Ta’lim sifatini nazorat qilish tizimini yanada takomillashtirish maqsadida, shuningdek O‘zbekiston Respublikasi Prezidentining 2018-yil 5-sentabrdagi “Xalq ta’limini boshqarish tizimini takomillashtirish bo‘yicha qo‘shimcha chora-tadbirlar to‘g‘risida”gi PF-5538-son Farmoniga muvofiq:

1. O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi (keyingi o‘rinlarda — Davlat inspeksiyasi) hamda O‘zbekiston Respublikasi Oliy va o‘rta maxsus ta’lim vazirligining 2019-yil 1-martdan boshlab xorijiy davlatlarda berilgan ta’lim olganlik to‘g‘risidagi hujjatlarni tan olish va nostrifikatsiya qilish (ekvivalentligini qayd etish) tartibini joriy etish bo‘yicha quyidagilarni nazarda tutuvchi:

a) O‘zbekiston Respublikasi hududida alohida bo‘linmalari (filiallari) va qo‘shma ta’lim muassasalari faoliyat yuritayotgan xorijiy ta’lim muassasalarida ta’lim olgan O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslarning (keyingi o‘rinlarda — fuqarolar);

O‘zbekiston Respublikasi Oliy va o‘rta maxsus ta’lim vazirligi hamda Davlat inspeksiyasining qo‘shma qarori bilan ro‘yxati har yili tasdiqlanadigan xalqaro e’tirof etilgan tashkilotlarning (Quacquarelli Symonds World University Rankings, Times Nigher Education, Academic Ranking of World Universities) reytingida oliy ta’lim muassasalari orasida birinchi 1 000 o‘rinni egallagan xorijiy oliy ta’lim muassasalarida ta’lim olgan fuqarolarning;

tasarrufida oliy ta’lim muassasalari bo‘lgan O‘zbekiston Respublikasi vazirlik va idoralarining yo‘llanmalari asosida mutaxassislarni maqsadli tayyorlash uchun xorijiy davlatlar tomonidan ajratilgan kvotalar (grantlar) hisobidan ta’lim olgan fuqarolarning;

1992-yil 1-yanvargacha xorijiy ta’lim muassasalariga o‘qishga kirgan fuqarolarning;

Oliy ta’limda sifatni kafolatlash Yevropa assotsiatsiyasining (European Association for Quality Assurance in Nigher Education) to‘laqonli a’zolari — vakolatli tashkilotlar tomonidan akkreditatsiya qilingan ta’lim muassasalarida ta’lim olgan fuqarolarning, ro‘yxati O‘zbekiston Respublikasi Vazirlar Mahkamasi tomonidan belgilanadigan yo‘nalishlar, mutaxassisliklar va kasblar bundan mustasno;

Amerika Qo‘shma Shtatlari, Avstraliya Ittifoqi, Isroil Davlati, Kanada, Singapur Respublikasi, Koreya Respublikasi, Yaponiya davlatlarining ushbu davlatlar vakolatli tashkilotlari tomonidan akkreditatsiya qilingan ta’lim muassasalarida ta’lim olgan fuqarolarning, ro‘yxati O‘zbekiston Respublikasi Vazirlar Mahkamasi tomonidan belgilanadigan yo‘nalishlar, mutaxassisliklar va kasblar bundan mustasno;

xorijiy oliy ta’lim muassasalarida mutaxassislarni maqsadli tayyorlash uchun O‘zbekiston Respublikasining vazirlik va idoralari tomonidan ajratilgan mablag‘lar hisobidan ta’lim olgan fuqarolarning;

O‘zbekiston Respublikasining xalqaro shartnomalari, O‘zbekiston Respublikasi Prezidenti va O‘zbekiston Respublikasi Vazirlar Mahkamasining qarorlarida nazarda tutilgan hollarda ta’lim olganlik to‘g‘risidagi hujjatlarini to‘g‘ridan to‘g‘ri (maxsus sinovlarsiz) tan olish va nostrifikatsiya qilish (ekvivalentligini qayd etish);

b) ta’lim olganlik to‘g‘risidagi hujjatlarni tan olish va nostrifikatsiya qilish (ekvivalentligini qayd etish) to‘g‘risidagi arizalarni faqatgina Davlat xizmatlari markazlari yoki O‘zbekiston Respublikasining Yagona interaktiv davlat xizmatlari portali orqali qabul qilish to‘g‘risidagi taklifi ma’qullansin.

2. Davlat inspeksiyasiga quyidagi qo‘shimcha vazifalar yuklatilsin:

O‘zbekiston Respublikasi ta’lim muassasalari reytingini tuzish va rasman e’lon qilish;

o‘quvchilarning bilim darajasini baholash bo‘yicha xalqaro dasturlar va tadqiqotlarda O‘zbekiston Respublikasining ishtirokini ta’minlash;

dunyoning yetakchi reyting tashkilotlari bilan hamkorlik qilish va milliy oliy ta’lim muassasalarining ushbu reytinglarga kirishiga har tomonlama ko‘maklashish.

3. Milliy oliy ta’lim muassasalari faoliyatini o‘rganish hamda ushbu muassasalarda kadrlar tayyorlash sifatini, jumladan xalqaro standartlar va ilg‘or xorijiy tajribani joriy etish orqali oshirish yuzasidan har chorakda O‘zbekiston Respublikasi Prezidenti Administratsiyasiga takliflar kiritib borish uchun mas’ul bo‘lgan Davlat inspeksiyasi boshlig‘ining birinchi o‘rinbosari lavozimi kiritilsin.

Belgilansinki, Davlat inspeksiyasi boshlig‘ining birinchi o‘rinbosari O‘zbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi hamda maqomi, tibbiy va transport ta’minoti sharoitlari bo‘yicha vazirning birinchi o‘rinbosariga tenglashtiriladi.

4. Davlat inspeksiyasining boshqaruv xodimlari cheklangan soni 108 nafardan iborat yangilangan tashkiliy tuzilmasi ilovaga muvofiq tasdiqlansin.

Davlat inspeksiyasining boshlig‘iga, zarur hollarda, xodimlarning o‘rnatilgan cheklangan umumiy soni va mehnatga haq to‘lash fondi doirasida Davlat inspeksiyasi tuzilmasiga o‘zgartirishlar kiritish huquqi berilsin.

5. Davlat inspeksiyasi manfaatdor vazirlik va idoralar bilan birgalikda:

ta’lim muassasalarining reytingini belgilovchi dunyoning yetakchi reyting tashkilotlari bilan hamkorlik o‘rnatsin;

2019-yil 1-aprelga qadar ilg‘or xorijiy tajribani o‘rganish natijalariga ko‘ra, ta’lim muassasalarini attestatsiyadan va davlat akkreditatsiyasidan o‘tkazish tartibini takomillashtirish to‘g‘risida hukumat qarori loyihasini ishlab chiqsin va O‘zbekiston Respublikasi Vazirlar Mahkamasiga kiritsin;

2019-yil 1-iyunga qadar ta’lim muassasalari, pedagog xodimlar, ta’lim oluvchilar, ta’lim-tarbiya jarayoni va boshqa zarur axborotlar to‘g‘risida yagona ma’lumotlar bazasini shakllantirishni o‘z ichiga olgan ta’lim sifatini ta’minlovchi axborot tizimini joriy etish bo‘yicha takliflar tayyorlasin va O‘zbekiston Respublikasi Vazirlar Mahkamasiga kiritsin.

6. Belgilansinki, 2019-yil 1-fevraldan:

pedagog kadrlarga birinchi va oliy malaka toifasi, yetakchi va bosh o‘qituvchi lavozimi berish, shuningdek umumiy o‘rta, o‘rta maxsus va kasb-hunar ta’limi muassasalarida mazkur malaka toifasiga va lavozimiga talabgorlarga malaka toifasini berishda to‘lanadigan yig‘imlardan tushadigan mablag‘ning 50 foizi Davlat inspeksiyasining budjetdan tashqari Rivojlantirish jamg‘armasiga yo‘naltiriladi (keyingi o‘rinlarda — Jamg‘arma);

Jamg‘armaga tushadigan mablag‘larning 80 foizgacha bo‘lgan miqdori Davlat inspeksiyasi boshlig‘ining qaroriga ko‘ra, lavozim maoshining 200 foizigacha miqdorda oylik ustamalar to‘lash, moddiy yordam ko‘rsatish, xizmat vazifalarini vijdonan va tashabbuskorlik bilan bajarganligi uchun mukofot puli, shuningdek, mamlakat ichida va tashqarisidagi xizmat safarlari xarajatlarini to‘lash tarzida xodimlarning moddiy rag‘batlantirilishiga yo‘naltirilishi mumkin.

7. Davlat inspeksiyasiga Jamg‘armaning mablag‘lari hisobidan quyidagi xarajatlarni to‘lashga ruxsat etilsin:

Davlat inspeksiyasiga yuklatilgan vazifa va funksiyalarni bajarish doirasida davlat organlari va tashkilotlari, ilmiy va oliy ta’lim muassasalari, yetakchi xalqaro va xorijiy tashkilotlarning malakali mutaxassislari, shu jumladan ta’lim sohasidagi xorijiy ekspertlar va xorijda yashayotgan vatandoshlarni maslahatchilar sifatida jalb qilish;

Davlat inspeksiyasi xodimlarini ilmiy-tadqiqot, ta’lim va boshqa muassasalarda, shu jumladan xorijda o‘qitish, malakasini oshirish va stajirovkadan o‘tkazish;

Davlat inspeksiyasi, unga idoraviy mansub tashkilotlar va hududiy bo‘limlarining faoliyatiga zamonaviy axborot-kommunikatsiya texnologiyalarini joriy qilish.

8. O‘zbekiston Respublikasi Investitsiyalar va tashqi savdo vazirligi, Moliya vazirligi va Davlat inspeksiyasi tasdiqlangan loyiha-smeta hujjatlariga muvofiq Davlat inspeksiyasining bino va inshootlarini rekonstruksiya qilishni O‘zbekiston Respublikasini rivojlantirishning kelgusi yillardagi davlat dasturlariga kiritilishini ta’minlasin.

9. Quyidagilar:

O‘zbekiston Respublikasi Bosh vazirining o‘rinbosari A.A. Abduxakimovga — yuklatilgan vazifalarning lozim darajada bajarilishi yuzasidan vazirlik va idoralarni muvofiqlashtirish, shuningdek ushbu qarorning bajarilishini muntazam ko‘rib chiqish yuzasidan;

Davlat inspeksiyasining boshlig‘i U.N. Tashkenbayevga — mazkur qarorga muvofiq joriy etiladigan xorijiy mamlakatlarda berilgan ta’lim olganlik to‘g‘risidagi hujjatlarni tan olish va nostrifikatsiya qilish (ekvivalentligini qayd etish) tartibining amalda ro‘yobga chiqarilishini ta’minlash, mazkur sohadagi qonunchilikni yanada takomillashtirish bo‘yicha sifatli va puxta ishlab chiqilgan takliflarni kiritish yuzasidan shaxsan javobgar ekanliklari ko‘rsatib o‘tilsin.

10. Davlat inspeksiyasi manfaatdor vazirliklar va idoralar bilan birgalikda ikki oy muddatda O‘zbekiston Respublikasi Vazirlar Mahkamasiga:

a) quyidagi bo‘yicha yangi yig‘imlar miqdorlarini tasdiqlash:

xorijiy mamlakatlarda berilgan ta’lim olganlik to‘g‘risidagi hujjatlarni tan olish va nostrifikatsiya qilish (ekvivalentligini qayd etish);

milliy ta’lim va ilmiy-tadqiqot muassasalari tomonidan berilgan rasmiy hujjatlarga apostil qo‘yish;

b) qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida takliflar kiritsin.

11. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidenti Administratsiyasi rahbari Z.Sh. Nizomiddinov, O‘zbekiston Respublikasi Prezidenti maslahatchisi A.A. Abduvaxitov va O‘zbekiston Respublikasi Prezidenti maslahatchisining birinchi o‘rinbosari B.M. Mavlonov zimmasiga yuklansin.