Non va qandolatchilik mahsulotlari ishlab chiqaruvchi yakka tartibdagi tadbirkorlarni un bilan ta’minlash va uning davlat resurslaridan oqilona foydalanish maqsadida Vazirlar Mahkamasi qaror qiladi:

1. Vazirlar Mahkamasining Iste’mol tovarlari ishlab chiqarish va savdo kompleksi, “O‘zdonmahsulot” davlat-aksiyadorlik korporatsiyasi O‘zbekiston Respublikasi Makroiqtisodiyot va statistika vazirligining bir oy muddatda Qoraqalpog‘iston Respublikasida, viloyatlar va Toshkent shahrida “O‘zdonmahsulot” korporatsiyasi bo‘linmalarining do‘konlari negizida non va qandolatchilik mahsulotlari ishlab chiqaruvchi yakka tartibdagi tadbirkorlarni un bilan ta’minlash bo‘yicha ilovaga* muvofiq ixtisoslashtirilgan ulgurji-chakana do‘konlar tashkil etish to‘g‘risidagi taklifi qabul qilinsin.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, “O‘zdonmahsulot” davlat-aksiyadorlik korporatsiyasi bilan birgalikda tashkil etiladigan ulgurji-chakana do‘konlarining joylashtirilishini ikki hafta muddatda belgilasin hamda ularni qo‘shimcha nazorat-kassa apparatlari va boshqa zarur savdo jihozlari bilan ta’minlasinlar.

“O‘zdonmahsulot” davlat-aksiyadorlik korporatsiyasiga Qoraqalpog‘iston Respublikasi Vazirlar Kengashi hamda viloyatlar va Toshkent shahar hokimliklari bilan kelishgan holda, mahalliy sharoitlardan kelib chiqib, keyinchalik yakka tartibdagi tadbirkorlarga un sotish bo‘yicha qo‘shimcha ulgurji-chakana do‘konlar ochish huquqi berilsin.

2. Belgilansinki, “O‘zdonmahsulot” davlat-aksiyadorlik korporatsiyasining ixtisoslashtirilgan ulgurji-chakana do‘konlarida un, non va qandolatchilik mahsulotlari ishlab chiqaruvchi yakka tartibdagi tadbirkorlarga:

mahalliy hokimliklar tomonidan “O‘zdonmahsulot” korporatsiyasining hududiy bo‘linmalariga taqdim etiladigan ro‘yxat bo‘yicha faqat belgilangan tartibda ro‘yxatdan o‘tkazilgan tadbirkorlarga:

naqd hisob-kitob qilishning belgilangan hajmlari doirasida, faqat nazorat-kassa apparatlaridan foydalanilgan holda, O‘zbekiston Respublikasi Moliya vazirligi bilan kelishilgan chakana narxlarda sotiladi.

3. Vazirlar Mahkamasining Iste’mol tovarlari ishlab chiqarish va savdo kompleksi, O‘zbekiston Respublikasi Iqtisodiyot vazirligi 2000-yil va undan keyingi davrlar hosilidan davlat resurslari uchun oziq-ovqat bug‘doyi etishtirish va undan foydalanish balanslarining asosiy normativlarini ishlab chiqishda “O‘zdonmahsulot” davlat-aksiyadorlik korporatsiyasiga tashkil etilayotgan ulgurji-chakana do‘konlar tarmog‘i orqali yakka tartibdagi tadbirkorlarga sotish uchun un ajratishni nazarda tutsinlar.

4. Vazirlar Mahkamasining Iste’mol tovarlari ishlab chiqarish va savdo kompleksi O‘zbekiston Respublikasi Moliya vazirligi, “O‘zdonmahsulot” davlat-aksiyadorlik korporatsiyasi bilan birgalikda Qoraqalpog‘iston Respublikasi, viloyatlar va Toshkent shahri bo‘yicha ixtisoslashtirilgan ulgurji-chakana do‘konlar tarmog‘i orqali yakka tartibdagi tadbirkorlarga sotish uchun un ajratish tartibini ikki hafta muddatda ishlab chiqsin va tasdiqlasin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari M.Z. Usmonov va T.X. Xoltoyev zimmasiga yuklansin.