Oʻzbek adabiyoti, sanʼati va meʼmorchiligi rivojidagi ulkan yutuqlarni ragʻbatlantirish tartibini takomillashtirish maqsadida Vazirlar Mahkamasi qaror qiladi:

1. Adabiyot, sanʼat va meʼmorchilik sohasida Alisher Navoiy nomidagi Davlat mukofotlarini 1996-yildan boshlab, Oʻzbekiston Respublikasi Prezidentining Farmoni bilan, har uch yilda bir marta Mustaqillik bayrami arafasida berish tartibi joriy qilinsin.

Alisher Navoiy nomidagi uchta Davlat mukofotlarining har biri 200 ta eng kam oylik ish haqi miqdorida belgilansin.

2. Adabiyot va sanʼat sohasida Abdulla Qodiriy nomidagi Davlat mukofotlarini 1997-yildan boshlab. Oʻzbekiston Respublikasi Prezidentining Farmoni bilan, har uch yilda bir marta Mustaqillik bayrami arafasida berish tartibi joriy qilinsin.

Abdulla Qodiriy nomidagi uchta Davlat mukofotlarining har biri 80 ta eng kam oylik ish haqi miqdorida belgilansin.

Tasviriy va amaliy sanʼat, xalq hunarmandchiligi sohasida Kamoliddin Behzod nomidagi Davlat mukofotlarini 1997-yildan boshlab Oʻzbekiston Respublikasi Prezidentining Farmoni bilan har uch yilda bir marta Mustaqillik bayrami arafasida berish tartibi joriy qilinsin.

Kamoliddin Behzod nomidagi uchta Davlat mukofotining har biri 80 ta eng kam oylik ish haqi miqdorida belgilansin.

3. Quyidagilar belgilansin

a) Alisher Navoiy, Kamoliddin Behzod va Abdulla Qodiriy nomidagi Davlat mukofotlarini berish toʻgʻrisidagi Oʻzbekiston Respublikasi Prezidentining Farmoni, ommaviy axborot vositalarida eʼlon qilinadi;

b) Davlat mukofotlari qoʻmitasining maqomi, tarkibi, vakolat muddati va vazifalari Oʻzbekiston Respublikasi Vazirlar Mahkamasi tomonidan tasdiqlangan Nizom bilan belgilanadi.

4. Yangi tahrirda ilova qilinayotgan:

Oʻzbekiston Respublikasining adabiyot, sanʼat va meʼmorchilik sohasida Alisher Navoiy nomidagi Davlat mukofoti toʻgʻrisidagi Nizom (1-ilova);

Oʻzbekiston Respublikasining adabiyot va sanʼat sohasida Abdulla Qodiriy nomidagi Davlat mukofoti toʻgʻrisidagi Nizom (2-ilova);

Oʻzbekiston Respublikasi Vazirlar Mahkamasi huzuridagi Adabiyot, sanʼat va meʼmorchilik sohasida Oʻzbekiston Respublikasi Davlat mukofotlari qoʻmitasi toʻgʻrisidagi Nizom (3-ilova);

5. Oʻzbekiston Respublikasi Moliya vazirligi qoʻmita ishchi guruhining faoliyati uchun har yili respublika budjetidan tegishli mablagʻ ajratsin.

6. Oʻzbekiston Respublikasi Vazirlar Mahkamasining 1991-yil 6-fevraldagi 33-son va 1993-yil 10-maydagi 215-son qarorlari oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Vazirlar Mahkamasining Ijtimoiy masalalar va madaniyat boʻlimiga yuklansin.

1. Oʻzbekiston Respublikasining Alisher Navoiy nomidagi Davlat mukofoti badiiy ijod sohasidagi eng oliy mukofotdir.

Alisher Navoiy nomidagi Davlat mukofoti Oʻzbekiston Respublikasining madaniy hayotida katta voqea boʻlgan, milliy qadriyatlar xazinasini boyitgan adabiyot, sanʼat va meʼmorchilik sohasidagi eng yorqin va sermazmun asarlar uchun beriladi.

2. Alisher Navoiy nomidagi Davlat mukofotiga respublikada hamda chet ellarda eʼlon qilingan, alohida kitob shaklida nashr qilingan, ommaviy ravishda ijro etilgan, koʻrsatilgan va namoyish qilingan hamda keng jamoatchilik tomonidan yuqori baholangan badiiy asarlar, sanʼat namunalari taqdim etiladi.

Hujjatlarni taqdim etish va rasmiylashtirish tartibi Vazirlar Mahkamasi huzuridagi Davlat mukofotlari Qoʻmitasi tomonidan belgilanadi.

3. Alisher Navoiy nomidagi Davlat mukofotiga taqdim etilgan ishlar vazirliklar, davlat qoʻmitalari, ijodiy uyushmalarning respublika miqyosidagi idoralari va xalqaro jamoat tashkilotlarining qarorlari asosida Qoʻmita tomonidan qabul qilinadi.

Mehnat jamoalari, ijodiy va ilmiy jamoalar yuqorida qayd etilgan tashkilotlarga Oʻzbekiston Respublikasining Alisher Navoiy nomidagi Davlat mukofotini olishga nomzod koʻrsatish boʻyicha takliflar kiritish, shuningdek, tavsiya etilgan ishlarga doir oʻz fikr mulohazalarini qoʻmitaga maʼlum qilish huquqiga egadirlar.

4. Oʻzbekiston Respublikasining boshqa Davlat mukofotlariga ilgari sazovor boʻlgan asarlar Alisher Navoiy nomidagi Davlat mukofotiga tavsiya etilmaydi.

5. Ishlarni Alisher Navoiy nomidagi Davlat mukofotiga taqdim etuvchi jamoa faqat ijodiy hissasi hal qiluvchi boʻlgan asosiy mualliflarni roʻyxatga kiritishi kerak. Maʼmuriy, maslahatchilik va tashkiliy ishlarda qatnashgan shaxslar mukofot olishga talabgorlar roʻyxatiga kiritilmaydi. Taqdim etilgan bir asar uchun mukofot olishga talabgorlar soni 3 kishidan oshmasligi kerak.

6. Alisher Navoiy nomidagi Davlat mukofoti Oʻzbekiston adabiyoti, sanʼati va meʼmorchiligi bilan bogʻliq boʻlgan eng yaxshi ishlar uchun boshqa mamlakatlarning madaniyat arboblariga ham berilishi mumkin.

Chet ellik madaniyat arboblariga Oʻzbekiston Respublikasi Davlat mukofoti berilganda, ularning bu mukofotni olish uchun kelib ketishlari bilan bogʻliq xarajatlar Oʻzbekiston Respublikasi Moliya vazirligi va Qoʻmita tomonidan belgilangan tartibda mablagʻ bilan qoplanadi.

7. Alisher Navoiy nomidagi Davlat mukofotlarini berish toʻgʻrisidagi qaror Qoʻmita tarkibining kamida uchdan ikki qismi ishtirokida, yashirin ovoz berish yoʻli bilan qatnashchilarning uchdan ikki qismi ijobiy munosabat bildirganda qabul qilinadi hamda Vazirlar Mahkamasiga taqdim etiladi.

Alisher Navoiy nomidagi Davlat mukofotlari alohida hollarda 1 yoki 2 asar uchun berilishi mumkin.

8. Alisher Navoiy nomidagi Davlat mukofotlariga tavsiya etilgan spektakllarni, musiqiy asarlarni, konsert dasturlarini, kino va telefilmlarni, tasviriy sanʼat asarlari va boshqa ishlarni koʻrish hamda tinglashni tashkil etish manfaatdor vazirliklar, idoralar va tashkilotlar zimmasiga yuklanadi.

Koʻrsatilgan talablar tegishli vazirlik va idoralar, ijodiy uyushmalar tomonidan bajarilmaganda Qoʻmita ishlarni koʻrib chiqishni rad etishi mumkin.

9. Alisher Navoiy nomidagi Davlat mukofotiga sazovor boʻlganlarga tantanali vaziyatda sovrindorlik yorliqlari va nishonlari topshiriladi. Mukofotning puli (agar ular bir ijodkordan koʻp boʻlsa) mualliflar jamoasi oʻrtasida teng ulushlarda taqsimlanadi.

Alisher Navoiy nomidagi Davlat mukofoti sovrindorining faxriy nishoni koʻkrakning oʻng tomoniga taqiladi.

10. Vafot etgan Alisher Navoiy nomidagi Davlat mukofoti sovrindorining (yoki vafotidan soʻng mukofotlanganning) yorligʻi va faxriy nishoni yodgorlik tariqasida uning oilasiga topshiriladi. Mukofotning puli Oʻzbekiston Respublikasi fuqarolik qonunida nazarda tutilgan tartibda meros qilib beriladi.

11. Oʻzbekiston Respublikasining Alisher Navoiy nomidagi Davlat mukofoti takroran berilmaydi.

1. Oʻzbekiston Respublikasining Abdulla Qodiriy nomidagi Davlat mukofoti adabiyot va sanʼat sohasida yaratilgan milliy istiqlol gʻoyalarini erkin badiiy shakllarda aks ettirgan, Oʻzbekistonning buyuk tarixini va hozirgi yuksalish jarayonlarini haqqoniy obrazlar orqali gavdalantirgan va keng jamoatchilik tomonidan tan olingan yetuk sanʼat asarlari uchun beriladi.

2. Mukofotga soʻnggi toʻrt yil mobaynida yaratilgan, eʼlon qilingan, alohida kitob shaklida nashr etilgan, koʻrgazmaga qoʻyilgan, mamlakatimizda ommaviy ravishda nashr va ijro etilgan badiiy adabiyot, musiqa, teatr-sahna asarlari koʻrib chiqish uchun qabul qilinadi.

Hujjatlarni taqdim etish va rasmiylashtirish tartibi Vazirlar Mahkamasi huzuridagi Davlat mukofotlari qoʻmitasi tomonidan belgilanadi.

3. Abdulla Qodiriy nomidagi Davlat mukofotiga taqdim etish toʻgʻrisidagi qarorlar vazirliklar, davlat qoʻmitalari, ijodiy uyushmalar, respublika va xalqaro jamoat tashkilotlari rahbar organlari tomonidan qabul qilinadi.

Mehnat jamoalari, ijodiy va ilmiy jamoalar yuqorida qayd etilgan tashkilotlarda koʻrib chiqish uchun Abdulla Qodiriy nomidagi mukofotni olishga nomzod koʻrsatish boʻyicha taklif kiritish, shuningdek, tavsiya etilgan asarlar va ishlarga doir oʻz fikr-mulohazalarini qoʻmitaga maʼlum qilish huquqiga egadirlar.

4. Oʻzbekiston Respublikasining boshqa Davlat mukofotiga ilgari sazovor boʻlgan asarlar Abdulla Qodiriy nomidagi Davlat mukofotiga tavsiya etilmaydi.

5. Ishlarni Abdulla Qodiriy nomidagi Davlat mukofotiga tavsiya etadigan jamoa faqat ijodiy hissasi hal qiluvchi boʻlgan asosiy mualliflarni roʻyxatga kiritishi kerak. Bir mukofotga talabgorlar soni 3 kishidan oshmasligi lozim.

6. Abdulla Qodiriy nomidagi Davlat mukofotiga tavsiya etilgan spektakllarni, musiqa asarlarini, konsert dasturlarini, kino va telefilmlarni koʻrish hamda tinglashni tashkil qilish, shuningdek, ularga zarur materiallarni oʻz vaqtida taqdim etish tegishli vazirliklar, kompaniyalar, ijodiy uyushmalar va boshqa manfaatdor tashkilotlar zimmasiga yuklanadi.

Koʻrsatib oʻtilgan talablar bajarilmagan taqdirda Qoʻmita ishlarni koʻrib chiqishni rad etishi mumkin.

7. Abdulla Qodiriy nomidagi Davlat mukofotini berishga doir takliflar toʻgʻrisidagi qarorni Qoʻmita oʻz tarkibining kamida uchdan ikki qismi ishtirokida, yashirin ovoz berish orqali koʻpchilik ovoz bilan qabul qiladi hamda Vazirlar Mahkamasiga taqdim etadi.

8. Oʻzbekiston Respublikasining Abdulla Qodiriy nomidagi Davlat mukofotiga sazovor boʻlgan ijodkorlarga tantanali vaziyatda sovrindorlik yorliqlari va faxriy nishonlar topshiriladi.

Mukofotning puli (agar ular bir ijodkordan koʻp boʻlsa) mualliflar jamoasi oʻrtasida teng ulushlarda taqsimlanadi. Abdulla Qodiriy nomidagi Davlat mukofoti sovrindori faxriy nishoni koʻkrakning oʻng tomoniga taqiladi.

9. Vafot etgan Abdulla Qodiriy nomidagi Davlat mukofoti sovrindorining (yoki vafotidan soʻng mukofotlanganning) yorligʻi va faxriy nishoni yodgorlik tariqasida uning oilasiga topshiriladi. Mazkur mukofotning puli Oʻzbekiston Respublikasining fuqarolik qonunida nazarda tutilgan tartibda meros qilib beriladi.

10. Oʻzbekiston Respublikasining Abdulla Qodiriy nomidagi Davlat mukofoti takroran berilmaydi.

1. Oʻzbekiston Respublikasi Vazirlar Mahkamasi huzuridagi Adabiyot, sanʼat va meʼmorchilik sohasida Oʻzbekiston Respublikasi Davlat mukofotlari qoʻmitasi (bundan keyin “Qoʻmita” deb ataladi) eng nufuzli adabiyot, sanʼat va meʼmorchilik arboblaridan, ijodiy uyushmalar va jamoatchilik tashkilotlari, idoralari hamda madaniyat muassasalarining taniqli vakillaridan tashkil topadi va uning tarkibi har toʻrt yilda uchdan ikki qismi yangilanishi nazarda tutilgan holda tasdiqlanadi. Mazkur qoʻmita aʼzolari jamoatchilik asosida ishlaydilar

2. Qoʻmita ishiga Vazirlar Mahkamasi tomonidan tasdiqlangan rais jamoatchilik asosida boshchilik qiladi.

3. Qoʻmita oʻz ishchi guruhiga ega boʻladi Qoʻmita raisining oʻrinbosari Qoʻmita raisi — tavsiyasiga muvofiq Vazirlar Mahkamasining farmoyishi bilan lavozimga tayinlanadi va lavozimdan ozod etiladi.

Qoʻmita raisi va uning oʻrinbosari oʻz xizmat lavozimiga koʻra qoʻmita tarkibiga kiradi.

4. Qoʻmita raisi oʻrinbosari tibbiy va maishiy taʼminot sharoitlari boʻyicha Vazirlar Mahkamasi huzuridagi qoʻmitalar raislari oʻrinbosarlariga tenglashtiriladi.

5. Qoʻmitada Qoʻmita raisining oʻrinbosaridan tashqari, maosh toʻlanadigan masʼul kotib va hisobchi oʻrinlari boʻladi.

6. Qoʻmitaga adabiyot, sanʼat va meʼmorchilik sohasida Oʻzbekiston Respublikasining Alisher Navoiy nomidagi, Kamoliddin Behzod nomidagi va Abdulla Qodiriy nomidagi Davlat mukofotlarini olish boʻyicha takliflarni ushbu mukofotlar toʻgʻrisidagi Nizomlarga qatʼiy muvofiq holda koʻrib chiqish va Oʻzbekiston Respublikasi Prezidenti Farmoni uchun zarur boʻlgan takliflarni tayyorlashga doir barcha ishlar yuklanadi.

7. Qoʻmita:

a) Davlat mukofotlariga tavsiya etilgan ishlarni, shuningdek, mukofotlar toʻgʻrisidagi nizomlarga muvofiq keladigan zarur hujjatlarni qabul qiladi;

b) koʻrib chiqish uchun qabul qilingan ishlar roʻyxatini, ularning mualliflarini hamda tavsiya etgan tashkilotlarni koʻrsatgan holda, mukofotlar berilishidan besh oy oldin respublika ommaviy axborot vositalarida eʼlon qiladi;

v) Davlat mukofotlariga tavsiya etilgan ishlarning jamoatchilik tomonidan keng va oshkora muhokama qilinishini tashkil etadi, ularning jamoatchilik va mutaxassislar tomonidan xolisona baholanishiga koʻmaklashadi;

g) Davlat mukofotlari yuzasidan tushgan takliflarni koʻrib chiqib, ular haqidagi asoslangan tavsiyalarni Vazirlar Mahkamasiga taqdim etadi;

d) tanlovga qoʻyilgan ishlar boʻyicha jamoatchilik fikrini oʻrganadi, mutaxassislar va ekspert komissiyalari tavsiyalari bilan yaqindan tanishadi va xulosalar beradi, mukofotlarni berish toʻgʻrisidagi takliflar asosida qarorlar qabul qiladi, qarorlarni Vazirlar Mahkamasi orqali Oʻzbekiston Respublikasi Prezidentining koʻrib chiqishi uchun taqdim etadi;

e) Davlat mukofotlari laureati yorliqlarini, faxriy nishonlarni rasmiylashtiradi hamda ularni topshirishni tashkil etadi, shuningdek, mukofotlar pulini toʻlashni amalga oshiradi;

j) Adabiyot, sanʼat va meʼmorchilik sohasida Oʻzbekiston Respublikasi Davlat mukofotlari qoʻmitasi huzuridagi Alisher Navoiy jamgʻarmasi ishiga rahbarlik qiladi.

8. Qoʻmitaga quyidagi huquqlar beriladi:

a) Davlat mukofotlariga taqdim etilgan ishlarni oldindan koʻrib chiqish, ular yuzasidan xulosalar tayyorlash uchun pul toʻlash yoʻli bilan mutaxassis-ekspertlarni taklif etish;

b) Davlat mukofotlarini olishga taqdim etilgan ishlarni ilmiy, ijodiy va davlat tashkilotlariga ekspertlarning koʻrib chiqishi uchun yuborish;

v) mukofotlarga taqdim etilgan ishlar, shuningdek, ularning mualliflari ijodi bilan joyning oʻzida tanishish uchun Qoʻmita aʼzolarini, ekspertlar yoki ekspert komissiyalarini Qoraqalpogʻiston Respublikasi va viloyatlarga yuborish;

g) Qoʻmita aʼzolari va taklif qilingan ekspertlarning xizmat safarlari xarajatlarini toʻlash;

d) Davlat mukofotlariga taqdim etilgan ishlar roʻyxatini va Qoʻmitaning boshqa hujjatlarini eʼlon qilish masalalari yuzasidan matbuot, radio va televideniye, ijodiy, ilmiy va boshqa muassasalarga murojaat qilish.

9 Davlat mukofotiga Qoʻmita aʼzosining ishi tavsiya etilgan boʻlsa, bunday holda u Qoʻmitada mazkur ish koʻrib chiqilayotgan majlislarda qatnashmaydi.

10. Qoʻmita ishchi guruhi oʻz kundalik ish faoliyatini pul — moliya boshqaruvchisi boʻlmish tashkiliy ishlar boʻyicha rais oʻrinbosari boshchiligida amalga oshiradi. Qoʻmitaning Oʻzbekiston Respublikasi Davlat gerbi tasvirlangan muhri va bank muassasalarida hisob raqami boʻladi.