Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq, buyuraman:

1. Oʻzbekiston Respublikasi adliya vazirining 2015-yil 25-dekabrdagi 384-mh-son “Normativ-huquqiy hujjatlar loyihalarining korrupsiyaga qarshi ekspertizasini oʻtkazish uslubiyotini tasdiqlash toʻgʻrisida”gi buyrugʻiga (roʻyxat raqami 2745, 2015-yil 25-dekabr) (Oʻzbekiston Respublikasi qonun hujjatlari toʻplami, 2015-y., 51-son, 644-modda) ilovaga muvofiq oʻzgartirish va qoʻshimchalar kiritilsin.

2. Mazkur buyruq davlat roʻyxatidan oʻtkazilsin va Hukumat bayonnoma qarorlari va idoraviy normativ hujjatlarni huquqiy ekspertizadan oʻtkazish boshqarmasi Idoraviy normativ-huquqiy hujjatlarning davlat reyestriga tegishli yozuv kiritsin.

3. Qonun hujjatlarini tahlil qilish va turkumlash boshqarmasi ushbu idoraviy normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da hamda Oʻzbekiston Respublikasi Qonun hujjatlari maʼlumotlari milliy bazasida eʼlon qilinishini taʼminlasin.

4. Mazkur buyruq rasmiy eʼlon qilingan kundan eʼtiboran kuchga kiradi.

5. Mazkur buyruqning ijrosini nazorat qilish vazirning birinchi oʻrinbosari N. Joʻrayev zimmasiga yuklansin

1. Nomi va 1-banddagi “Normativ-huquqiy hujjatlar loyihalarining” degan soʻzlar “Normativ-huquqiy hujjatlar va ularning loyihalarini” degan soʻzlar bilan almashtirilsin.

2. Ilovada:

a) nomidagi “Normativ-huquqiy hujjatlar loyihalarining” degan soʻzlar “Normativ-huquqiy hujjatlar va ularning loyihalarini” degan soʻzlar bilan almashtirilsin;

b) muqaddima quyidagi tahrirda bayon etilsin:

“Mazkur Uslubiyot Oʻzbekiston Respublikasining “Normativ-huquqiy hujjatlar toʻgʻrisida”gi, “Korrupsiyaga qarshi kurashish toʻgʻrisida”gi qonunlari va Oʻzbekiston Respublikasi Prezidentining 2018-yil 13-apreldagi PQ-3666-sonli “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq mazmunida huquqni qoʻllash jarayonida korrupsion koʻrinishlarga olib kelishi mumkin boʻlgan korrupsiyaviy omillarni aniqlash yuzasidan Oʻzbekiston Respublikasining qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Oʻzbekiston Respublikasi Vazirlar Mahkamasining qarorlari, mahalliy davlat hokimiyati organlarining qarorlari loyihalarining, vazirliklar, davlat qoʻmitalari va idoralarning normativ-huquqiy hujjatlarining (bundan buyon matnda loyihalar deb yuritiladi), shuningdek, amaldagi normativ-huquqiy hujjatlar, Oʻzbekiston Respublikasining xalqaro shartnomalari va ularning loyihalarini korrupsiyaga qarshi ekspertizasini oʻtkazishning tartibini belgilaydi.”;

v) 1-bandda:

quyidagi mazmundagi beshinchi xatboshi bilan toʻldirilsin:

“yuridik xizmat — davlat organi va tashkiloti faoliyatini huquqiy taʼminlash maqsadida qonunchilikda belgilangan meʼyor va mezonlarga muvofiq majburiy tartibda tashkil etiladigan yoki joriy qilinadigan mustaqil tarkibiy tuzilma yoxud lavozim;”;

beshinchi xatboshi oltinchi xatboshi deb hisoblansin;

oltinchi xatboshi “, tuman (shahar) adliya boʻlimlari” degan soʻzlar bilan toʻldirilsin;

g) 2-band quyidagi mazmundagi xatboshi bilan toʻldirilsin:

“Korrupsiyaga qarshi ekspertiza loyihalarda korrupsiyaviy omillarning vujudga kelishini oldini olish, ularni aniqlash va bartaraf etish maqsadida oʻtkaziladi.”;

d) 6-band quyidagi mazmundagi “d” kichik band bilan toʻldirilsin:

“d) ijtimoiy munosabatlar ishtirokchilarining erkinligini cheklashga olib kelishi mumkin boʻlgan, jismoniy va yuridik shaxslarning xatti-harakatlari va faoliyatining sababsiz va asossiz tartibga solinishida ifodalaniladigan munosabatlarning haddan tashqari ortiqcha huquqiy tartibga solinganligi.”;

e) quyidagi mazmundagi 7¹-band bilan toʻldirilsin:

“7¹. Loyiha bilan tartibga solinuvchi huquqiy munosabatlarning oʻziga xos jihatlarini hisobga olgan holda adliya organlari tomonidan loyihalarning boshqa normalari ham korrupsiyaviy omillar sifatida baholanishi mumkin.”;

j) 13-band quyidagi mazmundagi xatboshi bilan toʻldirilsin:

“Korrupsiyaga qarshi ekspertizani oʻtkazish jarayoniga mustaqil ekspertlar va tor doira yoʻnalishlaridagi mutaxassislar ham jalb qilinishi mumkin.”;

z) 15-band “tayyorlanadigan” degan soʻzdan keyin “loyihani qabul qilish maqsadga muvofiq emasligi toʻgʻrisidagi” degan soʻzlar bilan toʻldirilsin;

i) 16-banddagi “Xulosada” degan soʻz “Loyihani qabul qilish maqsadga muvofiq emasligi toʻgʻrisidagi xulosada” degan soʻzlar bilan almashtirilsin;

k) 17-band quyidagi tahrirda bayon etilsin:

“17. Oʻtkazilgan loyihalarning korrupsiyaga qarshi ekspertizasi natijalari boʻyicha eʼtirozlar majburiy tusga ega va loyiha huquqiy ekspertizadan oʻtkazilishi uchun takroran kiritilganda bartaraf qilinishi shart.”;

l) 19-band quyidagi mazmundagi xatboshi bilan toʻldirilsin:

“Amaldagi normativ-huquqiy hujjatlarning korrupsiyaga qarshi ekspertizasi huquqni qoʻllash amaliyotini oʻrganish, tahlil qilish va monitoring qilish jarayoni yoki natijasi boʻyicha oʻtkaziladi.”;

m) quyidagi mazmundagi 19¹-band bilan toʻldirilsin:

“19¹. Amaldagi normativ-huquqiy hujjatlarning korrupsiyaga qarshi ekspertizasini oʻtkazish uchun quyidagilar asos boʻladi:

adliya organlari, davlat organlari va tashkilotlarining ish rejalari;

jismoniy va yuridik shaxslarning murojaatlari;

jamoat nazorati subyektlarining taklif va mulohazalari;

ommaviy axborot vositalaridan kelib tushgan nashrlar va boshqa materiallarni oʻrganish natijalari.”;

n) 20-band quyidagi tahrirda bayon etilsin:

“20. Amaldagi normativ-huquqiy hujjatlarning korrupsiyaga qarshi ekspertizasi natijalari boʻyicha adliya organlari tomonidan Oʻzbekiston Respublikasi Prezidentining 2018-yil 13-apreldagi PQ-3666-sonli qarori bilan tasdiqlangan Oʻzbekiston Respublikasi Adliya vazirligi toʻgʻrisidagi nizomning 12-bandi 5-kichik bandiga muvofiq davlat boshqaruvi organlariga, mahalliy davlat hokimiyati organlariga, huquqni muhofaza qiluvchi organlar va nazorat tuzilmalariga bajarilishi majburiy boʻlgan tegishli taqdimnomalar kiritilishi mumkin.”.