O‘zbekiston Respublikasi Sog‘liqni saqlash vazirligi tizimidagi tibbiyot tashkilotlarida tibbiy yordam ko‘rsatish sifatini yaxshilash, ambulatoriya-poliklinika va statsionar tibbiy yordam ko‘rsatayotgan tashkilotlarning faoliyatini o‘zaro muvofiqlashtirish hamda O‘zbekiston Respublikasi Davlat budjetidan sog‘liqni saqlash tizimiga ajratilayotgan mablag‘lardan samarali va maqsadli foydalanilishini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Sog‘liqni saqlash vazirligi tizimidagi tibbiyot tashkilotlarida O‘zbekiston Respublikasi Davlat budjeti mablag‘lari hisobiga tibbiy yordam ko‘rsatish tartibi to‘g‘risidagi nizom ilovaga muvofiq tasdiqlansin va 2017-yil 1-dekabrdan boshlab amalga kiritilsin.

2. O‘zbekiston Respublikasi Sog‘liqni saqlash vazirligi:

ushbu qaror bilan tasdiqlangan Nizomning mazmun-mohiyati o‘zining idoraviy mansub tibbiyot tashkilotlari rahbarlari va xodimlari hamda aholiga, shu jumladan, ommaviy axborot vositalari orqali yetkazilishini ta’minlasin.

manfaatdor vazirliklar va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Sog‘liqni saqlash vaziri A.K. Shadmanov zimmasiga va Vazirlar Mahkamasining Sog‘liqni saqlash, ekologiya, atrof muhitni muhofaza qilish, jismoniy tarbiya va sport masalalari axborot-tahlil departamentiga yuklansin.

1. Ushbu Nizom O‘zbekiston Respublikasi Sog‘liqni saqlash vazirligi tizimidagi tibbiyot tashkilotlarida (keyingi o‘rinlarda tibbiyot tashkilotlari deb ataladi) O‘zbekiston Respublikasi Davlat budjeti mablag‘lari hisobiga tibbiy yordam ko‘rsatish uchun mijozlarni yo‘llash va tibbiyot tashkilotlarida tibbiy yordam ko‘rsatish tartibini belgilaydi.

2. Ushbu Nizomning amal qilishi O‘zbekiston Respublikasi Davlat budjeti mablag‘lari hisobiga saqlanadigan yoki imtiyozli shaxslar toifasi uchun ko‘rsatilgan tibbiy yordam uchun to‘lovlar O‘zbekiston Respublikasi Davlat budjeti mablag‘lari hisobiga moliyalashtiriladigan tuman, viloyat va respublika miqyosidagi tibbiyot tashkilotlariga tatbiq etiladi.

Ushbu Nizomning amal qilishi shoshilinch va kechiktirib bo‘lmaydigan tibbiy yordam ko‘rsatish tartibiga tatbiq etilmaydi.

3. Tibbiy yordam turlari, hajmi va tibbiy yordamning sifati standartlari O‘zbekiston Respublikasi Sog‘liqni saqlash vazirligi tomonidan belgilanadi.

4. Ushbu Nizomda quyidagi asosiy tushunchalar qo‘llaniladi:

mijoz — kasalligi bor yoki yo‘qligidan va sog‘lig‘ining holatidan qat’i nazar, unga yordam ko‘rsatilayotgan yoki tibbiy yordam so‘rab murojaat qilgan jismoniy shaxs;

mijozlarning imtiyozli toifasi — ijtimoiy maqomi va/yoki ayrim kasalliklarning mavjudligi munosabati bilan O‘zbekiston Respublikasi Prezidenti, O‘zbekiston Respublikasi Hukumati va O‘zbekiston Respublikasi Sog‘liqni saqlash vazirligining qarorlari bilan qonunchilikda belgilangan tartibda aniqlanadigan O‘zbekiston Respublikasi Davlat budjeti mablag‘lari hisobiga tibbiy yordam ko‘rsatiladigan mijozlar toifasi;

ambulatorida tibbiy yordam ko‘rsatish — tunu kun kuzatishga muhtoj bo‘lmagan mijozlarga ko‘rsatiladigan tibbiy yordam;

statsionarda tibbiy yordam ko‘rsatish — tunu kun kuzatish, parvarish qilish va davolashga muhtoj bo‘lgan mijozlarga ko‘rsatiladigan tibbiy yordam;

shifoxonaga yotqizish — statsionarda tibbiy yordam ko‘rsatish uchun mijozni tibbiyot tashkilotiga joylashtirish;

tibbiy-tanlov komissiyasi — mijozni shifoxonaga yotqizish belgilari mavjudligini aniqlash uchun tuman (shahar), viloyat (Toshkent shahri) va respublika miqyosidagi tibbiyot tashkilotlarida tashkil etiladigan komissiya.

5. Tibbiy yordam ko‘rsatilishi uchun yo‘llanma olish uchun mijoz yashash joyi bo‘yicha qishloq vrachlik punktlariga, qishloq va shahar oilaviy poliklinikalariga murojaat qiladi.

6. Mijozlarni tibbiy yordam olishning darajasiga muvofiq tibbiy yordam olish uchun yo‘naltirish quyidagi tartibda amalga oshiriladi:

qishloq vrachlik punktlari, qishloq va shahar oilaviy poliklinikalari tomonidan — tibbiyot birlashmalarining tegishli markaziy ko‘p tarmoqli poliklinikalariga yo‘llanma beriladi. Bunda ijtimoiy ahamiyatga ega bo‘lgan kasalliklar bo‘yicha dispanser ro‘yxatida turgan mijozlarga yo‘llanmalar to‘g‘ridan-to‘g‘ri kasallik ixtisosligi bo‘yicha tegishli viloyat tibbiyot tashkilotlariga berilishi mumkin;

tibbiyot birlashmalarining tegishli markaziy ko‘p tarmoqli poliklinikalari tomonidan — tibbiyot birlashmalarining tegishli statsionar bo‘linmalariga yoki viloyat darajasidagi tibbiyot tashkilotlariga;

viloyat darajasidagi tibbiyot tashkilotlari tomonidan — respublika darajasidagi tegishli tibbiyot tashkilotlariga yo‘llanma beriladi.

7. Toshkent shahrida mijozlarni tibbiy yordam olish uchun yo‘llash quyidagi tartibda amalga oshiriladi:

shahar oilaviy poliklinikalari tomonidan — tegishli markaziy ko‘p tarmoqli poliklinikalarga yo‘llanma beriladi. Bunda ijtimoiy ahamiyatga ega bo‘lgan kasalliklar bo‘yicha dispanser ro‘yxatida turgan mijozlarga yo‘llanmalar kasallik ixtisosligi bo‘yicha to‘g‘ridan-to‘g‘ri tegishli shahar (respublika) tibbiyot tashkilotlariga berilishi mumkin;

markaziy ko‘p tarmoqli poliklinikalar tomonidan — shahar (respublika) darajasidagi tegishli tibbiyot tashkilotlariga yo‘llanma beriladi.

8. Imtiyozli toifaga kiradigan yo‘llanma berilgan mijozlarga bepul tibbiy yordam ko‘rsatish uchun tibbiy-tanlov komissiyasining xulosasi asosida beriladigan order rasmiylashtiriladi.

Zarurat bo‘lganda O‘zbekiston Respublikasi Sog‘liqni saqlash vazirligi va hududiy sog‘liqni saqlash boshqaruv organlari mijozlarning imtiyozli toifasini bepul tibbiy yordam olish uchun o‘zining idoraviy mansub tibbiyot muassasalariga yo‘naltirishi mumkin. Imtiyozli toifaga kiradigan mijozlarni shifoxonaga yotqizish maqsadga muvofiqligi haqidagi qaror tibbiyot tashkilotining tibbiy-tanlov komissiyasi tomonidan aniqlanadi.

Respublika darajasidagi psixiatriya muassasalarida tibbiy yo‘sindagi majburlov choralari qo‘llanilgan ruhiy holati buzilgan shaxslarga ixtisoslashtirilgan tibbiy yordam ko‘rsatish zarurati tug‘ilganda, ular psixiatriya muassasalari tomonidan yo‘llanma asosida to‘g‘ridan-to‘g‘ri tegishli respublika darajasidagi tibbiyot tashkilotlariga yo‘naltiriladi.

9. Tibbiyot tashkilotlarida O‘zbekiston Respublikasi Davlat budjeti mablag‘lari hisobiga tibbiy yordam:

tuman (shahar) darajasida (pullik tashkilotlar, bo‘lim va palatalar bundan mustasno) — aholining (mijozlarning) barcha toifalariga;

viloyat (Toshkent shahri) va respublika darajalarida (pullik tashkilotlar, bo‘lim va palatalar bundan mustasno) — mijozlarning imtiyozli toifalariga ko‘rsatiladi.

Davlat tomonidan kafolatlangan tibbiy yordam hajmidan tashqari tibbiy va boshqa yordamlar qo‘shimcha hisoblanadi va mijoz tomonidan belgilangan tartibda ularning haqi to‘lanadi.

10. Ko‘rsatilgan tibbiy yordam natijasida yoki noto‘g‘ri qo‘yilgan tashxis yoki tibbiyot tashkilotining tibbiyot xodimlari harakatlari tufayli yuzaga kelgan asoratlar bilan bog‘liq qo‘shimcha xarajatlar tegishli tibbiyot tashkilotining budjetdan tashqari mablag‘lari hisobiga qoplanadi.

11. Umumiy amaliyot vrachining yo‘llanmasi bo‘yicha tibbiyot birlashmalarining markaziy ko‘p tarmoqli poliklinikalari tibbiyot xodimlari mijozga tegishli tibbiy yordam ko‘rsatadi va keyingi davolanish tartibini quyidagicha belgilaydi:

mijozga statsionar sharoitida tegishli tibbiy yordam ko‘rsatilishiga ehtiyoj bo‘lmagan hollarda — mijoz yashash joyi bo‘yicha keyinchalik ambulatoriya sharoitida davolanishi uchun tegishli tavsiyalar bilan umumiy amaliyot vrachiga qayta yo‘naltiriladi;

mijozga statsionar sharoitida tegishli tibbiy yordam ko‘rsatilishiga ehtiyoj bo‘lgan hollarda — mijozning tibbiy hujjatlari ko‘rib chiqish va xulosa berish uchun tibbiyot birlashmasining markaziy ko‘p tarmoqli poliklinikasi qoshidagi tibbiy-tanlov komissiyasiga topshiriladi.

Mijozga keyinchalik shifoxona sharoitlarida tibbiy yordam ko‘rsatilishi zarurligi tasdiqlangan holda — tibbiy tanlov komissiyasi xulosasi asosida mijozga tuman (shahar) yoki viloyat (Toshkent shahri) darajasidagi tegishli tibbiyot tashkilotiga yo‘llanma beriladi.

12. Tibbiy-tanlov komissiyasi tarkibi va tibbiy yordam ko‘rsatish darajasiga bog‘liq ravishda shifoxonaga yotqizishga ko‘rsatmalarni aniqlash tartibi hamda mijozlarni respublika darajasidagi tegishli tibbiyot tashkilotlariga yo‘naltiruvchi tibbiyot tashkilotlari ro‘yxati O‘zbekiston Respublikasi Sog‘liqni saqlash vazirligi tomonidan belgilanadi.

13. Agar mijoz tibbiy yordam olish uchun tegishli yo‘llanmasiz (ordersiz) tibbiyot tashkilotiga bevosita murojaat etsa, tibbiy yordam belgilangan tartibda pullik asosda ko‘rsatiladi, shoshilinch va kechiktirib bo‘lmaydigan tibbiy yordam ko‘rsatish talab etiladigan hollar bundan mustasno.

14. Tibbiy yordam olish uchun tuman (shahar), viloyat va respublika darajasidagi tibbiyot tashkilotiga berilgan yo‘llanma qat’iy hisobot beriladigan hujjat hisoblanadi, uning shakli va saqlash muddati belgilangan tartibda O‘zbekiston Respublikasi Sog‘liqni saqlash vazirligi tomonidan belgilanadi.

15. Mijozlar tibbiyot tashkilotlariga qabul bo‘limi (registratura) tomonidan qabul qilinadi, ular mijozlarni ish tartibi, tibbiy yordamlar ro‘yxati, ushbu yordamni ko‘rsatish va olish shart-sharoitlari, vrach-mutaxassislar malakasi to‘g‘risidagi ma’lumotlarni o‘z ichiga oluvchi bepul, tushunarli va ishonchli axborot bilan ta’minlashlari shart.

16. Tibbiyot xodimlari mijozlarga ularning sog‘lig‘ining holati to‘g‘risidagi ma’lumotlarni, shu jumladan, tekshirish natijalari, qanday kasali borligi, qanday tashxis qo‘yilganligi, kasallikning bundan buyon qanday kechishiga oid taxminlar, davolash usullari va bu usullar bilan bog‘liq xavf-xatar, tibbiy aralashuvning ehtimol tutilgan turlari va ularning oqibatlari, amalga oshirilgan davolashning natijalari to‘g‘risidagi ma’lumotlarni taqdim etishlari shart.

Mijozlarning talabi bo‘yicha ularga tibbiy hujjatlardan ularning salomatligi holatini aks ettiruvchi ko‘chirma taqdim etiladi. Mijozlarga tibbiy hujjatlarning asl nusxalarini berish taqiqlanadi.

Tibbiy hujjatlarning shakli, ularni to‘ldirish tartibi va saqlash muddatlari O‘zbekiston Respublikasi Sog‘liqni saqlash vazirligi tomonidan qonunchilikda belgilangan tartibda aniqlanadi.

17. Mijozlarning tibbiy hujjatlaridagi mavjud ma’lumotlar vrach siri bo‘lib, u faqat qonunchilikda nazarda tutilgan asoslarda mijozning roziligisiz taqdim etilishi mumkin.

18. Mijozning o‘z kasaliga doir ma’lumotlarni bilgan holda o‘z ixtiyori bilan rozilik berishi tibbiy aralashuvning dastlabki zarur shartidir.

Mijozning ahvoli o‘z xohish-irodasini izhor etishga imkon bermaydigan, tibbiy aralashuvni esa kechiktirib bo‘lmaydigan hollarda mijozning manfaatini ko‘zlab tibbiy aralashuvni amalga oshirish masalasini konsilium hal qiladi, basharti konsiliumga yig‘ilishning imkoni bo‘lmagan taqdirda esa, keyinchalik davolash-profilaktika muassasasining mansabdor shaxslarini xabardor qilish sharti bilan bevosita davolovchi (navbatchi) shifokor hal etadi.

19. Tibbiyot tashkilotlarining rahbarlari yo‘llanmalarning to‘g‘ri berilishi hamda tasdiqlangan tibbiy yordam sifati standartlariga hamda ushbu Nizom talablariga muvofiq tibbiy yordam ko‘rsatilishi uchun javob beradi.

20. Quyidagilar:

ushbu Nizomga muvofiq tibbiy yordam ko‘rsatilishiga O‘zbekiston Respublikasi Davlat budjeti mablag‘lari hisobiga ajratilayotgan mablag‘lar maqsadli ishlatilishini nazorat qilish Davlat moliyaviy nazorati inspeksiyasi va uning hududiy boshqarmalari tomonidan;

yo‘llanmalar to‘g‘ri berilishini va tasdiqlangan tibbiy yordam sifati standartlariga muvofiq tibbiy yordam ko‘rsatilishini nazorat qilish O‘zbekiston Respublikasi Sog‘liqni saqlash vazirligining Nazorat inspeksiyasi va uning hududiy bo‘linmalari tomonidan amalga oshiriladi.

21. Ushbu Nizomning qoidalari buzilishida aybdor bo‘lgan shaxslar qonunchilikka muvofiq javob beradi.