Viloyatlar, shaharlar va tumanlar hokimliklari tashkiliy-kadrlar xizmati faoliyatini yanada takomillashtirish, mahalliy ijro hokimiyati organlarida kadrlarni tanlash, joy-joyiga qoʻyish va yangilash ishlarini tubdan yaxshilash maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlarining eʼtiborlari joylarda tashkiliy-kadrlar xizmati faoliyatini tashkil etish masalalari boʻshashtirib yuborilganligiga, ularni bu sohada davlat siyosati tamoyillarini joriy etishga qodir boʻlgan tajribali va layoqatli mutaxassislar bilan toʻldirishga qaratilsin.

3. Hokimliklarning tashkiliy ishlar va kadrlar masalalari boʻyicha guruhlari zimmasiga quyidagi asosiy vazifalarni hal etish yuklansin:

rahbarlik lavozimlariga kadrlar tayyorlash va joy-joyiga qoʻyish tizimini yaratish va muvofiqlashtirish;

hududlarda kadrlarga boʻlgan ehtiyoj asosida amaldagi va istiqbolli kadrlar zaxirasini shakllantirish, ularni bosqichma-bosqich moʻljallangan lavozimlarga tayyorlab borish, qayta oʻqitish va pirovard natijada zamonaviy rahbar tayyorlash tizimini yaratish;

hududlarda muntazam ravishda kadrlar bilan ishlashning ahvolini tahlil qilish, yosh isteʼdodli, mustaqilligimiz gʻoyalariga sodiq boʻlgan vatanparvar, fidoiy kadrlarni tanlash va ular toʻgʻrisida hokimiyat rahbariyatiga axborot va takliflar berib borish;

rahbar kadrlar almashinuvi (rotatsiya) ehtiyojlarini oʻrganib borish va takliflar kiritish;

taʼlim muassasalalari va oʻquv yurtlari bilan kadrlarga boʻlgan ehtiyoj yuzasidan hamkorlik aloqalarini yoʻlga qoʻyish;

hududlardagi kadrlar toʻgʻrisidagi maʼlumotlarni oʻzida jamlagan yagona kompyuter maʼlumotlar bazasini yaratish va undan doimiy ravishda samarali foydalanish.

4. Belgilansinki, Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari kadrlar boʻyicha davlat siyosati tamoyillarining amalga oshirilishi, kadrlarni tanlash, joy-joyiga qoʻyish, oʻqitish va tarbiyalash uchun shaxsan javobgardirlar.

Ikki oy muddat ichida ularga Oʻzbekiston Respublikasi Prezidentining Tashkiliy-kadrlar ishlari boʻyicha Davlat maslahatchisi xizmati bilan birgalikda hokimliklarning tashkiliy ishlar va kadrlar masalalari boʻyicha guruhlarini maxsus bilim va tayyorgarlikka, kasbiy va hayotiy tajribaga ega boʻlgan, oʻz bilimi va ishchanlik malakasi boʻyicha davlatning kadrlarni tayyorlash va joy-joyiga qoʻyish siyosatini amalga oshirilishini taʼminlovchi kadrlar bilan yangilash va toʻldirish yuklansin.

5. Oʻzbekiston Respublikasi Moliya vazirligi tegishli hokimliklar xodimlarining cheklangan shtatlari soni doirasida, mehnatga haq toʻlashning yagona tarif setkasi va boshqaruv organlari xodimlariga mehnat haqi toʻlash boʻyicha guruhlar jadvalidan kelib chiqib:

viloyatlar va Toshkent shahri hokimliklari apparati tashkiliy ishlar va kadrlar masalalari boʻyicha guruh rahbarlari ish haqini Axborot-tahlil guruhlari rahbarlarinikiga tenglashtirilgan holda moliyalashtirishni taʼminlasin;

6. Oʻzbekiston Respublikasi Vazirlar Mahkamasining “Viloyatlar va Toshkent shahar hokimliklari apparati tuzilmasini takomillashtirish toʻgʻrisida”gi 1997-yil 17-iyundagi 301-son qarorining 1, 2, 5-ilovalariga, “Shaharlar va tumanlar hokimliklari apparati tuzilmasini takomillashtirish toʻgʻrisida”gi 1997-yil 30-sentabrdagi 459-son qarorining 1, 2, 3, 4, 9, 10, 11, 12-ilovalariga tegishli oʻzgartirishlar kiritilsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ. Sultonov va Prezidentning Tashkiliy-kadrlar ishlari boʻyicha davlat maslahatchisi zimmasiga yuklatilsin.