassasalarda, alohida aholi punktlari va hududlarda karantin-cheklash chora-tadbirlari hamda karantin joriy etish to‘g‘risida qaror qabul qilish;

tegishli vazirliklar, idoralar, korxonalar, tashkilotlar, muassasalardan hujjatlar talab qilish hamda ularning rahbarlarining yuqumli kasalliklarning oldini olish yuzasidan ko‘rilayotgan chora-tadbirlar, sanitariya-profilaktika va epidemiyaga qarshi chora-tadbirlar bajarilishi to‘g‘risidagi axborotlarini Komissiya majlislarida eshitish;

ularning aybi bilan yuqumli kasalliklar epidemiyasi avj olishiga yoki oziq-ovqatdan ommaviy zaharlanish hollariga yo‘l qo‘ygan vazirliklar, idoralar, korxonalar, tashkilotlar va muassasalarining mansabdor shaxslarini ishdan chetlatish, ma’muriy yoki jinoiy javobgarlikka tortish to‘g‘risidagi masalani tegishli organlar oldiga qo‘yish;

yuqumli kasalliklarning oldini olish va ular darajasini pasaytirish, shuningdek, oziq-ovqatdan zaharlanishning oldini olish bilan bog‘liq masalalarni Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining ko‘rib chiqishi uchun kiritish;

zarur sanitariya va epidemiyaga qarshi tadbirlar o‘tkazilgungacha suv quvurlarni, kanalizatsiya, gidrotexnika inshootlari va boshqa kommunal inshootlardan, oziq-ovqat, umumiy ovqatlanish, savdo korxonalaridan, madaniy-maishiy maqsaddagi binolardan va boshqa obyektlardan foydalanish, shuningdek, markazlashtirilgan suv manbalari va ochiq suv havzalarining ifloslangan suvlaridan, oziq-ovqat mahsulotlaridan, qoniqarsiz sanitariya holatida yoki ularning odamlar sog‘lig‘iga xavfli ta’siri mavjud bo‘lgan hollarda harakatlanadigan sostavdan va samolyotlardan foydalanishni O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi organlarining taqdimnomasi bo‘yicha taqiqlash yoki vaqtincha to‘xtatib qo‘yish

5. Respublika epidemiyaga qarshi kurashish favqulodda komissiyasi reja bo‘yicha ish olib boradi va u quyidagi joriy va istiqboldagi masalalar hal etilishini nazarda tutadi:

yuqumli kasalliklar va oziq-ovqatdan zaharlanishning paydo bo‘lishi va tarqalishining oldini olish;

vazirliklar va idoralar tomonidan VICH infeksiyasi (SPID) va boshqa yuqumli kasalliklar tarqalishining oldini olish chora-tadbirlarining, shuningdek, Komissiya qarorlarining bajarilishi.

6. Respublika epidemiyaga qarshi kurashish favqulodda komissiyasi raisi vujudga kelayotgan epidemiyaga qarshi vaziyatni hisobga olgan holda Komissiyaning rejali va navbatdan tashqari majlislari chaqirilishi va o‘tkazilishini ta’minlaydi hamda qabul qilinadigan qarorlarining bajarilishi ustidan nazoratni tashkil etadi.

7. Respublika epidemiyaga qarshi kurashish favqulodda komissiyasi majlisiga, ko‘rib chiqilayotgan masalalarning xususiyatiga qarab, vazirliklar, idoralar, jamoat tashkilotlari, korxonalar, muassasalar va mehnat jamoalarining rahbarlari yoki vakillari taklif etiladi.

Komissiya majlisida protokol yuritiladi, protokol ko‘chirma tarzida manfaatdor tashkilotlarga va mansabdor shaxslarga, shuningdek, ommaviy axborot vositalariga yetkaziladi.

Protokolni majlisda raislik qilgan shaxs va mas’ul kotib imzolaydilar.

8. Respublika epidemiyaga qarshi kurashish favqulodda komissiyasi a’zolari o‘z vazifalarini, qoidaga ko‘ra, ish vaqtida amalga oshiradilar. Asosiy ish bilan bog‘liq bo‘lmagan topshiriqlarni bajarish davrida Komissiya a’zolariga doimiy ish joyi bo‘yicha ish haqi saqlanib qoladi.