Davlat tomonidan xususiylashtirilgan korxonalarni samarali rivojlantirishga yanada koʻmaklashish, monopoliyaga qarshi siyosatni amalga oshirish va raqobat muhitini shakllantirish, davlat mulkini boshqarish tizimini takomillashtirish, qimmatli qogʻozlar va koʻchmas mulk bozorlari faoliyat koʻrsatishining mustahkam ilmiy-metodologik va metodik bazasini tashkil etishda iqtisodiyot fanining rolini kuchaytirish, shuningdek, mamlakat iqtisodiyotini isloh qilishning bugungi bosqichidagi boshqa vazifalarni hal etish maqsadida Vazirlar Mahkamasi qaror qiladi:

1. Xususiylashtirish, korporativ boshqaruv va qimmatli qogʻozlar bozorini rivojlantirish muammolarini tadqiq etish markazi hamda Monopoliyaga qarshi siyosatni takomillashtirish markazini birlashtirish yoʻli bilan ularning negizida Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Xususiylashtirish, raqobat va korporativ boshqaruvni rivojlantirish muammolarini tadqiq etish markazi (keyingi oʻrinlarda Markaz deb ataladi) tashkil qilinsin.

2. Quyidagilar Markazning asosiy vazifalari etib belgilansin:

yangi ish oʻrinlarini yaratish, faoliyat samaradorligini oshirish, ishlab chiqarishni modernizatsiyalash hamda raqobatbardosh mahsulotlar ishlab chiqarishni yoʻlga qoʻyish maqsadida xususiylashtirilgan korxonalarni rivojlantirishni taʼminlashning ilmiy-metodik bazasini shakllantirish;

xususiylashtirilgan korxonalarni rivojlantirishning “yoʻl xaritalari”ni ishlab chiqish va amalga oshirishning zamonaviy tajribasini oʻrganish hamda uni respublikada joriy etish boʻyicha tavsiyalar tayyorlash;

xususiylashtirilgan korxonalar faoliyatini tizimli tahlil qilish asosida davlat tomonidan ularga koʻmaklashish natijadorligini oshirishning asosiy yoʻnalishlari va mexanizmlari toʻgʻrisida takliflar tayyorlash;

Tadbirkorlik faoliyati asoslarini oʻqitish respublika markaziga xususiylashtirilgan obyektlar negizida investitsiya loyihalarini amalga oshirayotgan tadbirkorlarni oʻqitish uchun oʻquv-metodik materiallarni tayyorlashda koʻmaklashish;

monopoliyadan chiqarish va iqtisodiyotda sogʻlom raqobat muhitini shakllantirish jarayonlarini chuqur tahlil qilish asosida monopoliyaga qarshi tartibga solish, isteʼmolchilarning huquqlari va qonuniy manfaatlarini himoya qilish tizimlarining faoliyat koʻrsatish samaradorligini oshirish boʻyicha tavsiyalar ishlab chiqish;

iqtisodiy nochor korxonalarni moliyaviy sogʻlomlashtirishni hamda bankrotlik tartibotlarini amalga oshirishning metodologik asoslari va mexanizmlarini takomillashtirish;

davlat mulkini boshqarish institutlari va mexanizmlarini yanada rivojlantirish, xoʻjalik jamiyatlarida korporativ boshqaruvning zamonaviy xalqaro standartlari va usullarini joriy etishning ilmiy asoslari va metodik tavsiyalarini ishlab chiqish;

qimmatli qogʻozlar va koʻchmas mulk bozorlarini, ularning infratuzilmasini rivojlantirish holatini tahlil qilish va yoʻnalishlarini aniqlash, institutlar va ularning faoliyat koʻrsatish mexanizmlarini takomillashtirishga doir ilmiy tavsiyalar tayyorlash;

normativ-huquqiy hujjatlar loyihalarini, tahliliy va metodik hujjatlarni tayyorlash, ilmiy ishlarni chop etish, Markazning faoliyat yoʻnalishlari boʻyicha “davra suhbatlari” va seminarlar oʻtkazish.

3. Belgilansinki, Markaz davlat muassasasi shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan hamda oʻz nomi davlat tilida yozilgan muhr va blankalarga, mustaqil balansga, bank hisob raqamlari va Oʻzbekiston Respublikasi Moliya vazirligining Gʻaznachiligida shaxsiy gʻazna hisobvaraqlariga ega boʻladi.

4. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Xususiylashtirish, raqobat va korporativ boshqaruvni rivojlantirish muammolarini tadqiq etish markazining xodimlari cheklangan umumiy soni 39 nafar boʻlgan tuzilmasi 1-ilovaga muvofiq tasdiqlansin.

Markaz direktoriga, zarur boʻlganda, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan kelishgan holda, Markazning tuzilmasiga xodimlarning tasdiqlangan cheklangan umumiy soni doirasida oʻzgartirishlar kiritish huquqi berilsin.

5. Belgilab qoʻyilsinki:

Markaz direktori Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining raisi tomonidan lavozimga tayinlanadi va lavozimdan ozod etiladi;

Markaz xodimlariga Oʻzbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash shartlari tatbiq qilinadi;

Markaz huquqlari va majburiyatlari boʻyicha Xususiylashtirish, korporativ boshqaruvni va qimmatli qogʻozlar bozorini rivojlantirish muammolarini tadqiq etish markazi hamda Monopoliyaga qarshi siyosatni takomillashtirish markazining huquqiy vorisi hisoblanadi.

6. Markazga quyidagi huquqlar berilsin:

Vazirliklar va idoralardan Markaz vazifalarini hal etish uchun zarur boʻlgan mavjud statistik, tahliliy va boshqa axborotni bepul soʻrash va olish;

davlat organlari va boshqa tashkilotlar mutaxassislari, ilmiy-tadqiqot muassasalari xodimlari, oliy taʼlim muassasalari oʻqituvchilari, xorijiy mutaxassislarni tadqiqotlarga shartnoma asosida jalb qilish;

ilmiy-tadqiqot va oliy taʼlim muassasalari, shu jumladan xalqaro va xorijiy muassasalar bilan qoʻshma tadqiqotlarni oʻtkazish toʻgʻrisida shartnomalar tuzish;

oʻtkazilayotgan ilmiy tadqiqotlar toʻgʻrisida xabardorlik darajasini oshirish, normativ-huquqiy hujjatlar loyihalarini tayyorlashda ulardan foydalanish maqsadida davlat va xoʻjalik boshqaruvi organlariga axborot-tahliliy hisobotlarni va maʼlumotlarni taqdim qilish;

Markaz faoliyati yoʻnalishi boʻyicha noshirlik faoliyatini amalga oshirish.

7. Quyidagilar Markazni moliyalashtirish manbalari etib belgilansin:

Oʻzbekiston Respublikasi Fan va texnologiyalar agentligi tomonidan oʻtkaziladigan tanlov natijalari boʻyicha davlat ilmiy-texnika dasturlarini bajarishga ajratiladigan grantlar;

Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining budjetdan tashqari jamgʻarmasi hisobidan Markazning moddiy-texnika bazasini mustahkamlash uchun bepul asosda, shuningdek, normativ-huquqiy hujjatlar loyihalarini, tahliliy maʼlumotlarni tayyorlash va Markaz faoliyati yoʻnalishlari boʻyicha boshqa ishlarni bajarish uchun shartnomalar asosida Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi tomonidan ajratiladigan mablagʻlar;

Markaz faoliyati yoʻnalishi boʻyicha ishlarni bajarish uchun vazirliklar, idoralar va boshqa, shu jumladan xorijiy tashkilotlar bilan tuzilgan shartnomalar asosida olingan mablagʻlar;

xalqaro moliya institutlari va donor tashkilotlarning grantlari;

qonunchilikda taqiqlanmagan boshqa manbalar.

8. Oʻzbekiston Respublikasi Ichki ishlar vazirligi Xususiylashtirish, korporativ boshqaruvni va qimmatli qogʻozlar bozorini rivojlantirish muammolarini tadqiq etish markazi hamda Monopoliyaga qarshi siyosatni takomillashtirish markaziga tegishli boʻlgan va Markazga oʻtayotgan avtotransport vositalarini Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasiga yigʻimlar va boshqa toʻlovlar undirilmagan holda qayta roʻyxatdan oʻtkazsin.

9. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi:

Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Xususiylashtirish, raqobat va korporativ boshqaruvni rivojlantirish muammolarini tadqiq etish markazining ustavini ikki oy muddatda belgilangan tartibda tasdiqlansin va davlat roʻyxatidan oʻtkazilishi taʼminlansin;

Markaz Toshkent shahri Islom Karimov koʻchasidagi 55-uyda bepul foydalanish huquqi asosida joylashtirilsin;

zarurat boʻlganda, Markazning egallab turilgan maydonlaridan foydalanish boʻyicha toʻlovlarni amalga oshirish bilan bogʻliq xarajatlari Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining budjetdan tashqari jamgʻarmasi mablagʻlari hisobidan qoplansin.

10. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov hamda Xususiylashtirilgan korxonalarga koʻmaklashish va raqobatni rivojlantirish davlat qoʻmitasining raisi R.A. Gulyamov zimmasiga yuklansin.

1. Vazirlar Mahkamasining “Monopoliyaga qarshi siyosatni takomillashtirish markazini tashkil etish toʻgʻrisida” 2003-yil 29-iyuldagi 331-son qarori.

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2004-yil 17-yanvardagi 28-son qaroriga (Oʻzbekiston Respublikasi QT, 2004-y., 1-son, 5-modda) ilovaning 37-bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2005-yil 12-avgustdagi 196-son qaroriga (Oʻzbekiston Respublikasi QT, 2005-y., 8-son, 43-modda) 2-ilovaning 36-bandi.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish va baʼzilarini oʻz kuchini yoʻqotgan deb hisoblash toʻgʻrisida” 2005-yil 8-sentabrdagi 206-son qaroriga (Oʻzbekiston Respublikasi QT, 2005-y., 9-10-son, 48-modda) 1-ilovaning 40-bandi.

5. Vazirlar Mahkamasining “Oʻzbekiston Respublikasi Davlat mulki qoʻmitasi huzurida Xususiylashtirish, korporativ boshqaruvni va qimmatli qogʻozlar bozorini rivojlantirish muammolarini tadqiq etish markazini tashkil qilish toʻgʻrisida” 2006-yil 9-iyundagi 113-son qarori (Oʻzbekiston Respublikasi QHT, 2006-y., 23-son, 211-modda).

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2006-yil 2-oktabrdagi 207-son qaroriga (Oʻzbekiston Respublikasi QT, 2006-y., 10-son, 73-modda) 1-ilovaning 31-bandi.

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2012-yil 23-maydagi 143-son qaroriga (Oʻzbekiston Respublikasi QT, 2012-y., 5-son, 34-modda) ilovaning 13-bandi.