Xalqaro Mehnat Tashkilotining Bosh konferensiyasi Xalqaro Mehnat Byurosining Maʼmuriy kengashi tomonidan San-Fransiskoda chaqirilib va 1947-yilning 19-iyunida oʻzining Oʻttizinchi Sessiyasiga toʻplanib, sanoat va savdoda mehnat inspeksiyasini tashkil qilinishiga oid bir qancha takliflarni qabul qilishga qaror chiqarib va bu Sessiya kun tartibining toʻrtinchi bandi hisoblanib, mazkur takliflarga xalqaro konvensiya shaklini berishga qaror qilib, bir ming toʻqqiz yuz qirq yettinchi yil iyul oyining birinchi kunida quyidagi “Mehnat inspeksiyasi toʻgʻrisidagi 1947-yilgi Konvensiya” deb nomlanishi mumkin boʻlgan Konvensiyani qabul qildi:

Xalqaro Mehnat Tashkilotining har bir aʼzosi, ushbu Konvensiya unga nisbatan kuchga kirgan boʻlsa, sanoat ish joylarida mehnat inspeksiyasi tizimiga ega boʻlish majburiyatini oʻz zimmasiga oladi.

1. Sanoat ish joylaridagi mehnat inspeksiyasi tizimi, qoʻllanilishi mehnat inspektorlari tomonidan taʼminlanadigan mehnat sharoitlariga doir va ish jarayonida mehnatkashlarni muhofaza qilishga doir qonun-qoidalar qoʻllaniladigan barcha ish joylarini qamrab oladi.

2. Milliy qonun hujjatlari ushbu Konvensiya qoʻllanilishi doirasidan togʻ-kon sanoati va transport korxonalarini yoki ularning bir qismini chiqarishi mumkin.

1. Mehnat inspeksiyasi tizimi vazifalariga quyidagilar kiradi:

a) mehnat sharoitlariga va ish jarayonida mehnatkashlar xavfsizligini taʼminlashga doir qonun-qoidalar, yaʼni ish vaqti, ish haqi, mehnat xavfsizligi, sogʻlikni saqlash, farovonlikni taʼminlash, bolalar va oʻsmirlarni ishga yollash va boshqa shu kabi masalalar sohasiga doir qonun-qoidalar, qanchalik mehnat inspektorlari tomonidan qoʻllanilishi taʼminlansa, shu darajada bu qonun-qoidalarning tatbiq qilinishini muhofaza qilish;

b) ish beruvchilar va mehnatkashlarni qonun-qoidalarga rioya etishning eng samarali vositalari toʻgʻrisidagi texnik axborot va tavsiyalar bilan taʼminlash;

s) vakolatli hokimiyat organi eʼtiboriga mavjud qonun qoidalar qamrovi doirasiga alohida kirmaydigan kamchiliklar va huquqbuzarliklar hollarini yetkazish.

2. Agar mehnat inspektorlariga boshqa vazifa topshirilsa, bu ularning asosiy vazifalarini amalga oshirishga toʻsqinlik qilmasligi kerak yoki inspektorlar obroʻyi va ularning ish beruvchilar va mehnatkashlar bilan munosabatlarida talab etiladigan xolisligiga taʼsir qilmasligi kerak.

1. Mehnat inspeksiyasi Tashkilot aʼzosining maʼmuriy amaliyoti qay darajada imkon bersa, shu darajada markaziy hokimiyat organining kuzatuvi va nazorati ostida boʻladi.

2. Federativ davlat boʻlgan holda “markaziy hokimiyat organi” atamasi yoki federal hokimiyat organini yoki federatsiya biror tarkibiy qismining markaziy organini anglatishi mumkin.

Vakolatli hokimiyat organi quyidagilarga koʻmaklashish uchun tegishli choralarni koʻradi;

a) bir tomondan, inspeksiya xizmatlari, ikkinchi tomondan boshqa hukumat xizmatlari, shuningdek mazkur turdagi faoliyatni amalga oshirayotgan davlat va xususiy muassasalar oʻrtasida samarali hamkorlikka;

b) mehnat inspeksiyasi xizmatchilari hamda ish beruvchilar va mehnatkashlar yoki ularning tashkilotlari oʻrtasidagi hamkorlikka.

Inspeksiya shtati davlat xizmatchilaridan, yaʼni maqomi va xizmat sharoiti lavozimini barqaror egallab turishga kafolat beradigan hamda hukumatdagi har qanday oʻzgarishlar taʼsiridan yoki har qanday tashki taʼsirdan xoli boʻlishni talab etadigan davlat xizmatchilaridan iborat boʻladi.

1. Davlat xizmatchilarini ishga jalb qilish sohasidagi shartlarga rioya etgan holda, xususan, shu sohada milliy qonun hujjatlari tomonidan belgilanishi mumkin boʻlgan shartlarga rioya etgan holda, mehnat inspektorlari lavozimiga mazkur lavozim vazifasini bajarish uchun talab etiladigan yetarli malakaga ega boʻlgan nomzodlar jalb qilinadi.

2. Mazkur malakani tekshirish uslublari vakolatli hokimiyat organi tomonidan belgilanadi.

3. Mehnat inspektorlari oʻz vazifalarini amalga oshirish uchun tegishli tayyorgarlikdan oʻtadilar.

Inspeksiya shtati tarkibiga erkaklar xam, ayollar xam tayinlanishi mumkin; zarur hollarda erkak va ayol inspektorlar zimmasiga alohida vazifalar yuklatilishi mumkin.

Tashkilotning har bir aʼzosi, mehnatkashlarning ish jarayonida sogʻligʻini saqlashga va xavfsizligiga oid qonun-qoidalar hayotga tatbiq qilinishini taʼminlash maqsadida hamda mehnatkashlar salomatligi va xavfsizligiga ishlash uslublari, uskunalari va jarayonlarining taʼsirini aniqlash maqsadida, inspeksiya ishiga tegishli malakali ekspertlar va mutaxassislar, shu jumladan, tibbiyot, mexanika, elektr va kimyo boʻyicha mutaxassislar, milliy sharoitga eng maqbul deb eʼtirof etiladigan tarzda, jalb etilishini taʼminlash uchun zarur chora-tadbirlar koʻradi.

Mehnat inspektorlari soni inspeksiya xizmatining vazifalari samarali amalga oshirilishini taʼminlash uchun yetarli boʻlishi kerak va ular soni quyidagilarni hisobga olgan holda belgilanishi kerak:

a) inspektorlar bajarishi zarur boʻlgan vazifalar muhimligini, xususan:

i) inspeksiya nazorati ostidagi ish joylari soni, ularning xususiyati, koʻlami va joylashishini;

ii) ushbu ish joylarida band boʻlgan mehnatkashlar soni va toifalarini;

iii) hayotga tatbiq qilinishi zarur boʻlgan qonun-qoidalar miqdori va murakkabligini;

b) inspektorlar ixtiyoriga berilgan moddiy vositalarni; va

s) inspeksiya tashriflari amalga oshirilishi samarali boʻlishi uchun maqsadga muvofiq boʻlgan amaliy sharoitni.

1. Vakolatli hokimiyat organi mehnat inspektorlari tasarrufida kuyidagilar boʻlishi uchun zarur choralarni koʻradi:

a) inspeksiya xizmati ehtiyojlariga mos ravishda jihozlangan va barcha tegishli shaxslar uchun ochiq boʻlgan mahalliy byuro;

b) kerakli jamoat transport vositalari yoʻq boʻlgan hollarda ularning oʻz funksiyalarini amalga oshirishi uchun zarur boʻlgan transport vositalari.

2. Vakolatli hokimiyat organi mehnat inspektorlari oʻz funksiyalarini amalga oshirishi uchun ularga zarur boʻlgan har qanday safar va qoʻshimcha xarajatlarini qoplash maqsadida zarur choralarni koʻradi.

1. Mehnat inspektorlari oʻz vakolatlarini tasdiqlovchi hujjat bilan taʼminlangan holda quyidagi huquqlarga ega:

a) inspeksiya nazorati bilan qamrab olingan har qanday ish joyiga oldindan ogohlantirmasdan va xohlagan vaqtda hech bir toʻsiqsiz kirish:

b) ular tomonidan barcha binolarga, yaʼni inspeksiya qilish uchun yetarli asos bor deb hisoblangan barcha binolarga kunduzgi vaqtda kirish;

s) qonun-qoidalarga toʻgʻri rioya etilayotganligiga ishonch hosil qilish uchun ular zarur deb hisoblaydigan har qanday tekshirish va surishtirishlar oʻtkazish, xususan:

i) yakkama-yakka yoki guvohlar ishtirokida, ish beruvchilar yoki korxona personaliga qonun-qoidalar qoʻllanilishiga doir har qanday savol berish;

ii) mehnat sharoitlariga oid milliy qonun hujjatlarida saqlanishi koʻzda tutilgan har qanday kitoblar, roʻyxatlar yoki hujjatlar yordamida ish olib borilishini — ularni qonun-qoidalarga muvofiq ekanligini koʻrish va ulardan nusxa olish yoki ayrim joylarini koʻchirish maqsadida — talab qilish;

iii) qonun-qoidalarda talab qilinganidek.eʼlonlar osilishini talab qilish;

iv) ish beruvchini yoki uning vakilini tekshirish maqsadlari haqida ogoh qilgan holda foydalanilayotgan yoki ishlov berilayotgan materiallar va moddalar namunalarini tekshirish uchun olish.

2. Inspeksiya tashrifi hollarida inspektorlar; agar bu nazorat ishiga ziyon yetkazmaydi deb hisoblasalar, ish beruvchi yoki uning vakilini bu tashrif haqida ogohlantiradilar.

1. Mehnat inspektorlariga inshoot, uskuna yoki ishlash usullarida aniqlangan va mehnatkashlar sogʻligi yoki xavfsizligiga xavf soluvchi deb hisoblanishiga yetarli asos tugʻdiruvchi nuqsonlarni toʻgʻrilash maqsadida chora koʻrish uchun vakolat beriladi.

2. Mehnat inspektorlari shunday choralar koʻrish imkoniyatiga ega boʻlishlari uchun, qonunda koʻzda tutilishi mumkin boʻlgan sud yoki maʼmuriy hokimiyat organlariga shikoyat qilish huquqiga rioya etilgan holda, ularga kuyidagilar boʻyicha farmoyishlar chiqarish yoki chiqarilishini talab qilish vakolati beriladi:

a) muayyan vaqt chegarasida qurilma yoki inshootga mehnatkashlar sogʻligʻi yoki xavfsizligini muhofaza qilish sohasidagi qonun-qoidalarga mos boʻlishini taʼminlash uchun zarur boʻlgan oʻzgartirish kiritish boʻyicha;

b) mehnatkashlar sogʻligʻi yoki xavfsizligiga bevosita xavf tugʻilgan holatda darhol ijro etilishi shart boʻlgan choralar boʻyicha.

3. Agar 2-bandda belgilangan tartib Tashkilot aʼzosining maʼmuriy va sud amaliyotiga muvofiq kelmasa, inspektorlar vakolatli hokimiyat organiga darhol ijro etilishi shart boʻlgan farmoyishlar chiqarilishi uchun yoki choralar koʻrilishi uchun murojaat qilish huquqiga ega boʻladilar.

Mehnat inspeksiyasiga, milliy qonun hujjatlarida koʻzda tutilgan hollarda va tartibDa, ishlab chiqarishdagi baxtsiz hodisalar va kasb kasalliklari toʻgʻrisida maʼlum qilinadi.

Milliy qonun hujjatlarida koʻzda tutilishi mumkin boʻlgan istisnolarga rioya etilgan holda mehnat inspektorlariga:

a) oʻz nazoratida boʻlgan korxonalardan bevosita yoki bilvosita manfaatdor boʻlish man etiladi;

b) tegishli jazoga tortilishi yoki maʼmuriy.choralar koʻrilishi haqida ogohlantirilgan holda, oʻz vazifalarini bajarish paytida tanishishlari mumkin boʻlgan ishlab chiqarish yoki tijorat sirlarini, yoki ishlab chiqarish jarayonlari” haqidagi maʼlumotlarni, hatto lavozimidan ketgandan soʻng ham, oshkor qilmaslik majburiyati yuklatiladi;

s) kamchiliklar yoki qonun-qoidalar buzilishi yuzasidan har qanday shikoyat manbasini mutlaqo sir tutish majburiyati hamda ish beruvchi yoki uning vakiliga inspeksiya tashrifi ana shunday shikoyat tushishi munosabati bilan oʻtkazilganligi toʻgʻrisida aslo bildirmaslik majburiyati yuklatiladi.

Ish joylari tegishli qonun-qoidalarning samarali qoʻllanilishini taʼminlash uchun zarur boʻlgan miqdorda va sinchkovlik bilan inspeksiya qilinadi.

1. Qoʻllanilishi mehnat inspektorlari tomonidan taʼminlanadigan qonun-qoidalarni buzayotgan yoki ularga rioya etishdan bosh tortayotgan shaxslar, oldindan ogohlantirilmasdan, darhol sud taʼqibiga olinadi. Lekin milliy qonun hujjatlarida sud himoyasini yoki profilaktika choralarini amalga oshirish uchun oldindan ogohlantiruvchi hollarga nisbatan istisnolar koʻzda tutilishi mumkin.

2. Mehnat inspektorlari sud taʼqibini boshlash yoki tavsiya qilish oʻrniga ogohlantirish va maslahat berish kerakligini oʻzlari hal qiladilar.

Milliy qonun hujjatlarida qoʻllanilishi mehnat inspektorlari tomonidan taʼminlanadigan qonun-qoidalarni buzganlik uchun hamda mehnat inspektorlariga ularning vazifalarini amalga oshirishda toʻsqinlik qilinishiga qarshi tegishli jazo choralari koʻzda tutilishi kerak, shu bilan birga, ular hayotga samarali tatbiq qilinishi lozim.

1. Mehnat inspektorlaridan yoki mahalliy inspeksiya byurolaridan, vaziyatga qarab, markaziy inspeksiya organiga oʻz inspeksiya faoliyati natijalari toʻgʻrisidagi maʼruzalarni muntazam taqdim etish talab etiladi.

2. Ushbu maʼruzalar markaziy organ koʻrsatmasiga muvofiq tuziladi va vaqti-vaqti bilan ushbu organ tomonidan koʻrsatiladigan masalalarni qamrab oladi; ushbu maʼruzalar markaziy organ talab qilgan muddatlarda va har qanday holda yiliga kamida bir marta taqdim etiladi.

1. Markaziy inspeksiya organi uning nazorati ostidagi inspeksiya xizmatlari faoliyati toʻgʻrisida umumiy har yilgi maʼruzalarni chop etib boradi.

2. Ushbu maʼruzalar maqbul muddatlarda, maʼruzalarga taalluqli yil yakunida va har qanday holda oʻn ikki oy ichida chop etiladi.

3. Har yilgi maʼruzalarning nusxalari chop etilgandan soʻng maqbul muddatda va har qanday holda uch oy ichida Xalqaro Mehnat Byurosi Bosh direktoriga yuboriladi.

Markaziy inspeksiya organi tomonidan chop etiladigan har yilgi maʼruzalarda mazkur organ nazorati doirasi chegarasida kuyidagi va boshqa muhim masalalar toʻgʻrisidagi maʼlumotlar qamrab olinadi:

a) inspeksiya xizmati faoliyatiga doir qonun hujjatlari;

b) mehnat inspeksiyasi xizmatidagi mehnatkashlar shtati;

s) inspeksiya nazorati bilan qamrab olingan ish joylari toʻgʻrisida hamda ushbu ish joylarida yollangan mehnatkashlar soni toʻgʻrisidagi statistik maʼlumotlar;

d) inspeksiya tashriflari toʻgʻrisidagi statistik maʼlumotlar;

e) sodir etilgan huquqbuzarliklar va qoʻllanilgan jazo choralari toʻgʻrisidagi statistik maʼlumotlar;

f) ishlab chiqarishdagi baxtsiz hodisalar toʻgʻrisidagi statistik maʼlumotlar;

g) kasb kasalliklari bilan ogʻrish toʻgʻrisidagi statistik maʼlumotlar.

Xalqaro Mehnat Tashkilotining har bir aʼzosi, ushbu Konvensiyaning mazkur Boʻlimi unga nisbatan kuchga kirgan boʻlsa, savdo bilan bogʻliq ish joylarida mehnat inspeksiyasi tizimiga ega boʻlish majburiyatini oʻz zimmasiga oladi.

Savdo bilan bogʻlik ish joylaridagi mehnat inspeksiyasi tizimi qoʻllanilishi mehnat inspektorlari tomonidan taʼminlanadigan mehnat sharoitlariga doir va ish jarayonida mehnatkashlarni muhofaza qilishga doir qonun-qoidalar qoʻllaniladigan ish joylarini qamrab oladi.

Savdo bilan bogʻliq ish joylaridagi mehnat inspeksiyasi tizimi, mazkur Konvensiya 3 — 21-moddalari talablari qay darajada qoʻllanilsa, shu darajada mazkur talablarga mos boʻlishi kerak.

1. Ushbu Konvensiyani ratifikatsiya qiladigan Tashkilotning har bir aʼzosi, ratifikatsiya qilish toʻgʻrisidagi hujjatiga ilova qilingan deklaratsiyasi orqali, II Boʻlimni ushbu Konvensiyaning qabul qilishidan chiqarib tashlashi mumkin.

2. Tashkilotning har qanday aʼzosi, shunga oʻxshash deklaratsiya qilgan boʻlsa, istalgan paytida, navbatdagi deklaratsiya orqali uni bekor qilishi mumkin.

3. Tashkilotning har bir aʼzosi, unga nisbatan ushbu moddaning 1-bandiga muvofiq tayyorlangan deklaratsiyasi kuchda boʻlsa, har yili, ushbu Konvensiyaning qoʻllanishi toʻgʻrisidagi oʻzining har yilgi maʼruzalarida mazkur Konvensiya II Boʻlimi qoidalariga nisbatan oʻz qonunchiligi va amaliyotining holatini va ushbu qoidalar qay darajada qoʻllanilayotgani yoki ularni qoʻllash koʻzda tutilayotganini koʻrsatadi.

Ushbu Konvensiya qaysidir korxona, korxona boʻlimi yoki xizmati, yoki ish joyiga qoʻllanilishi boʻyicha shubha tugilayotgan har qanday xolda, mazkur masala vakolatli hokimiyat organi tomonidan hal qilinadi.

Mazkur Konvensiyada “qonun-qoidalar” atamasi qonun hujjatlaridan tashqari qonun kuchiga ega, qoʻllanilishi mehnat inspektorlari tomonidan taʼminlanishi kerak boʻlgan arbitraj sud qarorlari va jamoa shartnomalarini ham oʻz ichiga oladi.

Xalqaro Mehnat Tashkiloti Ustavining 22-moddasi qoidalariga muvofiq taqdim etiladigan har yilgi maʼruzalarga ushbu Konvensiyaning qoidalarini hayotga tatbiq qiluvchi qonun hujjatlari toʻgʻrisida toʻla maʼlumotlar kiritiladi.

1. Agar Tashkilot aʼzosining hududi oʻz ichiga yirik hududlarni qamrab olsa va vakolatli hokimiyat organi, mazkur hududlardagi aholi tarqoqligini yoki rivojlanish darajasini hisobga olib, ushbu Konvensiya qoidalarini qoʻllashning amalda iloji yoʻq, deb hisoblasa, mazkur vakolatli hokimiyat organi mazkur hududlarni ushbu Konvensiya qoʻllanilishi doirasidan toʻliq chiqarib tashlashi mumkin yoki baʼzi korxonalar, yoki ayrim ish turlariga nisbatan oʻz fikricha maqsadga muvofiq boʻlgan istisnolar bilan chiqarishi mumkin.

2. Tashkilotning har bir aʼzosi, Xalqaro Mehnat Tashkiloti Ustavining 22-moddasiga binoan taqdim etiladigan, ushbu Konvensiyaning qoʻllanishi toʻgʻrisidagi oʻzining birinchi har yilgi maʼruzasida, ushbu moddaning qoidalaridan foydalanishni moʻljallagan har bir hudud toʻgʻrisida xabar beradi va shu qoidalardan nimaga foydalanishni moʻljallaganlik sabablarini koʻrsatadi. Tashkilotning hech bir aʼzosi, birinchi har yilgi maʼruzasi taqdim etilganidan soʻng, shu maʼruzada koʻrsatilgan hududlardan tashqari boshqa. hududlarga mazkur modda qoidalarini koʻllay olmaydi.

3. Ushbu modda qoidalaridan foydalanadigan Tashkilotning qar bir aʼzosi oʻzining navbatdagi har yilgi maʼruzalarida qaysi hududlarga nisbatan mazkur modda qoidalarini ishlatish huquqidan voz kechganligi toʻgʻrisida xabar qiladi.

1. Ushbu Konvensiyani ratifikatsiya qiladigan Tashkilotning har bir aʼzosi Xalqaro Mehnat Byurosining Bosh direktoriga, ratifikatsiyadan keyin imkoni boricha qisqa muddatda, Xalqaro Mehnat Tashkiloti Ustavining Oʻzgartirishlar kiritish toʻgʻrisidagi 1946-yilgi akti bilan oʻzgartirishlar kiritilgan Xalqaro Mehnat Tashkiloti Ustavining 35-moddasida koʻzda tutilgan hududlarga nisbatan (ushbu Ustavning 35-moddasining 4- va 5-bandlarida koʻzda tutilgan hududlardan tashqari) quyidagilarni bildiradigan deklaratsiyani yuboradi:

a) qaysi hududlarga nisbatan Tashkilotning tegishli aʼzosi Konvensiya qoidalarining oʻzgartirishlarsiz qoʻllanilishini zimmasiga olishi;

b) qaysi hududlarga nisbatan Tashkilotning tegishli aʼzosi Konvensiya qoidalarining oʻzgartirishlar bilan qoʻllanilishini zimmasiga olishi va shu oʻzgartirishlarning tafsiloti;

s) qaysi hududlarga nisbatan Konvensiya qoʻllanilmasligi va bu holda uning qoʻllanilmaslik sabablari;

d) qaysi hududlarga nisbatan Tashkilotning tegishli aʼzosi oʻz qarorini saqlab turishi.

2. Ushbu modda 1-bandining “a” va “b” kichik bandlarida ifodalangan majburiyatlar ratifikatsiyaning ajralmas qismi deb hisoblanadi va ratifikatsiya kuchiga ega.

3. Tashkilotning har qanday aʼzosi navbatdagi deklaratsiya orqali ushbu modda 1-bandining “b”, “s” yoki “d” kichik bandlari asosida avvalgi deklaratsiyada aytib oʻtilgan har qanday shartlardan yoki ularning bir qismidan voz kechishi mumkin.

4. Tashkilotning har qanday aʼzosi, ushbu Konvensiya denonsatsiya qilinishi mumkin boʻlgan davr mobaynida, 34-modda qoidalariga muvofiq, Bosh direktorga istalgan avvalgi deklaratsiyaning har qanday shartiga oʻzgartirishlar kirituvchi hamda belgilangan hududlaridagi hozirgi ahvolni ifoda etuvchi navbatdagi deklaratsiyani yuborishi mumkin.

1. Ushbu Konvensiyada nazarda tutilgan masalalar har qanday metropoliyadan tashqaridagi avtonom hokimiyatlarga tegishli boʻlganda, shunday hududning xalqaro munosabatlari uchun javobgar boʻlgan Tashkilot aʼzosi, shu hududning hukumati bilan kelishib, Xalqaro Mehnat Byurosining Bosh direktoriga shu hudud nomidan mazkur Konvensiya majburiyatlarini qabul qilish toʻgʻrisidagi deklaratsiyani yuborishi mumkin.

2. Ushbu Konvensiya majburiyatlarini qabul qilish toʻgʻrisidagi deklaratsiya Xalqaro Mehnat Byurosining Bosh direktoriga yuborilishi mumkin:

a) tashkilotning ikki yoki undan koʻp aʼzosi tomonidan ularning birgalikdagi boshqaruvi ostida boʻlgan har qanday hududlar boʻyicha; yoki

b) Birlashgan Millatlar Tashkilotining Ustaviga muvofiq har qanday hududni boshqarishga yoki boshqa shunga oʻxshash hududni boshqarishga javobgar boʻlgan har qanday xalqaro darajadagi masʼul tomonidan.

3. Ushbu moddaning aytib oʻtilgan bandlariga muvofiq, Xalqaro Mehnat Byurosining Bosh direktoriga yuboriladigan deklaratsiyalarda Konvensiya qoidalari tegishli hududga nisbatan qanday qoʻllanilishi, yaʼni oʻzgartirishlar bilan yoki oʻzgartirishlarsiz qoʻllanilishi koʻrsatiladi; agar deklaratsiyada Konvensiya qoidalari oʻzgartirishlar bilan qoʻllanilishi koʻrsatilsa, u holda oʻzgartirishlarning tafsiloti ham beriladi.

4. Tashkilotning tegishli aʼzosi, aʼzolari yoki tegishli xalqaro darajadagi masʼul istalgan paytda, keyingi deklaratsiyasi orqali, tegishli huquqidan foydalanib, har qanday avvalgi deklaratsiyasida koʻzda tutilgan har qaysi oʻzgartirishlardan toʻliq yoki qisman voz kechishi mumkin.

5. Tashkilotning tegishli aʼzosi, aʼzolari yoki tegishli xalqaro darajadagi masʼul, ushbu Konvensiya denonsatsiya qilinishi mumkin boʻlgan muddat mobaynida, 34-modda qoidalariga muvofiq, Bosh direktorga har qanday avvalgi deklaratsiyaning har qanday shartiga oʻzgartirishlar kirituvchi hamda ushbu Konvensiyaning qoʻllanilishiga nisbatan hozirgi ahvolni ifoda etuvchi deklaratsiya yuborishi mumkin.

Ushbu Konvensiyani ratifikatsiya qilish toʻgʻrisidagi rasmiy hujjatlar roʻyxatga olinishi uchun Xalqaro Mehnat Byurosi Bosh direktoriga yuboriladi.

1. Ushbu Konvensiya faqatgina ratifikatsiya qilish toʻgʻrisidagi hujjatlari Bosh direktor tomonidan roʻyxatga olingan Xalqaro Mehnat Tashkilotining aʼzolarinigina birlashtiradi.

2. Ushbu Konvensiya Tashkilot ikki aʼzosining ratifikatsiya qilish toʻgʻrisidagi hujjatlari Bosh direktor tomonidan roʻyxatga olingan sanadan keyin oʻn ikki oy oʻtgach kuchga kiradi.

3. Keyinchalik ushbu Konvensiya Tashkilotning har bir aʼzosi uchun uning ratifikatsiya qilish toʻgʻrisidagi hujjati roʻyxatga olingan sanadan keyin oʻn ikki oy oʻtgach kuchga kiradi.

1. Ushbu Konvensiyani ratifikatsiya qilgan Tashkilotning aʼzosi Konvensiya dastlab kuchga kirgan sanadan oʻn yil oʻtganidan keyin Xalqaro Mehnat Byurosining Bosh direktoriga roʻyxatga olish uchun yuborilgan akt orqali Konvensiyani denonsatsiya qilishi mumkin. Bunday denonsatsiya denonsatsiya akti roʻyxatga olinganidan keyin bir yil oʻtgach kuchga kiradi.

2. Ushbu Konvensiyani ratifikatsiya qilgan Tashkilotning har bir aʼzosi, yuqoridagi bandda qayd etilgan, oʻn yillik muddat oʻtganidan keyin, bir yil ichida mazkur moddada koʻzda tutilgan denonsatsiya huquqidan foydalanmagan boʻlsa, navbatdagi oʻn yillik muddatni kutishga majbur boʻladi va shunga muvofiq, u mazkur modda shartlariga binoan ushbu Konvensiyani har, oʻn yillik muddat tugashi bilan denonsatsiya qilishi mumkin boʻladi.

1. Xalqaro Mehnat Byurosi Bosh direktori Tashkilot aʼzolari tomonidan yuborilgan ratifikatsiya qilish toʻgʻrisidagi hujjatlar deklaratsiyalar va denonsatsiya aktlarining barchasini roʻyxatga olganligi haqida Xalqaro Mehnat Tashkilotining barcha aʼzolariga xabar beradi.

2. Bosh direktor unga yuborilgan ikkinchi ratifikatsiya qilish toʻgʻrisidagi hujjatni roʻyxatga olganligi haqida Tashkilot aʼzolariga xabar berganda, Tashkilot aʼzolarining eʼtiborini Konvensiyaning kuchga kirish sanasiga qaratadi.

Xalqaro Mehnat Byurosi Bosh direktori, Birlashgan Millatlar Tashkiloti Ustavining 102-moddasiga muvofiq, yuqoridagi moddalar qoidalariga binoan oʻzi roʻyxatga olgan ratifikatsiya qilish toʻgʻrisidagi hujjatlar, deklaratsiyalar va denonsatsiya aktlarining barchasiga oid toʻla maʼlumotlarni Birlashgan Millatlar Tashkilotining Bosh kotibiga roʻyxatga olish uchun yuboradi.

Har gal, Xalqaro Mehnat Byurosi Maʼmuriy kengashi zarur deb topganda, Bosh konferensiyaga ushbu Konvensiyaning qoʻllanilishi toʻgʻrisidagi maʼruzani taqdim etadi va uni toʻla yoki qisman qayta koʻrib chiqish haqidagi masalani Konferensiya kun tartibiga kiritish kerakligini yoki kerak emasligini koʻrib chiqadi.

1. Agar Konferensiya mazkur Konvensiyani toʻla yoki qisman qayta koʻrib chiqadigan yangi konvensiya qabul qilsa va yangi konvensiyada zid keluvchi qoidalar mavjud boʻlmasa, u holda:

a) Tashkilotning biror aʼzosi tomonidan qayta koʻrib chiqilgan yangi konvensiyaning ratifikatsiya qilinishi, qonunning oʻz kuchi bilan, 34-modda qoidalaridan qatʼiy nazar, mazkur Konvensiyaning zudlik bilan denonsatsiya qilinishiga olib keladi, bunda qayta koʻrib chiqilgan yangi konvensiya kuchga kirgan boʻlishi kerak;

b) qayta koʻrib chiqilgan yangi konvensiya kuchga kirgan sanadan eʼtiboran, mazkur Konvensiyaning Tashkilot aʼzolari tomonidan ratifikatsiya qilinishi toʻxtatiladi.

2. Mazkur Konvensiya, har qanday holatda, uni ratifikatsiya qilgan, ammo qayta koʻrib chiqilgan yangi konvensiyani ratifikatsiya qilmagan Tashkilot aʼzolari uchun amaldagi shakli va mazmuni oʻz kuchida qolaveradi.

Mazkur Konvensiyaning inglizcha va fransuzcha matnlari bir xil kuchga ega.