Oʻzbekiston Respublikasi Prezidentining 2022-yil 26-oktabrdagi PQ-411-son “Aholini sifatli dori vositalari va tibbiy buyumlar bilan taʼminlash yuzasidan qoʻshimcha chora-tadbirlar toʻgʻrisida” qaroriga muvofiq buyuraman:

1. Alohida holatlarda tibbiyot muassasasida bemorlar tomonidan olib kelingan dori vositalari va tibbiy buyumlarni ishlatishga ruxsat berish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom alohida holatlarda tibbiyot muassasasida bemorlar tomonidan olib kelingan dori vositalari va tibbiy buyumlarni ishlatishga ruxsat berish tartibini belgilaydi.

1. Mazkur Nizom Oʻzbekiston Respublikasi Prezidentining “Sogʻliqni saqlash sohasida ixtisoslashtirilgan tibbiy yordam koʻrsatish tizimini yanada takomillashtirish chora-tadbirlari toʻgʻrisida” 2021-yil 28-iyuldagi PQ-5199-son qaroriga muvofiq Davlat tibbiy sugʻurtasi jamgʻarmasi orqali moliyalashtirish tizimiga oʻtkazilgan respublika darajasidagi davlat statsionar tibbiyot muassasalarida (bundan buyon matnda tibbiyot muassasasi deb yuritiladi) alohida holatlarda bemorlar tomonidan olib kelingan dori vositalari va tibbiy buyumlarni ishlatishga nisbatan tatbiq etiladi.

2. Ushbu Nizomda quyidagi asosiy tushunchalar qoʻllaniladi:

alohida holatlar — tibbiyot muassasasiga davolanish uchun kelgan bemorlar tomonidan ularning tegishli asosiy kasalliklarini, shuningdek ularda oldindan mavjud boʻlgan yondosh surunkali va atrofdagilar uchun xavf tugʻdiradigan kasalliklarni davolash uchun shifokor tomonidan yozilgan retsept asosida shu kunga qadar qabul qilayotgan dori vositalari va tibbiy buyumlarning tibbiyot muassasasiga foydalanish maqsadida olib kelinishi;

yondosh surunkali va atrofdagilar uchun xavf tugʻdiradigan kasalliklar — sil, oʻsma kasalliklari, jinsiy yoʻl bilan oʻtadigan kasalliklar, orttirilgan immunitet tanqisligi sindromi, moxov, ruhiy kasalliklar, yurak-qon tomir kasalliklari, endokrinologik va narkologik kasalliklar.

3. Tibbiyot muassasasida bemorlarni dori vositalari va tibbiy buyumlar bilan taʼminlash xarajatlar smetasi boʻyicha ajratilishi koʻzda tutilgan mablagʻlar hisobidan kafolatlangan tibbiy xizmatlar va dori vositalari paketi doirasida bepul, qolgan hollarda pullik asosda shifoxonaga kirim qilingan narxlarda amalga oshiriladi.

Bunda, bemorlar tibbiyot muassasasiga davolanish uchun kelganda, ular oʻzlarining asosiy kasalliklarini, shuningdek ularda oldindan mavjud boʻlgan yondosh surunkali va atrofdagilar uchun xavf tugʻdiradigan kasalliklarni davolash uchun shifokor tomonidan yozilgan retsept asosida shu kunga qadar qabul qilayotgan dori vositalari va tibbiy buyumlarni (bundan buyon matnda dori vositalari va tibbiy buyumlar deb yuritiladi) tibbiyot muassasasiga foydalanish maqsadida olib kelishi mumkin.

4. Bemorlar tomonidan tibbiyot muassasasiga olib kelingan dori vositalari va tibbiy buyumlarni ishlatishga ruxsat berishda davolovchi shifokor tomonidan:

ushbu dori vositalari va tibbiy buyumlarning shifokor tomonidan yozilgan retseptda koʻrsatilganligi;

dori vositalari va tibbiy buyumlarning oʻramida koʻrsatilgan yaroqlilik muddati, birlamchi va ikkilamchi oʻramdagi maʼlumotlarning mos kelishi, tashqi koʻrinishining butligi;

bemorning xozirgi xolatidagi kasallikning turi va ogʻirlik darajasi, kasallikning kechishi, bemorning yoshi, vazni, shuningdek dori vositalarining tibbiyotda qoʻllanilishiga doir yoʻriqnomalarida koʻrsatilgan qarshi koʻrsatmalar, nojoʻya taʼsirlar hamda dori vositalarining oʻzaro taʼsirlashuvi toʻgʻrisidagi maʼlumotlar tekshiriladi.

Bunda, bemorlar tomonidan tibbiyot muassasasiga olib kelingan dori vositalari va tibbiy buyumlar ushbu bandning ikkinchi — toʻrtinchi xatboshilarida nazarda tutilgan talablarga javob berganda, davolovchi shifokor tomonidan shu tibbiyot muassasasining tor mutaxassisi bilan maslahatlashilgan holda mazkur dori vositalari va tibbiy buyumlarni ishlatishga ruxsat beriladi.

5. Bemor tomonidan olib kelingan dori vositalari va tibbiy buyumlar Mazkur Nizomning 4-bandi ikkinchi — toʻrtinchi xatboshilarida nazarda tutilgan talablarga javob bermasa, ushbu dori vositalari va tibbiy buyumlarni ishlatishga ruxsat berilmaydi.

6. Bemorlar tomonidan olib kelingan va alohida saqlash sharoitlarini talab etmaydigan dori vositalari va tibbiy buyumlar bemor joylashtirilgan xonada saqlanadi.

Alohida saqlash sharoitlarini talab etadigan dori vositalari va tibbiy buyumlar esa tibbiyot muassasasining muolaja xonasida (shu jumladan ushbu xonadagi muzlatgichda) saqlanadi.

7. Tibbiyot muassasasining davolovchi shifokori bemorlar tomonidan olib kelingan dori vositalari va tibbiy buyumlarning sarflanishi boʻyicha maʼlumotlarni har kuni kasallik tarixiga qayd etib boradi hamda kiritilgan maʼlumotlarning toʻgʻriligi uchun javobgar hisoblanadi.

8. Quyidagilar tibbiyot muassasasi xodimlari (davolovchi shifokor hamda boʻlim hamshirasi)ning huquqlari hisoblanadi:

bemorlar tomonidan tibbiyot muassasasiga olib kelingan dori vositalari va tibbiy buyumlar alohida saqlash sharoitlarini talab etadigan boʻlsa, ushbu dori vositalari va tibbiy buyumlarni tibbiyot muassasasining muolaja xonasida (shu jumladan ushbu xonadagi muzlatgichda) saqlash uchun bemorlardan talab qilib olish;

bemorlar tomonidan tibbiyot muassasasiga shifokor retseptida koʻrsatilmagan dori vositalari va tibbiy buyumlar olib kelingan taqdirda, ushbu dori vositalari va tibbiy buyumlarni tibbiyot muassasasiga qabul qilmaslik hamda ishlatishga ruxsat bermaslik.

9. Quyidagilar tibbiyot muassasasi xodimlari (davolovchi shifokor hamda boʻlim hamshirasi)ning majburiyatlari hisoblanadi:

bemor tomonidan olib kelingan dori vositalari va tibbiy buyumlar alohida saqlash sharoitlarini talab etadigan boʻlsa, ushbu dori vositalari va tibbiy buyumlarni tibbiyot muassasasining muolaja xonasida (shu jumladan ushbu xonadagi muzlatgichda) saqlash;

bemor tomonidan olib kelingan dori vositalari va tibbiy buyumlar tibbiyot muassasasining dori vositalari va tibbiy buyumlari, shuningdek boshqa bemor tomonidan olib kelingan dori vositalari va tibbiy buyumlar bilan aralashib ketmasligini taʼminlash;

10. Bemorlarning huquqlari quyidagilar hisoblanadi:

mazkur Nizomning 4-bandi ikkinchi — toʻrtinchi xatboshilarida nazarda tutilgan talablarga javob beradigan dori vositalari va tibbiy buyumlarni oʻzlari bilan tibbiyot muassasasiga olib kelish;

oʻzlari bilan olib kelgan dori vositalari va tibbiy buyumlar alohida saqlash sharoitlarini talab etadigan boʻlsa, ushbu dori vositalari va tibbiy buyumlarni tibbiyot muassasasining muolaja xonasida (shu jumladan ushbu xonadagi muzlatgichda) saqlanishini tibbiyot muassasasi xodimlari (davolovchi shifokor hamda boʻlim hamshirasi)dan talab qilish;

oʻzlari bilan olib kelgan hamda tibbiyot muassasasining muolaja xonasida (shu jumladan ushbu xonadagi muzlatgichda) saqlangan dori vositalari va tibbiy buyumlarni tibbiyot muassasasi xodimlaridan (bosh shifokor, boʻlim hamshirasi) talab qilib olish.

11. Bemorlarning majburiyatlari quyidagilar hisoblanadi:

oʻzlari bilan olib kelgan dori vositalari va tibbiy buyumlarni (agar ular alohida saqlash sharoitlarini talab etmasa) tibbiyot muassasasi xodimlari (davolovchi shifokor hamda boʻlim hamshirasi)ning tekshiruvidan oʻtkazgan holda muolaja xonasida saqlash chorasini koʻrish;

oʻzlari bilan olib kelgan dori vositalari va tibbiy buyumlarni (agar ular alohida saqlash sharoitlarini talab etsa) tibbiyot muassasasining muolaja xonasida (shu jumladan ushbu xonadagi muzlatgichda) saqlash uchun tibbiyot muassasasi xodimlari (davolovchi shifokor, boʻlim hamshirasi)ga topshirish.

12. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladi.