LexUZ sharhi
Mazkur Farmon O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
Shahar avtomobil, elektr passajir transporti va metrosining ishini tubdan yaxshilash, yo‘lovchilarga xizmat ko‘rsatish sifati va madaniyatini oshirish maqsadida:
1. Toshkent tramvay-trolleybus ishlab chiqarish boshqarmasi, Toshkent metropoliteni, Toshkent shahar passajir transporti birlashmasi —“Tashgorpasstrans” negizida Toshkent shahar passajir transporti korxonalarining Vazirlar Mahkamasi huzuridagi Davlat uyushmasini tashkil etish to‘g‘risida yuqorida zikr etilgan transport tuzilmalari hamda Toshkent shahar hokimining taklifi qabul qilinsin.
2. Belgilab qo‘yilsinki, Toshkent shahar passajir transporti korxonalarining Davlat uyushmasi “Tashgorpasstrans” mustaqil ishlab chiqarish-xo‘jalik majmui bo‘lib, yuridik shaxs huquqiga ega va u o‘z faoliyatida O‘zbekiston Respublikasining qonunlariga, O‘zbekiston Respublikasi Prezidenti huzuridagi Vazirlar Mahkamasining qarorlari, farmoyishlariga, uyushmaning Nizomiga amal qiladi va Toshkent shahar hokimiyati bilan hamjihatlikda ish ko‘radi.
Uyushma tarkibiga kiruvchi transport korxonalarining Toshkent shahar hokimiga hisob berishi saqlab qolinsin.
3. Quyidagilar Toshkent shahar passajir transporti korxonalari Davlat uyushmasining asosiy vazifalari deb hisoblansin:
barcha turdagi passajir transportining uzluksiz ishlashini ta’minlash, yo‘lovchilarga xizmat ko‘rsatish sifati va madaniyatini muttasil yaxshilash, Toshkent shahrining avtomobil, elektr transporti va metrosining ishlarini muvofiqlashtirish;
barcha turdagi passajir transportini yanada rivojlantirish va yo‘lovchilarga xizmat ko‘rsatish tizimini takomillashtirish, xizmatlar ko‘rsatish hajmi va turlarini ko‘paytirish, shuningdek mehnat jamoalarining ijtimoiy sharoitlarini yaxshilash borasida chora-tadbirlar majmuini ishlab chiqish hamda Toshkent shahar hokimiyati, tegishli idoralarga qarashli birlashmalar, korxonalar va tashkilotlar bilan birgalikda amalga oshirish;
tarmoqda yagona texnikaviy siyosatni o‘tkazish, passajir transporti korxonalarini qayta tiklash va texnika bilan qayta qurollantirishga ko‘maklashish, yo‘lovchilar tashishni va ularga xizmat ko‘rsatishni tashkil qilishda boshqa davlatlarning tajribasini o‘rganish va ommalashtirish.
4. O‘zbekiston Respublikasining Prezidenti huzuridagi Vazirlar Mahkamasi mazkur Farmonni ro‘yobga chiqarish, shuningdek avtomobil va elektr passajir transporti xodimlarining mehnatiga haq to‘lash masalalarini qayta ko‘rib chiqish borasidagi tashkiliy tadbirlarni ko‘zda tutuvchi qarorni o‘n kun muddat ichida qabul qilsin.