O‘zbekiston Respublikasi Prezidentining “O‘zbekiston Respublikasida yuridik ta’lim va fanni tubdan takomillashtirish bo‘yicha qo‘shimcha chora-tadbirlar to‘g‘risida” 2020-yil 29-apreldagi PF-5987-son hamda “Davlat huquqiy siyosatini amalga oshirishda adliya organlari va muassasalari faoliyatini yanada takomillashtirish chora-tadbirlari to‘g‘risida” 2020-yil 19-maydagi PF-5997-son farmonlari ijrosi yuzasidan, shuningdek, xalqaro standartlarni hisobga olgan holda adliya organlari va muassasalari xodimlari, advokatlar, notariuslar, yuriskonsultlar, patent vakillari, mediatorlar hamda boshqa soha mutaxassislarini (keyingi o‘rinlarda — yuridik sohaga oid bilim talab etiladigan mutaxassislar) qayta tayyorlash va malakasini oshirish tizimini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Adliya vazirligining yuridik sohaga oid bilim talab etiladigan mutaxassislarni qayta tayyorlash va malakasini oshirishning zamonaviy tizimini joriy etish hamda Adliya vazirligi qoshidagi Yuristlar malakasini oshirish markazining (keyingi o‘rinlarda — Markaz) yuridik shaxs tashkil etmagan holda Qoraqalpog‘iston Respublikasi hamda viloyatlarda hududiy filiallarini (keyingi o‘rinlarda — filiallar) tashkil etish to‘g‘risidagi taklifi ma’qullansin.

2. Quyidagilar yuridik sohaga oid bilim talab etiladigan mutaxassislarni qayta tayyorlash va malakasini oshirish tizimining ustuvor vazifalari etib belgilansin:

kasbiy ehtiyojlardan kelib chiqqan holda kadrlar buyurtmachilari va xodimlariga malaka oshirish shakllarini mustaqil tanlash imkoniyatini yaratish;

an’anaviy malaka oshirish bilan bir qatorda kasbiy o‘qitishning uyg‘unlashgan, ish jarayoni bilan birgalikda olib boriladigan shakllarini, shuningdek, kadrlar malakasini oshirishning belgilangan davriyligiga rioya qilingan holda ta’lim dasturlarini, bilim va ko‘nikmalarni doimiy takomillashtirishdan iborat kredit-modul mexanizmini joriy qilish;

kadrlarni uzluksiz kasbiy rivojlantirish tizimi faoliyatini tashkil qilish, har bir xodimning individual trayektoriyalari bo‘yicha malaka oshirish jarayonlarini monitoring qiluvchi yagona ma’lumotlar bazasi — elektron platformani yaratish va amaliyotga joriy etish;

ta’lim jarayonini raqamli texnologiyalar asosida individuallashtirish, axborot texnologiyalari imkoniyatlaridan foydalanish darajasini oshirish, zamonaviy ta’lim texnologiyalarini qo‘llash orqali kadrlarni qayta tayyorlash va malakasini oshirish borasida masofaviy ta’limni yanada takomillashtirish va mustaqil ta’lim olish uchun qulay shart-sharoitlar yaratish;

xo‘jalik birlashmalari va boshqa tashkilotlarning mehnat bozorida huquqiy bilimlarini oshirish talab qilinadigan o‘zga soha mutaxassislari malakasini oshirishga qaratilgan qisqa muddatli o‘quv kurslarini tashkil etish;

adliya organlari va muassasalaridagi rahbarlik lavozimlariga zaxiraga olingan kadrlar malakasini oshirishning modullashtirilgan ta’lim dasturlari asosida maxsus kurslardan o‘tish amaliyotini joriy etish.

Qayta tayyorlash va malaka oshirish, shu jumladan, qisqa muddatli malaka oshirish kurslarini tashkil etish, qayta tayyorlash va malaka oshirish shakllari, kredit-modul tizimi va masofaviy ta’lim bo‘yicha malaka oshirishni tashkil etish, shuningdek, qayta tayyorlash va malaka oshirish kurslari tinglovchilarining huquq va majburiyatlarini nazarda tutuvchi O‘zbekiston Respublikasi Adliya vazirligi qoshidagi Yuristlar malakasini oshirish markazida qayta tayyorlash va malaka oshirish tartibi to‘g‘risidagi nizom 1-ilovaga muvofiq tasdiqlansin.

4. Belgilansinki:

filiallar O‘zbekiston Respublikasi Adliya vazirligining yuridik texnikumlari (keyingi o‘rinlarda — yuridik texnikumlar) binolarida joylashtiriladi;

filiallar tuzilmasi va ularning nizomi Adliya vazirligi tomonidan tasdiqlanadi;

yuridik texnikumlar filiallar faoliyat olib borishi uchun zarur shart-sharoitlar yaratib berish, o‘quv-metodik jarayonni tashkil qilishda axborot-resurslari orqali ko‘maklashish uchun mas’ul hisoblanadi;

o‘qitish davomiyligi qayta tayyorlash kurslarida to‘rt oy (576 soat)ni, malaka oshirish kurslarida esa ikki hafta (72 soat)ni tashkil etadi;

Markazda yuridik sohaga oid bilim talab etiladigan mutaxassislarni qayta tayyorlash va ularning malakasini oshirishga qo‘yiladigan kasbiy malaka talablari Adliya vazirligi tomonidan tasdiqlanadi;

Markaz va uning filiallarida o‘quv mashg‘ulotlari o‘tkazish uchun jalb qilinadigan mutaxassislar mehnatiga Markazni rivojlantirish jamg‘armasi mablag‘lari hisobidan soatbay haq to‘lash tartibi asosida haq to‘lanadi, bunda Markazga belgilangan miqdorni 200 foizgacha oshirish huquqi beriladi;

Markazga Markazni rivojlantirish jamg‘armasi mablag‘larining hamda shartnoma asosida ishlarni bajarish va xizmat ko‘rsatishdan tushadigan boshqa mablag‘larning (ularni amalga oshirish uchun xarajatlarini chegirib tashlagan holda) 80 foizgacha qismini Markaz va uning hududiy filiallari xodimlarini ijtimoiy himoya qilish va moddiy rag‘batlantirish tadbirlariga yo‘naltirish huquqi beriladi.

filiallar faoliyatini tashkil qilishni moliyalashtirish, moddiy-texnik jihatdan ta’minlash hamda xodimlari mehnatiga haq to‘lash Markazni rivojlantirish jamg‘armasi mablag‘lari hisobidan amalga oshiriladi.

5. O‘zbekiston Respublikasi Adliya vazirligi:

a) ikki oy muddatda:

Markazning professor-o‘qituvchilari va boshqa xodimlarini belgilangan tartibda attestatsiyadan o‘tkazish orqali yuqori malakali, ta’lim berishning zamonaviy shakl va uslublarini, shuningdek, axborot-kommunikatsiya texnologiyalaridan foydalanish ko‘nikmalarini puxta egallagan, ilmiy salohiyat va amaliy ish tajribasiga ega bo‘lgan, halol, tartib-intizomli pedagog kadrlar bilan to‘ldirilishini ta’minlasin.

Bunda pedagog xodimlar tarkibining Markazda qayta tayyorlash va malaka oshirish kurslarida o‘qishi belgilangan, soha yo‘nalishlarida yuqori amaliy ish tajribasiga ega bo‘lgan amaliyotchi xodimlar tarkibidan tanlov asosida shakllantirilishiga alohida e’tibor qaratilsin;

b) uch oy muddatda Axborot texnologiyalari va kommunikatsiyalarini rivojlantirish vazirligi, Advokatlar palatasi, Notarial palata hamda manfaatdor tashkilotlar bilan birgalikda:

kadrlarni uzluksiz kasbiy rivojlantirish tizimi faoliyatini tashkil qilish va har bir xodimning malaka oshirish jarayonlarini monitoring qiluvchi yagona ma’lumotlar bazasi — elektron platformani ishlab chiqsin;

yuridik texnikumlarda filiallar ochilishini va zamon talablari asosida ta’mirlanishi hamda eng zamonaviy o‘quv-texnika vositalari bilan jihozlanishini, xususan videokonferensaloqa tizimi bilan jihozlangan lokal va hududiy auditoriyalar tarmog‘i yaratilishini ta’minlasin;

Markazda malaka oshirish kursi bitiruvchilariga elektron sertifikatlar berish amaliyotini joriy etish maqsadida noyob identifikatsiya raqami va QR-kod hamda himoya elementlarini nazarda tutuvchi “Elektron sertifikatlar repozitoriysi” tizimi va dasturiy ta’minotini yaratish choralarini ko‘rsin.

Bu borada belgilangan tadbirlar Markazning budjetdan tashqari mablag‘lari hisobidan moliyalashtiriladi.

6. Davlat boshqaruvi organlari va xo‘jalik birlashmalari zaruratga qarab, o‘z kadrlarining huquqiy bilimlarini oshirish uchun doimiy ravishda tegishli mutaxassislarini Markazga yo‘naltirib borsin.

7. O‘zbekiston Respublikasi Hukumatining 3-ilovaga muvofiq ayrim qarorlariga o‘zgartirish va qo‘shimchalar kiritilsin.

8. O‘zbekiston Respublikasi Adliya vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Mazkur qarorning bajarilishini nazorat qilish O‘zbekiston Respublikasi adliya vaziri R.Q. Davletov zimmasiga yuklansin.

1. Ushbu Nizom O‘zbekiston Respublikasi Adliya vazirligi qoshidagi Yuristlar malakasini oshirish markazida (keyingi o‘rinlarda — Markaz), uning hududiy filiallarida hamda buyurtmachi tashkilotlarda adliya organlari va muassasalari xodimlari, advokatlar, notariuslar, yuriskonsultlar, patent vakillari, mediatorlar hamda boshqa soha mutaxassislarini qayta tayyorlash va malakasini oshirish tartibini belgilaydi.

2. Mazkur Nizomda quyidagi asosiy tushunchalar qo‘llaniladi:

qayta tayyorlash — davlat va jamiyat qurilishi sohasini yanada demokratlashtirish jarayonlari, shuningdek, davlat hokimiyati va boshqaruvi sohasida xalqaro standartlar va talablarni hisobga olgan holda ishlab chiqilgan o‘quv dasturlari asosida zarur bilim, ko‘nikma va malakalarni o‘zlashtirish orqali yangi kasbiy faoliyatga yo‘naltirishga qaratilgan o‘qitish shakli;

malaka oshirish — tegishli o‘quv dasturlari talablaridan kelib chiqqan holda, yuridik sohaga oid bilim talab etiladigan mutaxassislarning malaka va ko‘nikmalarini muntazam ravishda yangilab borish orqali ularning kasbiy mahorati oshirilishini ta’minlashga qaratilgan o‘qitish shakli;

o‘quv dasturi — o‘quv kursining ta’lim mazmunini, uning tinglovchilar tomonidan o‘zlashtirilishining maqsadga muvofiq usullarini tashkil etishni nazarda tutadigan, axborot manbai bo‘lgan, mutaxassisliklarning kasbiy malaka talablari, o‘quv kursining asosiy mazmuni va metodik tuzilishini aniqlab beruvchi asosiy hujjat;

o‘quv rejasi — bloklar va o‘quv fanlarining nomlarini, ularni o‘zlashtirish uchun ajratilgan soatlar hajmini hamda tinglovchilarning bilimlarini nazorat qilish shakllarini belgilab beruvchi asosiy hujjat;

kasbiy malaka talablari — tinglovchilarning umumiy bilim va kasb tayyorgarligi darajasiga qo‘yiladigan talablar majmui;

pedagog maslahatchi — ta’lim jarayonida tegishli o‘quv kursi (moduli) bo‘yicha tinglovchilar faoliyatini muvofiqlashtiruvchi va yo‘naltiruvchi, metodik yordam ko‘rsatuvchi, o‘qish va bilish nazoratini amalga oshiruvchi subyekt;

buyurtmachi tashkilot — Markazda kadrlarini qayta tayyorlash va ularning malakasini oshirish istagini bildirgan tashkilot.

3. Markazda tashkil etiladigan o‘quv kurslari (qisqa muddatli kurslar bundan mustasno) buyurtmachi tashkilotlar bilan kelishilgan holda ishlab chiqilgan va Markaz direktori tomonidan tasdiqlanadigan o‘quv dasturlari asosida amalga oshiriladi.

4. Qayta tayyorlash va malaka oshirish kurslarida o‘qish tinglovchining asosiy ish joyidan ajralgan yoki ajralmagan holda amalga oshiriladi.

Markazda tashkil etiladigan kurslarda auditoriya o‘quv yuklamasining eng ko‘p hajmi haftasiga 36 soat etib belgilanadi.

5. Qayta tayyorlash va malaka oshirish kurslarida o‘quv jarayoni, qoidaga ko‘ra, 25 nafardan ortiq bo‘lmagan tinglovchilardan iborat akademik guruhlarda tashkil qilinadi.

Bunda auditoriya mashg‘ulotlarining barcha turlari 80 daqiqa davom etadi, o‘quv mashg‘ulotlari oralig‘idagi tanaffus kamida 10 daqiqani tashkil etadi.

6. Qayta tayyorlash kurslarida o‘quv jarayoni buyurtmachi tashkilotlar bilan kelishilgan holda, Markaz tomonidan ishlab chiqilgan va O‘zbekiston Respublikasi Adliya vazirligi tomonidan tasdiqlangan o‘quv rejasi va o‘quv dasturlari asosida tashkil etiladi hamda mashg‘ulotlar jadvali bo‘yicha olib boriladi.

7. Qayta tayyorlash kurslarida tinglovchilar Markaz bilan tuzilgan shartnomaga muvofiq, to‘lov asosida o‘qitiladi.

8. Buyurtmachi tashkilot qayta tayyorlash kurslarini tashkil etish uchun onlayn tarzda (Markazning rasmiy veb-sayti yoki maxsus elektron dasturlar orqali) yoki bevosita Markazga murojaat qiladi.

9. Qayta tayyorlash kurslariga tinglovchilar buyurtmachi tashkilotlarning taqdimnomasiga asosan Markaz direktorining buyrug‘i bilan qabul qilinadi.

10. Qayta tayyorlash kursi tinglovchisi tomonidan bitiruv malakaviy ishi tayyorlanishi va himoya qilinishi lozim.

Tinglovchilar bitiruv malakaviy ishlari mavzularini Markaz direktori tomonidan tasdiqlanadigan bitiruv malakaviy ishlari mavzulari ro‘yxatida ko‘rsatilgan mavzulardan birini tanlaydi. Tinglovchi bitiruv malakaviy ishi mavzusini ixtiyoriy tanlash huquqiga ega.

Tinglovchining bitiruv malakaviy ishi mavzusidan kelib chiqib, unga tegishliligi bo‘yicha Markaz kafedralarining professor-o‘qituvchilari yoki malakali amaliyot xodimlari yoxud boshqa mutaxassislar orasidan Markaz direktorining buyrug‘i bilan ilmiy rahbar biriktiriladi.

Tinglovchi bitiruv malakaviy ishini yakuniy nazorat o‘tkazilishidan kamida uch kun oldin ilmiy rahbar xulosasi bilan birga Markazda o‘quv jarayonini nazorat qiluvchi bo‘limga topshiradi.

11. Bitiruv malakaviy ishi himoyasini o‘tkazish uchun O‘zbekiston Respublikasi adliya vazirining buyrug‘i bilan Adliya vazirligi, Markaz va buyurtmachi tashkilotning yetakchi mutaxassislari orasidan besh kishidan iborat tarkibda yakuniy imtihon o‘tkazish bo‘yicha komissiya tuziladi.

Yakuniy imtihon o‘tkazish bo‘yicha komissiya tarkibiga oliy ta’lim muassasalari va ilmiy-tadqiqot institutlari vakillari ham jalb qilinishi mumkin.

12. Bitiruv malakaviy ishlari yakuniy imtihon o‘tkazish bo‘yicha komissiyada himoya qilinadi. Komissiyaga tinglovchilarning bitiruv malakaviy ishlari Markazning o‘quv jarayonini nazorat qiluvchi bo‘limi tomonidan taqdim etiladi.

13. Qayta tayyorlash kurslari tinglovchilari o‘quv rejasida belgilangan fanlardan (kurslardan) yakuniy sinov imtihonini topshiradilar va bitiruv malakaviy ishini himoya qiladilar.

Qayta tayyorlash kurslari tinglovchilarining bitiruv malakaviy ishini himoya qilishiga yakuniy sinov imtihonini topshirish natijalariga ko‘ra ruxsat beriladi.

Bitiruv malakaviy ishini rasmiylashtirish va baholashga qo‘yiladigan talablar Markaz tomonidan belgilanadi.

14. Qayta tayyorlash kursini tamomlagan, yakuniy sinov imtihonlarini muvaffaqiyatli topshirgan va bitiruv malakaviy ishini himoya qilgan tinglovchilarga mazkur Nizomga 1-ilovada belgilangan namunadagi diplom beriladi.

Qayta tayyorlashga ikkinchi oliy ta’limni olish sifatida qaralmaydi. Qayta tayyorlash natijasida beriladigan hujjat (diplom) faqat muayyan lavozimda faoliyat ko‘rsatish huquqini beradi.

15. Malaka oshirish kurslarida o‘qish vaqti va muddati Markaz bilan kelishilgan holda tayyorlanadigan hamda tegishliligi bo‘yicha buyurtmachi tashkilotlar tomonidan tasdiqlanadigan ta’lim oluvchilarning malaka oshirish kurslaridan o‘tish vaqti, shakli va yo‘nalishi ko‘rsatilgan taqsimot-rejalarga muvofiq belgilanadi.

16. Taqsimot-rejalar yarim yil uchun tuziladi va buyurtmachi tashkilotlar tomonidan har yili iyun va dekabr oyining 15 sanasiga qadar tasdiqlanadi hamda Markazga yetkaziladi.

Taqsimot-rejalarda xodimning malaka oshirish kurslaridan o‘tish shakli ko‘rsatiladi.

17. Buyurtmachi tashkilotlar taqsimot-rejalarga asosan o‘qishi belgilangan xodimlarini malaka oshirish kurslarida qatnashishlarini ta’minlaydi.

18. Malaka oshirish kurslariga tinglovchilarni qabul qilish Markaz direktorining buyrug‘iga asosan o‘quv kurslari boshlangan kunning o‘zida rasmiylashtiriladi.

Markaz tinglovchilarni malaka oshirish kurslariga o‘z vaqtida kelmaganligi yoki qatnashmaganligi haqida buyurtmachi tashkilotlarga xabar beradi.

Malaka oshirish kurslariga uzrli sabablarga ko‘ra o‘z vaqtida kelmagan tinglovchilarga o‘qishning tegishli yo‘nalishi bo‘yicha navbatdagi malaka oshirish kurslarida o‘qishga ruxsat beriladi.

19. Malaka oshirish kurslarida o‘quv jarayoni Markaz direktori tomonidan tasdiqlanadigan mashg‘ulotlar jadvali bo‘yicha olib boriladi.

20. Malaka oshirish jarayonlari quyidagi shakllarni o‘z ichiga oladi:

Markaz va uning filiallarida o‘qitish;

mutaxassislik bo‘yicha xodimning ish joyida o‘qitish;

kredit-modul tizimi asosida o‘qitish;

masofaviy ta’lim.

21. Markaz va uning filiallarida o‘qitish tegishli ixtisoslik yo‘nalishlari bo‘yicha ishlab chiqilgan o‘quv dasturlarini o‘zlashtirishdan iborat.

Markazda va uning filiallarida o‘qitish 1+3, 2+2 yoki 3+1 sxemalari bo‘yicha (tegishli ravishda 25, 50 yoki 75 % — mustaqil ravishda bilim orttirish, 75, 50 yoki 25 % — bevosita Markaz yoki uning filiallarida) masofaviy ta’lim yoki manfaatdor tashkilotlar bazasida yakka tartibdagi topshiriqlarni bajarish shaklida tashkil etilishi mumkin.

O‘qitishning bunday shakllari axborot uzatishning zamonaviy axborot-kommunikatsiya vositalarini qo‘llash imkoniyati mavjud bo‘lgan taqdirda qo‘llaniladi.

22. Mutaxassislik bo‘yicha xodimning ish joyida o‘qitish tinglovchining ishdan ajralmagan holda xizmat joyiga Markaz tomonidan mutaxassislarni jalb etgan holda, tegishli o‘quv dasturlarini o‘zlashtirishdan iborat.

Mutaxassislik bo‘yicha xodimning ish joyida o‘qitish buyurtmachi tashkilotlar bilan kelishilgan holda, Markaz direktori tomonidan tasdiqlanadigan malaka oshirishning yakka tartibdagi rejasi asosida amalga oshiriladi.

Malaka oshirishning yakka tartibdagi rejasida xodim tomonidan o‘quv dasturida belgilangan mavzularni (modullarni) mustaqil o‘zlashtirish tartibi, mutaxassislarni jalb qilish hamda yakuniy sinov imtihonini topshirish shakli va muddatlari ko‘rsatiladi.

Xodim tomonidan o‘quv dasturida belgilangan mavzularni (modullarni) o‘zlashtirish uchun ko‘pi bilan bir oy muddat belgilanishi mumkin.

Malaka oshirishning mazkur shakli bo‘yicha o‘quv jarayoni guruhlarning to‘ldirilishiga bog‘liq holda tinglovchilar soni kamida o‘n nafar bo‘lgan guruhlarda tashkil etiladi.

23. Kredit-modul tizimi asosida malaka oshirish tegishli o‘quv dasturini mustaqil o‘zlashtirishni o‘z ichiga oladi.

Kredit-modul tizimi bo‘yicha malaka oshirish mutaxassis kadrlar malakasini oshirishning belgilangan davriyligiga rioya qilingan holda o‘quv dasturi modullarini uzluksiz, mustaqil ravishda o‘zlashtirib borishni nazarda tutadi.

Markaz direktori o‘quv dasturining har bir moduli bo‘yicha modul rahbarini, ya’ni alohida modulni o‘qitishning sifati, o‘quv materialini shakllantirish, shuningdek, barcha turdagi nazorat savollarini tuzish, tinglovchilar bilimini tekshirishda yagona standartlarni ta’minlashga mas’ul bo‘lgan pedagog xodimni belgilaydi. Modullar bo‘yicha tinglovchilar bilimini yil davomida baholab borish nazorat jadvallari va baholash mezonlari asosida amalga oshiriladi.

Modulning o‘quv dasturi mazmunini o‘zlashtirish kreditni — tinglovchilarning o‘quv yuklama hajmini aniqlashning shartli birligini qo‘llagan holda belgilanadi. Kredit tinglovchi tomonidan tegishli o‘quv ishlarini (modul xususiyati va mutaxassislarning malaka va ko‘nikmalarini muntazam ravishda yangilab borish uchun o‘quv ishlarining muhimligidan kelib chiqib Markaz tomonidan belgilanadigan) bajarishga ketadigan vaqtdan (soatlardan) tashkil topadi. Har bir modul mustaqil kredit hisobiga ega bo‘ladi.

O‘quv kurslari bo‘yicha bir kredit tarkibi va o‘qish davrini tamomlash uchun tinglovchi tomonidan to‘planishi lozim bo‘lgan kreditlarning umumiy soni hamda mazkur shakl bo‘yicha malaka oshirishning tartibi O‘zbekiston Respublikasi Adliya vazirligi tomonidan belgilanadi.

24. Kredit-modul tizimi bo‘yicha malaka oshirishda tegishli kredit ballarni yig‘ish uchun quyidagilar ham hisobga olinadi:

joriy davrda ilmiy maqolalar chop etish, monografiya, darslik va o‘quv qo‘llanma nashr ettirish;

malaka oshirishning belgilangan davriyligi davomida falsafa doktori (PhD) yoki fan doktori (DSc) ilmiy darajalariga ega bo‘lish.

Xodim mos ravishda falsafa doktori (PhD) ilmiy darajasiga ega bo‘lganda, malaka oshirish uchun belgilangan umumiy kredit ballni to‘plashdan ozod qilinib, to‘g‘ridan-to‘g‘ri yakuniy sinov imtihonini topshirishga ruxsat beriladi, fan doktori (DSc) ilmiy darajasiga ega bo‘lganda esa, xodim besh yil muddatga malaka oshirish kurslarini o‘tishdan ozod qilinadi.

Kredit-modul tizimi bo‘yicha malaka oshirish uchun jalb qilingan xodim so‘nggi uch yildagi ma’lumotlar elektron portfolio tizimiga shaxsan o‘zi tomonidan kiritiladi va ko‘rsatkichlar elektron monitoring tizimi orqali qayd etib boriladi.

25. Masofaviy ta’lim tegishli soha mutaxassislarining kasbiy ehtiyojlaridan kelib chiqqan holda ishlab chiqilgan va masofadan o‘qitishni amalga oshirishga mo‘ljallangan maxsus ta’lim dasturlari orqali onlayn hamda oflayn tarzda amalga oshiriladi.

26. Malaka oshirish kurslari o‘quv dasturiga muvofiq belgilangan mavzular (modullar) bo‘yicha yakuniy suhbat imtihonini topshirish bilan yakunlanadi.

27. Malaka oshirish kursi bo‘yicha yakuniy suhbat imtihonidan muvaffaqiyatli o‘tgan tinglovchilarga ushbu Nizomga 2-ilovada belgilangan namunadagi sertifikat beriladi. Malaka oshirish sertifikati elektron shaklda ham rasmiylashtirilishi mumkin.

Sinov imtihonini topshirmagan (suhbatdan o‘tmagan) tinglovchiga sertifikat berilmaydi. Bu holda tinglovchiga malaka oshirish kursida qatnashganligi to‘g‘risida ma’lumotnoma beriladi.

28. Markaz davlat boshqaruvi organi, xo‘jalik birlashmasi va boshqa tashkilotlar o‘zga soha mutaxassislarining huquqiy bilimlarini va ularning kasbiy mahoratini oshirishga ko‘maklashish maqsadida qisqa muddatli malaka oshirish kurslarini tashkil etishi mumkin.

29. Qisqa muddatli malaka oshirish kurslari Markaz tomonidan mustaqil ravishda yoki buyurtmachi tashkilotlar bilan kelishilgan holda tasdiqlanadigan o‘quv dasturlariga muvofiq ixtiyoriy tashkil etiladi.

Bunda o‘quv kurslarining davomiyligi, o‘quv yuklamasining hajmi, o‘qitish shakllari hamda o‘quv kurslari yakunlari bo‘yicha qabul qilinadigan sinov Markaz tomonidan buyurtmachi tashkilotlar bilan kelishilgan holda belgilanadi.

Markaz o‘qitish yo‘nalishlari bo‘yicha buyurtmachi tashkilotlar bilan hamkorlikda qisqa muddatli malaka oshirish kurslarining tinglovchilar guruhini shakllantiradi. Tinglovchilarni o‘quv kurslariga qabul qilish buyurtmachi tashkilotlar yoki xodim (fuqaro) tomonidan to‘g‘ridan-to‘g‘ri bildirgan takliflar asosida Markaz direktorining buyrug‘i bilan amalga oshiriladi.

Qisqa muddatli malaka oshirish kurslarida o‘qish pulli shartnoma asosida tashkil etiladi.

30. Qisqa muddatli o‘quv kurslarida o‘qigan tinglovchilarga o‘quv kursining nomi va hajmi ko‘rsatilgan holda, malaka oshirish kurslarini yakunlaganlik uchun taqdim etiladigan namunadagi sertifikat rasmiylashtiriladi.

31. Masofaviy ta’limning davomiyligi Markazda o‘qishning tegishli kursi akademik soatlarida belgilanadi, bunda kalendar muddatlari akademik muddatlardan ortiq bo‘lishi mumkin.

32. Onlayn shaklidagi masofadan o‘qitish usuli tinglovchi va professor-o‘qituvchilar o‘rtasida o‘zaro aloqani ta’minlash uchun maxsus jihozlangan o‘quv xonalarida real vaqt rejimida amalga oshiriladi.

Xodimlarning masofaviy ta’lim olish uchun belgilangan o‘qish joylariga yetib kelishi buyurtmachi tashkilotlar tomonidan ta’minlanadi.

33. Masofaviy ta’lim kurslari boshlanishidan uch kun oldin tinglovchilarga Markaz tomonidan elektron login va parol beriladi.

34. Tinglovchilar o‘ziga berilgan login va parol yordamida Markazning rasmiy veb-saytidagi “Masofaviy kurslar” bo‘limiga kiradi va unda o‘zining shaxsiy kabinetiga ega bo‘ladi.

35. Tinglovchiga berilgan login va parolni hamda shaxsiy kabinetini boshqa shaxslarga foydalanish uchun berish taqiqlanadi.

36. Masofaviy ta’lim davomida tinglovchilar kurslarni tashkil etish va o‘tkazish rejasiga, o‘qish davomiyligi (kelishuv asosida)ga amal qilishi, shuningdek onlayn va offlayn rejimidagi ta’lim jarayonida shaxsan o‘zi ishtirok etishi talab etiladi.

37. Masofaviy ta’lim shakli bo‘yicha o‘qitish jarayonida tinglovchilar faoliyati, ta’lim jarayonini muvofiqlashtirish va yo‘naltirish Markaz direktorining buyrug‘i bilan biriktiriladigan pedagog maslahatchi tomonidan amalga oshiriladi.

38. Tinglovchilar bilan doimiy aloqa bog‘lash, tinglovchilarga zarur metodik yordam berish, yakka tartibdagi mashg‘ulotni bajarish yuzasidan nazoratni amalga oshirish va tinglovchilar bilimlarini baholash pedagog maslahatchining vazifalariga kiradi. Pedagog maslahatchi yakka tartibdagi topshiriqning tinglovchi tomonidan bajarilishi xolisona baholanishi uchun javob beradi.

Pedagog maslahatchi bilan aloqa elektron pochta, telefon va boshqa elektron aloqa vositalari yordamida amalga oshiriladi. Shuningdek, pedagog maslahatchi bilan aloqa sessiyalar (bevosita yuzma-yuz muloqot) tarzida ham amalga oshirilishi mumkin.

39. Masofaviy ta’lim kurslari bo‘yicha yakuniy sinov imtihoni (suhbat) offlayn shaklida test topshiriqlarini bajarish yoki onlayn shaklida real vaqt rejimida tashkil etilishi mumkin.

Yakuniy sinov imtihonini (suhbatni) qabul qilish shakli Markaz direktorining buyrug‘ida ko‘rsatiladi.

40. Tinglovchilar o‘quv mashg‘ulotlari boshlashidan oldin Markazning ichki tartib-qoidalari bilan tanishtiriladi.

41. Tinglovchilar quyidagi huquqlarga ega:

o‘quv dasturida nazarda tutilgan bilimlarni egallash;

o‘quv jarayonini yanada yaxshilash, qayta tayyorlash va malaka oshirish tizimini takomillashtirish bo‘yicha Markaz rahbariyatiga takliflar kiritish;

ma’naviy-ma’rifiy va madaniy tadbirlarda qatnashish;

qayta tayyorlash va malaka oshirish bilan bog‘liq bo‘lgan qo‘shimcha ma’lumotlar va maslahatlar olish;

Markazning axborot-resurs markazi, o‘quv xonalari va kompyuter texnika vositalaridan foydalanish;

Markaz xodimlari xatti-harakatlari yuzasidan shikoyat qilish.

Tinglovchilar qonunchilik hujjatlariga muvofiq boshqa huquqlarga ham ega bo‘lishlari mumkin.

42. Tinglovchilar:

ta’lim dasturlari talablarini bajarishi;

o‘quv mashg‘ulotlariga o‘z vaqtida qatnashishi;

o‘quv dasturlarida nazarda tutilgan imtihon, test va yakuniy sinovni (imtihonlarni) topshirishi (suhbatdan o‘tishi);

o‘z nazariy bilimlarini, kasbiy ko‘nikmalari va mahorat darajasini oshirishi;

o‘quv jarayonida berilgan topshiriqlarni o‘z vaqtida bajarishi;

Markazga tegishli bo‘lgan mulklarni asrab-avaylash, Markaz ichki tartib-qoidalarga qat’iy rioya etishlari lozim.

Tinglovchilar qonunchilik hujjatlariga muvofiq boshqa majburiyatlarga ham ega bo‘lishlari mumkin.

43. Tinglovchi quyidagi holatlarda tinglovchilar safidan chiqariladi:

o‘z xohishiga binoan;

o‘quv intizomi va Markazning ichki tartib-qoidalarini muntazam ravishda yoki bir marotaba qo‘pol ravishda buzganda;

o‘quv mashg‘ulotlarini uzrli sabablarsiz o‘n olti akademik soatdan ortiq qoldirganda;

tinglovchiga berilgan login va parolni hamda shaxsiy kabinetini boshqa shaxslarga foydalanish uchun berganligi aniqlanganda;

shartnoma asosida o‘qitish bilan bog‘liq majburiyatlarni bajarmaganda;

salomatligi tufayli (tibbiy komissiya ma’lumotnomasi asosida);

sud tomonidan ozodlikdan mahrum etilganda;

vafot etganda.

44. Tinglovchi qayta tayyorlash yoki malaka oshirish kursi tinglovchilari safidan chiqarilganda, Markaz bu haqda uni o‘qishga yuborgan buyurtmachiga xabar beradi.

45. Diplom yoki sertifikatlarni yo‘qotgan yoki familiyasi, ismi va otasining ismi o‘zgargan shaxslarga yoxud diplom yoki sertifikat yaroqsiz holga kelgan, buzilgan hollarda qayta tayyorlash diplomi yoki malaka sertifikatining dublikati (keyingi o‘rinlarda — dublikat) beriladi. Bunda ushbu shaxslar Markaz direktoriga diplom yoki sertifikat yo‘qotish, buzilish yoxud familiyasi, ismi va otasining ismi o‘zgarish holati to‘liq bayon etilgan yozma ariza beradi.

Diplom yo‘qotilgan hollarda, arizaga hujjat yo‘qolganligi to‘g‘risida gazetada chop etilgan e’lon ilova qilinadi (e’londa yo‘qolgan diplomning berilgan yili, seriyasi va tartib raqami ko‘rsatilishi shart).

46. Dublikat murojaat qilingan sanadan boshlab o‘n besh kun muddat mobaynida beriladi.

47. Dublikatda hujjatlarning avvalgi qayd etilgan raqami, seriyasi, berilgan sanasi ko‘rsatiladi, yangi blankaning yuqoridagi o‘ng burchagiga “Dublikat” so‘zi yoziladi.

48. Yaroqsiz holatga kelgan, buzilgan va familiyasi, ismi yoki otasining ismi o‘zgartilgan diplom (sertifikat) Markazga qaytarilishi va qonunchilik hujjatlarida belgilangan tartibda yo‘q qilinishi lozim.

49. Ushbu Nizomni qo‘llashda yuzaga keladigan nizolar qonunchilik hujjatlarida belgilangan tartibda hal etiladi.

50. Mazkur Nizom talablarining buzilishida aybdor shaxslar qonunchilik hujjatlariga muvofiq javobgar bo‘ladilar.

Qayta tayyorlash to‘g‘risidagi diplom A4 formatli oq qog‘ozda ofset usulida, besh xil rangdan foydalangan holda: matn uchun — qora rangda, rasmlar tasviri uchun — yashil, ko‘k, qizil ranglarda, fon uchun — och pushti rangda bosib chiqariladi.

Varaqning chap qismida chetidan 10 mm chekingan holda, eni 32 mm bo‘lgan O‘zbekiston Respublikasi Davlat bayrog‘i tasvirlangan tasma joylashtiriladi. Tasmaning yuqori qismida diametri 30 mm bo‘lgan Davlat gerbi, past qismida esa — 35 mm o‘lchamli ikkita kvadrat qo‘shilishidan hosil bo‘lgan sakkiz qirrali yulduz, yulduzning o‘rtasida muhr uchun 25 mm diametrli oq aylana joylashgan.

Varaqning qolgan qismida yuqorida lotin yozuvi bilan davlat tilida “O‘ZBEKISTON RESPUBLIKASI” va “Qayta tayyorlash haqida DIPLOM” so‘zlari bosiladi. Diplom ikki lotin harfi — QT va olti raqamli sondan iborat tartib raqami bilan ta’minlangan. Barcha matn naqshli rastrdan iborat och pushti rang fonda bosib chiqariladi.

Diplom:

bosib chiqarishning ikki usuli — ofset va yuqori usuli;

yorug‘lik vositasida nusxa ko‘chirishni qiyinlashtirish uchun ochiq ranglar;

naqshli rastr;

har xil rangli rastrlardan foydalanish yo‘li bilan turli ranglarni tashkil etish;

maxsus qog‘ozlar;

o‘zgaradigan raqamlardan iborat tartib raqami qo‘llangan holda oltita himoyaga ega.

Malaka oshirish to‘g‘risidagi sertifikat A4 formatli oq qog‘ozda ofset usulida, besh xil rangdan foydalangan holda: matn uchun — qora rangda, rasmlar tasviri uchun — yashil, ko‘k, qizil ranglarda, fon uchun — och kul rangda bosib chiqariladi.

Varaqning chap qismida chetidan 10 mm chekingan holda, eni 32 mm bo‘lgan O‘zbekiston Respublikasi Davlat bayrog‘i tasvirlangan tasma joylashtiriladi. Tasmaning yuqori qismida diametri 30 mm bo‘lgan Davlat gerbi, past qismida esa — 35 mm o‘lchamli ikkita kvadrat qo‘shilishidan hosil bo‘lgan sakkiz qirrali yulduz, yulduzning o‘rtasida muhr uchun 25 mm diametrli oq aylana joylashgan.

Varaqning qolgan qismida yuqorida lotin yozuvi bilan davlat tilida “O‘ZBEKISTON RESPUBLIKASI” va “Malaka oshirish haqida SERTIFIKAT” so‘zlari bosiladi. Sertifikat ikki lotin harfi — MO va olti raqamli sondan iborat tartib raqami bilan ta’minlangan. Barcha matn naqshli rastrdan iborat och kul rang fonda bosib chiqariladi.

Sertifikat:

bosib chiqarishning ikki usuli — ofset va yuqori usuli;

yorug‘lik vositasida nusxa ko‘chirishni qiyinlashtirish uchun ochiq ranglar;

naqshli rastr;

har xil rangli rastrlardan foydalanish yo‘li bilan turli ranglarni tashkil etish;

maxsus qog‘ozlar;

o‘zgaradigan raqamlardan iborat tartib raqami qo‘llangan holda oltita himoyaga ega.

1. Vazirlar Mahkamasining 2007-yil 22-noyabrdagi 244-son qarori (O‘zbekiston Respublikasi QT, 2007-y., 11-son, 65-modda) bilan tasdiqlangan Yuridik xizmatlar xodimlarini attestatsiyadan o‘tkazish va ularning malakasini oshirish tartibi to‘g‘risidagi nizomning 35-bandida:

uchinchi xatboshi chiqarib tashlansin;

to‘rtinchi va beshinchi xatboshilar tegishli ravishda uchinchi va to‘rtinchi xatboshilar deb hisoblansin.

2. Vazirlar Mahkamasining 2019-yil 27-iyundagi 531-son qarori bilan tasdiqlangan O‘zbekiston Respublikasi Adliya vazirligi qoshidagi Yuristlar malakasini oshirish markazining ustavida:

a) 2-banddagi “Markaz adliya organlari hamda advokatura xodimlarini” so‘zlari “Markaz adliya organlari va muassasalari, advokatlar, notariuslar, FHDY organlari xodimlarini” so‘zlari bilan almashtirilsin;

b) 8-band quyidagi tahrirda bayon qilinsin:

“8. Adliya organlari va muassasalari, advokatlar, notariuslar, FHDY organlari va davlat boshqaruvi organlari, tashkiliy-huquqiy shaklidan qat’i nazar, boshqa tashkilotlarning yuridik xizmati xodimlari (yuriskonsultlari) hamda xo‘jalik birlashmalari va boshqa tashkilotlarning o‘zga soha mutaxassislarini qayta tayyorlash va ularning malakasini oshirish Markaz faoliyatining asosiy maqsadi hisoblanadi”;

v) 12-bandda:

quyidagi mazmundagi ikkinchi xatboshi qo‘shilsin:

“Markaz filiallari”;

ikkinchi — sakkizinchi xatboshilar tegishli ravishda uchinchi — to‘qqizinchi xatboshilar deb hisoblansin;

g) 16-bandning ikkinchi xatboshidagi “Markaz kafedralari,” so‘zlari “Markaz kafedralari va filiallari” so‘zlari bilan almashtirilsin;

d) 20-bandda:

oltinchi xatboshi chiqarib tashlansin;

yettinchi — o‘ninchi xatboshilar tegishli ravishda oltinchi — to‘qqizinchi xatboshilar deb hisoblansin;

sakkizinchi xatboshi chiqarib tashlansin;

to‘qqizinchi xatboshi sakkizinchi xatboshi deb hisoblansin;

e) 25-banddagi “davlat talablari” so‘zlari “davlat ta’lim talablari” so‘zlari bilan almashtirilsin;

j) 26-banddagi “davlat talablariga” so‘zlari “davlat ta’lim talablariga” so‘zlari bilan almashtirilsin;

z) 27-band o‘z kuchini yo‘qotgan deb hisoblansin;

i) 28-bandning birinchi xatboshidagi “O‘zbekiston Respublikasi Adliya vazirligi, Advokatlar palatasi” so‘zlari “buyurtmachi tashkilotlar” so‘zlari bilan almashtirilsin;

k) 30-bandning uchinchi xatboshidagi “advokatlar palatasining xodimi,” so‘zlari “Advokatlar palatasi, Notarial palataning xodimlari, boshqa buyurtmachi tashkilotlar hamda” so‘zlari bilan almashtirilsin;

l) 32-bandda:

ikkinchi xatboshi quyidagi tahrirda bayon qilinsin:

“O‘zbekiston Respublikasi Adliya vazirligi O‘zbekiston Respublikasi Moliya vazirligi bilan kelishilgan holda, tinglovchilarni o‘qitish xarajatlari hamda yuridik va jismoniy shaxslarga ko‘rsatiladigan xizmatlar uchun haq miqdorini mustaqil belgilaydi;

quyidagi mazmundagi xatboshi qo‘shilsin:

“Markaz va buyurtmachi tashkilotlar, advokatlar va boshqa toifadagi tinglovchilar bilan to‘lovni amalga oshirish to‘g‘risidagi to‘lov-shartnomalar elektron shaklda tuziladi va vakolatli shaxsning elektron raqamli imzosi bilan tasdiqlanadi”.

3. Vaziplap Mahkamasining 2020-yil 24-martdagi 180-son qarori bilan tasdiqlangan Nodavlat sud-ekspertiza tashkilotlari sud ekspertlarini qayta tayyorlash, malakasi va huquqiy bilimini oshirish tartibi to‘g‘risidagi nizomda:

a) 6-bandga quyidagi mazmundagi xatboshilar qo‘shilsin:

“Qayta tayyorlash jarayonlari quyidagilarni o‘z ichiga oladi:

davlat muassasalarida o‘qitish;

masofaviy ta’lim.

Davlat muassasalarida o‘qitish 1+3, 2+2 yoki 3+1 sxemalari bo‘yicha (tegishli ravishda 25, 50 yoki 75% — mustaqil ravishda bilim orttirish, 75, 50 yoki 25% — bevosita davlat muassasalarida) masofadan qayta tayyorlash yoki manfaatdor tashkilotlar bazasida yakka tartibdagi topshiriqlarni bajarish shaklida tashkil etilishi mumkin.

O‘qitishning bunday shakllari axborot uzatishning zamonaviy axborot-kommunikatsiya vositalari mavjud bo‘lgan taqdirda qo‘llaniladi.

Masofaviy ta’lim tegishli soha mutaxassislarining kasbiy ehtiyojlaridan kelib chiqqan holda ishlab chiqilgan va masofadan o‘qitishni amalga oshirishga mo‘ljallangan maxsus ta’lim dasturlari orqali onlayn hamda oflayn tarzda amalga oshiriladi”;

b) 17-band quyidagi tahrirda bayon qilinsin:

“17. Talabgor tegishli davlat muassasasiga onlayn tarzda yoki bevosita quyidagi hujjatlarni topshiradi:

davlat muassasasi rahbari nomiga ariza (arizada talabgorning muassasada ta’lim beriladigan tillardan birida ta’lim olish va imtihon topshirish hohlashi ko‘rsatiladi);

pasport nusxasi (pasportning asl nusxasi hujjat topshirishda ko‘rsatiladi);

ma’lumoti to‘g‘risidagi diplom nusxasi;

3,5x4,5 hajmdagi ikki dona fotosurat;

nodavlat sud-ekspertiza tashkiloti nomidan tavsiyanoma (agar shaxs nodavlat sud ekspertiza tashkilotida faoliyat ko‘rsatayotgan bo‘lsa);

mehnat daftarchasining ish joyida tasdiqlangan nusxasi yoxud undan ko‘chirma yoki ekspertlik faoliyati va turini tasdiqlovchi boshqa hujjat.

Bunda hujjatlarni onlayn tarzda topshirish davlat muassasasining rasmiy veb-saytida amalga oshiriladi”;

v) 22-bandning uchinchi xatboshi quyidagi tahrirda bayon qilinsin:

“Shartnoma tuzgan talabgorlar sonidan kelib chiqib, qoida tariqasida o‘n nafardan yigirma nafargacha tinglovchidan iborat akademik guruhlar shakllantiriladi”;

g) 22-bandga quyidagi mazmundagi xatboshilar qo‘shilsin:

“O‘quv jarayonini tashkil etish uchun zarur miqdordagi xarajatlarni to‘liq qoplash to‘g‘risida qo‘shimcha to‘lovlarni amalga oshirish bo‘yicha talabgorlar bilan kelishuvga erishilgan holatlarda, talabgorlar soni 10 (o‘n) nafarga yetmasa ham qayta tayyorlash guruhlari shakllantirilishi mumkin.

Masofadan o‘qitish usullari asosidagi kurslarda tinglovchilarning o‘zlashtirish ko‘rsatkichlari onlayn shaklida qayd etib boriladi va kurslarni to‘liq o‘zlashtirgan tinglovchilarga bevosita qayta tayyorlash, malaka va huquqiy bilimni oshirish bo‘yicha ta’lim muassasalarida o‘tkaziladigan onlayn test sinovlarida ishtirok etishga ruxsat beriladi.

Elektron portfolio ko‘rsatkichlari va onlayn test sinovlari natijalari asosida tinglovchilarga malakaviy ishini (referatni) himoya qilishga ruxsat beriladi”;

d) 26-band quyidagi tahrirda bayon qilinsin:

“O‘quv kursining har bir modul yoki bo‘lim yakunida tinglovchi tanlangan mavzu bo‘yicha malakaviy ishini (referatni) himoya qiladi va malakaviy ishi (referat) hajmi, himoya qilish, taqrizdan o‘tkazish tartibi o‘quv dasturida belgilanadi”;

e) 30-bandga quyidagi mazmundagi xatboshilar qo‘shilsin:

“Tinglovchilar, shuningdek, qayta tayyorlash kurslarini o‘tmasdan yakuniy imtihon topshiradigan talabgorlar ikki bosqichda — test (qog‘oz yoki elektron) hamda suhbat shaklida imtihon topshiradilar.

Test savollari bilan tanishib chiqish, javobni tanlash va imtihon testini to‘ldirish uchun 40 (qirq) daqiqadan ko‘p bo‘lmagan vaqt belgilanadi.

Joriy, oraliq nazorat va yakuniy attestatsiya (imtihon) o‘tkazish jarayonida talabgorga (tinglovchiga) normativ-huquqiy hujjatlardan, maxsus adabiyotlardan, aloqa vositalaridan, shuningdek, boshqa manbaalardan foydalanish, boshqa talabgorlar (tinglovchilar) bilan gaplashish taqiqlanadi”;

j) 41-band quyidagi tahrirda bayon qilinsin:

“41. Nodavlat sud-ekspertiza tashkilotlari sud ekspertlarini qayta tayyorlash va ularning malakasini oshirishga qo‘yiladigan davlat talablari (keyingi o‘rinlarda — Talablar) sud ekspertlarining qayta tayyorlash va malakasini oshirish bo‘yicha o‘quv dasturlari, ta’lim sifatini baholash va nazorat qilish bo‘yicha hujjatlarni davlat muassasasi tomonidan ishlab chiqish uchun asos hisoblanadi.

Sud ekspertlarini qayta tayyorlash, ularning malaka va huquqiy bilimini oshirish kurslari bo‘yicha o‘quv jarayonini tashkil etish, amaliyot o‘tash, natijalarini baholash va nazorat qilish tartiblari davlat muassasalarining kollegial organi tomonidan belgilanadi”;

z) 54-bandga quyidagi mazmundagi xatboshilar qo‘shilsin:

“Sud ekspertlarining malakasini va huquqiy bilimini oshirish jarayonlari quyidagilarni o‘z ichiga oladi:

Davlat muassasalarida o‘qitish;

masofaviy ta’lim.

Davlat muassasalarida o‘qitish 1+3, 2+2 yoki 3+1 sxemalari bo‘yicha (tegishli ravishda 25, 50 yoki 75% — yashash joyi bo‘yicha mustaqil ravishda bilim orttirish, 75, 50 yoki 25% — bevosita davlat muassasalarida) masofadan malaka oshirish yoki manfaatdor tashkilotlar bazasida yakka tartibdagi topshiriqlarni bajarish shaklida tashkil etilishi mumkin.

O‘qitishning bunday shakllari axborot uzatishning zamonaviy axborot-kommunikatsiya vositalari mavjud bo‘lgan taqdirda qo‘llaniladi.

Masofaviy ta’lim tegishli soha mutaxassislarining kasbiy ehtiyojlaridan kelib chiqqan holda ishlab chiqilgan va masofadan o‘qitishni amalga oshirishga mo‘ljallangan maxsus ta’lim dasturlari orqali onlayn hamda oflayn tarzda amalga oshiriladi”.