Oʻzbekiston Respublikasi Vazirlar Mahkamasining “Valyuta bozorini yanada erkinlashtirish chora-tadbirlari toʻgʻrisida” 2001-yil 22-iyundagi 263-son qaroriga muvofiq hamda yuqori likvidli mahsulotlarning ayrim turlarini xorijiy kompaniyalar va firmalarga erkin almashtiriladigan valyutaga kafolatli hajmlarda kimoshdi savdosi orqali sotishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Makroiqtisodiyot va statistika vazirligi, Davlat mulki qoʻmitasi va Oʻzbekiston respublika tovar-xomashyo birjasining Oʻzbekiston respublika tovar-xomashyo birjasi tuzilmasida yuqori likvidli mahsulotlarni muqobil kimoshdi savdosida sotish boʻyicha ixtisoslashtirilgan “Oʻzauksionsavdo” tashkilotini tashkil etish toʻgʻrisidagi taklifi qabul qilinsin.

2. “Oʻzauksionsavdo” tashkilotiga quyidagi asosiy vazifalarni amalga oshirish yuklansin:

yuqori likvidli mahsulotlarni sotishga doir muqobil kimoshdi savdolari oʻtkazilishini tashkil etish;

kimoshdi savdolari oʻtkazilishi, kimoshdi savdolariga qoʻyiladigan yuqori likvidli mahsulotlarning turlari va hajmlari toʻgʻrisida keng axborot berish;

kimoshdi savdolari gʻoliblari tomonidan sotib olinadigan yuqori likvidli mahsulotlarning ayrim turlariga oldi-sotdi shartnomalarini tayyorlash, rasmiylashtirish va ularni roʻyxatdan oʻtkazish;

kimoshdi savdosida qatnashish shartlariga rioya etilishini nazorat qilish.

3. Belgilansinki:

“Oʻzauksionsavdo” tashkiloti Oʻzbekiston respublika tovar xomashyo birjasining yuridik shaxs huquqiga ega boʻlgan shuʼba korxonasi hisoblanadi;

yuqori likvidli mahsulotlarni sotish boʻyicha kimoshdi savdolari “Oʻzbekiston respublika tovar-xomashyo birjasining savdo maydonida oʻtkaziladi;

“Oʻzauksionsavdo” tashkilotining kimoshdi savdolari oʻtkazishga doir faoliyatini Birlashgan barqarorlashtirish jamgʻarmasini boshqarish kengashi, Makroiqtisodiyot va statistika vazirligi, Moliya vazirligi, Tashqi iqtisodiy aloqalar vazirligi, Oʻzbekiston Respublikasi Markaziy banki, Tashqi iqtisodiy faoliyat milliy banki va “Oʻzbekinvest” eksport-import milliy sugʻurta kompaniyasi vakillaridan iborat tarkibda tuziladigan Kimoshdi savdolarini tashkil etish kengashi muvofiqlashtiradi va nazorat qiladi.

4. “Oʻzauksionsavdo” tashkilotining xodimlarning cheklangan soni 10 nafar boʻlgan (xizmat koʻrsatuvchi xodimlardan tashqari) apparati tuzilmasi 1-ilovaga muvofiq maʼqullansin.

Oʻzbekiston Respublikasi Davlat mulki qoʻmitasi joriy faoliyat uchun boshlangʻich aylanma mablagʻlar, hisoblash texnikasi va asbob-uskunalar bilan taʼminlashda “Oʻzauksionsavdo” tashkilotiga koʻmaklashsin.

5. Quyidagilar:

Yuqori likvidli mahsulotlarning ayrim turlarini kimoshdi savdosida kafolatli hajmlarda sotish tartibi toʻgʻrisidagi Nizom 2-ilovaga muvofiq;

Yuqori likvidli mahsulotlarning ayrim turlarini sotish boʻyicha kimoshdi savdolarini tashkil etish kengashining shaxsiy tarkibi 3-ilovaga* muvofiq tasdiqlansin.

6. Oʻzbekiston Respublikasi Makroiqtisodiyot va statistika vazirligi shakllanayotgan talabni hisobga olgan holda har chorakda Vazirlar Mahkamasiga kimoshdi savdosida sotishga moʻljallangan yuqori likvidli tovarlar hajmlari va turlarini kengaytirishga doir takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.

Xodimlarning cheklangan soni (xizmat koʻrsatuvchi xodimlardan tashqari) 10 kishi.

1. Ushbu Nizom Oʻzbekiston Respublikasi Vazirlar Mahkamasining “Valyuta bozorini yanada erkinlashtirish chora-tadbirlari toʻgʻrisida” 2001-yil 22-iyundagi 263-son qaroriga muvofiq ishlab chiqilgan va yuqori likvidli mahsulotlarning ayrim turlarini muqobil kimoshdi savdosi asosida xorijiy kompaniyalar hamda firmalarga erkin almashtiriladigan valyutaga kafolatlangan miqdorlarda sotish tartibini belgilaydi.

2. Nizom kimoshdi savdosini oʻtkazishning umumiy tartibini va unda qatnashish shartlarini tartibga soladi, kimoshdi savdolarini oʻtkazish boʻyicha maxsus organning vakolatlarini, hisob-kitoblarni oʻtkazish mexanizmini, shuningdek sotiladigan yuqori likvidli tovarlarning ayrim turlariga egalik qilish huquqini rasmiylashtirish tartibotlarini belgilaydi.

3. Kimoshdi savdolariga yuqori likvidli tovarlarning xorijiy kompaniyalar va firmalarga erkin almashtiriladigan valyutaga oldindan haq toʻlash shartlarida, ham yetkazib berish muddatini kechiktirgan holda, ham tuzilgan kontrakt boʻyicha yetkazib bergan holda, ushbu eksport kontraktlarini Oʻzbekiston Respublikasi Tashqi iqtisodiy aloqalar vazirligida roʻyxatdan oʻtkazmasdan sotishga moʻljallangan ayrim turlari qoʻyiladi.

4. Kimoshdi savdosida sotiladigan yuqori likvidli mahsulotlarning aniq turlari va miqdori Hukumat qarori bilan tovarlar (ishlar, xizmatlar)ni eksport qilish prognozini har yilgi tasdiqlash chogʻida, Oʻzbekiston Respublikasi Makroiqtisodiyot va statistika vazirligi, Markaziy bank hamda Tashqi iqtisodiy aloqalar vazirligi takliflari asosida belgilanadi.

5. Yuqori likvidli mahsulotlar ayrim turlarining kimoshdi savdolarini zarur darajada tashkil etish va nazorat qilishni taʼminlash uchun Birlashgan barqarorlashtirish jamgʻarmasini boshqarish kengashi, Oʻzbekiston Respublikasi Makroiqtisodiyot va statistika vazirligi, Moliya vazirligi, Tashqi iqtisodiy aloqalar vazirligi, Markaziy banki, Tashqi iqtisodiy faoliyat milliy banki va “Oʻzbekinvest” eksport-import milliy sugʻurta kompaniyasi vakillaridan kimoshdi savdolarini tashkil etish kengashi tuziladi, uning shaxsiy tarkibi Vazirlar Mahkamasi tomonidan tasdiqlanadi.

Kimoshdi savdolarini tashkil etish kengashi yuqori likvidli mahsulotlarning belgilangan turlari boʻyicha ularning har qaysi kimoshdi savdosiga qoʻyiladigan aniq miqdorlarini va lotlarning boshlangʻich narxlarini belgilaydi, ushbu Nizomga rioya etilishi, mahsulot sotishdan tushgan mablagʻlarning Birlashgan barqarorlashtirish jamgʻarmasiga toʻliq va oʻz vaqtida oʻtkazilishi ustidan nazoratni amalga oshiradi.

6. Oʻzbekiston respublika tovar-xomashyo birjasining shuʼba korxonasi – “Oʻzauksionsavdo” (keyingi oʻrinlarda “Agent” deb ataladi) yuqori likvidli mahsulotlarning ayrim turlarini sotish boʻyicha kimoshdi savdolarini oʻtkazuvchi ixtisoslashtirilgan tashkilot hisoblanadi. Agent faoliyati ustidan nazoratni kimoshdi savdolarini tashkil etish kengashi amalga oshiradi.

Kimoshdi savdolari Oʻzbekiston respublika tovar xomashyo birjasining savdo maydonchasida oʻtkaziladi.

7. Agent zimmasiga quyidagi funksiyalar yuklangan:

kimoshdi savdosiga qoʻyiladigan savdo lotlari hujjatlarini qabul qilib olish va tekshirish;

kimoshdi savdosini oʻtkazish uchun zarur boʻlgan hujjatlarni rasmiylashtirish;

kimoshdi savdosi oʻtkazilishi toʻgʻrisidagi xabarni chop etish;

kimoshdi savdosi qatnashchilarini kimoshdi savdolariga qoʻyiladigan tovarlar turlari va miqdorlari toʻgʻrisida xabardor qilish;

qoʻyilayotgan lotni identifikatsiyalash uchun potensial qatnashchilarga hujjatlarni taqdim etish;

kimoshdi savdosi qatnashchilarini roʻyxatdan oʻtkazish va qatnashchilarga chiptalar berish;

kimoshdi savdosini tashkil etish;

kimoshdi savdosida qatnashish shartlariga rioya etish ustidan nazoratni amalga oshirish;

kimoshdi savdosi qatnashchilarini kim oщdi savdolari natijalaridan xabardor qilish;

kimoshdi savdolarining borishi va natijalari toʻgʻrisida protokollar tuzish, keyinchalik ularni kimoshdi savdolarini tashkil etish kengashiga berish;

kimoshdi savdolari gʻoliblari bilan oldi-sotdi shartnomalarini rasmiylashtirish va ularni bojxona organlarida hisobga qoʻyish;

Oʻzbekiston Respublikasi qonun hujjatlariga muvofiq boshqa funksiyalar.

8. Agent savdolarni oʻtkazish jarayoniga bevosita aralashish, shu jumladan ushbu Nizom buzilgan, til biriktirish, fors-major holatlar aniqlangan hollarda lotni savdodan chiqarish, savdoni toʻxtatib qoʻyish huquqiga ega. Agent mazkur lotni kimoshdi savdosidan chiqarish sabablarini qatnashchilarga izohlab bermaslikka haqlidir.

9. Baʼzi lotlar yuzasidan faqat bittadan qatnashchi roʻyxatdan oʻtkazilgan taqdirda Agent kimoshdi savdosi ochilgungacha oʻtkazilmagan savdolarning protokolini rasmiylashtirishi va qatnashchilarni xabardor qilgan holda ushbu lotlarni kimoshdi savdosidan chiqarishi mumkin.

10. Agent kimoshdi savdolarini tashkil etish kengashining qarori asosida respublika va zarurat boʻlganda, xalqaro ommaviy axborot vositalarida kimoshdi savdosi oʻtkazilishi toʻgʻrisidagi bildirishnoma eʼlon qiladi hamda xabarnomalarni kimoshdi savdosi oʻtkaziladigan sanadan kamida 30 kun oldin treyder kompaniyalarga joʻnatadi.

11. Bildirishnoma va xabarnomada quyidagi maʼlumotlar boʻlishi kerak:

kimoshdi savdosining oʻtkazilish vaqti va joyi;

kimoshdi savdolariga qoʻyiladigan tovarlar nomi va miqdorlari;

kimoshdi savdosini oʻtkazish, shu jumladan gʻolibni aniqlash tartibi;

qatnashchilarning kimoshdi savdosida qatnashish uchun badali miqdori;

zakalat summasi va u oʻtkazilishi kerak boʻlgan hisob raqami;

ishlab chiqaruvchi omboridagi shartlarda keltirilgan boshlangʻich narx toʻgʻrisidagi maʼlumotlar;

yetkazib berish va toʻlov shartlari (tovar turiga koʻra), yetkazib berish muddatlari;

buyurtmanomalarni qabul qilish tugaydigan muddat;

nizolarni hal qilish tartibi, kimoshdi savdosi qatnashchilariga qoʻyiladigan talablar.

Koʻrsatib oʻtilgan shartlar kimoshdi savdolarini tashkil etish kengashi tomonidan belgilanadi.

12. Koʻrsatib oʻtilgan maʼlumotlarni taqdim etish shakli, qoʻshimcha maʼlumotlar shartlari va roʻyxati Agent tomonidan belgilanadi.

13. Bildirishnoma eʼlon qilingan yoki xabarnoma olingan vaqtdan boshlab tashkilotchi kimoshdi savdosining barcha qatnashchilariga qoʻyiladigan lotni identifikatsiya qilish uchun hujjatlarni taqdim etadi. Kimoshdi savdosining potensial qatnashchilari talab qilishganda sotuvchi har qaysi lot namunasini tanishish uchun taqdim etadi.

14. Kimoshdi savdosida qatnashganlik uchun toʻlov, qaytarib berilmagan zakalatlar va qonunchilik bilan ruxsat etilgan boshqa mablagʻlar kimoshdi savdolarini tashkil etish uchun moliyaviy mablagʻlar manbalari hisoblanadi.

15. Agentga quyidagilarni muddatida taqdim etgan kompaniyalar va firmalar kimoshdi savdosida qatnashish uchun eksklyuziv huquqqa egadir:

kimoshdi savdosida qatnashish uchun buyurtmanoma;

savdo reyestridan koʻchirma;

kimoshdi savdosida qatnashish uchun bankning tavsiyanomasi.

Agentning hisob raqamiga erkin almashtiriladigan valyutada buyurtmanoma taqdim etilayotgan lot boshlangʻich qiymatining 0,1 foizidan koʻp boʻlmagan miqdorda kimoshdi savdosida qatnashish uchun badal toʻlanganini tasdiqlovchi toʻlov hujjatining nusxasi;

Agentning hisob raqamiga buyurtmanoma taqdim etilayotgan lot boʻyicha kimoshdi savdolarini tashkil etish kengashi tomonidan belgilangan miqdorda erkin valyutada zakalat toʻlanganligini tasdiqlovchi toʻlov hujjatining nusxasi.

16. Agent tomonidan zarur hujjatlarni qabul qilish va roʻyxatga olish kimoshdi savdosi oʻtkazilishi eʼlon qilingan sanadan 5 ish kuni oldin toʻxtatiladi.

17. Kimoshdi savdosida qatnashishga qoʻyilgan xorijiy kompaniyalar va firmalarga xaridorning kimoshdi savdosida qatnashayotgan tartib raqami va kimoshdi savdosiga qoʻyilgan lotning tartib raqami yozilgan kimoshdi savdosi qatnashchisining chiptasi beriladi.

18. Agar buyurtmanoma taqdim etgan xorijiy kompaniya yoki firma mazkur Nizomning 15-bandida belgilangan talablarni bajarmagan boʻlsa, buyurtmanoma egasining kimoshdi savdosida qatnashishi rad etilishi mumkin.

19. Kimoshdi savdosida qatnashish uchun buyurtmanoma taqdim etgan xorijiy kompaniyalar va firmalar toʻgʻrisidagi maʼlumotlar oshkor etilmaydi.

20. Kimoshdi savdolarini oʻtkazish maqsadida Agent auksionchini tayinlaydi, auksionchi Agentning oʻz xodimi ham, chetdan kontrakt asosida jalb etilgan shaxs ham boʻlishi mumkin.

21. Agent va auksionchi oʻzlari tashkil etgan kimoshdi savdosida qatnashchilarning manfaatlarini ifodalash huquqiga ega emaslar.

22. Kimoshdi savdosini oʻtkazish tartiboti quyidagilarni nazarda tutadi:

kimoshdi savdosi boshlangunga qadar sotilayotgan lotning tartib raqamini eʼlon qiladi, kimoshdi savdosiga qoʻyilgan tovar va savdo shartlarini tariflab beradi;

auksionchi tegishli lot boʻyicha kimoshdi savdosida ishtirok etish uchun roʻyxatdan oʻtkazilgan qatnashchilarning roʻyxatdan oʻtish tartibi raqamini eʼlon qiladi. Auksionchi tomonidan tartib raqami eʼlon qilingan ishtirokchi kimoshdi savdosida qatnashayotganligini tasdiqlab, qatnashchi kartochkasini koʻtarishi lozim;

auksionchi lotning boshlangʻich bahosi va kimoshdi savdosining qadamini eʼlon qilgan vaqt kimoshdi savdosi boshlangan vaqt hisoblanadi. Kimoshdi savdosi qadamlari toʻgʻrisidagi qaror auksionchi tomonidan har bir lot uchun alohida qabul qilinadi. Zaruriyat boʻlganda auksionchi kimoshdi savdosi davomida qadamni oʻzgartirishi mumkin;

boshlangʻich baho eʼlon qilinganidan keyin auksionchi uning belgilangan qadamga muvofiq holda oshirilishi yuzasidan takliflarni kutadi;

yuqoriroq bahoni taklif etmoqchi boʻlgan qatnashchi oʻzining qatnashchi kartochkasini koʻtaradi, bu belgilangan qadam boʻyicha bahoni oshirishga doir taklif hisoblanadi. Auksionchi birinchi boʻlib yuqoriroq bahoni taklif etgan ishtirokchini eʼlon qilar ekan taklif etilgan baho va mazkur qatnashchining tartib raqamini eʼlon qiladi. Agar auksionchi taklif etgan bahoni uch karra eʼlon qilganidan keyin qatnashchilardan hech kim yuqoriroq baho taklif etmasa, auksionchi bolgʻachaning uchinchi zarbi bilan ayni bir vaqtda lotning mazkur bahoni taklif etgan qatnashchiga sotilganligini eʼlon qiladi. Shundan soʻng mazkur lotga doir kimoshdi savdosi yopilgan hisoblanadi.

23. Lotning boshlangʻich bahosi eʼlon qilinganidan keyin uni xarid qilishni xohlovchilar boʻlmasa, lot kimoshdi savdosidan chiqariladi.

24. Kimoshdi savdosi gʻolibi keyinchalik oldi-sotdi shartnomasini tuzish uchun asos boʻlib xizmat qiladigan kimoshdi savdosi natijalari toʻgʻrisidagi protokolni savdo oʻtkazilgan kunda imzolashi kerak.

Kimoshdi savdosi gʻolibi yuqorida qayd etilgan protokolni imzolashdan bosh tortgan taqdirda, Agent kimoshdi savdosi natijalarini bekor qilishi mumkin. Bunda gʻolib toʻlagan zakalat summasi qaytarilmaydi.

Protokol ikki nusxada xaridor va Agent tomonidan imzolanadi. Protokolda sotuvchi va xaridor toʻgʻrisidagi maʼlumotlar, sotilayotgan obyektning nomi, uzil-kesil baho, shuningdek tomonlarning oldi-sotdi shartnomasini imzolash boʻyicha majburiyatlari koʻrsatiladi. Kimoshdi savdosi natijalari toʻgʻrisidagi protokolning bir nusxasi xaridorga beriladi va xaridorning oldi-sotdi shartnomasini tuzish huquqini tasdiqlovchi hujjat hisoblanadi.

25. Agar lot boʻyicha kimoshdi savdosi, ishtirokchilardan hech biri mazkur lotni boshlangʻich bahosi boʻyicha xarid qilish istagini bildirmaganligi yoki uning kimoshdi savdosidan chiqarilganligi yohud boshqa sabablarga koʻra oʻtkazilmagan deb eʼlon qilingan boʻlsa, oʻtkazilmagan kimoshdi savdosining protokoli tuziladi.

26. Oldi-sotdi shartnomasi tovar egasi va kimoshdi savdosi gʻolibi oʻrtasida kimoshdi savdosi natijalari toʻgʻrisidagi protokolga asosan, Oʻzbekiston Respublikasi qonun hujjatlariga muvofiq kimoshdi savdosi tugagan va protokol rasmiylashtirilgandan keyin ikki haftadan kechikmay tuziladi.

Agar kimoshdi savdosi gʻolibi tegishli kim oshdi savdosi oʻtkazilgan sanadan eʼtiboran ikki hafta muddat ichida shartnomani imzolamagan boʻlsa, kimoshdi savdosi natijalari bekor qilinadi va toʻlangan zakalat summasi unga qaytarilmaydi.

Tomonlardan biri shartnomani tuzishdan bosh tortgan taqdirda ikkinchi tomon shartnomani tuzishga majbur qilish, shuningdek shartnoma tuzishdan boʻyin tovlash tufayli yetkazilgan zarar toʻgʻrisidagi talabnoma bilan sudga murojaat etishi mumkin.

27. Kimoshdi savdosi gʻolibi (keyingi oʻrinlarda “xaridor” deb yuritiladi) bilan shartnoma tuzish chogʻida u toʻlagan zakalat summasi tuzilgan shartnoma boʻyicha majburiyatlarning bajarilishi sifatida hisobga olinadi. Kimoshdi savdosining qolgan ishtirokchilariga zakalat summasi kimoshdi savdosi natijalari eʼlon qilingan vaqtdan eʼtiboran 3 ish kuni mobaynida qaytarib beriladi.

28. Oldi-sotdi shartnomasida quyidagilar koʻrsatiladi:

sotilgan tovarning nomi;

sotilgan tovarning bahosi va miqdori;

sotuvchi, xaridor toʻgʻrisidagi maʼlumotlar, tovarni yetkazib berish shartlari, toʻlov shakli va muddatlari;

tomonlar masʼuliyati yuzaga kelish shartlari va doirasi;

shartnomaning Oʻzbekiston Respublikasi qonun hujjatlariga muvofiq boshqa shartlari.

29. Kimoshdi savdosi natijalari boʻyicha tuzilgan oldi-sotdi shartnomasi:

yuqori likvidli mahsulotni oldindan toʻlov asosida mahsulot yetkazib berish muddatini keyinga surish, shuningdek kontraktning tuzilganligi fakti boʻyicha yetkazib berish shartlarida sotish;

oldindan toʻlov xaridorning talabi bilan tegishli ravishda Oʻzbekiston Respublikasi Tashqi iqtisodiy faoliyat milliy banki va “Oʻzbekinvest” eksport-import milliy sugʻurta kompaniyasi tomonidan beriladigan bankning muqobil kafolatnomasi yoki sugʻurta polisi ostida amalga oshiriladi;

kimoshdi savdosi shartlaridan farq qiluvchi mahsulot yetkazib berishga doir qoʻshimcha shartlarni nazarda tutishi mumkin.

30. Xaridor shartnomaga muvofiq toʻlovlarni u imzolangan vaqtdan eʼtiboran ikki haftadan kechiktirmay amalga oshirishi shart.

31. Agar xaridor belgilangan muddatda hisob-kitob qilmasa, Agent kimoshdi savdosi natijalarini bekor qilish huquqiga ega. Ushbu hollarda:

zakalat qaytarilmaydi;

kimoshdi savdosi gʻolibi Agent tomonidan oʻtkaziladigan boshqa kimoshdi savdolarida ishtirok etish huquqidan mahrum boʻladi.

32. Kimoshdi savdosida sotilmay qolgan lotlar keyingi kimoshdi savdolariga (shu jumladan oxirgi kimoshdi savdosida eʼlon qilinganidan boshqa baholar boʻyicha) qoʻyilishi mumkin.

33. Kimoshdi savdosi jarayonida paydo boʻlgan daʼvolar kimoshdi savdosi yopilgunga qadar Agent tomonidan koʻrib chiqiladi. Agentning qarorlari ustidan vakolatli organlarga yoki sud tartibida shikoyat qilinishi mumkin.

34. Kimoshdi savdosi natijalariga oid toʻliq maʼlumotlar kiritilgan hisobot kimoshdi savdosi oʻtkazilgandan keyin ikki hafta muddatda kimoshdi savdolarini tashkil etish kengashiga kiritiladi.

35. Kimoshdi savdosi natijalari toʻgʻrisidagi protokolga muvofiq kimoshdi savdosi gʻolibi yuqori likvidli tovar egasi bilan kafolatlangan miqdorlarda xarid qilinayotgan tovar uchun toʻlanadigan mablagʻlarning Agentning Oʻzbekiston Respublikasi Markaziy bankining Operatsiyalar boshqarmasida ochilgan maxsus tranzit valyuta hisob raqamiga tushishini nazarda tutuvchi oldi-sotdi shartnomasini toʻlov muddatini keyinga surish sharti bilan tuzadi.

36. Agent yuqori likvidli mahsulotni sotish va kimoshdi savdosini tashkil etishdan olingan valyuta tushumining hammasini Oʻzbekiston Respublikasi Markaziy bankiga birjadan tashqari bozorning erkin kursi boʻyicha, uni Birlashgan barqarorlashtirish jamgʻarmasiga maqsadli yoʻnaltirgan holda sotadi.

37. Agentga Oʻzbekiston Respublikasi Markaziy bankidan milliy valyuta – “soʻm”da tushgan tushum tuzilgan oldi-sotdi shartnomasiga muvofiq holda yuqori likvidli tovar egasining hisobiga (kimoshdi savdolarini tashkil etish kengashi tomonidan belgilangan Agentning vositachilik haqi chegirilgan holda) oʻtkaziladi.

Yuqori likvidli tovar kimoshdi savdosida markazlashtirilgan eksportning belgilangan miqdorlari hisobiga sotilgan hollarda, Agentga Oʻzbekiston Respublikasi Markaziy bankidan milliy valyuta – “soʻm”da tushgan tushum tuzilgan oldi-sotdi shartnomasiga muvofiq holda yuqori likvidli tovarni yetkazib beruvchining hisobiga (kimoshdi savdolarini tashkil etish kengashi tomonidan belgilangan Agentning vositachilik haqi chegirilgan holda) oʻtkaziladi, tovarning mahsulot yetkazib beruvchidan xarid qilingan bahosi bilan kimoshdi savdosidagi sotuv bahosi oʻrtasidagi farq esa — davlat budjetiga oʻtkaziladi.

38. Yuqori likvidli tovarni oldi-sotdi shartnomasida nazarda tutilgan miqdorda, nomenklaturada, sifat va muddatlarda yetkazib berish boʻyicha javobgarlik tovar yetkazib beruvchining zimmasiga yuklanadi.

39. Agent va kimoshdi savdosi ishtirokchilarining javobgarligi Oʻzbekiston Respublikasining amaldagi qonun hujjatlarida belgilangan tartibda belgilanadi.

40. Agar toʻlovdan keyin kimoshdi savdosini oʻtkazish rad etilgan boʻlsa, Agent oʻzi taklif etgan ishtirokchilar tomonidan toʻlangan toʻlovlarni 3 kun mobaynida ularga qaytarib beradi.