Yurtimiz ozodligi va mustaqilligi uchun kurashlarda matonat koʻrsatgan, millatni hurlik va erkinlikka chorlagan, mustabid tuzum yillarida qatagʻon etilgan vatandoshlarimizning moʻtabar xotirasini abadiylashtirish, ularning ibratli hayoti va faoliyati, ilmiy-ijodiy merosini chuqur oʻrganish, yoshlar qalbida metin irodali, mard ajdodlarimiz ruhi-pokiga ehtirom, ijtimoiy adolat tantanasiga ishonch, istiqlol gʻoyalariga sadoqat, vatanparvarlik va fidoyilik tuygʻularini kuchaytirish maqsadida, Oʻzbekiston Respublikasi Prezidentining 1999-yil 12-maydagi F-999-son Farmoyishiga muvofiq Vazirlar Mahkamasi qaror qiladi:

1. Mustamlakachilik davri qurbonlari xotirasini abadiylashtirish boʻyicha jamoatchilik komissiyasining qatagʻon qurbonlari boʻlgan vatandoshlarimiz hayoti va faoliyatini oʻrganish, xotirasini abadiylashtirish yuzasidan taklif va tavsiyalari maʼqullansin.

Jamoatchilik komissiyasining keng xalq ommasi fikrlariga asoslangan takliflari hisobga olinib, Mustamlakachilik davri qurbonlari xotirasini abadiylashtirish boʻyicha respublika tashkiliy qoʻmitasi tuzilsin va uning tarkibi 1-ilovaga* muvofiq tasdiqlansin.

Tashkiliy qoʻmita jamoatchilik komissiyasi bilan birgalikda, Madaniyat ishlari vazirligi, Badiiy akademiya, ijodiy uyushmalar, nodavlat va jamoat tashkilotlari, oʻz-oʻzini boshqarish organlari, ijtimoiy fan vakillarini jalb etgan holda:

— Toshkent shahrining Yunusobod tumanidagi Boʻzsuv qirgʻogʻida Mustamlakachilik davri qurbonlari xotira majmuasini barpo etish boʻyicha keng jamoatchilik fikrini toʻliq oʻrganish va tanlovlar asosida tayyorlangan takliflarni ikki oy muddatda Vazirlar Mahkamasiga kiritsin;

— viloyatlar, tuman va shaharlarda mustamlakachilik davri qurbonlari xotirasini abadiylashtirish maqsadida yodgorlik majmualarini barpo etish va boshqa qoʻshimcha tadbirlarni koʻzda tutuvchi dasturlarni ishlab chiqsin.

Qoraqalpogʻiston Respublikasi Vazirlar Kengashi va viloyatlar hokimliklari ushbu tadbirlarning oʻz hududlarida amalga oshirilishini taʼminlasin.

2. Mustamlakachilik davri qurbonlari xotirasini abadiylashtirish boʻyicha jamoatchilik komissiyasi huzurida “Shahidlar xotirasi” xayriya jamgʻarmasini tuzish toʻgʻrisidagi taklif inobatga olinsin.

“Shahidlar xotirasi” xayriya jamgʻarmasining vazirliklar, davlat qoʻmitalari, kompaniyalar, korporatsiyalar, banklar va boshqa muassasalardan iborat homiylar guruhi 2-ilovaga muvofiq maʼqullansin.

Jamgʻarmaning tarkibiy tuzilmasi 3-ilovaga muvofiq maʼqullansin va uning Nizomi belgilangan tartibda roʻyxatdan oʻtkazilsin.

Xalqaro tashkilotlar, ayrim fuqarolar va xorijiy shaxslarning xayriya ulushlari uchun jamgʻarma hisobi ochiq ekanligi eʼtiborga olinsin.

3. Quyidagilar “Shahidlar xotirasi” xayriya jamgʻarmasining asosiy vazifalari etib belgilanishi maʼlumot uchun qabul qilinsin:

— Mustamlakachilik davri qurbonlari xotirasini abadiylashtirish boʻyicha jamoatchilik komissiyasi ishini tashkil etish va komissiya zimmasiga yuklangan vazifalarning bajarilishiga yordam berish;

— qatagʻon etilgan fidoyi vatandoshlarimizni nomma-nom aniqlash maqsadida jamoatchilik komissiyasi tomonidan mamlakatimiz hududlarida tuziladigan ilmiy-ishchi guruhlar faoliyatini qoʻllab-quvvatlash;

— shahid boʻlgan yurtdoshlarimiz nomini abadiy saqlash va kelgusi avlodlarga yetkazish maqsadida koʻp jildlik “Qatagʻon qurbonlari” xotira kitobini yaratish va nashr etishga koʻmaklashish;

— xorijdagi turli arxiv, muzey, kutubxona va boshqa ilmiy-maʼrifiy muassasalar, mutaxassislar bilan aloqalar oʻrnatish, hamkorlik qilish hamda vatandoshlarimiz hayoti, faoliyatiga oid chet ellardagi mavjud manbalarni izlab topish va oʻrganish maqsadida ilmiy ekspeditsiyalar tashkil etish;

— qonunda belgilangan tartibda ishlab chiqarish hamda tadbirkorlik faoliyatini amalga oshirish.

4. Oʻzbekiston Respublikasi Moliya vazirligi “Shahidlar xotirasi” xayriya jamgʻarmasi faoliyatini qoʻllab-quvvatlash uchun Vazirlar Mahkamasining zaxira jamgʻarmasidan 20 million soʻm ajratsin.

“Shahidlar xotirasi” xayriya jamgʻarmasi va uning tasarrufiga kiruvchi boʻlinmalar, korxonalar barcha turdagi davlat soliqlaridan, bojxona toʻlovi hamda davlat budjetiga oʻtkaziladigan boshqa toʻlovlardan besh yil muddatga ozod etilsin.

Homiylarning daromaddan toʻlaydigan soliq boʻyicha bazasi ularning jamgʻarmaga oʻtkazadigan pul mablagʻlari miqdoriga monand qisqartirilishi belgilab qoʻyilsin.

5. Toshkent shahar hokimligi bir oy muddatda “Shahidlar xotirasi” xayriya jamgʻarmasini Toshkent shahar Navoiy koʻchasidagi 69-uy (Oʻzbekiston Fanlar akademiyasining sobiq Qoʻlyozmalar instituti binosi)ga joylashtirsin.

6. Oʻzbekiston pochta va telekommunikatsiyalar agentligiga “Shahidlar xotirasi” xayriya jamgʻarmasi boshqaruvini shahar va hukumat telefon aloqasi bilan taʼminlash topshirilsin.

7. “Shahidlar xotirasi” xayriya jamgʻarmasi “Adolat” va “Maʼnaviyat” nashriyotlarida “Istiqlol fidoyilari” turkumida mustamlakachilik davri qurbonlarining ilmiy-ijodiy merosi, ular haqidagi tadqiqotlar, Vatanimiz ozodligi yoʻlida jon fido qilgan insonlarning ibratli hayotidan hikoya qiluvchi xotiralar, yodnomalar, shuningdek targʻibiy-tashviqiy adabiyotlar va koʻrgazmali vositalarni muntazam chop etishni yoʻlga qoʻysin.

8. Oʻzbekiston Respublikasi Milliy xavfsizlik xizmati, Respublika Prokuraturasi, Ichki ishlar vazirligi, Mudofaa vazirligi, Fanlar akademiyasi, Prezident devoni arxivi va Bosh arxiv boshqarmasi Mustamlakachilik davri qurbonlari xotirasini abadiylashtirish jamoatchilik komissiyasi hamda “Shahidlar xotirasi” xayriya jamgʻarmasi soʻrovlariga binoan, zarur arxiv hujjatlaridan foydalanish uchun tegishli sharoitlar yaratsin.

9. “Oʻzteleradio” kompaniyasiga “Unutmas meni Vatan” nomli maxsus ijodiy guruh tashkil etib, mustamlakachilik davri qurbonlarining xotirasini abadiylashtirishga oid amalga oshirilayotgan ishlarni muntazam yoritib borish topshirilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H. Karomatov zimmasiga yuklansin.

1. Xalq taʼlimi vazirligi

2. Oliy va oʻrta maxsus taʼlim vazirligi

3. Madaniyat ishlari vazirligi

4. Mudofaa vazirligi

5. Ichki ishlar vazirligi

6. Tashqi iqtisodiy aloqalar vazirligi

7. Tashqi iqtisodiy faoliyat milliy banki

8. Oʻzbekiston Respublikasi Markaziy banki

9. Davlat matbuot qoʻmitasi

10. “Oʻzteleradio” kompaniyasi

11. Fan va texnika davlat qoʻmitasi

12. Fanlar akademiyasi

13. Badiiy akademiya

14. Oʻzbekiston Kasaba uyushmalari Federatsiyasi

15. Oʻzbekiston Respublikasi Prezidenti huzuridagi Davlat va jamiyat qurilishi akademiyasi

16. “Oʻzbekkino” davlat-aksiyadorlik kompaniyasi

17. “Oʻzbekiston havo yoʻllari” milliy aviakompaniyasi

18. “Oʻzbekturizm” milliy kompaniyasi

19. “Sharq” nashriyot-matbaa konserni

20. “Maʼnaviyat va maʼrifat” jamoatchilik markazi

21. “Oltin meros” jamgʻarmasi

22. “Mahalla” jamgʻarmasi

23. “Navroʻz” jamgʻarmasi

24. “Kamolot” jamgʻarmasi

25. “Vatanparvar” jamiyati

26. Ommaviy axborot vositalarini demokratlashtirish va qoʻllab-quvvatlash jamgʻarmasi

27. “Alp Jamol” tijorat korporatsiyasi