Oʻzbekiston Respublikasi Prezidentining “Maʼnaviyat va maʼrifat” jamoatchilik markazi faoliyatini yanada takomillashtirish va samaradorligini oshirish toʻgʻrisida”gi Farmoniga binoan xalqimiz merosining noyob namunalarini toʻplash, avaylab asrash, targʻib etish, xalqimiz, ayniqsa, yoshlarimizda mustaqillik, vatanparvarlik tuygʻusini shakllantirish, milliy anʼanalarimiz va urf-odatlarimiz davomiyligini, ravnaqini, ularning umuminsoniy qadriyatlar bilan uygʻunlashib borishini taʼminlash maqsadida Vazirlar Mahkamasi qaror qiladi:

1. Respublika “Maʼnaviyat va maʼrifat” markazi huzurida “Oltin meros” xalqaro xayriya jamgʻarmasi tuzilgani, uning Ustavi Oʻzbekiston Respublikasi Adliya vazirligida roʻyxatdan oʻtkazilgani eʼtiborga olinsin.

2. “Oltin meros” xalqaro xayriya jamgʻarmasi tugatilgan Madaniyat jamgʻarmasi, “Isteʼdod” jamgʻarmasi, “Ijodkorlar” jamgʻarmasi, Milliy va ijtimoiy barqarorlik jamgʻarmasi hamda “Yodgorlik” jamiyatining barcha mol-mulki va mablagʻlarining huquqiy vorisi boʻlishi maʼlumot uchun qabul qilinsin.

3. Jamgʻarmaning asosiy maqsadi va vazifalari:

buyuk ajdodlarimizning asrlar davomida yaratgan bebaho madaniy-maʼrifiy merosini koʻz qorachigʻiday asrab-avaylash, kelgusi avlodlarga yodgorlik qilib qoldirish, xalqimizning umuminsoniy qadriyatlar xazinasiga qoʻshgan ulkan hissasini butun dunyoga qayta tanitish, uni keng targʻib etib, kishilarimiz, ayniqsa, yoshlarimiz ongiga milliy gʻurur, milliy iftixor, Vatanga muhabbat va istiqlol gʻoyalariga sadoqat tuygʻularini singdirish;

oʻtmish madaniyatimizga oid qadimiy qoʻlyozmalar, tarixiy hujjatlar, xalq hunarmandchiligi, amaliy sanʼati namunalari va tarixiy-madaniy qimmatga molik boshqa yodgorliklarni mamlakatimizda, xorijda izlab topish va oʻrganish, ulardan ulkan merosimizning uzviy qismi sifatida foydalanish;

respublikadagi va chet ellardagi madaniy-maʼrifiy tashkilotlar bilan hamkorlik qilish, xalqaro aloqalarni rivojlantirish maqsadida turli tanlov, auksion, festivallar uyushtirish, ijodiy-ilmiy delegatsiyalar almashish;

isteʼdodli yoshlarni tanlab, ularning ijodiy kamolotiga moddiy va maʼnaviy homiylik qilish;

oʻz va davlat dasturini bajarish uchun mablagʻlarning muayyan qismini mamlakatimizdagi va xorijdagi faoliyat hisobidan, shu jumladan, qoʻshma korxonalar ochish yoʻli bilan jamgʻarishdan va Ustavida belgilangan boshqa xayrli ishlardan iborat ekanligi inobatga olinsin.

4. Jamgʻarma taʼsischilari va homiylarining (roʻyxat ilova* qilinadi) hamda madaniy-ilmiy jamoatchilikning mazkur jamgʻarmani moddiy-maʼnaviy jihatlardan keng qoʻllab-quvvatlash haqidagi takliflari maʼqullansin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari joylarda “Oltin meros” xalqaro xayriya jamgʻarmasi boʻlimlarini tashkil etish, ularni bino va moddiy-texnika ashyolari bilan taʼminlash masalalarini bir oy muddat ichida hal qilsinlar.

6. Toshkent shahar hokimligi va Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash qoʻmitasi Toshkent shahar Shodlik koʻchasidagi 6-uyni hovlisi va hovlidagi barcha qurilishlari bilan birga belgilangan tartibda “Oltin meros” xalqaro xayriya jamgʻarmasiga haq olmasdan mulk qilib bersinlar.

Jamgʻarma joylashgan binoni milliy uslubda taʼmirlash va zamonaviy jihozlash ishlarini 3 oy muddat ichida tugallash Oʻzbekiston Respublikasi Tashqi iqtisodiy faoliyat milliy banki (R.S. Azimov)ga yuklansin.

7. Oʻzbekiston Respublikasi Moliya vazirligi (B. Hamidov) Jamgʻarmaga Vazirlar Mahkamasining zaxirasidan 10 mln. soʻm miqdorida mablagʻ ajratsin.

Jamgʻarma dasturiga binoan chet ellardan milliy boyliklarimizni sotib olish uchun, xorijiy mamlakatlarga ekspeditsiyalar uyushtirish hamda oʻzining asosiy faoliyati doirasidagi buyurtmalari boʻyicha norezidentlar bilan hisob-kitob qilish uchun moʻljallangan milliy soʻmni erkin muomaladagi valyutalarga ayirboshlash hal etilsin.

8. Belgilab qoʻyilsinki, Jamgʻarma, uning boʻlimlari va unga qarashli korxonalar Ustavida koʻrsatilgan maqsadlar va vazifalarga qatʼiy mos keladigan faoliyat yoʻnalishlari boʻyicha:

ishlab chiqarish, tashqi iqtisodiy faoliyat va tijorat bilan shugʻullanishga haqlidirlar;

Oʻzbekiston Respublikasi Prezidentining “Maʼnaviyat va maʼrifat” jamoatchilik markazi faoliyatini yanada takomillashtirish va samaradorligini oshirish toʻgʻrisidagi Farmoniga binoan barcha turdagi soliqlardan besh yil muddatga ozod qilingan.

10. Ommaviy axborot vositalariga “Oltin meros” xalqaro xayriya jamgʻarmasi faoliyatini keng yoritish, doimiy maxsus ruknlar ochish tavsiya etilsin.

11. Oʻzbekiston SSR Ministrlar Sovetining 1965-yil 1-apreldagi 188-son, 1987-yil 11-dekabrdagi 501-son, Oʻzbekiston Respublikasi Vazirlar Mahkamasining 1992-yil 13-yanvardagi 12-son va 1993-yil 19-maydagi 238-son qarorlari oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Bosh vazir oʻrinbosari S. Saidqosimov zimmasiga yuklansin.