Oʻzbekiston Respublikasi Prezidentining “Transport va turizm obyektlarida jamoat xavfsizligini taʼminlashning samarali tizimini joriy etishga oid qoʻshimcha chora-tadbirlar toʻgʻrisida” 2019-yil 6-martdagi PQ-4229-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Prezidentining “Transport va turizm obyektlarida jamoat xavfsizligini taʼminlashning samarali tizimini joriy etishga oid qoʻshimcha chora-tadbirlar toʻgʻrisida” 2019-yil 6-martdagi PQ-4229-son qarori bilan Oʻzbekiston Respublikasi Ichki ishlar vazirligining Xavfsiz turizmni taʼminlashni muvofiqlashtirish boshqarmasi va uning hududiy boʻlinmalariga shartnoma asosida turistlar va turistik guruhlarni, shu jumladan, avtotransportda harakatlanish vaqtida kuzatib borish hamda moddiy madaniy meros obyektlarida jamoat tartibini saqlash boʻyicha pulli xizmatlar koʻrsatish huquqi berilganligi maʼlumot uchun qabul qilinsin.

2. Quyidagilar:

Ichki ishlar organlarining xavfsiz turizmni taʼminlash boʻlinmalari tomonidan shartnoma asosida turistlar va turistik guruhlarni kuzatib borish boʻyicha pulli xizmatlar koʻrsatish tartibi toʻgʻrisidagi nizom 1-ilovaga muvofiq;

Ichki ishlar organlarining xavfsiz turizmni taʼminlash boʻlinmalari tomonidan shartnoma asosida turizm namoyishi obyektlarida jamoat tartibini saqlash boʻyicha pulli xizmatlar koʻrsatish tartibi toʻgʻrisidagi nizom 2-ilovaga muvofiq tasdiqlansin.

3. Oʻzbekiston Respublikasi Ichki ishlar vazirligi Turizmni rivojlantirish davlat qoʻmitasi bilan birgalikda ikki oy muddatda:

ichki ishlar organlarining xavfsiz turizmni taʼminlash boʻlinmalari tomonidan pulli xizmatlar koʻrsatish tariflarini belgilangan tartibda ishlab chiqsin va tasdiqlasin;

Madaniyat vazirligi va boshqa manfaatdor vazirliklar va idoralar bilan birgalikda turistik faoliyat subyektlari hamda fuqarolar orasida ushbu qarorning mazmuni va mohiyati, amaliy ahamiyatini tushuntirish borasida tegishli tadbirlarni tashkil etsin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduhakimov va Oʻzbekiston Respublikasi ichki ishlar vaziri P.R. Bobojonov zimmasiga yuklansin.

1. Ushbu Nizom ichki ishlar organlarining xavfsiz turizmni taʼminlash boʻlinmalari tomonidan shartnoma asosida turistlar va turistik guruhlarni (keyingi oʻrinlarda turistlar deb ataladi) kuzatib borish boʻyicha pulli xizmatlar koʻrsatish tartibini belgilaydi.

2. Turistlarni shartnoma asosida kuzatib borish xizmati (keyingi oʻrinlarda kuzatuv xizmati deb ataladi) Oʻzbekiston Respublikasi Ichki ishlar vazirligi Transport va turizm obyektlarida xavfsizlikni taʼminlash departamentining Xavfsiz turizm boshqarmasi va uning hududiy boʻlinmalari tomonidan turistlarning xavfsizligini taʼminlash maqsadida piyoda va (yoki) maxsus avtotransport vositalaridan foydalangan holda amalga oshiriladi.

3. Kuzatuv xizmati turistlarning hayoti, sogʻligʻi va mol-mulkini turli tajovuzlardan himoya qilish hamda ular transport vositalarida harakatlanishlari davomida yoʻl harakati xavfsizligini taʼminlashga qaratilgan chora-tadbirlarni amalga oshirishni nazarda tutadi.

Turistlar transport vositalarida harakatlanayotgan paytda kuzatuv xizmati maxsus jihozlangan transport vositalaridan yoʻl harakati qoidalariga qatʼiy rioya qilgan holda foydalanadi, bunda harakatlanish davomida maxsus tovush signallari va chiroq-mayoqchalardan faqatgina istisno holatlarda foydalanilishi mumkin.

4. Kuzatuv xizmati Oʻzbekiston Respublikasi Ichki ishlar vazirligi tomonidan Turizmni rivojlantirish davlat qoʻmitasi bilan kelishgan holda tasdiqlanadigan tariflarga muvofiq toʻlov asosida amalga oshiriladi.

5. Ichki ishlar organlarining xavfsiz turizmni taʼminlash boʻlinmalari tomonidan shartnoma asosida turistlar va turistik guruhlarni kuzatib borish boʻyicha pulli xizmatlar koʻrsatish ushbu Nizomga 1-ilovada keltirilgan sxemaga muvofiq amalga oshiriladi.

6. Kuzatuv xizmatini koʻrsatish uchun jismoniy yoki yuridik shaxs tegishli hududiy ichki ishlar organining Xavfsiz turizmni taʼminlash boshqarmasiga (keyingi oʻrinlarda XTTB deb ataladi) yozma yoki elektron shaklda murojaat qiladi.

7. Murojaatda jismoniy yoki yuridik shaxs (keyingi oʻrinlarda buyurtmachi deb ataladi) toʻgʻrisidagi maʼlumotlar, turistlar va transport vositalarining soni, ularni kuzatib borish vaqti va qatnov yoʻli koʻrsatilishi lozim.

8. Murojaat XTTB tomonidan qabul qilingan kunning oʻzida koʻrib chiqiladi va natijasi haqida buyurtmachiga yozma ravishda maʼlum qilinadi.

9. Murojaatni koʻrib chiqishda:

turistlarning shaxsiga oid maʼlumotlar;

turistik xizmatlar koʻrsatuvchi tadbirkorlik subyektining murojaati boʻyicha uning bunday faoliyatni olib borishi uchun qonunchilik hujjatlarida nazarda tutilgan tegishli ruxsatnomasi mavjudligi;

transport vositalari va haydovchilarning hujjatlari qonunchilik hujjatlarida belgilangan talablarga muvofiqligi;

kuzatib borish qatnov yoʻli va tashrif rejalashtirilgan hududlarning xavfsizlik talablariga javob berishi;

kuzatuv xizmatini amalga oshirish uchun yetarli kuch va vositalarning mavjudligi kabi masalalar oʻrganiladi.

Ushbu bandning ikkinchi, uchinchi va toʻrtinchi xatboshilarida koʻrsatilgan maʼlumotlar buyurtmachi tomonidan taqdim etiladi.

10. Murojaatni koʻrib chiqish natijasida kuzatuv xizmatini koʻrsatish uchun toʻsqinlik qiluvchi holatlar aniqlanmasa, XTTB va buyurtmachi oʻrtasida uch ish kunidan kechiktirmasdan turistlar yoki turistik guruhlarni kuzatib borish toʻgʻrisida shartnoma (keyingi oʻrinlarda shartnoma deb ataladi) tuziladi.

Shartnoma shartlari buyurtma talablaridan kelib chiqqan holda kuzatuv xizmatini koʻrsatishning belgilangan tariflari asosida hamda qonunchilik hujjatlari talablariga muvofiq belgilanadi.

Kuzatuv xizmati uchun toʻlov summasini hisoblashda maxsus avtotransport vositasida kuzatib borish va XTTBga tegishli transport vositalarida turistlarni tashish masofasi, xizmat koʻrsatish uchun zarur xodimlar soni, ularni jalb qilish vaqti va boshqa xarajatlar inobatga olinadi.

Kuzatuv xizmati shartnoma summasi oldindan toʻliq toʻlangandan soʻng amalga oshiriladi.

11. Quyidagi hollarda:

ushbu Nizomning 7-bandi hamda 9-bandining ikkinchi, uchinchi va toʻrtinchi xatboshilarida koʻrsatilgan maʼlumotlar buyurtmachi tomonidan toʻliq taqdim etilmaganda;

buyurtmachi tomonidan taqdim etilgan maʼlumotlarni oʻrganish natijalariga koʻra qonunchilik hujjatlari talablari buzilganligi aniqlanganda;

kuzatuv xizmatini koʻrsatish qatnov yoʻli va tashrif rejalashtirilgan hududlar xavfsizlik talablariga javob bermaganda;

kuzatuv xizmatini amalga oshirish uchun yetarli kuch va vositalarni jalb qilish imkoni boʻlmaganda;

shartnomada nazarda tutilgan toʻlov buyurtmachi tomonidan toʻliq amalga oshirilmaganda kuzatuv xizmatini koʻrsatish rad etiladi.

12. Murojaatni koʻrib chiqish yakuniga koʻra kuzatuv xizmatini koʻrsatish rad etilganda, bu haqda sabablari koʻrsatilgan holda buyurtmachiga yozma yoki elektron ravishda xabar beriladi.

13. Kuzatuv xizmatini koʻrsatish davomida XTTB xodimlari qonunchilik hujjatlari va Oʻzbekiston Respublikasi Ichki ishlar vazirligining tegishli hujjatlari talablariga qatʼiy rioya etishlari shart.

Kuzatuv xizmatini tashkil etishda turistlar hamda boshqa shaxslarning huquq va erkinliklari poymol qilinishiga yoʻl qoʻyilmaydi.

14. Kuzatuv xizmatini koʻrsatishdan oldin XTTB tomonidan:

turistlarga Oʻzbekiston Respublikasining qonunchilik talablari va umumeʼtirof etilgan axloq qoidalariga rioya etishlari hamda xavfsizlik talablari boʻyicha tushuntirish oʻtkaziladi;

kuzatuvi amalga oshiriladigan turistlarning shaxsi va soni shartnomaga muvofiqligi tekshiriladi;

kuzatib boriladigan transport vositasining texnik sozligi koʻzdan kechiriladi, haydovchida zarur hujjatlar mavjudligi tekshiriladi hamda u bilan yoʻl harakati qoidalariga rioya etish va kuzatib borish qatnov yoʻli boʻyicha tegishli yoʻriqnoma oʻtkaziladi.

15. Kuzatuv xizmatini koʻrsatish yakunida XTTB va buyurtmachi oʻrtasida koʻrsatilgan xizmatlarning haqiqiy hajmi boʻyicha uch ish kuni mobaynida dalolatnoma tuziladi va uning asosida shartnoma summasi belgilangan tariflar boʻyicha qayta hisoblanib, oʻzaro hisob-kitob amalga oshiriladi.

16. Kuzatuv xizmatini koʻrsatish shartnomada belgilangan asoslarda va tartibda toʻxtatilishi mumkin.

17. Kuzatuv xizmatini koʻrsatishdan tushgan mablagʻlar Oʻzbekiston Respublikasi Ichki ishlar vazirligi huzuridagi Xavfsiz turizmni taʼminlash jamgʻarmasiga oʻtkaziladi.

18. Shartnomada nazarda tutilmagan nizolar qonunchilik hujjatlarida belgilangan tartibda hal etiladi.

19. Ushbu Nizom talablarining buzilishi qonunchilik hujjatlarida belgilangan javobgarlikni keltirib chiqaradi.

1. Ushbu Nizom ichki ishlar organlarining xavfsiz turizmni taʼminlash boʻlinmalari tomonidan shartnoma asosida turizm namoyishi obyektlarida jamoat tartibini saqlash boʻyicha pulli xizmatlar koʻrsatish tartibini belgilaydi.

2. Turizm namoyishi obyektlarida jamoat tartibini saqlash boʻyicha pulli xizmatlar shartnoma asosida ichki ishlar organlarining xavfsiz turizmni taʼminlash boʻlinmalari tomonidan turizm namoyish obyekti unga mulk huquqi va boshqa ashyoviy huquq asosida tegishli boʻlgan turistik faoliyatni tashkil etishga vakolatli yuridik yoki jismoniy shaxs (keyingi oʻrinlarda vakolatli shaxs deb ataladi) bilan tuziladigan shartnomalarga muvofiq amalga oshiriladi.

3. Ichki ishlar organlarining xavfsiz turizmni taʼminlash boʻlinmalari tomonidan shartnoma asosida turizm namoyishi obyektlarida jamoat tartibini saqlash boʻyicha xizmatlar koʻrsatish tariflari Oʻzbekiston Respublikasi Ichki ishlar vazirligi tomonidan Turizmni rivojlantirish davlat qoʻmitasi bilan kelishgan holda belgilanadi.

4. Ichki ishlar organlarining xavfsiz turizmni taʼminlash boʻlinmalari tomonidan shartnoma asosida turizm namoyishi obyektlarida jamoat tartibini saqlash boʻyicha pulli xizmatlar koʻrsatish ushbu Nizomga 1-ilovada keltirilgan sxemaga muvofiq amalga oshiriladi.

5. Turizm namoyishi obyektida jamoat tartibini saqlash boʻyicha xizmat koʻrsatish toʻgʻrisida shartnoma (keyingi oʻrinlarda shartnoma deb ataladi) vakolatli shaxsning hududiy ichki ishlar organining Xavfsiz turizmni taʼminlash boshqarmasiga (keyingi oʻrinlarda XTTB deb ataladi) qilgan murojaati asosida koʻrib chiqiladi.

6. Murojaat tushgan kundan boshlab oʻn besh kunlik muddatda XTTB tomonidan oʻrganib chiqiladi va natijasi haqida murojaat muallifiga yozma ravishda maʼlum qilinadi.

7. Murojaatni koʻrib chiqish davomida yuridik shaxsning vakili yoki jismoniy shaxs bilan birgalikda turizm namoyishi obyektining hududi koʻzdan kechiriladi va bu haqda dalolatnoma tuziladi.

Dalolatnomada obyekt hududining chegarasi, obyektda jamoat tartibini saqlash faoliyatini tashkil etish uchun talab etiladigan XTTB xodimlari soni va xizmat xonalari, xizmat olib borish tartibi, hududi va patrullik yoʻnalishlari belgilanadi.

8. Shartnoma tuzish va unga muvofiq XTTBga qoʻshimcha shtat birliklari ajratish toʻgʻrisida hududiy ichki ishlar organi tomonidan murojaat tushgan kundan boshlab besh kun muddatda Oʻzbekiston Respublikasi Ichki ishlar vazirligiga taqdimnoma kiritiladi.

9. Oʻzbekiston Respublikasi Ichki ishlar vazirligi taqdimnomani tushgan kundan boshlab besh kun muddatda koʻrib chiqadi va qoʻshimcha shtat birliklari ajratish yoki ajratmaslik haqida qaror qabul qiladi.

Qoʻshimcha shtat birliklari ajratilgan taqdirda, tuzilgan dalolatnoma asosida XTTB va vakolatli shaxs oʻrtasida shartnoma tuziladi.

Shartnoma bir yil muddatga tuziladi.

Turizm namoyishi obyektining oʻziga xos xususiyatlarini inobatga olgan holda dalolatnoma va shartnoma loyihasida jamoat tartibini saqlash faoliyatini tashkil etishning alohida shartlari koʻrsatilishi mumkin.

10. Shartnomada belgilangan XTTB majburiyatlari qoʻshimcha shtat birliklari ajratilgan va jamlangandan soʻng bajariladi.

11. Turizm namoyishi obyektlarida jamoat tartibini saqlash xizmati XTTB naryadlarining faoliyatini Oʻzbekiston Respublikasi Ichki ishlar vazirligining tegishli hujjatlarida belgilangan talablar asosida tashkil etish orqali amalga oshiriladi.

12. Jamoat tartibini saqlash xizmatini koʻrsatish davomida XTTB xodimlari qonunchilik hujjatlari va Oʻzbekiston Respublikasi Ichki ishlar vazirligining tegishli hujjatlari talablariga qatʼiy rioya etishlari shart.

13. Shartnoma asosida xizmat olib borayotgan XTTB xodimlarining faoliyatini moliyalashtirish va ularni moddiy-texnik vositalar bilan taʼminlash shartnomalardan tushgan mablagʻlar hisobiga amalga oshiriladi.

14. Turizm namoyishi obyektida XTTB xodimlarining xizmat olib borish tartibi, hududi va patrullik yoʻnalishlari XTTB boshligʻi tomonidan vakolatli shaxs bilan kelishgan holda tasdiqlanadi.

15. Shartnoma asosida joriy etilgan shtat birliklari lavozimlariga XTTB xodimlari uchun qonunchilik hujjatlarida belgilangan kadrlarni tanlash, jamlash va mehnatga haq toʻlash shartlari tatbiq etiladi.

16. XTTBning shartnomalar asosida kiritilgan shtat birliklari belgilangan tartibda qisqartirilishi mumkin.

17. Shartnoma asosida xizmat koʻrsatishdan tushgan mablagʻlar Oʻzbekiston Respublikasi Ichki ishlar vazirligi huzuridagi Xavfsiz turizmni taʼminlash jamgʻarmasiga oʻtkaziladi.

18. Shartnomada nazarda tutilmagan nizolar qonunchilik hujjatlarida belgilangan tartibda hal etiladi.

19. Ushbu Nizom talablarining buzilishi qonunchilik hujjatlarida belgilangan javobgarlikni keltirib chiqaradi.