Sud hokimiyatining mustaqilligini yanada taʼminlash, sudlar, adliya organlari va muassasalarining moddiy-texnika taʼminotini mustahkamlash, ular faoliyati uchun zarur shart-sharoitlar yaratish maqsadida:

1. Oʻzbekiston Respublikasi Oliy sudi, Sudyalar oliy kengashi, Adliya vazirligi va Moliya vazirligining Sudlar va adliya organlarini rivojlantirish jamgʻarmasi hamda uning Ijro etuvchi direksiyasini tugatib, quyidagilarni tashkil etish boʻyicha taklifiga rozilik berilsin:

Sud hokimiyati organlarini rivojlantirish jamgʻarmasi;

budjetdan tashqari Adliya organlari va muassasalarini rivojlantirish jamgʻarmasi.

2. Belgilansinki, quyidagilar Sud hokimiyati organlarini rivojlantirish jamgʻarmasi daromadlarini shakllantirish manbalari hisoblanadi:

jinoiy, fuqarolik, maʼmuriy, iqtisodiy va harbiy sudlar tomonidan koʻrib chiqiladigan ishlar boʻyicha davlat bojlari toʻlashdan Oʻzbekiston Respublikasi Davlat budjetiga tushayotgan summalarning 40 foizi miqdoridagi ajratmalar;

jinoiy, fuqarolik, maʼmuriy, iqtisodiy va harbiy sudlar tomonidan koʻrib chiqiladigan ishlar boʻyicha jarimalar toʻlashdan Oʻzbekiston Respublikasi Davlat budjetiga tushayotgan summalarning 40 foizi miqdoridagi ajratmalar;

ijro ishi boʻyicha Oʻzbekiston Respublikasi Davlat budjetiga undirilgan summadan 40 foiz miqdoridagi ajratmalar, qarzdorning mol-mulkini sotish hisobiga soliq qarzdorligini undirish bundan mustasno;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

qonun hujjatlarida taqiqlanmagan boshqa daromadlar.

3. Sud hokimiyati organlarini rivojlantirish jamgʻarmasi toʻgʻrisidagi nizom 1-ilovaga muvofiq tasdiqlansin.

4. Belgilab qoʻyilsinki, Sud hokimiyati organlarini rivojlantirish jamgʻarmasi faoliyatini boshqarish va uning mablagʻlarini taqsimlash Oʻzbekiston Respublikasi Oliy sudi raisi boshqaradigan Sud hokimiyati organlarini rivojlantirish jamgʻarmasi Kuzatuv kengashi (keyingi oʻrinlarda — Kuzatuv kengashi) tomonidan amalga oshiriladi.

Kuzatuv kengashi tarkibiga lavozimiga koʻra Oʻzbekiston Respublikasi Sudyalar oliy kengashi raisi, Oʻzbekiston Respublikasi Oliy sudi huzuridagi Sudlar faoliyatini taʼminlash departamenti (keyingi oʻrinlarda — Departament) direktori va Oʻzbekiston Respublikasi Sudyalar oliy kengashi huzuridagi Odil sudlov muammolarini oʻrganish tadqiqot markazi (keyingi oʻrinlarda — Markaz) direktori kiradi.

5. 2017-yilning 1-sentabridan boshlab malaka darajalari, martaba darajalari va uzoq muddat xizmat qilganligi uchun sudyalar hamda sudlar va Departament xodimlari lavozim maoshlariga ustama va har oylik qoʻshimcha haq toʻlash, sudlar va Departamentning yordamchi xodimlarini taʼminlash, sudyalar hamda sudlar, Oʻzbekiston Respublikasi Sudyalar oliy kengashi, Departament va Markaz xodimlari tomonidan belgilangan tartibda uy-joyni ijaraga olish (ijarada turish), sudlar, Oʻzbekiston Respublikasi Sudyalar oliy kengashi, Departament va Markaz binolari va xonalarini qurish va taʼmirlash sudlarni transport vositalari bilan taʼminlash xarajatlari, sudlar, Oʻzbekiston Respublikasi Sudyalar oliy kengashi, Departament va Markaz xodimlarining xizmat safari xarajatlari, shuningdek sudlar, Oʻzbekiston Respublikasi Sudyalar oliy kengashi, Departament va Markazning kommunal-foydalanish hamda boshqa joriy xarajatlari Oʻzbekiston Respublikasi Davlat budjeti mablagʻlari hisobidan amalga oshirilishi belgilab qoʻyilsin.

6. Belgilansinki, quyidagilar budjetdan tashqari Adliya organlari va muassasalarini rivojlantirish jamgʻarmasi daromadlarini shakllantirish manbalari hisoblanadi:

FHDY organlari tomonidan undiriladigan davlat boji summalaridan 16 foiz, notariuslar tomonidan undiriladigan davlat boji summalaridan esa 12 foiz miqdoridagi ajratmalar;

adliya organlari tomonidan nodavlat notijorat tashkilotlarini, advokatlik byurolarini, firmalarini, hayʼatlarini, nodavlat notijorat tashkilotlarining ramzlarini davlat roʻyxatidan oʻtkazganlik, nodavlat notijorat tashkilotlarining xorijiy fuqarolar boʻlgan xodimlarini, shuningdek ularning oila aʼzolarini akkreditatsiyadan oʻtkazganlik, nodavlat notijorat tashkiloti, uning ramzi davlat roʻyxatidan oʻtkazilganligi toʻgʻrisidagi guvohnomaning va nodavlat notijorat tashkilotining taʼsis hujjatlarining dublikatini berganlik uchun, akkreditatsiya kartochkasi dublikatini berganlik uchun, advokatlik faoliyatini litsenziyalaganlik uchun undiriladigan mablagʻlarning, shuningdek adliya organlari tomonidan undiriladigan jarimalar summasining 80 foizi;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

qonun hujjatlarida taqiqlanmagan boshqa daromadlar.

7. Belgilansinki, budjetdan tashqari Adliya organlari va muassasalarini rivojlantirish jamgʻarmasi mablagʻlari:

adliya organlari va muassasalarini moddiy-texnik taʼminotiga;

adliya organlari va muassasalarini bino, uskunalarini qurish va taʼmirlashga;

adliya organlari va muassasalari xodimlarini moddiy ragʻbatlantirishga va ijtimoiy muhofaza qilishga (adliya organlari xodimlari uchun uy-joy qurish, sanatoriya-kurort va tibbiy xizmat koʻrsatish, mukofotlar toʻlash, maoshlarga ustamalar belgilash, moddiy yordam koʻrsatish va hokazo);

adliya organlari va muassasalari xodimlarini xizmat safar xarajatlariga, shu jumladan xorijiy davlatlardagi xizmat safarlariga;

uy-joy sharoitlarini yaxshilashga muhtoj boʻlgan adliya organlari xodimlariga uy-joy sotib olish uchun besh yildan koʻp boʻlmagan muddatga va eng kam ish haqining ming barobaridan oshmagan miqdorda foizsiz qarz ajratishga;

adliya organlari va muassasalari xodimlariga martaba darajalari hamda uzoq muddatli xizmati uchun ustamalar va qoʻshimcha haq toʻlashga;

belgilangan tartibda adliya organlari va muassasalari xodimlariga uy-joylarni ijaraga olganlik (ijarada turganlik) uchun toʻlovlarni kompensatsiya qilishga;

adliya organlari va muassasalari xodimlarini oʻqitish, malakasini oshirish hamda stajirovka oʻtashiga, shu jumladan, ularning xorijiy davlatlarga tashriflarini tashkil etishga va chet davlatlarda oʻtkaziladigan konferensiya, seminarlar va boshqa tadbirlarda ishtirok etishiga;

adliya organlari va muassasalari faoliyati bilan bogʻliq masalalar boʻyicha Oʻzbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etishga;

adliya organlarining kommunal-foydalanish hamda boshqa joriy xarajatlariga;

notarius tomonidan oʻz kasb majburiyatlari buzilishi oqibatida yetkazilgan zararni va tegishli xarajatlarni qoplashga;

Oʻzbekiston Respublikasi Qonun hujjatlari maʼlumotlari milliy bazasini yuritish, texnik jihatdan saqlab turish va modernizatsiya qilishni moliyalashtirishga;

adliya organlarining yordamchi xodimlari taʼminotiga;

adliya organlari va muassasalari faoliyatini yaxshilashga qaratilgan boshqa tadbirlarga yoʻnaltiriladi.

“Adolat” huquqiy axborot markazi” DUK va “Adliya organlari va muassasalarida axborot-kommunikatsiya texnologiyalarini rivojlantirish markazi” DUKni moliyalashtirish.

8. Sudlar va adliya organlarini rivojlantirish jamgʻarmasi Ijro etuvchi direksiyasining faoliyati tugatilganligi bois uning 2 shtat birligini Oʻzbekiston Respublikasi Adliya vazirligiga va 2 shtat birligini Departamentga ajratish va ularning tegishincha budjetdan tashqari Adliya organlari va muassasalarini rivojlantirish jamgʻarmasi va Sud hokimiyati organlarini rivojlantirish jamgʻarmasi mablagʻlari hisobidan saqlanishi taʼminlansin.

9. Oʻzbekiston Respublikasi Adliya vazirligi:

Oʻzbekiston Respublikasi Oliy sudi va Moliya vazirligi bilan birgalikda bir oy muddatda Sudlar va adliya organlarini rivojlantirish jamgʻarmasi mablagʻlari qoldigʻini, shu jumladan, kreditorlik va debitorlik qarzdorligini Sud hokimiyati organlarini rivojlantirish jamgʻarmasi va budjetdan tashqari Adliya organlari va muassasalarini rivojlantirish jamgʻarmasi oʻrtasida hamda tugatilayotgan Sudlar va adliya organlarini rivojlantirish jamgʻarmasi ijro etuvchi direksiyasini mulkini Oʻzbekiston Respublikasi Adliya vazirligi va Departament oʻrtasida taqsimlanishini taʼminlasin;

Oʻzbekiston Respublikasi Oliy sudi va Sudyalar oliy kengashi bilan birgalikda tugatilayotgan Sudlar va adliya organlarini rivojlantirish jamgʻarmasining hisobidan sudyalar, sud va Departament xodimlariga oʻtgan davr uchun toʻlanmagan malaka darajalari, martaba darajalari hamda uzoq muddatli xizmati uchun ustamalar va qoʻshimcha haqlarni toʻlanishini taʼminlasin;

Oʻzbekiston Respublikasi Moliya vazirligi bilan kelishilgan holda bir oy muddatda budjetdan tashqari Adliya organlari va muassasalarini rivojlantirish jamgʻarmasi mablagʻlaridan foydalanish tartibi toʻgʻrisidagi nizomni tasdiqlasin.

10. Oʻzbekiston Respublikasi Prezidentining hamda Oʻzbekiston Respublikasi Hukumatining ayrim qarorlari 2-ilovaga muvofiq oʻz kuchini yoʻqotgan deb hisoblansin.

11. Oʻzbekiston Respublikasi Adliya vazirligi, Moliya vazirligi va Oliy sudi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

12. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi O.B. Murodov va Oʻzbekiston Respublikasi adliya vaziri R.Q. Davletov zimmalariga yuklansin.

1. Sud hokimiyati organlarini rivojlantirish jamgʻarmasi (keyingi oʻrinlarda — Jamgʻarma) sudlar, Oʻzbekiston Respublikasi Sudyalar oliy kengashi, Oʻzbekiston Respublikasi Oliy sudi huzuridagi Sudlar faoliyatini taʼminlash departamenti (keyingi oʻrinlarda — Departament) va Oʻzbekiston Respublikasi Sudyalar oliy kengashi huzuridagi Odil sudlov muammolarini oʻrganish tadqiqot markazining (keyingi oʻrinlarda — Markaz) faoliyatini moliyalashtirish va moddiy-texnika taʼminotini yaxshilash, shuningdek ular faoliyati uchun zarur shart-sharoitlar yaratish maqsadida tashkil etilgan.

2. Jamgʻarma mablagʻlari:

jinoiy, fuqarolik, maʼmuriy, iqtisodiy va harbiy sudlar tomonidan koʻrib chiqiladigan ishlar boʻyicha davlat bojlari toʻlashdan Oʻzbekiston Respublikasi Davlat budjetiga tushayotgan summalarning 16 foizi miqdoridagi ajratmalar;

jinoiy, fuqarolik, maʼmuriy, iqtisodiy va harbiy sudlar tomonidan koʻrib chiqiladigan ishlar boʻyicha jarimalar toʻlashdan Oʻzbekiston Respublikasi Davlat budjetiga tushayotgan summalarning 16 foizi miqdoridagi ajratmalar;

ijro ishi boʻyicha Oʻzbekiston Respublikasi Davlat budjetiga undirilgan summadan 24 foiz miqdoridagi ajratmalar, qarzdorning mol-mulkini sotish hisobiga soliq qarzdorligini undirish bundan mustasno;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

qonun hujjatlarida taqiqlanmagan boshqa daromadlar hisobiga shakllantiriladi.

3. Jamgʻarma mablagʻlari:

sudlar, Oʻzbekiston Respublikasi Sudyalar oliy kengashi, Departament va Markaz (keyingi oʻrinlarda — sud organlari) binolari va xonalarini qurish, taʼmirlash va jihozlash, sudyalar va sud organlari xodimlarining xizmat safari xarajatlari, sud organlarining kommunal-foydalanish va boshqa joriy xarajatlarining Oʻzbekiston Respublikasi Davlat budjeti mablagʻlari hisobidan qoplanmagan qismiga;

sud organlarini zarur anjomlar, kompyuterlar va boshqa zamonaviy tashkiliy-texnika vositalari bilan taʼminlashga;

sud organlarining texnika vositalariga xizmat koʻrsatish va ularni taʼmirlashga;

sud organlari xodimlarini moddiy ragʻbatlantirishga va ijtimoiy muhofaza qilishga (uy-joy qurish, sanatoriya-kurort va tibbiy xizmat koʻrsatish, maoshlarga ustamalar va qoʻshimcha haq belgilash, moddiy yordam koʻrsatish);

Oʻzbekiston Respublikasi Konstitutsiyaviy sudi, Oʻzbekiston Respublikasi sudlari sudyalari va sud organlari xodimlari tomonidan belgilangan tartibda uy-joy sotib olishga dastlabki badalni toʻlashga;

sud organlari xodimlarini tegishli adabiyotlar va matbaa nashrlari bilan taʼminlashga;

sudyalarni formali kiyim-boshlar bilan taʼminlash xarajatlarini moliyalashtirishga;

sud organlari xodimlarining malakasini oshirishga, ularni oʻqitishga va stajirovka oʻtashiga, shu jumladan ularning xorijiy davlatlarga tashriflarini tashkillashtirishga, xorijiy davlatlarda oʻtkaziladigan konferensiya, seminar va boshqa tadbirlarda ishtirok etishiga;

sud organlari faoliyati bilan bogʻliq masalalar boʻyicha Oʻzbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etishga;

Jamgʻarma zaxirasini yaratishga;

sud organlari faoliyatini yaxshilashga qaratilgan boshqa tadbirlarga va maqsadlarga qonunchilikda oʻrnatilgan tartibda yoʻnaltiriladi.

4. Jamgʻarmaning joriy yilda foydalanilmagan mablagʻlari Oʻzbekiston Respublikasi Davlat budjetiga olib qoʻyilmaydi va ulardan keyingi yilda foydalaniladi.

5. Jamgʻarma mablagʻlaridan foydalanish har yili mablagʻlar va buyurtmanomalar tushishi prognozi asosida shakllantiriladigan sud organlarini rivojlantirish dasturlarini moliyalashtirish orqali amalga oshiriladi.

Sud organlarini rivojlantirish dasturida sud organlari binolari va xonalarini qurish, rekonstruksiya qilish, taʼmirlash, jihozlash muddatlari va hajmlari; ularni jihozlar, transport vositalari, kompyuterlar va boshqa zamonaviy tashkiliy-texnika vositalari bilan taʼminlash, shuningdek ularni rivojlantirish boʻyicha boshqa tadbirlar nazarda tutiladi.

Sud organlarini rivojlantirish dasturi, ularni mablagʻ bilan taʼminlash hajmlari hamda Jamgʻarmaning zaxiraga qoʻyiladigan har yilgi qismi miqdori Jamgʻarmaning Kuzatuv kengashi (keyingi oʻrinlarda — Kuzatuv kengashi) tomonidan tasdiqlanadi.

6. Jamgʻarma faoliyatini boshqarish va uning mablagʻlarini taqsimlash Oʻzbekiston Respublikasi Oliy sudi raisi boshqaradigan Kuzatuv kengashi tomonidan amalga oshiriladi.

Kuzatuv kengashi tarkibiga lavozimiga koʻra Oʻzbekiston Respublikasi Sudyalar oliy kengashi raisi, Departament va Markaz direktorlari kiradi.

Kuzatuv kengashi har chorakda kamida bir marta majlis oʻtkazadi. Zarur hollarda Kuzatuv kengashining navbatdan tashqari majlislari chaqirilishi mumkin.

Kuzatuv kengashi majlisi unda Kuzatuv kengashi aʼzolarining kamida toʻrtdan uch qismi ishtirok etgan taqdirda vakolatli hisoblanadi.

Jamgʻarma mablagʻlaridan foydalanish boʻyicha qaror Kuzatuv kengashi aʼzolarining oddiy koʻpchilik ovozi bilan qabul qilinadi va Kuzatuv kengashi raisi tomonidan imzolanadi.

7. Jamgʻarma mablagʻlari toʻplanishi va sarflanishini tezkor boshqarish Departament tomonidan amalga oshiriladi.

8. Departament quyidagilarga majbur:

buyurtmanomalarni yigʻish va Kuzatuv kengashi tomonidan koʻrib chiqish uchun materiallarni tayyorlash;

Kuzatuv kengashi qarorlarini sud organlariga yetkazish;

Kuzatuv kengashi qarorlarini oʻz vaqtida ijro etish;

Jamgʻarmaning ajratilgan mablagʻlaridan foydalanilishini nazorat qilish va uning monitoringini amalga oshirish;

Kuzatuv kengashiga va Oʻzbekiston Respublikasi Moliya vazirligiga Jamgʻarma mablagʻlaridan foydalanilishi boʻyicha hisobot taqdim etish.

9. Departament quyidagi huquqlarga ega:

zarur hollarda mablagʻlar ajratishga tushgan buyurtmanomalar boʻyicha qoʻshimcha maʼlumotlar olish;

Jamgʻarmaning ajratilgan mablagʻlaridan maqsadli foydalanilishini tekshirish;

mablagʻlardan belgilangan maqsadda foydalanilmagan taqdirda moliyalashtirishni toʻxtatib turish, keyinchalik ushbu masalani Kuzatuv kengashga koʻrib chiqish uchun kiritish.

10. Jamgʻarmadan mablagʻlar ajratish yuzasidan buyurtmanomalar Departamentga Oʻzbekiston Respublikasi Sudyalar oliy kengashi, Oliy sudi va Departamentning hududiy boʻlimlari tomonidan tushadi.

Departament tushgan buyurtmanomalarni umumlashtiradi va ularni koʻrib chiqish uchun Kuzatuv kengashiga kiritadi.

Kuzatuv kengashining qarorlari boʻyicha Departament Jamgʻarmadan mablagʻlarni qabul qilingan qarorga muvofiq foydalanish uchun oʻtkazadi.

Oʻzbekiston Respublikasi Sudyalar oliy kengashi, Oliy sudi va Departamentning hududiy boʻlimlari Departamentga Jamgʻarmaning ajratilgan mablagʻlaridan foydalanilishi toʻgʻrisida belgilangan tartibda hisobot taqdim etadi.

11. Jamgʻarma mablagʻlaridan foydalanish toʻgʻrisidagi hisobot har chorakda Kuzatuv kengashi tomonidan koʻrib chiqiladi va Oʻzbekiston Respublikasi Oliy sudi raisi tomonidan Oʻzbekiston Respublikasi Prezidenti devoniga taqdim etiladi.

12. Oʻzbekiston Respublikasi Moliya vazirligi Jamgʻarma mablagʻlaridan maqsadli foydalanilishini nazorat qiladi.

13. Jamgʻarma mablagʻlarini toʻplash va ulardan foydalanish tartibi Kuzatuv kengashi tomonidan tasdiqlanadi.

1. Oʻzbekiston Respublikasi Prezidentining “Oʻzbekiston Respublikasi Adliya vazirligi huzuridagi Sud departamentining sud qarorlarini ijro etish, moddiy-texnika jihatidan va moliyaviy taʼminlash tizimini yanada takomillashtirish chora-tadbirlari toʻgʻrisida” 2007-yil 1-noyabrdagi PQ-722-sonli qarorining 8-bandi hamda uning 7-ilovasi.

2. Oʻzbekiston Respublikasi Prezidentining “Oʻzbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamenti faoliyatini yanada takomillashtirish chora-tadbirlari toʻgʻrisida” 2012-yil 29-dekabrdagi PQ-1900-sonli qarori 7-ilovasining 4-bandi.

3. Oʻzbekiston Respublikasi Prezidentining “Oʻzbekiston Respublikasining 2014-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2013-yil 25-dekabrdagi PQ-2099-sonli qarori 36-ilovasining 22-bandi.

4. Vazirlar Mahkamasining “Sudlar va adliya organlarini rivojlantirish jamgʻarmasini tashkil etish toʻgʻrisida” 2003-yil 18-martdagi 147-son qarori (Oʻzbekiston Respublikasi QT, 2003-y., 3-son, 26-modda).

5. Vazirlar Mahkamasining “Vazirliklar va idoralarning budjetdan tashqari jamgʻarmalariga mablagʻlar ajratish va ulardan foydalanishni tartibga solish chora-tadbirlari toʻgʻrisida” 2003-yil 19-noyabrdagi 520-son qarori 2-ilovasining 13-bandi (Oʻzbekiston Respublikasi QT, 2003-y., 11-son, 123-modda).

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2007-yil 21-dekabrdagi 263-son qarorining 1-bandi hamda uning 1-ilovasi (Oʻzbekiston Respublikasi QT, 2007-y., 12-son, 72-modda).

7. Vazirlar Mahkamasining “Sudlar va adliya organlarini rivojlantirish jamgʻarmasi toʻgʻrisidagi nizomga qoʻshimcha kiritish haqida (Oʻzbekiston Respublikasi Prezidentining “Sud qonunchiligini demokratlashtirish va liberallashtirish hamda sud tizimi mustaqilligini taʼminlash boʻyicha tadqiqot markazini tashkil etish toʻgʻrisida” 2008-yil 23-iyundagi PQ-896-son qarori)” 2008-yil 11-oktabrdagi 224-son qarori (Oʻzbekiston Respublikasi QT, 2008-y., 10-son, 54-modda).

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasi Prezidentining ayrim qarorlariga oʻzgartirishlar kiritish toʻgʻrisida” 2009-yil 27-fevraldagi PQ-1062-son qarori)” 2009-yil 11-martdagi 63-son qarori 1-ilovasining 13-bandi (Oʻzbekiston Respublikasi QT, 2009-y., 3-son, 20-modda).

9. Vazirlar Mahkamasining “Oʻzbekiston Respublikasi Advokatlar palatasining moddiy-texnika bazasini mustahkamlashga doir qoʻshimcha chora-tadbirlar toʻgʻrisida” 2009-yil 9-dekabrdagi 308-son qarorining 3-bandi.

10. Vazirlar Mahkamasining “Oʻzbekiston Respublikasi qonun hujjatlari maʼlumotlari milliy bazasidan keng foydalanishni taʼminlash chora-tadbirlari toʻgʻrisida” 2009-yil 31-dekabrdagi 340-son qarorining 2-bandi (Oʻzbekiston Respublikasi QT, 2009-y., 12-son, 83-modda).

11. Vazirlar Mahkamasining “Vazirliklar, davlat qoʻmitalari va idoralarning budjetdan tashqari jamgʻarmalariga mablagʻlar ajratishni tartibga solish chora-tadbirlari toʻgʻrisida” 2010-yil 2-apreldagi 62-son qarori 2-ilovasining 11-bandi (Oʻzbekiston Respublikasi QT, 2010-y., 4-son, 14-modda).

12. Vazirlar Mahkamasining “Oʻzbekiston Respublikasi Prezidentining “Oʻzbekiston Respublikasida notariat institutini yanada takomillashtirish choralari toʻgʻrisida” 2010-yil 5-maydagi PF-4216-son Farmonini amalga oshirish chora-tadbirlari haqida” 2010-yil 2-iyundagi 104-son qarori 3-ilovasining 4-bandi (Oʻzbekiston Respublikasi QT, 2010-y., 6-son, 25-modda).

13. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining 2010-yil 17-sentabrdagi “Baholash faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish toʻgʻrisida”gi OʻRQ-257-sonli Qonuni)” 2010-yil 9-noyabrdagi 248-son qarori ilovasining 6-bandi (Oʻzbekiston Respublikasi QT, 2010-y., 11-son, 58-modda).

14. Vazirlar Mahkamasining “Notarius tomonidan oʻz kasb majburiyatlari buzilishi oqibatida yetkazilgan zararni qoplash tartibi toʻgʻrisidagi nizomni tasdiqlash haqida” 2010-yil 28-dekabrdagi 318-son qarorining 2-bandi hamda uning 2-ilovasi (Oʻzbekiston Respublikasi QT, 2010-y., 12-son, 73-modda).

15. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Rieltorlik faoliyati toʻgʻrisida” 2010-yil 22-dekabrdagi OʻRQ-269-sonli Qonuni)” 2012-yil 27-fevraldagi 52-son qarori ilovasining 3-bandi (Oʻzbekiston Respublikasi QT, 2012-y., 2-son, 13-modda).

16. Vazirlar Mahkamasining “Oʻzbekiston Respublikasi Hukumatining notariat faoliyatini tashkil etishga doir ayrim qarorlariga oʻzgartirishlar kiritish toʻgʻrisida” 2012-yil 10-apreldagi 105-son qarori ilovasining 1-bandi (Oʻzbekiston Respublikasi QT, 2012-y., 4-son, 24-modda).

17. Vazirlar Mahkamasining “Sud ijrochilari tomonidan soliq qarzdorligini undirish tartibga solinishi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2012-yil 11-oktabrdagi 290-son qarori 1-bandining ikkinchi xatboshisi (Oʻzbekiston Respublikasi QT, 2012-y., 10-son, 74-modda).

18. Vazirlar Mahkamasining “Sudyalarga, prokuratura organlari hamda Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimlariga imtiyozli shartlarda uy-joy sotib olishga uzoq muddatli ipoteka kreditlari berish tartibi toʻgʻrisidagi nizomni hamda Sudyalarga, prokuratura organlari hamda Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimlariga uy-joylarni ijaraga olganlik (ijaraga turganlik) uchun har oylik pul kompensatsiyasi toʻlash tartibi toʻgʻrisidagi nizomni tasdiqlash haqida” 2012-yil 31-oktabrdagi 312-son qarorining 2-bandi (Oʻzbekiston Respublikasi QT, 2012-y., 10-son, 78-modda).

19. Vazirlar Mahkamasining “Oʻzbekiston Respublikasi Hukumatining ayrim qarorlariga qoʻshimcha va oʻzgartirishlar kiritish toʻgʻrisida (Oʻzbekiston Respublikasi Prezidentining “Yuridik kadrlarni tayyorlash tizimini yanada takomillashtirish chora-tadbirlari toʻgʻrisida” 2013-yil 28-iyundagi PQ-1990-son qarori)” 2013-yil 16-avgustdagi 227-son qarori ilovasining 1-bandi (Oʻzbekiston Respublikasi QT, 2013-y., 8-son, 57-modda).

20. Vazirlar Mahkamasining “Oʻzbekiston Respublikasi Prezidentining “Fuqarolik jamiyati institutlarini rivojlantirishga koʻmaklashish borasidagi qoʻshimcha chora-tadbirlar toʻgʻrisida” 2013-yil 12-dekabrdagi PQ-2085-son qarorini amalga oshirish chora-tadbirlari haqida” 2014-yil 10-martdagi 57-son qarori 5-ilovasining 3-bandi (Oʻzbekiston Respublikasi QT, 2014-y., 3-son, 25-modda).

21. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Tadbirkorlik subyektlariga davlat xizmatlarini koʻrsatish mexanizmlarini takomillashtirishga doir qoʻshimcha chora-tadbirlar toʻgʻrisida” 2017-yil 1-fevraldagi PQ-2750-son qarori)” 2017-yil 1-maydagi 252-son qarori 1-ilovasining 5-bandi.