LexUZ sharhi
Mazkur qaror O‘zbekiston Respublikasi iqtisodiyot va moliya vazirining 2023-yil 11-dekabrdagi 93-sonli ““Fuqarolar va tadbirkorlik subyektlarining ko‘chmas mulk obyektlariga bo‘lgan huquqlarni davlat ro‘yxatidan o‘tkazish sohasidagi arizalari va shikoyatlarini ko‘rib chiqish tartibi to‘g‘risidagi nizomni tasdiqlash haqida”gi qaror, shuningdek unga o‘zgartirishlar va qo‘shimchani o‘z kuchini yo‘qotgan deb topish to‘g‘risida”gi buyrug‘iga (ro‘yxat raqami 3156-3, 21.12.2023-y.) asosan o‘z kuchini yo‘qotgan.
O‘zbekiston Respublikasi Vazirlar Mahkamasining 2018-yil 29-dekabrdagi 1060-son “Ko‘chmas mulk obyektlariga bo‘lgan huquqlarni davlat ro‘yxatidan o‘tkazish tartibini takomillashtirish chora-tadbirlari to‘g‘risida”gi qaroriga muvofiq O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi qaror qiladi:
1. Fuqarolar va tadbirkorlik subyektlarining ko‘chmas mulk obyektlariga bo‘lgan huquqlarni davlat ro‘yxatidan o‘tkazish sohasidagi arizalari va shikoyatlarini ko‘rib chiqish tartibi to‘g‘risidagi nizom ilovaga muvofiq tasdiqlansin.
O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasining 2019-yil 11-martdagi 4-son qaroriga
ILOVA
ILOVA
Mazkur Nizom O‘zbekiston Respublikasi Vazirlar Mahkamasining 2018-yil 29-dekabrdagi 1060-son “Ko‘chmas mulk obyektlariga bo‘lgan huquqlarni davlat ro‘yxatidan o‘tkazish tartibini takomillashtirish chora-tadbirlari to‘g‘risida”gi qaroriga muvofiq fuqarolar va tadbirkorlik subyektlarining (bundan buyon matnda manfaatdor shaxs deb yuritiladi) ko‘chmas mulk obyektlariga bo‘lgan huquqlarni davlat ro‘yxatidan o‘tkazish sohasidagi arizalari va shikoyatlarini (bundan buyon matnda murojaat deb yuritiladi) ko‘rib chiqilishi tartibini belgilaydi.
ko‘chmas mulk obyektlari — yer uchastkalari, yer osti boyliklari, binolar, inshootlar, ko‘p yillik dov-daraxtlar va yer bilan uzviy bog‘langan boshqa mol-mulk, ya’ni belgilangan maqsadiga nomutanosib zarar yetkazmagan holda joyini o‘zgartirish mumkin bo‘lmaydigan obyektlar;
ko‘chmas mulk obyektlariga bo‘lgan huquqlarni davlat ro‘yxatidan o‘tkazish — manfaatdor shaxslarning, jumladan bitimlar asosida yuzaga keladigan ko‘chmas mulk obyektlariga bo‘lgan huquqlarining vujudga kelishi, boshqa shaxsga o‘tishi, bekor bo‘lishini tan olish hamda tasdiqlash;
ro‘yxatdan o‘tkazuvchi — O‘zbekiston Respublikasi Iqtisodiyot va moliya vazirligi huzuridagi Kadastr agentligi Davlat kadastrlari palatasi (bundan buyon matnda Davlat kadastrlari palatasi deb yuritiladi) va uning Qoraqalpog‘iston Respublikasi, viloyatlar va Toshkent shahar boshqarmalari (bundan buyon matnda hududiy boshqarma deb yuritiladi) rahbarlari tomonidan tayinlanadigan mas’ul shaxslar.
(1-bandning to‘rtinchi xatboshisi O‘zbekiston Respublikasi iqtisodiyot va moliya vazirining 2023-yil 6-iyuldagi 51-sonli buyrug‘i (ro‘yxat raqami 3450, 31.07.2023-y.) tahririda — Qonunchilik ma’lumotlari milliy bazasi, 01.08.2023-y., 10/23/3450/0546-son)
2. Manfaatdor shaxslarning ko‘chmas mulk obyektlariga bo‘lgan huquqlarni davlat ro‘yxatidan o‘tkazish yuzasidan murojaatlari Davlat kadastrlari palatasi va uning hududiy boshqarmalari qoshidagi doimiy ravishda faoliyat yuritadigan komissiyalar (bundan buyon matnda komissiya deb yuritiladi) tomonidan ko‘rib chiqiladi.
(2-band O‘zbekiston Respublikasi Davlat soliq qo‘mitasi huzuridagi Kadastr agentligi direktorining 2022-yil 6-iyundagi 4-2022-sonli buyrug‘i (ro‘yxat raqami 3156-2, 20.06.2022-y.) tahririda — Qonunchilik ma’lumotlari milliy bazasi, 20.06.2022-y., 10/22/3156-2/0540-son)
3. Komissiya tomonidan manfaatdor shaxslarning murojaatlarini ko‘rib chiqish bepul amalga oshiriladi.
4. Ko‘chmas mulk obyektlariga bo‘lgan huquqlarni davlat ro‘yxatidan o‘tkazish bilan bog‘liq nizo sud tartibida ko‘rib chiqilgan hollarda komissiya tomonidan qayta ko‘rib chiqilmaydi.
5. Komissiya tegishliligiga ko‘ra Davlat kadastrlari palatasi raisi va hududiy boshqarma rahbarining buyrug‘iga asosan 5 kishidan kam bo‘lmagan toq sondagi (komissiya raisi, kotibi va a’zolari) tarkibda tuziladi.
(5-band O‘zbekiston Respublikasi Davlat soliq qo‘mitasi huzuridagi Kadastr agentligi direktorining 2022-yil 6-iyundagi 4-2022-sonli buyrug‘i (ro‘yxat raqami 3156-2, 20.06.2022-y.) tahririda — Qonunchilik ma’lumotlari milliy bazasi, 20.06.2022-y., 10/22/3156-2/0540-son)
6. Komissiya tarkibi tegishliligiga ko‘ra Davlat kadastrlari palatasi, uning hududiy boshqarmasi, shuningdek Qoraqalpog‘iston Respublikasi Qurilish va uy-joy kommunal xo‘jaligi vazirligi, viloyatlar va Toshkent shahar qurilish va uy-joy kommunal xo‘jaligi bosh boshqarmalari hamda Qoraqalpog‘iston Respublikasi, viloyatlar va Toshkent shahar soliq boshqarmalari mas’ul xodimlari orasidan shakllantiriladi.
(6-band O‘zbekiston Respublikasi iqtisodiyot va moliya vazirining 2023-yil 6-iyuldagi 51-sonli buyrug‘i (ro‘yxat raqami 3450, 31.07.2023-y.) tahririda — Qonunchilik ma’lumotlari milliy bazasi, 01.08.2023-y., 10/23/3450/0546-son)
7. Ko‘chmas mulk obyektlariga bo‘lgan huquqlarni davlat ro‘yxatidan o‘tkazish haqida qaror qabul qilgan yoki davlat ro‘yxatidan o‘tkazishni rad etgan shaxs komissiya a’zosi bo‘lishi mumkin emas.
8. Tegishliligiga ko‘ra Davlat kadastrlari palatasi raisi va uning hududiy boshqarmasi rahbari komissiya raisi hisoblanadi.
(8-band O‘zbekiston Respublikasi Davlat soliq qo‘mitasi huzuridagi Kadastr agentligi direktorining 2022-yil 6-iyundagi 4-2022-sonli buyrug‘i (ro‘yxat raqami 3156-2, 20.06.2022-y.) tahririda — Qonunchilik ma’lumotlari milliy bazasi, 20.06.2022-y., 10/22/3156-2/0540-son)
(9-band O‘zbekiston Respublikasi adliya vazirining 2021-yil 28-iyuldagi 16-mh-sonli buyrug‘i (ro‘yxat raqami 3313, 28.07.2021-y.) tahririda — Qonunchilik ma’lumotlari milliy bazasi, 28.07.2021-y., 10/21/3313/0724-son)
11. Komissiya raisi komissiya ishini tashkil qilish va uni o‘z vaqtida, to‘g‘ri va haqqoniy o‘tkazilishi uchun mas’ul hisoblanadi.
12. Manfaatdor shaxslardan kelib tushgan murojaatlarni hamda komissiya ishi bilan bog‘liq hujjatlarni saqlanishi uchun komissiya kotibi mas’ul hisoblanadi.
13. Manfaatdor shaxs komissiyaga ko‘chmas mulk obyektlariga bo‘lgan huquqlarni davlat ro‘yxatidan o‘tkazish yuzasidan murojaat qilishi mumkin.
14. Jismoniy shaxsning murojaatida uning familiyasi (ismi, otasining ismi), yashash joyi, shuningdek yuridik shaxsning murojaatida yuridik shaxsning to‘liq nomi, uning joylashgan eri (pochta manzili) to‘g‘risidagi ma’lumotlar ko‘rsatilgan bo‘lishi kerak.
Murojaatda manfaatdor shaxsning elektron pochta manzili, aloqa telefonlari va fakslari raqamlari ko‘rsatilishi mumkin.
15. Murojaatda ko‘chmas mulk obyektining joylashgan eri (pochta manzili) haqidagi ma’lumotlar ko‘rsatilishi tavsiya etiladi.
16. Murojaatga ko‘chmas mulk obyekti bilan bog‘liq boshqa ma’lumotlar va hujjatlar ilova qilinishi mumkin.
17. O‘zbekiston Respublikasi Vazirlar Mahkamasining 2018-yil 29-dekabrdagi 1060-son “Ko‘chmas mulk obyektlariga bo‘lgan huquqlarni davlat ro‘yxatidan o‘tkazish tartibini takomillashtirish chora-tadbirlari to‘g‘risida”gi qaroriga asosan komissiya manfaatdor shaxsning murojaatini u kelib tushgan kundan boshlab 10 kun ichida ko‘rib chiqishi lozim.
18. Komissiya kotibi kelib tushgan murojaatlarni shu kunning o‘zida Murojaatlarni ro‘yxatga olish kitobiga tegishli yozuv kiritish orqali qayd qiladi.
19. Komissiya kotibi kelib tushgan murojaatlarning to‘g‘riligini hamda undagi ma’lumotlar to‘liq ko‘rsatilganligini o‘rganadi.
20. Jismoniy shaxsning familiyasi (ismi, otasining ismi), uning yashash joyi to‘g‘risidagi ma’lumotlar yoki yuridik shaxsning to‘liq nomi, uning joylashgan eri (pochta manzili) to‘g‘risidagi ma’lumotlar ko‘rsatilmagan yoxud ular haqida yolg‘on ma’lumotlar ko‘rsatilgan murojaat, shuningdek uni identifikatsiya qilish imkoniyatini bermaydigan elektron murojaat yoxud imzo bilan tasdiqlanmagan yozma murojaat anonim murojaat hisoblanadi va komissiya tomonidan ko‘rib chiqilmaydi.
Murojaatlar ko‘rmay qoldirilganda tegishli xulosa tuziladi, u komissiya raisi tomonidan tasdiqlanadi.
21. Komissiyaga kelib tushgan murojaatlarning soni bir yoki bir nechta bo‘lishidan qat’i nazar, komissiya mazkur Nizomning 17-bandida belgilangan muddatlarda murojaatlarni ko‘rib chiqishi shart.
23. Komissiya kotibi komissiya a’zolarini komissiya majlisi o‘tkaziladigan kundan kamida 3 kun oldin xabardor qilishi lozim.
24. Komissiya taqdim etilgan murojaatni manfaatdor shaxs yoki uning qonuniy vakili ishtirokida ko‘rib chiqadi.
(24-band O‘zbekiston Respublikasi Davlat soliq qo‘mitasi huzuridagi Kadastr agentligi direktorining 2022-yil 6-iyundagi 4-2022-sonli buyrug‘i (ro‘yxat raqami 3156-2, 20.06.2022-y.) tahririda — Qonunchilik ma’lumotlari milliy bazasi, 20.06.2022-y., 10/22/3156-2/0540-son)
25. Komissiya majlisida murojaatni ko‘rib chiqish natijasi bo‘yicha komissiya a’zolari murojaatda nazarda tutilgan masalaning barcha holatlarini hisobga olgan holda quyidagi qarorlardan birini qabul qiladi:
ro‘yxatdan o‘tkazuvchining ko‘chmas mulk obyektiga bo‘lgan huquqni davlat ro‘yxatidan o‘tkazish haqidagi qarorini bekor qilish lozimligi to‘g‘risida;
ro‘yxatdan o‘tkazuvchining ko‘chmas mulk obyektiga bo‘lgan huquqni davlat ro‘yxatidan o‘tkazishni rad etish haqidagi qarorini bekor qilish va ko‘chmas mulk obyektiga bo‘lgan huquqni davlat ro‘yxatidan o‘tkazish lozimligi to‘g‘risida;
ro‘yxatdan o‘tkazuvchining ko‘chmas mulk obyektiga bo‘lgan huquqni davlat ro‘yxatidan o‘tkazish haqidagi qarorini o‘z kuchida qoldirish lozimligi to‘g‘risida;
ro‘yxatdan o‘tkazuvchining ko‘chmas mulk obyektiga bo‘lgan huquqni davlat ro‘yxatidan o‘tkazishni rad etish haqidagi qarorini o‘z kuchida qoldirish lozimligi to‘g‘risida.
26. Komissiya qarori komissiya a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolgan taqdirda, komissiya raisining ovozi hal qiluvchi hisoblanadi.
27. Komissiya majlisi bayonnoma bilan rasmiylashtiriladi. Bunda komissiya majlisi bayonnomalarini rasmiylashtirish komissiya kotibi tomonidan amalga oshiriladi.
28. Komissiyaning qabul qilgan qarori asosida komissiya kotibi tomonidan 3 ta nusxada xulosa rasmiylashtiriladi.
29. Xulosada tegishliligi bo‘yicha manfaatdor shaxsning F.I.O. yoki yuridik shaxsning to‘liq nomi, ko‘chmas mulk obyekti haqidagi tegishli ma’lumotlar hamda komissiya tomonidan mazkur murojaat yuzasidan qabul qilingan qaror ko‘rsatilishi kerak.
30. Xulosalar komissiyaning har bir a’zosi tomonidan imzolanadi hamda tasdiqlash uchun komissiya raisiga taqdim etiladi.
31. Komissiya kotibi komissiya raisi tomonidan tasdiqlangan xulosalarni shu kunning o‘zida bir nusxadan ro‘yxatdan o‘tkazuvchi va manfaatdor shaxsga yetkazilishini ta’minlaydi.
33. Ko‘chmas mulk obyektiga bo‘lgan huquq yuzasidan aniqlangan yangi holatlar asosida komissiya tomonidan qabul qilingan qaror qayta ko‘rib chiqilishi mumkin.
34. O‘zbekiston Respublikasi Iqtisodiyot va moliya vazirligi huzuridagi Kadastr agentligi direktorining buyrug‘i bilan Apellatsiya komissiyasi tuziladi. Apellatsiya komissiyasi tarkibiga Iqtisodiyot va moliya vazirligi huzuridagi Kadastr agentligining, O‘zbekiston Respublikasi Qurilish va uy-joy kommunal xo‘jaligi vazirligining hamda O‘zbekiston Respublikasi Iqtisodiyot va moliya vazirligi huzuridagi Soliq qo‘mitasining komissiya faoliyatida ishtirok etmagan mas’ul xodimlari orasidan Apellatsiya komissiyasi raisi va kamida to‘rt nafar a’zo kiritiladi.
(34-band O‘zbekiston Respublikasi iqtisodiyot va moliya vazirining 2023-yil 6-iyuldagi 51-sonli buyrug‘i (ro‘yxat raqami 3450, 31.07.2023-y.) tahririda — Qonunchilik ma’lumotlari milliy bazasi, 01.08.2023-y., 10/23/3450/0546-son)
35. Komissiya xulosasidan norozi bo‘lgan manfaatdor shaxs yoki ro‘yxatdan o‘tkazuvchi komissiya xulosasini olgan kundan boshlab 10 kun davomida Apellatsiya komissiyasiga murojaat qilish huquqiga ega.
36. Manfaatdor shaxs yoki ro‘yxatdan o‘tkazuvchi tomonidan berilgan apellatsiya Apellatsiya komissiyasi tomonidan 10 kun ichida ko‘rib chiqilishi lozim.
37. Apellatsiya komissiyasi manfaatdor shaxs yoki ro‘yxatdan o‘tkazuvchining apellatsiyasini ko‘rib chiqish natijalari bo‘yicha komissiya xulosasini bekor qilish yoki uni o‘z kuchida qoldirish to‘g‘risida qaror qabul qiladi.
38. Apellatsiya komissiyasi tegishli qarorni manfaatdor shaxs va ro‘yxatdan o‘tkazuvchiga yetkazilishini ta’minlaydi.
39. Mazkur Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javobgarlikka tortiladi.
(39-band O‘zbekiston Respublikasi adliya vazirining 2021-yil 28-iyuldagi 16-mh-sonli buyrug‘i (ro‘yxat raqami 3313, 28.07.2021-y.) tahririda — Qonunchilik ma’lumotlari milliy bazasi, 28.07.2021-y., 10/21/3313/0724-son)
40. Ushbu nizom O‘zbekiston Respublikasi Qurilish vazirligi va Davlat soliq qo‘mitasi bilan kelishilgan.