Transport vositalarining haydovchilari va yo‘lovchilari uchun qulay shart-sharoitlar yaratish, shuningdek, tusi o‘zgartirilgan (qoraytirilgan) oynali transport vositalaridan foydalanishni tartibga solish maqsadida Vazirlar Mahkamasi qaror qiladi:

1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.

2. Belgilansinki, mazkur qaror qabul qilingunga qadar amalda bo‘lgan to‘lov stavkalari bo‘yicha 2019-yil 1-yanvardan oynalarning tusini o‘zgartirish (qoraytirish) uchun olingan ruxsatnomalarning amal qilish muddati mazkur qarorga muvofiq joriy etiladigan yangi to‘lov stavkalariga mutanosib ravishda uzaytiriladi.

3. O‘zbekiston Respublikasi Ichki ishlar vazirligi Yo‘l harakati xavfsizligi bosh boshqarmasiga tender savdolarini o‘tkazmasdan, idoraviy tanlov komissiyalari tomonidan baholanadigan eng maqbul takliflarni tanlab olish orqali avtotransport vositalari oynalarining tusini o‘zgartirish (qoraytirish) uchun sarflanadigan materiallarni xarid qilish huquqi berilsin.

4. O‘zbekiston Respublikasi Ichki ishlar vazirligi:

ichki ishlar organlarining ruxsatnomasi asosida tusi o‘zgartirilganligini (qoraytirilganligini) bildiruvchi maxsus emblemalar (gologrammalar) namunalarini tasdiqlasin va ularning avtotransport vositalarining old oynalariga joylashtirilishini ta’minlasin;

ikki oy muddatda tusi o‘zgartirilgan (qoraytirilgan) oynali transport vositalaridan ruxsatnomasiz foydalanganlik uchun oynalarning tusini o‘zgartirishga (qoraytirishga) to‘lov stavkalariga teng bo‘lgan miqdordagi ma’muriy javobgarlik belgilashni nazarda tutuvchi qonun loyihasini Vazirlar Mahkamasiga kiritsin;

O‘zbekiston Respublikasi Davlat bojxona qo‘mitasi bilan birgalikda ikki oy muddatda xorijiy davlatlarning ishlab chiqaruvchi korxonalari tomonidan tusi o‘zgartirilgan (qoraytirilgan) oynalar o‘rnatilgan avtotransport vositalaridan foydalanish uchun to‘lovlarni tartibga solish bo‘yicha takliflar kiritsin;

manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

5. “Davlat belgisi” davlat-ishlab chiqarish birlashmasi mazkur qarorni inobatga olgan holda, O‘zbekiston Respublikasi Ichki ishlar vazirligining buyurtmasi bo‘yicha tusni o‘zgartirishga (qoraytirishga) ruxsatnomalar blankalari va maxsus emblemalarni (gologrammalarni) o‘z vaqtida tayyorlashni ta’minlasin.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — transport vaziri A.J. Ramatov va O‘zbekiston Respublikasi ichki ishlar vaziri P.R. Bobojonov zimmasiga yuklansin.

1. Vazirlar Mahkamasining 2012-yil 4-iyuldagi 191-son qarori (O‘zbekiston Respublikasi QHT, 2012-y., 26-27-son, 298-modda) bilan tasdiqlangan “Avtotransport vositalari konstruksiyasining foydalanish shartlari bo‘yicha xavfsizligi to‘g‘risida”gi umumiy texnik reglamentning 74-bandi birinchi va ikkinchi xatboshilarining rus tilidagi matni quyidagi tahrirda bayon etilsin:

“74. Svetopropuskaniye perednix lobovix, bokovix i zadnix stekol na vsex transportnix sredstvax doljno sostavlyat ne meneye 70%. Dannie trebovaniya ne primenyayutsya k steklam lyukov, ustanovlennix na krishe avtotransportnogo sredstva, a takje k tonirovannim (zatemnennim) steklam avtotransportnix sredstv, ustanovlennim na osnovanii razresheniya organov vnutrennix del.

Na avtotransportnix sredstvax vsex kategoriy, pri nalichii s obeix storon narujnix zerkal zadnego vida, kotorie udovletvoryayut trebovaniya nastoyaщego Texnicheskogo reglamenta, dopuskayetsya tonirovaniye (zatemneniye) zadnego lobovogo stekla bez ogranicheniya svetopropuskaniya, a takje nalichiye na nem zanaveski (jalyuzi, shtorka)”.

3. Vazirlar Mahkamasining “O‘zbekiston Respublikasi Ichki ishlar vazirligining Davlat yo‘l harakati xavfsizligi xizmati xodimlarini moddiy rag‘batlantirish tizimini yanada takomillashtirish chora-tadbirlari to‘g‘risida” 2018-yil 6-iyuldagi 514-son qarorida (O‘zbekiston Respublikasi QT, 2018-y., 7-son, 169-modda):

2-banddagi “Davlat yo‘l harakati xavfsizligi xizmati xodimlarini rag‘batlantirish va mukofotlash jamg‘armasi” so‘zlari “Davlat yo‘l harakati xavfsizligi xizmatining moddiy-texnika bazasini rivojlantirish, xodimlarini rag‘batlantirish va mukofotlash jamg‘armasi” so‘zlari bilan almashtirilsin.

3-bandda:

ikkinchi xatboshiga “summaning 10 foizi” so‘zlaridan keyin “shuningdek, avtotransport vositalari oynalarining tusini o‘zgartirishga (qoraytirishga) ruxsatnoma berishdan tushadigan mablag‘lar” so‘zlari qo‘shilsin;

uchinchi xatboshiga “mukofotlash uchun” so‘zlaridan keyin “shuningdek, avtotransport vositalari oynalarining tusini o‘zgartirish (qoraytirish) uchun sarflanadigan materiallarni xarid qilish bilan bog‘liq harajatlarni qoplash, DYHXX moddiy-texnika bazasini rivojlantirish va qonunchilikda belgilangan boshqa maqsadlarda” so‘zlari qo‘shilsin.

4. Vazirlar Mahkamasining “Tusi o‘zgartirilgan (qoraytirilgan) oynali yengil avtotransport vositalaridan foydalanishni tartibga solish chora-tadbirlari to‘g‘risida” 2018-yil 18-iyuldagi 547-son qarorida (O‘zbekiston Respublikasi QT, 2018-y., 7-son, 181-modda):

nomlanishidagi “yengil” so‘zi chiqarib tashlansin;

2-band quyidagi tahrirda bayon etilsin:

“2. Shunday tartib joriy etilsinki, unga ko‘ra:

a) yengil avtomobillar orqa yon oynalarining tusini yorug‘lik o‘tkazuvchanligi — cheklanmagan darajada, old yon oynalarining tusini yorug‘lik o‘tkazuvchanligi — 50 foizdan kam bo‘lmagan darajada, shuningdek, turistik yo‘nalishlarda yo‘lovchi tashish faoliyatini amalga oshiruvchi avtobus, mikroavtobus va minivenlar (keyingi o‘rinlarda turistik avtobuslar deb ataladi) yon oynalarining tusini yorug‘lik o‘tkazuvchanligi — 50 foizdan kam bo‘lmagan darajada o‘zgartirish (qoraytirish) tasdiqlangan davlat standarti bo‘yicha O‘zbekiston Respublikasi Ichki ishlar vazirligi Davlat yo‘l harakati xavfsizligi xizmati tomonidan 1 yil muddatga beriladigan ruxsatnomaga asosan amalga oshiriladi;

b) avtotransport vositalari orqa oynasining tusini, shuningdek, avtotransport vositalari old oynasining tepa qismi tusini 14 sm dan ko‘p bo‘lmagan polosa shaklida yorug‘lik o‘tkazuvchanligi cheklanmagan darajada o‘zgartirish (qoraytirish) ruxsatnomasiz, tasdiqlangan davlat standarti asosida amalga oshiriladi;

v) yengil avtotransport vositalari oynalarining tusini o‘zgartirishga (qoraytirishga) ruxsatnoma berish uchun to‘lov stavkalari:

orqa yon oynalar bo‘yicha jismoniy shaxslar uchun — bazaviy hisoblash miqdorining o‘n baravari miqdorini, yuridik shaxslar uchun — bazaviy hisoblash miqdorining o‘n baravari miqdorini va O‘zbekiston Respublikasida faoliyat ko‘rsatayotgan xorijiy davlatlar yuridik shaxslari uchun — bazaviy hisoblash miqdorining yigirma baravari miqdorini;

orqa va old yon oynalar bo‘yicha jismoniy shaxslar uchun — bazaviy hisoblash miqdorining ellik baravari miqdorini, yuridik shaxslar uchun — bazaviy hisoblash miqdorining ellik baravari miqdorini va O‘zbekiston Respublikasida faoliyat ko‘rsatayotgan xorijiy davlatlar yuridik shaxslari uchun — bazaviy hisoblash miqdorining sakson baravari miqdorini tashkil etadi;

g) turistik avtobuslar yon oynalarining tusini o‘zgartirishga (qoraytirishga) ruxsatnoma berish uchun to‘lov stavkalari ularning egalari huquqiy holati inobatga olingan holda, tegishli litsenziyani ko‘rsatish asosida ushbu bandning “v” kichik bandi uchinchi xatboshisiga muvofiq belgilanadi;

d) avtotransport vositalari oynalarining tusini o‘zgartirishga (qoraytirishga) ruxsatnoma berish uchun tushadigan mablag‘lar O‘zbekiston Respublikasi Ichki ishlar vazirligi Yo‘l harakati xavfsizligi bosh boshqarmasi Davlat yo‘l harakati xavfsizligi xizmatining moddiy-texnika bazasini rivojlantirish, xodimlarini rag‘batlantirish va mukofotlash jamg‘armasiga yo‘naltiriladi hamda avtotransport vositalari oynalarining tusini o‘zgartirish (qoraytirish) uchun sarflanadigan materiallarni xarid qilish bilan bog‘liq bo‘lgan harajatlarni qoplashga, DYHXX moddiy-texnika bazasini va avtomobil parkini rivojlantirishga, shuningdek, xodimlarini rag‘batlantirishga maqsadli yo‘naltiriladi;

e) O‘zbekiston Respublikasi ichki ishlar vaziriga avtotransport vositalari oynalarining tusini o‘zgartirishga (qoraytirishga) ruxsatnoma berishdan tushadigan mablag‘lar hisobidan DYHXX xodimlarining (ishchi va xizmatchilar) qo‘shimcha shtat birliklarini kiritish huquqi beriladi;

j) xorijiy davlatlarning oynalari tusi o‘zgartirilgan (qoraytirilgan) yengil avtotransport vositalarining O‘zbekiston Respublikasi hududiga vaqtincha kirishi va tranzit harakatlanishi uchun O‘zbekiston Respublikasi Davlat budjetiga tushadigan 15 AQSh dollari miqdorida yig‘im undiriladi.

Izoh. 2019-yilning 1-sentabriga qadar avtotransport vositalari oynalarining tusini o‘zgartirishga (qoraytirishga) ruxsatnoma berish uchun to‘lovlar stavkasi eng kam ish haqidan kelib chiqib hisoblanadi”;

3-bandning ikkinchi xatboshisi chiqarib tashlansin.