O‘zbekiston Respublikasi Prezidentining “O‘zbekiston Respublikasi Markaziy bankining faoliyatini tubdan takomillashtirish chora-tadbirlari to‘g‘risida” 2018-yil 9-yanvardagi PF-5296-son Farmoniga, O‘zbekiston Respublikasi Prezidentining “O‘zbekiston Respublikasining iqtisodiy va moliyaviy ko‘rsatkichlarining ommaviyligi va ochiqligini ta’minlash chora-tadbirlari to‘g‘risida” 2017-yil 12-sentabrdagi F-5054-son farmoyishiga muvofiq, shuningdek, tashqi sektor statistikasining o‘z vaqtida va sifatli shakllantirilishini ta’minlash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Prezidentining “O‘zbekiston Respublikasining iqtisodiy va moliyaviy ko‘rsatkichlarining ommaviyligi va ochiqligini ta’minlash chora-tadbirlari to‘g‘risida” 2017-yil 12-sentabrdagi F-5054-son farmoyishiga muvofiq O‘zbekiston Respublikasining Xalqaro valyuta fondining kengaytirilgan Ma’lumotlarni tarqatish umumiy tizimiga qo‘shilishi bo‘yicha faol ishlar olib borilayotganligi;

O‘zbekiston Respublikasi Prezidentining “O‘zbekiston Respublikasi Markaziy bankining faoliyatini tubdan takomillashtirish chora-tadbirlari to‘g‘risida” 2018-yil 9-yanvardagi PF-5296-son Farmoniga muvofiq O‘zbekiston Respublikasi Markaziy bankiga O‘zbekiston Respublikasi to‘lov balansining hisobi va tahlili tizimli asosda Xalqaro valyuta fondi metodologiyasiga muvofiq yuritilishini ta’minlash yuklanganligi ma’lumot uchun qabul qilinsin.

2. O‘zbekiston Respublikasining tashqi sektori statistikasini shakllantirish tartibi to‘g‘risidagi nizom ilovaga* muvofiq tasdiqlansin.

3. O‘zbekiston Respublikasi Moliya vazirligi, Davlat bojxona qo‘mitasi va Davlat statistika qo‘mitasi O‘zbekiston Respublikasi tashqi sektori statistikasi shakllantirilishi uchun zarur bo‘lgan ma’lumotlarni yig‘ish va Markaziy bankka o‘z vaqtida taqdim etish uchun mas’ul bo‘lgan vakolatli bo‘linmalar (shaxslar)ni bir oy muddatda belgilasinlar.

4. O‘zbekiston Respublikasi Markaziy bankiga va Davlat statistika qo‘mitasiga tashqi sektor statistikasini tuzish uchun zarur bo‘lgan ma’lumotlarni o‘z vaqtida taqdim etish va ularning to‘g‘riligi uchun shaxsiy mas’uliyat vazirliklar va idoralar rahbarlari zimmasiga yuklansin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — Moliya vaziri J.A. Qo‘chqorov, O‘zbekiston Respublikasi Davlat statistika qo‘mitasi raisi B.A. Begalov va O‘zbekiston Respublikasi Markaziy banki raisi M.B. Nurmuratov zimmasiga yuklansin.