Tadbirkorlik subyektlarini tugatish tartibini soddalashtirish, tugatish jarayonini amalga oshirishda tadbirkorlik subyektlari uchun asossiz xarajatlar qilishga olib keluvchi ortiqcha ma’muriy cheklovlarni bekor qilish, biznesni yuritish bo‘yicha xalqaro reyting va indekslarda O‘zbekiston Respublikasining o‘rnini yanada yaxshilash, shuningdek 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturida belgilangan vazifalarni amalga oshirish maqsadida:

1. O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil, Davlat soliq qo‘mitasi va Adliya vazirligining 2020-yil 1-yanvardan boshlab:

moliya-xo‘jalik faoliyatini amalga oshirmayotgan va (yoki) qonunchilikda belgilangan muddatlarda o‘zlarining ustav jamg‘armalarini shakllantirmagan korxonalarni tugatish bo‘yicha doimiy ishlovchi maxsus hududiy komissiyalarni tugatish;

davlat ro‘yxatidan o‘tkazilgan paytdan e’tiboran bir yil ichida ustav fondi ta’sis hujjatlarida nazarda tutilgan miqdorda shakllantirilmaganligi uchun tadbirkorlik subyektlarini tugatish tartibini bekor qilish;

davlat organlari o‘rtasida elektron axborot almashinuvini joriy etish orqali tadbirkorlik subyektlarini tugatish jarayonidagi ortiqcha hujjatlar va tartib-taomillarni qisqartirish to‘g‘risidagi takliflariga rozilik berilsin.

2. 2020-yil 1-yanvardan boshlab shunday tartib joriy etilsinki, unga muvofiq:

a) tadbirkorlik subyektlari — yuridik shaxslarni (keyingi o‘rinlarda — korxonalar) ixtiyoriy tugatishda:

bir yoki bir necha davriy bosma nashrlarda korxonaning tugatilishi to‘g‘risida e’lonlar berish talab etilmaydi, bunda tegishli ma’lumotlar ro‘yxatdan o‘tkazuvchi organning rasmiy saytiga joylashtiriladi;

davlat ro‘yxatidan o‘tkazilgan vaqtdan boshlab moliya-xo‘jalik faoliyatini amalga oshirmagan hamda soliq qarzi mavjud bo‘lmagan korxonalarning moliya-xo‘jalik faoliyati tekshirilmaydi;

davlat soliq xizmati organlari tomonidan o‘tkaziladigan, tugatiladigan korxonaning moliya-xo‘jalik faoliyatini tekshirishning eng uzoq davriyligi uch yilni tashkil etadi;

moliya-xo‘jalik faoliyatini tekshirish uchun vakolatli davlat organlaridan korxona to‘g‘risidagi mavjud ma’lumotlarni olish Tadbirkorlik subyektlarini davlat ro‘yxatidan o‘tkazish va hisobga qo‘yishning avtomatlashtirilgan tizimi (keyingi o‘rinlarda — Tizim) orqali amalga oshiriladi;

korxonani ixtiyoriy tugatishning umumiy muddati ro‘yxatdan o‘tkazuvchi organ ixtiyoriy tugatish to‘g‘risida xabardor qilingan kundan boshlab olti oydan oshmasligi kerak;

b) tadbirkorlik subyektlari — jismoniy shaxslar faoliyatini to‘xtatishda ariza beruvchi tomonidan davlat soliq xizmati organining soliqlar va boshqa majburiy to‘lovlar bo‘yicha qarzi yo‘qligi to‘g‘risidagi xulosasini olish talab etilmaydi;

v) korxonani moliya-xo‘jalik faoliyatini amalga oshirmayotgan deb hisoblash uchun quyidagilar asos bo‘ladi:

davlat ro‘yxatidan o‘tgan sanadan boshlab uch oy mobaynida bank hisobvaraqlarini ochmaganligi;

bank hisobvaraqlarini ochgan, biroq olti oy mobaynida:

moliya-xo‘jalik faoliyati bo‘yicha bank hisobvaraqlariga mablag‘lar tushirmaganligi;

elektron hisobvaraq-fakturalarni rasmiylashtirmaganligi;

onlayn nazorat-kassa mashinalari, virtual kassa yoki marketpleys to‘lov tizimidan foydalanmaganligi;

tashqi savdo operatsiyalarini amalga oshirmaganligi;

g) moliya-xo‘jalik faoliyatini amalga oshirmayotgan korxonalarni tugatishda:

moliya-xo‘jalik faoliyatini amalga oshirmayotgan korxonalar davlat soliq xizmati organining taqdimnomasiga asosan ro‘yxatdan o‘tkazuvchi organ tomonidan bir yil muddatga harakatsiz rejimga o‘tkaziladi;

harakatsiz rejimga o‘tkazilgan korxonalar faoliyati bir yil davomida tiklanmagan taqdirda, ro‘yxatdan o‘tkazuvchi organ ularni Tadbirkorlik subyektlarining yagona davlat reyestridan chiqaradi.

3. Belgilab qo‘yilsinki, Tizimga ulangan davlat organlari va boshqa tashkilotlari tomonidan tegishli axborotlarning o‘z vaqtida, to‘liq va ishonchli tarzda kiritilishini ta’minlamaslik davlat xizmatlari ko‘rsatilishining belgilangan tartibini buzish deb hisoblanadi.

O‘zbekiston Respublikasi Adliya vazirligi Tizimga ulangan davlat organlari va boshqa tashkilotlari tomonidan tegishli axborotlar o‘z vaqtida, to‘liq va ishonchli tarzda kiritilishi ustidan, shu jumladan Tizim orqali doimiy nazorat o‘rnatsin.

4. O‘zbekiston Respublikasi Vazirlar Mahkamasi huzuridagi “O‘zarxiv” agentligi bir oy muddatda ixtiyoriy tugatilayotgan tadbirkorlik subyektlarining hujjatlarini qabul qilishda arxiv xizmatlarining amaldagi normativ bo‘yicha aniqlanadigan narxlarini ikki barobargacha pasaytirish choralarini ko‘rsin hamda natijasi bo‘yicha Vazirlar Mahkamasiga axborot kiritsin.

5. O‘zbekiston Respublikasi Davlat soliq qo‘mitasi, Adliya vazirligi Vazirlar Mahkamasiga ikki oy muddatda:

O‘zbekiston Respublikasi Prezidenti huzuridagi Loyiha boshqaruvi milliy agentligi, Axborot texnologiyalari va kommunikatsiyalarini rivojlantirish vazirligi hamda Moliya vazirligi bilan birgalikda Tizimni mazkur Farmon talablariga moslashtirish, manfaatdor davlat organlari va tashkilotlarining unga ulanishlarini tashkil etish bo‘yicha moliyalashtirish manbalari aniq ko‘rsatilgan chora-tadbirlar dasturini;

O‘zbekiston Respublikasi Oliy sudi, O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil bilan birgalikda O‘zbekiston Respublikasining Fuqarolik kodeksi, Iqtisodiy protsessual kodeksi hamda “Tadbirkorlik faoliyati erkinligining kafolatlari to‘g‘risida”gi Qonuniga moliya-xo‘jalik faoliyatini amalga oshirmayotgan korxonalarni ro‘yxatdan o‘tkazuvchi organ tomonidan uch yil muddatga harakatsiz rejimga o‘tkazish, faoliyati uch yil davomida tiklanmagan taqdirda ularni Tadbirkorlik subyektlarining Yagona davlat reyestridan chiqarishni nazarda tutuvchi o‘zgartirish va qo‘shimchalar kiritish to‘g‘risidagi takliflarni;

manfaatdor vazirlik va idoralar bilan birgalikda Tadbirkorlik subyektlarini ixtiyoriy tugatish va ularning faoliyatini to‘xtatish tartibi to‘g‘risidagi nizom hamda Moliya-xo‘jalik faoliyatini amalga oshirmayotgan tadbirkorlik subyektlarini davlat reyestridan chiqarish tartibi to‘g‘risidagi nizom loyihalarini;

manfaatdor vazirlik va idoralar bilan birgalikda qonun hujjatlariga mazkur Farmondan kelib chiqadigan o‘zgartirish va qo‘shimchalar to‘g‘risidagi takliflarni kiritsin.

6. O‘zbekiston Respublikasi Prezidentining ayrim hujjatlari 2020-yil 1-yanvardan e’tiboran ilovaga muvofiq o‘z kuchini yo‘qotgan deb hisoblansin.

7. Mazkur Farmonning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.

1. O‘zbekiston Respublikasi Prezidentining 1999-yil 28-iyundagi PF-2331-son “Moliya-xo‘jalik faoliyatini amalga oshirmayotgan va qonunchilikda belgilangan muddatlarda o‘zlarining ustav jamg‘armalarini shakllantirmagan korxonalarni tugatish tartibini soddalashtirish chora-tadbirlari to‘g‘risida”gi Farmoni (O‘zbekiston Respublikasi Oliy Majlisining Axborotnomasi, 1999 y, 6-son, 155-modda).

4. O‘zbekiston Respublikasi Prezidentining 2012-yil 3-oktabrdagi PF-4473-son “O‘zbekiston Respublikasi Prezidentining ayrim hujjatlariga o‘zgartishlar kiritish to‘g‘risida”gi Farmoniga (O‘zbekiston Respublikasi QT, 2012-yil, 40-son, 466-modda) 1-ilovaning 9-bandi.

5. O‘zbekiston Respublikasi Prezidentining 2014-yil 8-iyuldagi PF-4631-son “O‘zbekiston Respublikasi Prezidentining ayrim hujjatlariga o‘zgartish va qo‘shimchalar kiritish to‘g‘risida”gi Farmoniga (O‘zbekiston Respublikasi QT, 2014-yil 21-iyul, 29-son, 356-modda) ilovaning 7 va 33-bandlari.

6. O‘zbekiston Respublikasi Prezidentining 2017-yil 24-maydagi PF-5055-son “O‘zbekiston Respublikasi Prezidentining ayrim hujjatlariga o‘zgartish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida”gi Farmoniga (O‘zbekiston Respublikasi QT, 2017-yil 5-iyun, 22-son, 411-modda) 1-ilovaning 3-bandi.

7. O‘zbekiston Respublikasi Prezidentining 2017-yil 11-sentabrdagi PF-5187-son “O‘zbekiston Respublikasi Prezidentining ayrim hujjatlariga o‘zgartishlar kiritish, ba’zilarini esa o‘z kuchini yo‘qotgan, deb hisoblash to‘g‘risida”gi Farmoniga (O‘zbekiston Respublikasi QT, 2017-yil 18-sentabr, 37-son, 980-modda) 1-ilovaning 5-bandi.

8. O‘zbekiston Respublikasi Prezidentining 2017-yil 9-oktabrdagi PF-5200-son “O‘zbekiston Respublikasi Prezidentining ayrim hujjatlariga o‘zgartish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida”gi Farmoniga 1-ilovaning 3-bandi.

9. O‘zbekiston Respublikasi Prezidentining 2018-yil 15-yanvardagi PF-5302-son “O‘zbekiston Respublikasi Prezidentining ayrim hujjatlariga o‘zgartish va qo‘shimchalar kiritish to‘g‘risida”gi Farmoniga ilovaning 1-bandi.

10. O‘zbekiston Respublikasi Prezidentining 2018-yil 18-yanvardagi PF-5304-son “O‘zbekiston Respublikasi Prezidentining ayrim hujjatlariga o‘zgartishlar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Fermer, dehqon xo‘jaliklari va tomorqa yer egalarining huquqlari va qonuniy manfaatlarini himoya qilish, qishloq xo‘jaligi ekin maydonlaridan samarali foydalanish tizimini tubdan takomillashtirish chora-tadbirlari to‘g‘risida” 2017-yil 9-oktabrdagi PF-5199-sonli Farmoni)”gi Farmoniga 1-ilovaning 1-bandi.

11. O‘zbekiston Respublikasi Prezidentining 2018-yil 17-apreldagi PF-5420-son “O‘zbekiston Respublikasi Prezidentining ayrim hujjatlariga o‘zgartirish va qo‘shimchalar kiritish to‘g‘risida”gi Farmoniga ilovaning 4-bandi.

12. O‘zbekiston Respublikasi Prezidentining 2007-yil 27-apreldagi PQ-630-son “Tadbirkorlik subyektlarini ixtiyoriy tugatish va ularning faoliyatini to‘xtatish tartibini takomillashtirish to‘g‘risida”gi qarori (O‘zbekiston Respublikasi QT, 2007-yil, 17-18-son, 179-modda).

14. O‘zbekiston Respublikasi Prezidentining 2013-yil 31-oktabrdagi PQ-2060-son “O‘zbekiston Respublikasi Prezidentining “O‘zbekiston Respublikasi Prezidentining ayrim qarorlariga o‘zgartish va qo‘shimchalar kiritish to‘g‘risida”gi qarori (O‘zbekiston Respublikasi QT, 2013-yil 11-noyabr, 45-son, 585-modda).

15. O‘zbekiston Respublikasi Prezidentining 2017-yil 22-maydagi PQ-2985-son “O‘zbekiston Respublikasi Prezidentining “O‘zbekiston Respublikasi tadbirkorlik subyektlarini ixtiyoriy tugatish va ularning faoliyatini to‘xtatish tartibi to‘g‘risidagi nizomga qo‘shimcha va o‘zgartishlar kiritish to‘g‘risida”gi qarori (O‘zbekiston Respublikasi QT, 2017-yil 29-may, 21-son, 386-modda).