Oʻzbekiston Respublikasi Prezidentining “Ichki bozorni qum-shagʻal materiallari bilan barqaror taʼminlash boʻyicha qoʻshimcha chora-tadbirlar toʻgʻrisida” 2018-yil 9-iyuldagi PQ-3841-son qarori ijrosini taʼminlash hamda daryolar oʻzanlarini tozalash jarayonida qum-shagʻal materiallarini qazib olish ishlariga tadbirkorlik subyektlarini jalb qilish tartibini joriy etish maqsadida Vazirlar Mahkamasi qaror qiladi:

1. Daryolar oʻzanlarini tozalash ishlariga tadbirkorlik subyektlarini elektron onlayn-auksion orqali jalb qilish tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.

3. Oʻzbekiston Respublikasi Favqulodda vaziyatlar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Favqulodda vaziyatlar vaziri vazifasini bajaruvchi T.A. Xudaybergenov zimmasiga yuklansin.

1. Ushbu Nizom daryolar oʻzanlarini tozalash ishlariga tadbirkorlik subyektlarini elektron onlayn-auksion orqali jalb qilish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

“E-IJRO AUKSION” yagona elektron savdo maydonchasi (keyingi oʻrinlarda savdo maydonchasi deb ataladi) — elektron onlayn-auksionlarni (keyingi oʻrinlarda auksion deb ataladi) tashkil etish va oʻtkazish uchun zarur boʻlgan axborotni kiritish, saqlash va qayta ishlash, shuningdek, manfaatdor shaxslarning auksionlar jarayonlaridan operator veb-portali orqali bevosita foydalanish imkoniyatini taʼminlaydigan axborot tizimi;

auksion — savdo maydonchasi orqali loyihalarni amalga oshirish huquqi realizatsiya qilinadigan auksion;

auksion ishtirokchisi — elektron onlayn-auksionda ishtirok etish uchun ariza bergan va unda ishtirok etishga ruxsat etilgan barcha tadbirkorlik subyektlari;

auksion obyekti — auksion orqali realizatsiya qilinadigan daryolar oʻzanlarini tozalash jarayonida qum-shagʻal materiallarini qazib olish ishlarini olib borish uchun ishlab chiqilgan va davlat ekologik ekspertizasi xulosasi olingan loyihani amalga oshirish huquqi;

loyiha tashkilotlari — daryolar oʻzanlarini tozalash ishlarini tashkil etishda ilmiy izlanishlar va hisob-kitoblarga tayangan holda loyihalarni ishlab chiqishga ixtisoslashgan tashkilotlar;

loyihaning minimal qiymati — loyihani auksionga qoʻyish uchun uni amalga oshirish huquqining qiymati;

operator — Oʻzbekiston Respublikasi Bosh prokuraturasi huzuridagi Majburiy ijro byurosi qoshidagi savdo maydonchasida auksionlarni tashkil etadigan va oʻtkazadigan “Elektron onlayn-auksionlarni tashkil etish markazi” davlat unitar korxonasi.

3. Daryolar oʻzanlarini tozalash uchun ishlab chiqilgan loyihalarni amalga oshirish huquqi elektron onlayn-auksion orqali mazkur Nizomga 1-ilovaga muvofiq sxema boʻyicha beriladi.

4. Daryolar oʻzanlarini tozalashda qum-shagʻal materiallarini qazib olish ishlari transport va yoʻl infratuzilmasi obyektlarini, shuningdek, davlat dasturlari, yirik investitsiya loyihalari va davlat ahamiyatiga ega boshqa loyihalar doirasida qurilish, rekonstruksiya va taʼmirlash ishlarini amalga oshirish uchun Oʻzbekiston Respublikasi Prezidentining farmonlari, qarorlari va farmoyishlari, Oʻzbekiston Respublikasi Vazirlar Mahkamasining qarorlari asosida, istisno tariqasida, Oʻzbekiston Respublikasi Favqulodda vaziyatlar vazirligi huzuridagi “Xavfsiz daryo” davlat unitar korxonasi (keyingi oʻrinlarda “Xavfsiz daryo” DUK deb ataladi) va tadbirkorlik subyektlari yoki boshqa tashkilotlar oʻrtasida toʻgʻridan-toʻgʻri shartnoma tuzilib, loyiha hujjatlarini ishlab chiqqan holda amalga oshirilishi mumkin.

Agar bunday daryo uchastkalari uchun loyiha hujjatlari ishlab chiqilmagan yoki yakunlanmagan boʻlsa, bunda daryolar oʻzanlarini tozalashda qum-shagʻal materiallarini qazib olish boʻyicha loyiha hujjatlarini ishlab chiqish va davlat ekologik ekspertizasidan oʻtkazish ishlarini parallel ravishda olib borilishiga ruxsat beriladi.

Tadbirkorlik subyektlarining huquqlarini toʻlaqonli taʼminlash maqsadida favqulodda vaziyatlarni oldini olish va ular oqibatida zararlangan daryolar qirgʻoqlarini va ulardagi dambalarni tiklashga daryo oʻzanlaridan qazib olingan qum-shagʻal materiallari uchun toʻlovlar undirilmaydi. Bunda loyihada belgilangan zaxira qirgʻoqlarni va dambalarni tiklash uchun olingan qum-shagʻal materiallari hajmiga kamaytiriladi.

5. Oʻzbekiston Respublikasi Favqulodda vaziyatlar vazirligi, Ekologiya va atrof-muhitni muhofaza qilish davlat qoʻmitasi hamda Davlat geologiya va mineral resurslar qoʻmitasi tomonidan zaruratga koʻra olib borilgan oʻrganishlar natijalari boʻyicha daryolar oʻzanlarida qum-shagʻal materiallari toʻplanib qolgan va tozalanishi lozim boʻlgan uchastkalar roʻyxati (keyingi oʻrinlarda uchastkalar roʻyxati deb ataladi) shakllantiriladi.

Daryo oʻzanlarini tozalashda faqat, qirgʻoqlar yuvilishiga hamda yaqin hududlarni suv bosishiga sabab boʻlishi mumkin boʻlgan va suv oqimlariga toʻsqinlik qilayotgan oʻzanda yigʻilib qolgan qum-shagʻal materiallari hajmini qazib olinishiga ruxsat etiladi.

6. Oʻzbekiston Respublikasi Favqulodda vaziyatlar vazirligi besh ish kuni mobaynida uchastkalar roʻyxatini Oʻzbekiston Respublikasi Prezidentining “Toshqinlar, sel oqimlari, qor koʻchish va yer koʻchki hodisalari bilan bogʻliq favqulodda vaziyatlarning oldini olish hamda ularning oqibatlarini tugatish borasidagi chora-tadbirlar toʻgʻrisida” 2007-yil 19-fevraldagi PQ-585-son qarori bilan tashkil etilgan toshqin suvlari va sel oqimlarini xavf-xatarsiz oʻtkazib yuborishni taʼminlash, qor koʻchish va yer koʻchki hodisalari xavfini kamaytirish boʻyicha hukumat komissiyasiga (keyingi oʻrinlarda Komissiya deb ataladi) belgilangan tartibda kiritadi.

Komissiya oʻn ish kuni mobaynida uchastkalar roʻyxatini koʻrib chiqadi, tasdiqlaydi va ijro uchun Oʻzbekiston Respublikasi Favqulodda vaziyatlar vazirligiga yuboradi.

7. “Xavfsiz daryo” DUK besh ish kuni mobaynida tasdiqlangan uchastkalar roʻyxati boʻyicha bosqichma-bosqich har bir uchastkaga loyiha hujjatlarini ishlab chiqish uchun tegishli loyiha tashkilotlariga buyurtma beradi.

8. Loyiha tashkilotlari buyurtmada (shartnomada) koʻrsatilgan muddatda loyiha xujjatlarini ishlab chiqadi. Loyiha hujjatlarida quyidagilar aks etadi:

loyihaning maqsadi;

qum-shagʻal zaxirasining hajmi;

loyihadan kutiladigan natija;

loyihani amalga oshirish muddati va joyi;

loyihani amalga oshirish joyi joylashgan hududdan kelib chiqqan holda texnik koʻrsatkichlar.

9. Loyiha tashkilotlari tomonidan tayyorlangan loyiha hujjatlarini olgandan soʻng “Xavfsiz daryo” DUK ikki ish kuni mobaynida davlat ekologik ekspertizasi xulosasini olish uchun Oʻzbekiston Respublikasi Ekologiya va atrof-muhitni muhofaza qilish davlat qoʻmitasining davlat ekologik ekspertizasi organlariga belgilangan tartibda loyiha hujjatlarini taqdim etadi.

10. Oʻzbekiston Respublikasi Ekologiya va atrof-muhitni muhofaza qilish davlat qoʻmitasining davlat ekologik ekspertizasi organlari yigirma ish kuni mobaynida har bir loyiha hujjatlari boʻyicha davlat ekologik ekspertizasi xulosasini tayyorlaydi va “Xavfsiz daryo” DUK vakiliga ishonchnoma asosida topshiradi.

11. Loyiha hujjatlari boʻyicha davlat ekologik ekspertizasi xulosasi olingandan soʻng “Xavfsiz daryo” DUK ikki ish kuni mobaynida loyihani amalga oshirish huquqini auksionda realizatsiya qilish uchun tegishli materiallar tayyorlanishini taʼminlaydi.

12. Loyihani amalga oshirish huquqini auksionda realizatsiya qilish uchun tegishli materiallarni tayyorlash quyidagilarni oʻz ichiga oladi:

loyihaning minimal qiymatini aniqlash;

loyihani amalga oshirish huquqini auksionda realizatsiya qilish uchun auksionga qoʻyish toʻgʻrisida “Xavfsiz daryo” DUK direktori buyrugʻini ishlab chiqish;

loyihani amalga oshirish huquqini auksionda realizatsiya qilish uchun zarur boshqa hujjatlarni tayyorlash.

13. Loyihaning minimal qiymati loyihada koʻrsatilgan qum-shagʻal materiallari zahirasining har 1 kub.m. uchun loyiha auksionga qoʻyilgan kunda amalda boʻlgan eng kam oylik ish haqining ikki foizi miqdorida belgilanadi.

Loyihaning minimal qiymati loyihani amalga oshirish huquqini auksionga qoʻyishda boshlangʻich narx hisoblanadi.

14. Loyihani amalga oshirish huquqini auksionda realizatsiya qilish uchun auksionga qoʻyish toʻgʻrisidagi buyruq “Xavfsiz daryo” DUK direktori tomonidan imzolanadi va unda quyidagilar koʻrsatiladi:

loyihani amalga oshirish huquqini auksionga qoʻyish uchun asos;

loyihani amalga oshirishdan belgilangan maqsad;

loyihaning oʻziga xos raqami, uni amalga oshirish joyi va muddati;

loyiha boʻyicha qum-shagʻal zaxirasining hajmi;

loyihaning minimal qiymati (boshlangʻich narxi);

loyihani amalga oshirish huquqi egasining majburiyatlari, shu jumladan davlat ekologik ekspertizasi xulosasida qayd etilgan majburiyatlar;

loyihani amalga oshirish shartlari va tartibi toʻgʻrisida axborot.

15. Loyiha hujjatlari boʻyicha davlat ekologik ekspertizasi xulosasi olingandan soʻng “Xavfsiz daryo” DUK ikki ish kuni mobaynida operatorga loyihani amalga oshirish huquqini realizatsiya qilish boʻyicha auksion tashkil qilish haqidagi elektron buyurtmani (keyingi oʻrinlarda buyurtma deb ataladi) mazkur Nizomga 2-ilovaga muvofiq shaklda taqdim etadi.

16. Buyurtma “Xavfsiz daryo” DUK direktorining elektron imzosi bilan tasdiqlanadi va operatorga yuboriladi.

17. Buyurtmaga quyidagilar elektron (skaner qilingan) shaklda ilova qilinadi:

a) “Xavfsiz daryo” DUK direktorining loyihani amalga oshirish huquqini auksionda realizatsiya qilish uchun auksionga qoʻyish toʻgʻrisidagi buyrugʻi;

b) daryo oʻzanlaridan qum-shagʻal materiallarini qazib olish ishlarini olib borish boʻyicha tayyorlangan loyiha;

v) davlat ekologik ekspertizasi xulosasi;

g) “Xavfsiz daryo” DUK va auksion gʻolibi bilan tuziladigan shartnoma loyihasi;

d) google xaritada loyihani amalga oshirish joyi (koordinatali nuqtalari bilan);

e) loyihani amalga oshirish joyining fotosurati (15x20 sm).

18. Buyurtmaga mazkur Nizomning 17-bandida nazarda tutilgan barcha hujjatlar ilova qilinmaganda yoki ular tegishli ravishda rasmiylashtirilmaganda, operator buyurtmani olgandan soʻng keyingi ish kunidan kechiktirmasdan buyurtmani bartaraf etilishi lozim boʻlgan kamchiliklarni koʻrsatgan holda “Xavfsiz daryo” DUKga qaytaradi.

“Xavfsiz daryo” DUK operator tomonidan qayd etilgan barcha kamchiliklarni besh ish kuni mobaynida bartaraf etib, buyurtmani mazkur Nizomning 17-bandi talablariga muvofiq takroran operatorga yuboradi.

19. “Xavfsiz daryo” DUK taqdim etilgan hujjatlar mazkur Nizomning 17-bandi talablariga muvofiqligi yuzasidan operator tasdigʻidan soʻng:

bosma va elektron ommaviy axborot vositalarida loyihani amalga oshirish huquqi auksionga qoʻyilishi toʻgʻrisidagi axborotni tarqatadi;

Oʻzbekiston Respublikasi Favqulodda vaziyatlar vazirligiga, Ekologiya va atrof-muhitni muhofaza qilish davlat qoʻmitasiga hamda Davlat geologiya va mineral resurslar qoʻmitasiga loyihani amalga oshirish huquqi auksionga qoʻyilishi haqidagi axborotni mazkur Nizomning 17-bandida nazarda tutilgan hujjatlarni ilova qilgan holda yuboradi.

20. Oʻzbekiston Respublikasi Favqulodda vaziyatlar vazirligi, Ekologiya va atrof-muhitni muhofaza qilish davlat qoʻmitasi, Davlat geologiya va mineral resurslar qoʻmitasi tadbirkorlik subyektlarini auksionda ishtirok etishga keng jalb qilishga doir choralarni koʻradi, shu jumladan “Xavfsiz daryo” DUKdan olingan hujjatlar va axborotni auksionda ishtirok etish uchun buyurtma joylashtiriladigan Internet portal manziliga tayangan holda oʻz rasmiy veb-saytlarida majburiy tartibda joylashtiradi.

21. Loyihalarni amalga oshirish huquqi “Xavfsiz daryo” DUK tomonidan berilgan buyurtmalar boʻyicha operator tomonidan auksionga qoʻyiladi.

Loyihani amalga oshirish huquqi auksionga ushbu Nizomga muvofiq har bir loyiha boʻyicha alohida qoʻyiladi.

Operator tomonidan operator va “Xavfsiz daryo” DUK oʻrtasida tuzilgan shartnomaga muvofiq auksionni tashkil etish xizmatlari koʻrsatiladi.

22. Loyihani amalga oshirish huquqini realizatsiya qilish boʻyicha auksion savdolari faqat savdo maydonida auksion shaklida oʻtkaziladi va unda barcha tadbirkorlik subyektlari ishtirok etishga haqli.

Auksion butunjahon Internet tarmogʻi orqali ishtirok etish imkonini beradigan va arizalarni qabul qilish hamda gʻoliblarni aniqlash jarayonlariga aralashish imkoniyatlarini istisno qiluvchi maxsus dasturiy mahsulotdan foydalangan holda oʻtkaziladi.

23. Auksionni oʻtkazish toʻgʻrisidagi xabar va lot haqidagi axborot auksion boshlanishidan avval 30 kalendar kunidan kechiktirmasdan operatorning veb-portalida joylashtiriladi.

24. Auksionlarda elektron raqamli imzo bilan tasdiqlangan elektron arizalarni taqdim etish va zakalat pulini kiritish orqali ishtirok etiladi.

25. Auksion narxlarni oshirib borish prinsipi boʻyicha oʻtkaziladi.

26. Loyihani amalga oshirish huquqi auksionga buyurtmada koʻrsatilgan boshlangʻich narx boʻyicha qoʻyiladi.

Ushbu Nizomda nazarda tutilgan holatlar va tartibda auksion oʻtkazilmagan deb eʼtirof etilgan taqdirda, loyihani amalga oshirish huquqi takroriy auksionga boshlangʻich narxda qoʻyiladi.

27. Auksionni tashkil etish boʻyicha xizmatlar uchun operator shartnomada belgilangan, biroq auksion obyekti realizatsiya qilingan summaning bir foizidan oshmagan miqdorda haq oladi.

Mazkur Nizom 53-bandining ikkinchi va toʻrtinchi xatboshilariga asosan auksion savdolari oʻtkazilmagan deb topilgan taqdirda, auksionni tashkil etish boʻyicha xizmatlar uchun eng kam oylik ish haqining 2 baravari miqdorda haq toʻlanadi.

28. Operator “Xavfsiz daryo” DUKdan buyurtma va unga belgilangan talablarga mos keladigan hujjatlarni olgandan soʻng ikki ish kuni mobaynida oʻz veb-portalida auksion oʻtkazilishi toʻgʻrisidagi xabarnomani joylashtiradi.

29. Xabarnoma quyidagi maʼlumotlarni oʻz ichiga olishi zarur:

a) auksion oʻtkazish sanasi, shu jumladan uning boshlanish va tugash vaqti;

b) lot raqami va nomlanishi;

v) auksionda ishtirok etish uchun arizalarni qabul qilishning oxirgi sanasi va vaqti;

g) loyihani amalga oshirish joyi va muddati;

d) loyihani amalga oshirish huquqiga ega tadbirkorlik subyektlarining majburiyatlari va mavjud cheklovlar, shu jumladan davlat ekologik ekspertizasi xulosasida qayd etilgan majburiyatlar;

e) loyihani amalga oshirishdan belgilangan maqsad;

j) auksion obyektining boshlangʻich narxi;

z) zakalat pulining boshlangʻich narxdan foiz koʻrinishida va qatʼiy summada ifodalangan miqdori, zakalat puli oʻtkazilishi lozim boʻlgan operatorning bank rekvizitlari;

i) “Xavfsiz daryo” DUKning manzili va telefon raqami.

30. Operatorning veb-portalida tadbirkorlik subyektlariga xabarnoma va lot boʻyicha batafsil maʼlumot, shuningdek, mazkur Nizomning 17-bandida koʻrsatilgan hujjatlar bilan erkin tanishish imkoniyati taʼminlanishi lozim.

Operatorning veb-portalida auksionni oʻtkazish qoidalari bilan tanishish imkoniyati yaratiladi.

Operator tadbirkorlik subyektlarini ommaviy axborot vositalari orqali, shuningdek, boshqa usullarda auksionlarda ishtirok etish tartibi haqida muntazam tanishtirib boradi.

31. Auksionda ishtirok etish uchun arizalar xabarnoma joylashtirilgan kundan boshlab operatorning veb-portalida avtomatik tarzda qabul qilinadi.

32. Tadbirkorlik subyektlari oʻttiz ish kuni mobaynida auksionda ishtirok etishga elektron shaklda ariza topshiradi hamda elektron arizada qayd etilgan lot raqami va nomi boʻyicha elektron savdolar ochilgan kuni bir ish kuni mobaynida auksionda qatnashadi.

Arizalarni qabul qilish auksionni oʻtkazish kunidan oldingi ikki ish kuni soat 13:00 da yakunlanadi.

Ariza qabul qilish uchun belgilangan muddat oʻtgandan keyin kelib tushgan arizalar qabul qilinmaydi.

33. Arizalar elektron koʻrinishda mazkur Nizomga 3-ilovaga muvofiq shaklda beriladi.

Ariza elektron raqamli imzo bilan imzolanadi. Arizada zakalat puli toʻlanganini tasdiqlovchi toʻlov hujjatining rekvizitlari koʻrsatiladi.

Arizaga zakalat puli toʻlanganini tasdiqlovchi toʻlov hujjatining elektron (skaner qilingan) nusxasini ilova qilish mumkin.

Bunda toʻlov hujjatining toʻlov maqsadida zakalat puli toʻlanayotgan lot raqami koʻrsatilgan boʻlishi lozim.

Bir nechta auksion obyektlari boʻyicha zakalat puli ularning har biriga alohida toʻlov hujjatlari bilan toʻlanadi.

Auksionni oʻtkazish qoidalarida auksion ishtirokchisiga shaxsiy kabinetda kiritilgan zakalat puli va zakalat kiritiladigan lotning toʻliq narxi toʻlanganining hisobi yuritiladigan shaxsiy hisobraqam ochish nazarda tutilishi mumkin.

34. Auksionda ishtirok etish uchun zakalat loyiha minimal qiymatining 5 foizi miqdorida belgilanadi va operatorning bank hisobraqamiga oʻtkaziladi.

Agar ishtirokchining pul mablagʻi yetarli boʻlmasa, uning arizasi qabul qilinmaydi.

35. Auksion ishtirokchisi ariza qabul qilishning oxirgi muddatidan kechiktirmasdan, mazkur Nizomga 4-ilovaga muvofiq bildirishnomani operatorga yuborish orqali auksionda ishtirok etish uchun arizani oʻzgartirish yoki chaqirib olishga haqli.

Auksionda ishtirok etish uchun ariza chaqirib olingan hollarda operator toʻlangan zakalat pulini ariza chaqirib olingan kundan boshlab, uch ish kunidan kechiktirmay auksion ishtirokchisiga qaytaradi. Zakalat puli auksion ishtirokchisi auksionda ishtirok etishga bergan arizasida koʻrsatilgan bank hisobraqamiga qaytariladi.

Auksion ishtirokchisiga zakalat puli qaytarilganda bank hisobraqami notoʻgʻri koʻrsatilganligi yoki boshqa sabablarga koʻra, toʻlov operatorning bank hisobraqamiga qaytib tushgan holatda, operator auksion ishtirokchisini bu haqda ogohlantiradi va aniq bank maʼlumotlari berish talabini qoʻyadi. Bu holatda, oldindan zakalat puli auksion ishtirokchisi tomonidan aniq bank maʼlumotlari berilgan kundan keyingi ish kunidan kechiktirmasdan qaytariladi.

36. Ariza qabul qilingandan soʻng operator tomonidan avtomatik tarzda quyidagi qoidalarga rioya qilishi tekshiriladi:

ariza belgilangan talablarga muvofiq toʻldirilganligi, shuningdek, elektron raqamli imzoning ariza bergan shaxsga tegishliligi va haqiqiyligi (shu jumladan amal qilishi toʻxtatilishi, bekor qilinishi);

arizani xabarnomada koʻrsatilgan ariza topshirish muddati oʻtmasdan topshirilganligi.

37. Ariza va unga ilova qilingan hujjatlar belgilangan talablarga muvofiq toʻldirilgan va yuborilgan, shuningdek, zakalat puli shaxsiy hisobvaragʻidan toʻliq kelib tushgandan keyin avtomatik tarzda qabul qilinadi.

Auksion ishtirokchilariga ular auksionda ishtirok etishda foydalanish uchun shaxsiy tartib raqamlari beriladi.

38. Ariza va unga ilova qilingan hujjatlar belgilangan talablarga muvofiq toʻldirilmagan va joʻnatilmagan, zakalat puli operatorning bank hisobvaragʻiga toʻlanmagan yoki toʻliq toʻlanmagan hollarda avtomatik tarzda ariza rad qilinadi va bu haqda elektron pochtasiga bildirishnoma yuboriladi.

39. Ishtirokchi xabarnomada koʻrsatilgan ariza qabul qilish vaqti yakunlanguniga qadar auksionda ishtirok etishga arizani undagi kamchiliklarni bartaraf qilgan holda takroran yuborishga haqli.

40. Operator arizalar va ishtirokchilar haqidagi maʼlumotlarni sir tutilishini taʼminlaydi.

Arizalarni qabul qilish davrida, shuningdek, auksionni oʻtkazish davomida operatorning veb-portalida auksion ishtirokchilari haqidagi maʼlumotlarni (tadbirkorlik subyektlarining nomi va pochta manzili, identifikatsiya raqami, ishtirokchini aniqlash imkonini beradigan boshqa maʼlumotlarni) aks ettirishga yoʻl qoʻyilmaydi.

41. Auksion operatorning veb-portalidagi xabarnomada koʻrsatilgan kunda va vaqtda boshlanadi.

42. Auksion unga qoʻyilgan ikki va undan ortiq ishtirokchi mavjud boʻlganda oʻtkaziladi.

43. Tegishli lot boʻyicha auksion boshlangach, veb-portalda auksion boshlangani haqidagi maʼlumot avtomatik tarzda yangilanadi.

44. Auksion ish kuni mobaynida soat 9.00 dan soat 18.00 gacha oʻtkaziladi.

45. Boshlangʻich narx bilan loyihaning minimal qiymatiga teng narx belgilanadi.

46. Auksion qadami auksion obyekti minimal qiymatining 2 foizi miqdorida belgilanadi.

47. Auksion uning ishtirokchilaridan lotni boshlangʻich narxdan bitta qadamga oshirilgan narxda sotib olish boʻyicha taklifni tasdiqlashni soʻrashdan boshlanadi.

48. Agar taklif berilgandan keyin 10 daqiqa davomida auksion ishtirokchilaridan biri belgilangan qadamga oshirilgan lot narxini tasdiqlasa, keyingi taklifni tasdiqlash uchun vaqt yana 10 daqiqaga uzaytiriladi.

49. Agar tasdiqlangan oxirgi taklifdan soʻng 10 daqiqa davomida keyingi oshirilgan lot narxi boʻyicha taklif auksion ishtirokchilarining birontasi tomonidan tasdiqlanmasa, auksion uning natijalari haqidagi bayonnomani avtomatik tarzda shakllantirgan holda yakunlanadi. Lot narxi boʻyicha taklifni oxirgi tasdiqlagan ishtirokchi auksion gʻolibi deb topiladi.

50. Agar lot narxini oshirish boʻyicha taklifni oxirgi tasdiqlagan auksion ishtirokchisi buni auksionni oʻtkazish vaqti yakunlanishiga oʻn daqiqadan kam qolganda amalga oshirgan boʻlsa, auksionni oʻtkazish vaqti oxirgi taklif tasdiqlangan paytdan boshlab keyingi oʻn daqiqaga uzaytiriladi. Keyingi har bir taklif auksionni oʻtkazish vaqtini oʻn daqiqadan uzaytirib boradi. Biroq, bunda auksionni oʻtkazish vaqti 3 soatdan ortiq boʻlmagan muddatga uzaytirilishi mumkin va auksion soat 21-00 ga qadar yakunlanishi lozim. Lot narxi boʻyicha oxirgi taklifni soat 21-00 ga qadar bildirgan ishtirokchi auksion gʻolibi deb topiladi.

51. Savdo maydonchasida auksionni oʻtkazishga toʻsqinlik qiladigan texnik uzilish sodir boʻlgan hollarda, auksion oʻtkazish sanasi va vaqti haqida auksion ishtirokchilariga xabar berilgan holda auksion texnik uzilish bartaraf qilingan kundan keyingi kunda davom ettiriladi.

52. Auksion yakunlangandan keyin veb-portalda auksion yakunlangani va uning natijalari haqidagi maʼlumot avtomatik tarzda yangilanadi.

Auksion yakunlanganda operatorning veb-portalida quyidagi maʼlumotlar aks ettiriladi:

lotning boshlangʻich narxi;

oxirgi va oxirgidan oldin tasdiqlangan takliflar (oxirgi va oxirgidan oldingi qadamlarni hisobga olgan holda auksion ishtirokchilari tomonidan tasdiqlangan takliflar boʻyicha shakllangan narxlar);

auksion gʻolibining hamda oxirgidan oldin taklifni tasdiqlagan auksion ishtirokchisining tegishli maʼlumotlari.

53. Auksion quyidagi hollarda oʻtkazilmagan deb topiladi:

auksionda ishtirok etish uchun uning birorta ham ishtirokchisi qoʻyilmagan boʻlsa, shu jumladan, unda ishtirok etish uchun bironta ariza kelib tushmagan boʻlsa;

auksionda ishtirok etishga faqat yagona ishtirokchi qoʻyilgan boʻlib, u auksion obyektini mazkur Nizomning 56-bandida belgilangan tartibda sotib olishdan bosh tortgan boʻlsa;

auksion ishtirokchilaridan hech qaysi biri loyihani amalga oshirish huquqini auksion jarayonida taklif etilgan narxda sotib olish istagini bildirmasa;

mazkur Nizomning 61-bandida belgilangan tartibda auksion obyektini sotib olish taklif etilgan auksion gʻolibi va oxiridan oldingi taklifni tasdiqlagan ishtirokchi tomonidan auksion obyekti qiymatining 30 foizi belgilangan muddatda toʻliq toʻlanmasa.

54. Auksion oʻtkazilmagan deb topilganda, operatorning veb-portalida avtomatik tarzda bu haqida uning sabablari, shuningdek, lotning boshlangʻich narxi koʻrsatilgan maʼlumot aks ettiriladi.

55. Auksion oʻtkazilmagan deb topilganda, loyihani amalga oshirish huquqi mazkur Nizomning 28 — 56-bandlarida belgilangan tartibda oʻtkaziladigan auksionga avtomatik tarzda takroran qoʻyiladi.

Bunda:

loyihani amalga oshirish huquqi ushbu Nizomning 53-bandida nazarda tutilgan asoslarga koʻra oʻtkazilmagan deb topilishi sababli realizatsiya qilinmasa, takroriy auksionlarda auksion obyektining boshlangʻich narxida qoʻyiladi. Takroriy auksionlar 2 marotaba oʻtkaziladi.

Takroriy auksion oʻtkazilmagan deb topilgan taqdirda, operator “Xavfsiz daryo” DUKni bu haqda elektron xat bilan xabardor qiladi hamda auksion obyektini auksion savdosidan oladi.

56. Agar ariza berish muddati tamom boʻlganda ariza faqat yagona ishtirokchi tomonidan berilgan boʻlsa, operator auksion oʻtkaziladigan kunda ushbu ishtirokchiga elektron shaklda auksion obyektini loyihaning minimal qiymati boʻyicha sotib olish taklifini yuboradi.

Bunda auksion ishtirokchisi besh ish kuni mobaynida auksion obyektini baholash qiymati boʻyicha sotib olishga rozilik bildirsa, u auksion gʻolibi deb topiladi va unga mazkur Nizomning 57 va 58-bandlarida belgilangan tartibda auksion natijalari haqida bayonnoma rasmiylashtiriladi.

Auksion ishtirokchisi taklif yuborilgan paytdan boshlab, besh ish kuni mobaynida operatorni auksion obyektini sotib olish istagi yoʻqligi toʻgʻrisida xabardor qilsa, auksion obyektini sotib olishni rad etgan deb topiladi.

57. Auksion gʻolibi auksion yakunlangan kundan boshlab besh ish kunidan kechiktirmay, auksionda sotilgan auksion obyekti qiymatining 30 foizi miqdorini toʻlashi va pul mablagʻlari oʻtkazilganligini tasdiqlovchi toʻlov hujjatining elektron (skaner qilingan) nusxasini operatorga joʻnatishi lozim.

Bunda ushbu auksion obyekti boʻyicha avval toʻlangan zakalat puli auksion obyektining 30 foiz qiymatiga qoʻshib hisoblanadi.

Gʻolib tomonidan auksion obyektining 30 foiz qiymati toʻliq toʻlangandan soʻng operator bir ish kunidan kechiktirmasdan:

auksionni tashkil etish boʻyicha xizmatlar haqini ushlab qolgan holda, auksion obyektini realizatsiya qilishdan tushgan mablagʻlarni “Xavfsiz daryo” DUK buyurtmasida koʻrsatilgan bank hisobraqamiga oʻtkazadi;

maxsus blankada auksion natijalari haqidagi bayonnomani rasmiylashtiradi, uni muhr bilan tasdiqlaydi va bir nusxasini auksion gʻolibiga topshiradi (yoki auksion gʻolibining roziligiga koʻra pochta joʻnatmasi bilan yuboradi). Bayonnomaning ikkinchi nusxasi auksion natijalari haqida xabardor qilgan holda “Xavfsiz daryo” DUKga belgilangan tartibda yuboriladi, uchinchi nusxasi operatorda qoladi.

58. Auksion natijalari haqidagi bayonnomada quyidagi maʼlumotlar koʻrsatiladi:

a) oʻtkazilgan auksion sanasi;

b) “Xavfsiz daryo” DUKning loyihani amalga oshirish huquqini auksionda realizatsiya qilish uchun qoʻyish toʻgʻrisidagi buyrugʻi;

v) lot raqami;

g) auksion obyektining boshlangʻich bahosi;

d) auksion obyektining sotilgan bahosi;

e) auksion gʻolibi;

j) auksion obyekti, shu jumladan:

loyihaning oʻziga xos raqami, uni amalga oshirish joyi;

loyihani amalga oshirishning belgilangan maqsadi;

loyihani amalga oshirish muddati.

59. Operator bir ish kuni mobaynida oʻtkazilgan auksion natijalari haqidagi bayonnomani “Xavfsiz daryo” DUKga taqdim etadi va oʻz veb-portaliga axborotni kiritadi.

60. Auksion natijalari haqidagi bayonnoma “Xavfsiz daryo” DUK va auksion gʻolibi bilan shartnoma tuzish uchun asos hisoblanadi.

61. Agar auksion natijalariga koʻra, auksion gʻolibi besh ish kuni ichida loyihani amalga oshirish huquqini sotib olishdan bosh tortsa, operator keyingi kalendar kundan kechiktirmay oxirgidan oldingi taklifni bildirgan auksion ishtirokchisiga elektron shaklda u auksion davomida taklif etgan narxda loyihani amalga oshirish huquqini sotib olishni taklif qiladi.

Agar oxirgidan oldingi taklifni bildirgan auksion ishtirokchisi besh ish kuni ichida loyihani amalga oshirish huquqini sotib olishga rozilik bildirsa, u auksion gʻolibi deb topiladi va unga mazkur Nizomning 57 va 58-bandlarida belgilangan tartibda auksion natijalari haqidagi bayonnoma rasmiylashtiriladi.

62. “Xavfsiz daryo” DUK operatordan auksion natijalari haqidagi bayonnomani olgandan soʻng va loyihani amalga oshirish huquqini realizatsiya qilishdan pul mablagʻlari tushgach, uch ish kuni mobaynida:

auksion gʻolibi bilan belgilangan tartibda shartnoma tuzadi;

Oʻzbekiston Respublikasi Favqulodda vaziyatlar vazirligi, Ekologiya va atrof-muhitni muhofaza qilish davlat qoʻmitasi hamda Davlat geologiya va mineral resurslar qoʻmitasiga auksion gʻolibi toʻgʻrisidagi maʼlumotlarni taqdim etadi.

63. Oʻzbekiston Respublikasi Favqulodda vaziyatlar vazirligi, Ekologiya va atrof-muhitni muhofaza qilish davlat qoʻmitasi hamda Davlat geologiya va mineral resurslar qoʻmitasi “Xavfsiz daryo” DUKdan olingan auksion gʻolibi toʻgʻrisidagi maʼlumotlarni uch ish kuni mobaynida oʻz rasmiy veb-saytlarida majburiy tartibda joylashtiradi.

64. Mazkur Nizomning 65 va 66-bandlarida koʻrsatilgan holatlardan tashqari, auksion yakunlanganidan yoki oʻtkazilmagan deb topilganidan soʻng zakalat puli quyidagilarga qaytariladi:

oxirgidan oldingi taklifni bildirgan auksion ishtirokchisiga — auksion yakunlangan kundan boshlab oʻn ikki ish kuni ichida;

auksionda ishtirok etishga qoʻyilgan yagona ishtirokchiga — xabarnomada koʻrsatilgan auksion oʻtkazish kunidan boshlab olti ish kuni ichida;

boshqa ishtirokchilarga — auksion yakunlangan yoki oʻtkazilmagan deb topilgan kundan boshlab uch ish kuni ichida.

Bunda zakalat puli auksion ishtirokchisining arizasiga asosan aynan shu lot boʻyicha takroriy auksionda qatnashish uchun operatorning bank hisobraqamida qoldirilishi mumkin.

65. Mazkur Nizomning 60 va 61-bandlarida belgilangan tartibda shartnoma tuzgan auksion ishtirokchisiga zakalat puli kaytarilmaydi va shartnomada kelishilgan narxga qoʻshib hisoblanadi.

66. Mazkur Nizomning 57-bandida belgilangan tartibda auksion obyekti qiymatining 30 foizini toʻlamagan, shuningdek, mazkur Nizomning 53-bandi beshinchi xatboshida nazarda tutilgan auksion ishtirokchilariga zakalat puli qaytarilmaydi va operatorning tasarrufida qoladi.

67. Loyihani amalga oshirish huquqini realizatsiya qilish boʻyicha oʻtkazilgan pul mablagʻlari operator tomonidan “Xavfsiz daryo” DUKning bank hisobraqamida jamlanadi va Oʻzbekiston Respublikasi Prezidentining “Ichki bozorni qum-shagʻal materiallari bilan barqaror taʼminlash boʻyicha qoʻshimcha chora-tadbirlar toʻgʻrisida” 2018-yil 9-iyuldagi PQ-3841-son qarorida va “Xavfsiz daryo” DUKning Ustavida belgilangan maqsadlarga yoʻnaltiriladi.

68. Shartnomada loyihani amalga oshirish shartlari, shu jumladan loyihani belgilangan muddatlarda amalga oshirish, davlat ekologik ekspertizasi xulosasida nazarda tutilgan talablarga rioya etish toʻgʻrisidagi majburiyatlari, shuningdek, ushbu majburiyatlarni bajarmaslik oqibatlari koʻrsatiladi.

Bunda shartnomaga auksionni oʻtkazish haqidagi xabarnomada avval nazarda tutilmagan talablar va majburiyatlarni kiritishga yoʻl qoʻyilmaydi.

69. Auksion gʻolibi shartnomada koʻrsatilgan majburiyatlarga rioya etmagan holatlarda, ushbu loyihani amalga oshirish boʻyicha tuzilgan shartnoma qonun hujjatlarida belgilangan tartibda bekor qilinadi.

70. Daryo oʻzanlarini tozalash jarayonida qum-shagʻal materiallarini qazib olish ishlari mavsumiy tarzda, yer uchastkalarini ajratmagan xolda amalga oshiriladi.

71. Tadbirkorlik subyektlari har yili bir marta yillik qazib olingan foydali qazilmalar hajmlari toʻgʻrisida belgilangan tartibda marksheyderlik xulosasini tuzadilar va Davlat geologiya va mineral resurslar qoʻmitasi huzuridagi Kon-geologiya faoliyatini nazorat qilish hududiy inspeksiyalariga taqdim etadilar.

72. “Xavfsiz daryo” DUK doimiy ravishda:

Oʻzbekiston Respublikasi Favqulodda vaziyatlar vazirligi, Ekologiya va atrof-muhitni muhofaza qilish davlat qoʻmitasi hamda Davlat geologiya va mineral resurslar qoʻmitasi xodimlari bilan birgalikda joylarga chiqqan holda, daryolar oʻzanlarini tozalash ishlari olib borilayotgan uchastkalardagi holatni oʻrganadi;

shartnoma asosida jalb etilgan tadbirkorlik subyektlari tomonidan daryolar oʻzanlarini tozalash ishlari natijasida olingan qum-shagʻal materiallari hajmining hisobini yuritadi.

73. Auksion gʻolibi tomonidan loyihani amalga oshirish boʻyicha majburiyatlarning bajarilishi “Xavfsiz daryo” DUK tomonidan nazorat qilinadi va bu toʻgʻrisida har oyda Oʻzbekiston Respublikasi Favqulodda vaziyatlar vazirligiga hisobot beriladi.

74. Ushbu Nizom talablari buzilishida aybdor shaxslar qonun hujjatlarida belgilangan tartibda javob beradilar.

1. Vazirlar Mahkamasining 2017-yil 9-avgustdagi 606-son qarori (Oʻzbekiston Respublikasi QHT, 2017-y., 32-son, 818-modda) bilan tasdiqlangan Oʻzbekiston Respublikasi Favqulodda vaziyatlar vazirligi toʻgʻrisidagi nizomda:

a) 12-bandga quyidagi mazmundagi xatboshi qoʻshilsin:

“daryolar oʻzanlarini tozalash va qirgʻoqlarini mustahkamlash ishlarini tashkil etish va amalga oshirish”;

b) 13-bandga quyidagi mazmundagi “m” kichik band bilan qoʻshilsin:

“m) daryolar oʻzanlarini tozalash va qirgʻoqlarini mustahkamlash ishlarini tashkil etish va amalga oshirish sohasida:

daryolar oʻzanlarini tozalash jarayonida qum-shagʻal qazib olish ishlarini olib borish uchun loyiha hujjatlarini ishlab chiqish, ular boʻyicha davlat ekologik ekspertizasi xulosasini olishni taʼminlaydi;

daryolar oʻzanlarini tozalash ishlari olib borilayotgan uchastkalardagi holatni oʻrganib boradi;

shartnoma asosida jalb etilgan tadbirkorlik subyektlari tomonidan daryolar oʻzanlarini tozalash ishlari natijasida olingan qum-shagʻal materiallari hajmining hisobini yuritadi;

daryolar oʻzanlarida toʻplanib qolgan va tozalanishi lozim boʻlgan uchastkalar roʻyxati tayyorlanishini taʼminlaydi;

daryolar oʻzanlarini tozalash va qirgʻoqlarni mustahkamlash ishlarini amalga oshiradi”;

v) 14-bandning toʻqqizinchi xatboshi quyidagi tahrirda bayon qilinsin:

“avariya-qutqaruv texnikalarini yaratish, avariyalar va halokatlardan jabrlangan aholi va hududlarni reabilitatsiya qilish ishlarini olib borishda ishlarni bajaruvchilar (firmalar), chet ellik ish bajaruvchilar bilan, shuningdek, Vazirlik zimmasiga yuklatilgan boshqa vazifalarni bajarish uchun belgilangan tartibda shartnomalar tuzish;”.

2. Vazirlar Mahkamasining 2017-yil 21-dekabrdagi 1009-son qarori bilan tasdiqlangan Daryolar oʻzanlarini tozalash va qirgʻoqlarini mustahkamlash ishlarini amalga oshirish tartibi toʻgʻrisidagi nizomning 6-bandiga quyidagi mazmundagi xatboshi qoʻshilsin:

“Daryolar oʻzanlarini toʻplanib qolgan qum-shagʻal materiallaridan tozalash FVV, Davlat ekologiya qoʻmitasi hamda Davlat geologiya qoʻmitalari xodimlari tomonidan olib borilgan oʻrganishlar natijasida shakllantirilgan roʻyxatga muvofiq belgilangan tartibda amalga oshiriladi”.