Qizilmiya va boshqa dorivor oʻsimliklarni yetishtirish hamda sanoat usulida qayta ishlashni samarali tashkil etishni taʼminlash, sohaning tadbirkorlik subyektlari uchun jozibadorligini oshirish, shuningdek, yuqori qoʻshilgan qiymatga ega boʻlgan eksportbop mahsulotlar ishlab chiqarish hajmlarini koʻpaytirish maqsadida Vazirlar Mahkamasi qaror qiladi:

1. Quyidagilar Qizilmiya va boshqa dorivor oʻsimliklarni yetishtirish va qayta ishlash tashkilotlari uyushmasining (keyingi oʻrinlarda Uyushma deb ataladi) asosiy vazifalari hisoblansin:

qizilmiya va boshqa dorivor oʻsimliklarni yetishtirish va qayta ishlashni kompleks rivojlantirish dasturlarini shakllantirish hamda ularning amalga oshirilishini muvofiqlashtirishda ishtirok etish, ushbu sohada yagona ilmiy-texnik, texnologik, investitsiya va eksport siyosatini yuritishga koʻmaklashish;

qizilmiya va boshqa dorivor oʻsimliklar oʻsishi uchun qulay hududlarda maxsus plantatsiyalar tashkil etish, shu jumladan yetishtirishning intensiv texnologiyalarini joriy etish orqali va tabiiy oʻsish maydonlaridan oqilona foydalangan holda ularni yetishtirish hajmlarini bosqichma-bosqich oshirib borish;

plantatsiyalarni tashkil etish, shuningdek, qizilmiya va boshqa dorivor oʻsimliklarni sanoat asosida chuqur qayta ishlash hamda ulardan yuqori qoʻshilgan qiymatga ega boʻlgan eksportbop mahsulotlar ishlab chiqarish doirasida tadbirkorlik subyektlarining davlat boshqaruvi organlari, barcha darajadagi mahalliy davlat hokimiyati organlari bilan oʻzaro hamkorligini samarali tashkil etishga koʻmaklashish;

qizilmiya va boshqa dorivor oʻsimliklarni yetishtirish hamda qayta ishlash sohasini rivojlantirishga oid normativ-huquqiy hujjatlar loyihalarini ishlab chiqishda ishtirok etish, shuningdek, jamoatchilik ekologik nazoratini amalga oshirish;

qizilmiya va boshqa dorivor oʻsimliklarni yetishtirish hamda qayta ishlash sohasidagi investitsiya dasturlari va loyihalarining amalga oshirilishini muvofiqlashtirishda ishtirok etish;

qizilmiya va boshqa dorivor oʻsimliklarni yetishtirish hamda qayta ishlash boʻyicha yangi quvvatlarni tashkil etish va mavjudlarini rivojlantirish jarayonlariga xorijiy sarmoyalarni, chet ellik mutaxassislar hamda maslahatchilarni faol jalb etish, ushbu sohada ilgʻor texnologiyalarni joriy etish;

mazkur soha uchun mutaxassislarni tayyorlash va qayta tayyorlash, oliy va oʻrta maxsus, kasb-hunar taʼlimi muassasalarida, shuningdek, xorijda ularning malakasini oshirish ishlarini samarali tashkil etish hamda muvofiqlashtirishda ishtirok etish.

2. Davlat va xoʻjalik boshqaruvi organlari, mahalliy ijro etuvchi hokimiyat organlari Uyushmaga uning soʻrovlari boʻyicha unga yuklangan vazifalarni bajarish bilan bogʻliq zarur axborot, statistika hamda boshqa maʼlumotlar taqdim etilishini taʼminlasinlar.

3. Boshqaruv xodimlarining cheklangan soni 12 nafardan iborat boʻlgan Uyushmaning ijro etuvchi apparati tuzilmasi 1-ilovaga muvofiq maʼqullansin.

4. 2019 — 2023-yillarda Qoraqalpogʻiston Respublikasida qizilmiya oʻsimligi yangi plantatsiyalarini tashkil etishning prognoz parametrlari 2-ilovaga muvofiq tasdiqlansin.

Qoraqalpogʻiston Respublikasi Vazirlar Kengashi Raisi va tumanlari hokimlarining 2019 — 2023-yillarda Qoraqalpogʻiston Respublikasida qizilmiya oʻsimligi yangi plantatsiyalarini tashkil etish prognoz parametrlarining oʻz vaqtida, toʻliq hamda samarali bajarilishini taʼminlash uchun shaxsiy masʼuliyati belgilansin.

5. Uyushma va uning aʼzolari oʻrtasidagi oʻzaro munosabatlar qonun hujjatlariga muvofiq tegishli taʼsis shartnomasi asosida tartibga solinishi maʼlumot uchun qabul qilinsin.

6. Uyushmaning 2019-yil 1-maydan boshlab, qizilmiya ekstrakti ishlab chiqaruvchilari boʻlgan Uyushma aʼzolari uchun 2024-yil 1 yanavargacha 100 gektardan kam boʻlmagan maydonda qizilmiya plantatsiyalarini majburiy tashkil etish boʻyicha talablar belgilash toʻgʻrisidagi taklifiga rozilik berilsin.

7. Uyushma aʼzolariga 2024-yil 1-yanvargacha boʻlgan muddatda qizilmiya va boshqa dorivor oʻsimliklar yetishtirish, qizilmiya va boshqa dorivor oʻsimliklar plantatsiyalarini nazorat qilish hamda monitoringini olib borish jarayonini samarali boshqarish uchun uchuvchisiz uchish apparatlarini olib kirishga ruxsat berilsin.

8. Oʻzbekiston Respublikasi Transport vazirligi huzuridagi Fuqaro aviatsiyasi agentligi zarur hujjatlar taqdim etilgan kundan boshlab oʻn kun muddatda Uyushma aʼzolariga uchuvchisiz uchish apparatlaridan foydalanishga ruxsat etish toʻgʻrisida xulosa berilishini taʼminlasin.

9. Qizilmiya va boshqa dorivor oʻsimliklar plantatsiyalarini tashkil etadigan, shuningdek, qizilmiya va boshqa dorivor oʻsimliklarni qayta ishlaydigan tadbirkorlik subyektlariga 2024-yil 1-yanvargacha boʻlgan muddatga:

a) quyidagilardan:

qizilmiya va boshqa dorivor oʻsimliklarni yetishtirishda va (yoki) qayta ishlashda foydalaniladigan (olinadigan) obyektlar (foyda, daromad) qismida yuridik shaxslardan olinadigan yer soligʻi, yuridik shaxslarning mol-mulkiga solinadigan soliq va foyda soligʻi va aylanmadan olinadigan soliqni toʻlashdan;

belgilangan tartibda shakllantiriladigan roʻyxatlar boʻyicha oʻzlarining ishlab chiqarish ehtiyojlari uchun respublikada ishlab chiqarilmaydigan olib kelinadigan texnologik uskunalar, maxsus qishloq xoʻjaligi texnikalari, ularning butlovchi va ehtiyot qismlari, qizilmiya va boshqa dorivor oʻsimliklar urugʻlari va koʻchatlari uchun bojxona bojidan ozod qilish.

b) plantatsiyalar tashkil etish uchun ekish materiallarini (urugʻ, qalamchalar) tayyorlash (yigʻish) maqsadida ruxsatnoma olish uchun yigʻimlar toʻlovini kechiktirish tarzida imtiyozlar berilsin.

10. Xomashyo koʻrinishidagi qizilmiyani Oʻzbekiston Respublikasidan tashqariga yuqori qoʻshilgan qiymatga ega boʻlgan mahsulot ishlab chiqarish va eksport qilish maqsadida olib chiqish uchun toʻlovlar boʻyicha imtiyozlar berish amaliyoti bekor qilinsin.

11. Belgilab qoʻyilsinki, 2019-yil 1-maydan boshlab:

Xalqaro laboratoriyalarni akkreditatsiya qilish tashkiloti (ILAC) va Xalqaro akkreditatsiya qilish forumining (IAF) toʻlaqonli aʼzolari hisoblangan mamlakatlarning sertifikatlash organlari tomonidan berilgan muvofiqlik sertifikatlari yoki sinovlar protokollari taqdim etilganda, Uyushma aʼzolari faqat oʻzlarining ishlab chiqarish ehtiyojlari, plantatsiyalar tashkil qilish, qizilmiya va boshqa dorivor oʻsimliklardan yuqori qoʻshilgan qiymatga ega boʻlgan mahsulotlar ishlab chiqarish uchun olib kelinadigan tovarlarni sertifikatlash talab etilmaydigan tartib belgilanadi;

qizilmiyadan foydalanish uchun Oʻzbekiston Respublikasi Ekologiya va atrof muhitni muhofaza qilish davlat qoʻmitasi tomonidan tasdiqlanadigan qoʻshimcha kvotalar Uyushmaning buyurtmanomasi boʻyicha Oʻzbekiston Respublikasi Fanlar akademiyasining ijobiy xulosasi hisobga olingan holda joriy yilning 1-aprelidan 30-dekabrigacha boʻlgan davrga ajratiladi.

12. Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasi, Sogʻliqni saqlash vazirligi Qizilmiya va boshqa dorivor oʻsimliklarni yetishtirish va qayta ishlash tashkilotlari uyushmasi bilan birgalikda Oʻzbekiston Respublikasi Prezidentining “Texnik jihatdan tartibga solish, standartlashtirish, sertifikatlashtirish va metrologiya tizimlarini yanada rivojlantirish chora-tadbirlari toʻgʻrisida” 2018-yil 12-dekabrdagi PQ-4059-son qarorining 9-bandi ijrosini taʼminlash doirasida import qilinadigan qizilmiya xomashyosi uchun karantin ruxsatnomasi berilishini bekor qilishning maqsadga muvofiqligi toʻgʻrisidagi masalani ikki hafta muddatda koʻrib chiqsin.

13. Oʻzbekiston Respublikasi Ekologiya va atrof muhitni muhofaza qilish davlat qoʻmitasi ikki oy muddatda:

Qishloq xoʻjaligi vazirligi, Fanlar akademiyasi va Uyushma bilan birgalikda qizilmiya va boshqa dorivor oʻsimliklar plantatsiyalari toʻgʻrisidagi nizomni tasdiqlashni nazarda tutadigan Hukumat qarorining loyihasini ishlab chiqsin hamda Vazirlar Mahkamasiga kiritsin;

Ichki ishlar vazirligi va Uyushma bilan birgalikda tayyorlovchilar bilan tuzilgan yetkazib berish shartnomalarini amalga oshirish doirasida tayyorlangan qizilmiyani qayta ishlovchi tashkilotlargacha tashib berishda tabiatni muhofaza qilishga doir qonun hujjatlariga rioya etilishini nazorat qilish sohasida idoralararo yaqin oʻzaro hamkorlikni tashkil etish boʻyicha qoʻshma dasturni ishlab chiqsin va tasdiqlasin.

14. Oʻzbekiston Respublikasi Innovatsion rivojlanish vazirligi 2019 — 2021-yillar uchun amaliy va innovatsion tadqiqotlar davlat ilmiy dasturlarini shakllantirishda qizilmiya va boshqa dorivor oʻsimliklar yetishtirishning zamonaviy texnologiyalarini ishlab chiqish boʻyicha loyihalar tanlovlari oʻtkazilishini taʼminlasin.

15. Vazirlar Mahkamasining 2014-yil 20-oktabrdagi 290-son qarori bilan tasdiqlangan Oʻsimlik dunyosi obyektlaridan foydalanish va oʻsimlik dunyosi obyektlaridan foydalanish sohasida ruxsat berish tartib-taomillaridan oʻtish tartibi toʻgʻrisidagi nizomga 13-ilovaning “Oʻsimlik dunyosi obyektlarining turlari” ustunining uchinchi xatboshidagi “TIF TN kodi 1211 90 850 0” soʻzlari “TIF TN kodi 1211 90 860 8” soʻzlari bilan almashtirilsin.

16. Oʻzbekiston Respublikasi Vazirlar Mahkamasining “Oʻzbekiston Respublikasida Qizilmiya va boshqa dorivor oʻsimliklarni yetishtirish hamda sanoat usulida qayta ishlashni yanada rivojlantirish chora-tadbirlari toʻgʻrisida” 2018-yil 27-yanvardagi 63-son qarorining 2, 3, 7 va 14-bandlari, shuningdek, qarorga 1 va 2-ilovalar oʻz kuchini yoʻqotgan deb hisoblansin.

17. Mazkur qarorning bajarilishini nazorat qilish Oʻzbekiston Respublikasi Bosh vazirning oʻrinbosari E.M. Gʻaniyev zimmasiga va Vazirlar Mahkamasining Agrar va oziq-ovqat sohalarini rivojlantirish masalalari kotibiyatiga yuklansin.