Oʻzbekiston Respublikasi Prezidentining 1992-yil 28-fevraldagi “Harbiy tribunallar va harbiy prokuratura organlari toʻgʻrisida”gi Farmoniga muvofiq hamda harbiy prokuraturalar va harbiy sudlarni tajribali va malakali kadrlar bilan toʻldirishni taʼminlash maqsadida Vazirlar Mahkamasi qaror qiladi:

1. Belgilab qoʻyilsinki, oliy yuridik maʼlumotli va zaxiradagi zobitlar boʻlgan yoxud zaxiradagi zobit unvoni boʻlmagan yurist fuqarolar harbiy xizmatga chaqirilganda “Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonunining 19-moddasiga muvofiq, ularning oliy va oʻrta maxsus oʻquv yurtida oʻqish, milliy xavfsizlik xizmati va ichki ishlar organlarida xizmat qilish, shuningdek sud organlari, prokuratura, adliya, davlat va boshqa organlardagi huquqni himoya qilish faoliyati bilan bogʻliq boʻlgan uzluksiz ish davri harbiy xizmat muddatiga qoʻshib hisoblanadi.

2. Oʻzbekiston Respublikasi Mudofaa vaziriga Oʻzbekiston Respublikasi Bosh prokurori, adliya vaziri, Oliy sudining raisi bilan kelishgan holda xodimlar harbiy prokuraturalar, harbiy sudlar uchun haqiqiy harbiy xizmatga chaqirilganda ularga navbatdagi harbiy unvondan bir pogʻona yuqori, rahbar lavozimlarga tayinlanadigan shaxslarga esa — shtatda nazarda tutilganidan kamida ikki pogʻona yuqori boʻlgan harbiy unvon berish topshirilsin.

3. Oʻzbekiston Respublikasi Mudofaa vaziriga “Umumiy harbiy majburiyat va harbiy xizmat toʻgʻrisida”gi Qonunning 22-moddasi 2-bandiga muvofiq yuqori kasb malakasiga, amaliy ish tajribasiga ega boʻlgan, belgilangan yoshdan katta yoshdagi, lekin qonunda belgilanganidan 5 yoshdan ortiq katta yoshda boʻlmagan, fuqarolarni harbiy prokuratura organlari va harbiy sudlarga haqiqiy harbiy xizmatga chaqirish masalasini hal etishga ruxsat berilsin.

4. Mazkur qarorning 2 va 3-bandlari harbiy prokuratura organlari va harbiy sudlarni kadrlar bilan toʻldirish davrida — 1993-yil 1-dekabrgacha amal qiladi deb hisoblansin.

5. Qarorning bajarilishini nazorat qilish Oʻzbekiston Respublikasi Bosh prokurori, adliya vaziri, Oliy sud raisi, Mudofaa vaziri zimmasiga yuklatilsin.