Vazirlar Mahkamasining 1994-yil 19-apreldagi 215-son qaroriga muvofiq avtomobil, temir yo‘l, havo transporti va aloqa sohasida bozor munosabatlarini shakllantirishdagi faoliyatning ba’zi turlari bilan shug‘ullanishga maxsus ruxsatnomalar (litsenziyalar) berish tartibini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasida temir yo‘l, havo va avtomobil transportida yuk va yo‘lovchilar tashish bo‘yicha faoliyatni litsenziyalash to‘g‘risida Nizom 1-ilovaga muvofiq tasdiqlansin.

2. Transport sohasidagi faoliyatni litsenziyalash bo‘yicha Vazirlar Mahkamasining komissiyasi tarkibi 3-ilovaga* muvofiq tasdiqlansin.

Komissiya bir oy muddatda ish reglamentini ishlab chiqsin.

3. Belgilab qo‘yilsinki, mulkchilik shaklidan qat’i nazar, transport va aloqa sohasida faoliyat olib boruvchi korxonalar (tashkilotlar) 1996-yil 1-sentabrgacha transport va aloqa sohasidagi faoliyatiga maxsus ruxsatnomalar (litsenziyalar) olishlari kerak.

Belgilangan muddatda maxsus ruxsatnoma (litsenziya) olmagan korxonalar (tashkilotlar)ning transport va aloqa sohasidagi faoliyati noqonuniy hisoblanadi va ularning faoliyatning ushbu turidan olgan daromadi tegishli budjetga olib qo‘yiladi.

4. O‘zbekiston Respublikasi Vazirlar Mahkamasining 1995-yil 25-iyuldagi 287-son qaroriga 6-ilovaning 5-bandi o‘z kuchini yo‘qotgan deb hisoblansin.

5. Mazkur qarorning bajarilishini nazorat qilish Bosh vazir o‘rinbosari K.R. Rahimov zimmasiga yuklansin.

1. O‘zbekiston Respublikasida yuk va yo‘lovchilarni transportda tashishni litsenziyalash harakat va uchish xavfsizligini ta’minlash, transport obyektlaridan foydalanishda ekologiya normalariga rioya qilish va transport xizmati bozorining normal ishlashi, ushbu xizmatlar iste’molchilari manfaatlarini himoya qilish maqsadida amalga oshiriladi.

2. Yuk va yo‘lovchilar tashishning quyidagi turlari litsenziyalanadi:

a) temir yo‘l transportida:

yo‘lovchilar tashish;

yo‘lovchilarni xalqaro tashishlar;

yuk tashish;

yuklarni xalqaro tashishlar;

vokzallar faoliyati;

yuk saroylari faoliyati;

respublika ichidagi transport-ekspeditorlik faoliyati;

xalqaro transport-ekspeditorlik faoliyati;

b) avtomobil transportida:

shaharda yo‘lovchilar tashishlar;

shahar atrofida va shaharlararo yo‘lovchilar tashishlar;

yo‘lovchilarni xalqaro tashishlar;

shaharda yuk tashishlar;

shahar atrofida va shaharlararo yuk tashishlar;

yuklarni xalqaro tashishlar;

avtovokzallar, avtostansiyalar va avtokassalar faoliyati;

respublika ichida transport-ekspeditsiya xizmati ko‘rsatish;

xalqaro transport-ekspeditsiya xizmati ko‘rsatish;

v) havo transportida:

mahalliy havo yo‘llarida yuk tashish;

mahalliy havo yo‘llarida yo‘lovchilar tashish;

xalqaro havo yo‘llarida yuk tashish;

xalqaro havo yo‘llarida yo‘lovchilar tashish;

aeroportlarda havo kemalari, yo‘lovchilar va yuklarga xizmat ko‘rsatish bilan bog‘liq faoliyat;

korxonalar va aholi ehtiyojlari uchun aviatsiya ishlari.

Korxonalar (tashkilotlar), bajariladigan ishlarga ko‘ra, yuk va yo‘lovchilar tashishlarning bir necha turi uchun litsenziyaga ega bo‘lishlari mumkin.

3. Yo‘lovchilar, yuklar tashishlarning va aviatsiya ishlarining quyidagi turlari litsenziyalanmaydi:

a) O‘zbekiston Respublikasining maxsus qonunchilik hujjatlari asosida amalga oshiriladigan;

b) aholi hayoti va salomatligini xavf ostiga qo‘yadigan hamda avariya-qutqaruv va tiklash ishlarini talab qiladigan tabiiy ofatlar, epidemiyalar, yirik avariyalar oqibatlarini tugatish bilan bog‘liq bo‘lgan.

4. Litsenziya olish uchun komissiyaga quyidagilar taqdim etiladi:

a) belgilangan shakldagi ariza;

b) ta’sis hujjatlari yoki ularning tasdiqlangan nusxalari;

v) O‘zbekiston Respublikasi fuqaro aviatsiyasi organlari tomonidan (aviatsiya tashishlari va ishlarini bajarish uchun berilgan) attestatsiya varaqasi nusxasi;

g) transportda tashishlarni ta’minlash, aviatsiya ishlari uchun korxona (tashkilot) ega bo‘lgan harakat sostavi (havo kemalari) parki (turi, markasi va soni) to‘g‘risida ma’lumotlar, shuningdek yuklash-tushirish mexanizmlari, omborxona binolari, maydonchalar, texnik xizmat ko‘rsatish va harakatdagi sostavni, chipta-bosma apparatlarini tuzatish postlari, yo‘lovchilar uchun kutish joylari, transportga chiqarish maydonchalari mavjudligi va ularning holati to‘g‘risida, shuningdek obyektlar, binolar, yer usti inshootlari hamda litsenziyalanadigan faoliyatni bajarish asbob-uskunalarining tayyorligi to‘g‘risida ma’lumotlar va bajariladigan ishlarga ko‘ra zarur ma’lumotlar;

d) xalqaro tashishlarga xizmatlarni amalga oshirish (ko‘rsatish)ga litsenziya berishda xalqaro tashishlarni tashkil etish bilan bog‘liq bo‘lgan korxona (tashkilot)ning professional jihatdan yaroqliligini tasdiqlovchi hujjatlar va tashqi iqtisodiy aloqalar qatnashchisi guvohnomasining nusxasi qo‘shimcha ravishda talab qilinadi;

e) litsenziya berish uchun yig‘imni to‘laganlik to‘g‘risidagi hujjatlar.

“g” va “d” kichik bandlarida ko‘rsatilgan hujjatlar “O‘zbekiston temir yo‘llari” kompaniyasi, “O‘zbekiston havo yo‘llari” aviakompaniyasi va “O‘zavtotrans” korporatsiyasining (faoliyat turiga ko‘ra) ekspert xulosasi bilan birga taqdim etiladi.

Korxona (tashkilot) rahbarlari taqdim etilgan ma’lumotlarning to‘g‘riligi uchun javobgardirlar.

5. Litsenziyalar olish uchun davlat poshlinasi amaldagi qonunchilikka muvofiq undiriladi.

6. Litsenziya berish (bermaslik) haqidagi qaror to‘g‘ri rasmiylashtirilgan hujjatlar olingandan keyin 10 kundan kechiktirilmay qabul qilinadi.

Komissiya hujjatlar tegishli ravishda rasmiylashtirilmay taqdim etilganda, shuningdek ular amaldagi qonunchilik va mazkur Nizom talablariga muvofiq kelmagan hollarda litsenziyalar berishni rad etish huquqiga ega. Litsenziya berishni rad etishga boshqa sabablar, shu jumladan maqsadga muvofiq emasligi tufayli yo‘l qo‘yilmaydi.

Litsenziya berishni rad etish to‘g‘risidagi qaror asoslangan bo‘lishi va murojaat qiluvchiga yozma ravishda jo‘natilishi kerak.

Murojaat qiluvchi tomonidan hujjatlar qayta rasmiylashtirilgan taqdirda ular 5 kun muddatda qayta ko‘rib chiqiladi.

7. Litsenziya berish:

a) harakatdagi sostav (havo kemalari), aviatsiya texnikasi yoxud boshqa shartlar tashishlar (parvozlar) xavfsizligini ta’minlash yoki amalga oshirilishiga ruxsat so‘raladigan faoliyat xususiyatiga oid belgilangan talablarga muvofiq bo‘lmaganda;

b) murojaat qiluvchining ishlab chiqarish bazasi ekologik va boshqa belgilangan talablarga muvofiq kelmaganda;

v) aviatsiya tashishlari va ishlarini bajarish uchun ariza beruvchining attestatsiya varaqasi amalga oshirilishiga ruxsat so‘raladigan faoliyat xususiyatiga muvofiq bo‘lmaganda;

g) taqdim etilgan hujjatlarda noto‘g‘ri ma’lumotlar ko‘rsatilganda;

d) ariza beruvchi qonunda belgilangan tartibda litsenziyalanadigan faoliyat bo‘yicha nohalol raqobatchilikda aybdor deb tan olinganda;

e) O‘zbekiston Respublikasi qonun hujjatlarida nazarda tutilgan boshqa hollarda rad etiladi.

8. Litsenziyalar O‘zbekiston Respublikasi Vazirlar Mahkamasi komissiyasining qaroriga binoan belgilangan shaklda 5 yil muddatgacha beriladi.

Ariza beruvchining asoslangan iltimosiga binoan litsenziyaning amalda bo‘lishi muddati belgilangan miqdordagi poshlina to‘langach yana shuncha muddatga uzaytirilishi mumkin. Litsenziyaning uzaytirilishi yozma ravishda tasdiqlanadi.

Litsenziyalarda amalda bo‘lish hududlari va bajariladigan ishlarning turlari bo‘yicha cheklashlar nazarda tutilishi mumkin.

Litsenziya harakatdagi sostav, texnik vositalar, binolar, inshootlar, asbob-uskunalar, qurilmalar va boshqa obyektlardan foydalanishning amaldagi qoidalarida nazarda tutilgan zarur guvohnomalar, ish diplomlari, sertifikatlar va boshqa hujjatlarga ega bo‘lish majburiyatidan ozod qilmaydi.

9. Litsenziyani boshqa shaxslarga berish man etiladi. Litsenziatning tashkiliy-huquqiy shakli o‘zgarganda litsenziya uning berilishi uchun belgilangan tartibda qayta rasmiylashtirilishi lozim.

10. Litsenziya egasi:

a) yo‘lovchilar va yuk tashish hamda ishlar bajarishda har bir avtotransport vositasida, havo kemasida maxsus litsenziya kartochkalarining bo‘lishini ta’minlashga;

b) O‘zbekiston Respublikasi qonunchilik va normativ hujjatlariga, shuningdek litsenziya shartlariga rioya qilinishini ta’minlashga;

v) komissiya va “O‘zbekiston temir yo‘llari” kompaniyasi, “O‘zbekiston havo yo‘llari” aviakompaniyasi hamda “O‘zavtotrans” korporatsiyasi talablariga binoan litsenziyalangan faoliyati haqidagi ma’lumotlarni taqdim etishga;

g) o‘z tashkiliy-huquqiy shaklining o‘zgarganligi haqida bir hafta muddatda komissiyani xabardor etishga majburdir.

11. Litsenziya blanklari va litsenziya kartochkalari qat’iy hisobdagi hujjatlar hisoblanadi, seriyasi va tartib raqamiga ega bo‘lib matbaa yo‘li bilan tayyorlanadi.

12. Litsenziya shartlariga rioya etilishi ustidan nazorat “O‘zbekiston temir yo‘llari” kompaniyasi, “O‘zbekiston havo yo‘llari” aviakompaniyasi va “O‘zavtotrans” korporatsiyasi tomonidan ta’minlanadi.

13. Litsenziya quyidagi hollarda komissiya tomonidan bekor qilinishi mumkin:

a) litsenziat arizasiga binoan;

b) agar litsenziya olish uchun takdim etilgan materiallarda haqiqatga to‘g‘ri kelmaydigan ma’lumotlar mavjudligi aniqlansa;

v) agar korxona (tashkilot) tomonidan litsenziyada belgilangan faoliyat turiga amal qilinmayotgan bo‘lsa;

g) O‘zbekiston Respublikasi qonun hujjatlarida nazarda tutilgan boshqa hollarda.

14. Litsenziyani bekor qilishga asoslar aniqlangan hollarda komissiya korxona (tashkilot)ga tartib buzilishini tuzatish zarurligi haqida ogohlantirish xati beradi. Agar korxona (tashkilot) ogohlantirish xatini olgach 30 kun muddatda tartib buzilishini bartaraf etmasa komissiya litsenziyani bekor qiladi va tegishli faoliyatning to‘xtatilishi lozim bo‘lgan muhlatni belgilaydi.

Litsenziyaning bekor qilingani haqidagi qaror nusxasi 3 kun muddatda korxona (tashkilot) va u joylashgan hududdagi hokimlikka jo‘natiladi.

Qaror nusxasi olingan kundan boshlab 10 kun muddatda litsenziya va litsenziya kartochkalari “O‘zbekiston temir yo‘llari” kompaniyasi, “O‘zbekiston havo yo‘llari” aviakompaniyasi va “O‘zavtotrans” korporatsiyasiga topshirilishi zarur.

15. Korxona (tashkilot) litsenziya berish rad etilganligi yoki uning bekor qilingani to‘g‘risidagi qaror nusxasini olgandan so‘ng 30 kun muddatda sudga arz qilish huquqiga ega.

16. Mazkur Nizomning 2-bandida ko‘rsatilgan faoliyatni litsenziyasiz yoki mazkur Nizomda nazarda tutilgan tartibni buzgan holda amalga oshirgan korxona (tashkilot)lar amaldagi qonunchilikka muvofiq javob beradilar.