“Toshkent shahar yoʻlovchilar tashish transportini boshqarishni takomillashtirish toʻgʻrisida” 1992-yil 4-iyundagi Farmonga muvofiq va yoʻlovchilar tashish transporti ishini tubdan yaxshilash, yoʻlovchilarga xizmat koʻrsatish sifati va madaniyatini oshirish, xizmatlarning turlarini kengaytirish hamda mehnat jamoalarining moliyaviy, ishlab chiqarish, ijtimoiy vazifalarini hal etish maqsadida Vazirlar Mahkamasi qaror qiladi:

1. Toshkent shahar yoʻlovchilar tashish transporti korxonalari davlat uyushmasining ilova kilinayotgan tuzilmasi ilovaga muvofiq birlashmalar, korxonalar va tashkilotlardan iborat tarkibda tasdiqlansin.

Belgilab qoʻyilsinki, birlashmalar, korxonalar va tashkilotlarning faoliyati hamda uyushma Boshqaruvi bilan va oʻzaro munosabatlar uyushma Ustavi va taʼsis shartnomalari bilan tartibga solinadi, bunda ularning yuridik va xoʻjalik mustaqilligi saqlab qolinadi.

2. Belgilab qoʻyilsinki, Toshkent shahar yoʻlovchilar tashish transporti korxonalari davlat uyushmasi:

mustaqil ishlab chiqarish-xoʻjalik kompleksi hisoblanadi, oʻz faoliyatida Oʻzbekiston Respublikasi qonunlariga, Oʻzbekiston Respublikasi Prezidenti farmonlariga, Vazirlar Mahkamasining qarorlari va farmoyishlariga, uyushma Ustaviga amal qiladi hamda Toshkent shahar hokimligi bilan hamkorlik qiladi;

oʻziga yuklatilgan vazifa va funksiyalarning zarur tartibda bajarilishi uchun Vazirlar Mahkamasi, Toshkent shahar hokimligi va uyushma tarkibiga qiruvchi boʻlinmalar oldida javob beradi;

oʻziga qarashli birlashmalar, korxonalar va tashkilotlarning mol-mulkini boshqaradi, Oʻzbekiston Respublikasining amaldagi qonunlariga muvofiq ularni tuzadi, qayta tashkil etadi va tugatadi;

Toshkent shahar hokimligi bilan tuzilgan shartnoma asosida yoʻlovchilar tashish transportining turlarini yanada rivojlantirish va yoʻlovchilarga xizmat koʻrsatish tizimini takomillashtirish, xizmatlarning hajmlari va turlarini kengaytirish boʻyicha kompleks chora-tadbirlarni ishlab chiqadi va ularning bajarilishini taʼminlaydi;

oʻziga qarashli birlashmalar, korxonalar va tashkilotlarning moddiy-texnika taʼminoti xizmatlari ishini taʼminlaydi, shuningdek, materiallar, asbob-uskunalar, ehtiyot qismlar, harakatdagi sostav va boshqa texnikaviy vositalarni kooperatsiya yoʻli bilan yetkazib berishni rivojlantirish chora-tadbirlarini ishlab chiqadi va ularning amalga oshirilishiga koʻmaklashadi.

3. Uyushma boshqaruvining yuqori organi Kengash hisoblanadi. Uyushma Kengashi boshqaruvni saylaydi, tuzilmani, uning xodimlari mehnatiga haq toʻlash va ularni ragʻbatlantirish tizimini belgilaydi. Uyushma ijroiya direksiyasi xodimlarining cheklangan soni 40 nafardan iborat qilib belgilansin.

Uyushma boshqaruvining Raisi va uning oʻrinbosarlari uyushma Kengashi va Toshkent shahar hokimligining tavsiyasi boʻyicha Oʻzbekiston Respublikasi Prezidenti huzuridagi Vazirlar Mahkamasi tomonidan tayinlanadi.

4. Uyushma boshqaruvining Raisi, birinchi oʻrinbosari va oʻrinbosarlari maqomi, maishiy taʼminoti, tibbiy va transport xizmati koʻrsatish boʻyicha tegishli ravishda Oʻzbekiston Respublikasi vaziri, vazirning birinchi oʻrinbosari va oʻrinbosarlariga tenglashtirilsin.

5. Moliya vazirligi, respublika Avtomobil transporti vazirligi va Toshkent shahar hokimligi Toshkent shahar yoʻlovchilar tashish transporti korxonalari davlat uyushmasi bilan birgalikda bir oy muddat ichida shahar passajir transporti turlari boʻyicha pulli xizmat koʻrsatiladigan bir yoʻlovchi hisobiga budjetdan mablagʻ ajratish normativlarini ishlab chiqsinlar va uyushmani mablagʻ bilan taʼminlash tartibini tasdiqlasinlar, bunda yil davomida foydalanilmagan budjet mablagʻlari musodara qilinmasligi nazarda tutilsin.

6. Oʻzbekiston Respublikasi Mehnat vazirligi Moliya vazirligi, Avtomobil transporti vazirligi va Davlat uyushmasi bilan birgalikda bir hafta muddat ichida mehnat sarfi va ish sharoitlaridan kelib chiqib, transportning turlari oʻrtasida mehnatga haq toʻlash nisbatini tenglashtirishni hisobga olgan holda yoʻlovchilar tashish avtomobil va elektr transporti xodimlari mehnatiga haq toʻlashning yangi shartlarini ishlab chiqsin va uni 1992-yil 16-iyundan boshlab joriy etsin.

7. Uyushma 1992 — 1994-yillar mobaynida harakatdagi transport bilan bogʻliq xodimlarni formali kiyim bilan taʼminlash tartibini ishlab chiqsin va Oʻzbekiston Respublikasi Moliya vazirligi bilan kelishgan holda uni mablagʻ bilan taʼminlash manbaini tasdiqlasin.

8. Oʻzbekistonning taraqqiyot istiqbolini belgilash qoʻmitasi, Oʻzbekiston Respublikasi Moliya vazirligi, Tashqi iqtisodiy aloqalar vazirligi uyushma bilan birgalikda 15 kun ichida Vazirlar Mahkamasiga:

import boʻyicha harakatdagi sostav, asbob-uskunalar va ehtiyot qismlar olish uchun valyuta mablagʻlari ajratish;

harakatdagi sostav parkini yangilash va toʻldirishga, shuningdek, uyushmaning ishlab chiqarish va ijtimoiy ahamiyatga ega boʻlgan obyektlarini koʻrish, qayta koʻrish, texnika bilan qayta jihozlashga kapital mablagʻlar ajratish;

Toshkent metropoliteni qurilishini davom ettirish uchun har yili maqsadli zarur mablagʻlar ajratish toʻgʻrisida takliflar kiritsinlar.

9. “Oʻzshartnomasavdo”:

uyushma korxonalari moddiy-texnika taʼminotning mavjud tartibini 1992-yilda saqlab qolsin;

1992-yilning ikkinchi yarmidan boshlab avtomobil va trolleybus shinalarining ularni tayyorlagan zavodlardan bevosita “Toshshaharyoʻlovchiavtotrans” ishlab chiqarish birlashmasiga va tramvay-trolleybus ishlab chiqarish boshqarmasiga yetkazib berilishini taʼminlasin;

har yili uyushma korxonalariga huqumatlararo bitimlarga kirgan moddiy-texnika resurslarini yetkazib berish uchun kvotalar ajratilishini nazarda tutsin, shartnoma asosida mahsulot yetkazib beruvchilar bilan toʻgʻridan-toʻgʻri xoʻjalik aloqalari oʻrnatilishiga har tomonlama koʻmaklashsin.

10. Oʻzbekiston Respublikasi Neft mahsulotlari bilan taʼminlash davlat qoʻmitasi uyushma korxonalari bilan tuzilgan shartnomalar boʻyicha benzin, dizel yonilgʻisi va yonilgʻi-moylash hamda ishlatish materiallari boshqa turlarining yetkazib berilishini taʼminlasin.

11. Toshkent shahar metropoliteni uchun temir yoʻl transporti korxonasi maqomi, uning xodimlari uchun esa ushbu toifa uchun nazarda tutilgan huquq va imtiyozlar hamda temir yoʻl transporti xodimlarining tartib-intizomi haqidagi Ustavning amal qilishi saqlab qolinsin.

12. Oʻzbekiston Respublikasi Qishloq xoʻjaligi vazirligi bir oy muddat ichida shahar atrofidagi sabzavotchilik-chorvachilik yoʻnalishidagi davlat xoʻjaliklaridan birini uyushma tarkibiga berish masalasini koʻrib chiqsin va hal etsin.

13. Oʻzbekiston Respublikasi Avtomobil transporti vazirligi:

ilovada qayd etilgan korxonalar va tashkilotlarni 1992-yil 1-iyundagi holatiga koʻra balansdan balansga uyushma tarkibiga oʻtkazsin;

harakatdagi sostavning moddiy-texnika taʼminoti va uni tuzatishning amaldagi tartibi 1992-yil oxirigacha saqlab qolinsin.

14. Toshkent shahar hokimligi:

shahar yoʻlovchilar tashish transporti ishini muvofiqlashtirish va uning barcha turlarini rivojlantirish Boshqarmasini mehnatga haq toʻlash fondi va xodimlari soni bilan birga uyushmaga oʻtkazsin;

avtomobil yoʻllari, koʻchalar va tor koʻchalarning holatini, ularning yoritilishini yaxshilash, ulash tarmoqlari zonasida daraxtlarni kesish va yigʻishtirib olish, shuningdek, haydovchilari uchun xavf-xatarsiz ish sharoitlari, ayniqsa tungi vaqtda, yaratish boʻyicha qoʻshimcha chora-tadbirlarni ishlab chiqsin va amalga oshirsin;

1992-yilning sentabrigacha uyushma korxonalariga bevosita yaqin joydan uy-joylar va ularni qurish uchun yer uchastkalari ajratish imkoniyatini koʻrib chiqsin va belgilasin;

ishchilar taʼminoti boshqarmasi va haydovchilar tarkibi uchun maxsus ovqatlanish bloklari tashkil etishda uyushmaga amaliy yordam koʻrsatsin;

uyushma bilan birgalikda bir oy muddat ichida Toshkent shahar sanoat korxonalarida zarur ehtiyot qismlar, uzellar va agregatlar tayyorlash dasturini ishlab chiqsin va ularni tayyorlashni tashkil etsin.

15. Davlat uyushmasi bir oy muddat ichida Ustav loyihasini ishlab chiqsin va tasdiqlash uchun uni Oʻzbekiston Respublikasi Prezidenti huzuridagi Vazirlar Mahkamasiga kiritsin.

16. Tashkil etilayotgan uyushmaning apparati Shirokaya koʻchasi, 6-uydagi binoga joylashtirilsin.

“Toshshaharyoʻlovchiavtotrans” ishlab chiqarish birlashmasi

Tramvay-trolleybus ishlab chiqarish boshqarmasi

Toshkent metropoliteni

Avtomobil oʻquv-kurs kombinatining Toshkent shahri boʻyicha filiali

“Oʻzavtoqurilish” trestining xoʻjalik hisobidagi Toshkent qurilish uchastkasi

Avtomobil tuzatish zavodi (respublika Avtomobil transporti vazirligi bilan kelishilgan holda)

Qurilayotgan korxonalarning birlashgan direksiyasi