Sud hokimiyatining mustaqilligini yanada ta’minlash, sudlar, adliya organlari va muassasalarining moddiy-texnika ta’minotini mustahkamlash, ular faoliyati uchun zarur shart-sharoitlar yaratish maqsadida:

1. O‘zbekiston Respublikasi Oliy sudi, Sudyalar oliy kengashi, Adliya vazirligi va Moliya vazirligining Sudlar va adliya organlarini rivojlantirish jamg‘armasi hamda uning Ijro etuvchi direksiyasini tugatib, quyidagilarni tashkil etish bo‘yicha taklifiga rozilik berilsin:

Sud hokimiyati organlarini rivojlantirish jamg‘armasi;

budjetdan tashqari Adliya organlari va muassasalarini rivojlantirish jamg‘armasi.

2. Belgilansinki, quyidagilar Sud hokimiyati organlarini rivojlantirish jamg‘armasi daromadlarini shakllantirish manbalari hisoblanadi:

jinoiy, fuqarolik, ma’muriy, iqtisodiy va harbiy sudlar tomonidan ko‘rib chiqiladigan ishlar bo‘yicha davlat bojlari to‘lashdan O‘zbekiston Respublikasining Davlat budjetiga tushayotgan summalarning 5 foizi miqdoridagi ajratmalar;

jinoiy, fuqarolik, ma’muriy, iqtisodiy va harbiy sudlar tomonidan ko‘rib chiqiladigan ishlar bo‘yicha jarimalar to‘lashdan O‘zbekiston Respublikasining Davlat budjetiga tushayotgan summalarning 5 foizi miqdoridagi ajratmalar;

ijro ishi bo‘yicha O‘zbekiston Respublikasining Davlat budjetiga undirilgan summaning 5 foizi miqdoridagi ajratmalar, qarzdorning mol-mulkini sotish hisobiga soliq qarzdorligini undirish bundan mustasno.

Bunda yuqorida ko‘rsatib o‘tilgan ajratmalar miqdori haqiqiy tushum va xarajatlarni inobatga olib, 2026-yil 1-yanvardan 2030-yil 31-dekabrga qadar har yili O‘zbekiston Respublikasi Oliy sudi va O‘zbekiston Respublikasi Iqtisodiyot va moliya vazirligi tomonidan kelishilgan miqdorlarda belgilanadi. Belgilangan miqdorlardan ortiqcha tushgan mablag‘lar kelgusi yil dastur xarajatlarini moliyalashtirishda inobatga olinadi;

vaqtincha bo‘sh turgan mablag‘larni tijorat banklarining depozitlariga joylashtirishdan tushadigan daromadlar;

qonunchilik hujjatlarida taqiqlanmagan boshqa daromadlar.

3. Sud hokimiyati organlarini rivojlantirish jamg‘armasi to‘g‘risidagi nizom 1-ilovaga muvofiq tasdiqlansin.

4. Belgilab qo‘yilsinki, Sud hokimiyati organlarini rivojlantirish jamg‘armasi faoliyatini boshqarish va uning mablag‘larini taqsimlash O‘zbekiston Respublikasi Oliy sudi raisi boshqaradigan Sud hokimiyati organlarini rivojlantirish jamg‘armasi Kuzatuv kengashi (keyingi o‘rinlarda — Kuzatuv kengashi) tomonidan amalga oshiriladi.

Kuzatuv kengashi tarkibiga lavozimiga ko‘ra O‘zbekiston Respublikasi Sudyalar oliy kengashi raisi, O‘zbekiston Respublikasi Oliy sudi huzuridagi Sudlar faoliyatini ta’minlash departamenti (keyingi o‘rinlarda — Departament) direktori va O‘zbekiston Respublikasi Odil sudlov akademiyasi (keyingi o‘rinlarda — Akademiya) rektori kiradi.

5. 2017-yilning 1-sentabridan boshlab malaka darajalari, martaba darajalari va uzoq muddat xizmat qilganligi uchun sudyalar hamda sudlar va Departament xodimlari lavozim maoshlariga ustama va har oylik qo‘shimcha haq to‘lash, sudlar va Departamentning yordamchi xodimlarini ta’minlash, sudyalar hamda sudlar, O‘zbekiston Respublikasi Sudyalar oliy kengashi, Departament va Akademiya xodimlari tomonidan belgilangan tartibda uy-joyni ijaraga olish (ijarada turish), sudlar, O‘zbekiston Respublikasi Sudyalar oliy kengashi, Departament va Akademiya binolari va xonalarini qurish va ta’mirlash sudlarni transport vositalari bilan ta’minlash xarajatlari, sudlar, O‘zbekiston Respublikasi Sudyalar oliy kengashi, Departament va Akademiya xodimlarining xizmat safari xarajatlari, shuningdek sudlar, O‘zbekiston Respublikasi Sudyalar oliy kengashi, Departament va Akademiyaning kommunal-foydalanish hamda boshqa joriy xarajatlari O‘zbekiston Respublikasi Davlat budjeti mablag‘lari hisobidan amalga oshirilishi belgilab qo‘yilsin.

6. Belgilansinki, quyidagilar budjetdan tashqari Adliya organlari va muassasalarini rivojlantirish jamg‘armasi daromadlarini shakllantirish manbalari hisoblanadi:

FHDY organlari hamda notariuslar tomonidan undiriladigan davlat boji summalaridan 16 foiz miqdoridagi ajratmalar;

adliya organlari tomonidan nodavlat notijorat tashkilotlarini, advokatlik byurolarini, firmalarini, hay’atlarini, nodavlat notijorat tashkilotlarining ramzlarini davlat ro‘yxatidan o‘tkazganlik, nodavlat notijorat tashkilotlarining xorijiy fuqarolar bo‘lgan xodimlarini, shuningdek ularning oila a’zolarini akkreditatsiyadan o‘tkazganlik, nodavlat notijorat tashkiloti, uning ramzi davlat ro‘yxatidan o‘tkazilganligi to‘g‘risidagi guvohnomaning va nodavlat notijorat tashkilotining ta’sis hujjatlarining dublikatini berganlik uchun, akkreditatsiya kartochkasi dublikatini berganlik uchun, advokatlik faoliyatini litsenziyalaganlik uchun undiriladigan mablag‘larning, shuningdek adliya organlari tomonidan undiriladigan jarimalar summasining 80 foizi;

vaqtincha bo‘sh turgan mablag‘larni tijorat banklarining depozitlariga joylashtirishdan tushadigan daromadlar;

qonunchilik hujjatlarida taqiqlanmagan boshqa daromadlar.

7. Belgilansinki, budjetdan tashqari Adliya organlari va muassasalarini rivojlantirish jamg‘armasi mablag‘lari:

adliya organlari va muassasalarini moddiy-texnik ta’minotiga;

adliya organlari va muassasalarini bino, uskunalarini qurish va ta’mirlashga;

adliya organlari va muassasalari xodimlarini moddiy rag‘batlantirishga va ijtimoiy muhofaza qilishga (adliya organlari xodimlari uchun uy-joy qurish, sanatoriya-kurort va tibbiy xizmat ko‘rsatish, mukofotlar to‘lash, maoshlarga ustamalar belgilash, moddiy yordam ko‘rsatish va hokazo);

adliya organlari va muassasalari xodimlarini xizmat safar xarajatlariga, shu jumladan xorijiy davlatlardagi xizmat safarlariga;

uy-joy sharoitlarini yaxshilashga muhtoj bo‘lgan adliya organlari xodimlariga uy-joy sotib olish uchun besh yildan ko‘p bo‘lmagan muddatga va bazaviy hisoblash miqdorining ming barobaridan oshmagan miqdorda foizsiz qarz ajratishga;

adliya organlari va muassasalari xodimlariga martaba darajalari hamda uzoq muddatli xizmati uchun ustamalar va qo‘shimcha haq to‘lashga;

O‘zbekiston Respublikasi Adliya vazirligi tomonidan belgilangan tartibda adliya organlari va muassasalari xodimlariga uy-joylarni ijaraga olganlik (ijarada turganlik) uchun to‘lovlarni kompensatsiya qilishga;

adliya organlari va muassasalari xodimlarini o‘qitish, malakasini oshirish hamda stajirovka o‘tashiga, shu jumladan, ularning xorijiy davlatlarga tashriflarini tashkil etishga va chet davlatlarda o‘tkaziladigan konferensiya, seminarlar va boshqa tadbirlarda ishtirok etishiga;

adliya organlari va muassasalari faoliyati bilan bog‘liq masalalar bo‘yicha O‘zbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etishga;

adliya organlarining kommunal-foydalanish hamda boshqa joriy xarajatlariga;

“Adolat” milliy huquqiy axborot markazi” davlat muassasasi, “Adliya organlari va muassasalarida axborot-kommunikatsiya texnologiyalarini rivojlantirish markazi” davlat muassasasi hamda “Intellektual mulk markazi” davlat muassasasini moliyalashtirishga;

notarius tomonidan o‘z kasb majburiyatlari buzilishi oqibatida yetkazilgan zararni va tegishli xarajatlarni qoplashga;

O‘zbekiston Respublikasi Qonunchilik ma’lumotlari milliy bazasini yuritish, texnik jihatdan saqlab turish va modernizatsiya qilishni moliyalashtirishga;

adliya organlari va muassasalarining boshqaruv va yordamchi xodimlari ta’minotiga;

adliya organlari va muassasalari faoliyatini yaxshilashga qaratilgan, shuningdek, qonunchilik hujjatlarida hamda O‘zbekiston Respublikasi Prezidenti va Bosh vazirining topshiriqlarida nazarda tutilgan boshqa tadbirlarga yo‘naltiriladi.

8. Sudlar va adliya organlarini rivojlantirish jamg‘armasi Ijro etuvchi direksiyasining faoliyati tugatilganligi bois uning 2 shtat birligini O‘zbekiston Respublikasi Adliya vazirligiga va 2 shtat birligini Departamentga ajratish va ularning tegishincha budjetdan tashqari Adliya organlari va muassasalarini rivojlantirish jamg‘armasi va Sud hokimiyati organlarini rivojlantirish jamg‘armasi mablag‘lari hisobidan saqlanishi ta’minlansin.

9. O‘zbekiston Respublikasi Adliya vazirligi:

O‘zbekiston Respublikasi Oliy sudi va Moliya vazirligi bilan birgalikda bir oy muddatda Sudlar va adliya organlarini rivojlantirish jamg‘armasi mablag‘lari qoldig‘ini, shu jumladan, kreditorlik va debitorlik qarzdorligini Sud hokimiyati organlarini rivojlantirish jamg‘armasi va budjetdan tashqari Adliya organlari va muassasalarini rivojlantirish jamg‘armasi o‘rtasida hamda tugatilayotgan Sudlar va adliya organlarini rivojlantirish jamg‘armasi ijro etuvchi direksiyasini mulkini O‘zbekiston Respublikasi Adliya vazirligi va Departament o‘rtasida taqsimlanishini ta’minlasin;

O‘zbekiston Respublikasi Oliy sudi va Sudyalar oliy kengashi bilan birgalikda tugatilayotgan Sudlar va adliya organlarini rivojlantirish jamg‘armasining hisobidan sudyalar, sud va Departament xodimlariga o‘tgan davr uchun to‘lanmagan malaka darajalari, martaba darajalari hamda uzoq muddatli xizmati uchun ustamalar va qo‘shimcha haqlarni to‘lanishini ta’minlasin;

O‘zbekiston Respublikasi Moliya vazirligi bilan kelishilgan holda bir oy muddatda budjetdan tashqari Adliya organlari va muassasalarini rivojlantirish jamg‘armasi mablag‘laridan foydalanish tartibi to‘g‘risidagi nizomni tasdiqlasin.

10. O‘zbekiston Respublikasi Prezidentining hamda O‘zbekiston Respublikasi Hukumatining ayrim qarorlari 2-ilovaga muvofiq o‘z kuchini yo‘qotgan deb hisoblansin.

11. O‘zbekiston Respublikasi Adliya vazirligi, Moliya vazirligi va Oliy sudi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

12. Mazkur qarorning bajarilishini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidentining Davlat maslahatchisi O.B. Murodov va O‘zbekiston Respublikasi adliya vaziri R.Q. Davletov zimmalariga yuklansin.

1. Sud hokimiyati organlarini rivojlantirish jamg‘armasi (keyingi o‘rinlarda — Jamg‘arma) sudlar, O‘zbekiston Respublikasi Sudyalar oliy kengashi, O‘zbekiston Respublikasi Oliy sudi huzuridagi Sudlar faoliyatini ta’minlash departamenti (keyingi o‘rinlarda — Departament) faoliyatini moliyalashtirish va moddiy-texnika ta’minotini yaxshilash, shuningdek ular faoliyati uchun zarur shart-sharoitlar yaratish maqsadida tashkil etilgan.

2. Jamg‘arma mablag‘lari:

jinoiy, fuqarolik, ma’muriy, iqtisodiy va harbiy sudlar tomonidan ko‘rib chiqiladigan ishlar bo‘yicha davlat bojlari to‘lashdan O‘zbekiston Respublikasining Davlat budjetiga tushayotgan summalarning 5 foizi miqdoridagi ajratmalar;

jinoiy, fuqarolik, ma’muriy, iqtisodiy va harbiy sudlar tomonidan ko‘rib chiqiladigan ishlar bo‘yicha jarimalar to‘lashdan O‘zbekiston Respublikasining Davlat budjetiga tushayotgan summalarning 5 foizi miqdoridagi ajratmalar;

ijro ishi bo‘yicha O‘zbekiston Respublikasining Davlat budjetiga undirilgan summadan 5 foiz miqdoridagi ajratmalar, qarzdorning mol-mulkini sotish hisobiga soliq qarzdorligini undirish bundan mustasno.

Bunda yuqorida ko‘rsatib o‘tilgan ajratmalar miqdori haqiqiy tushum va xarajatlar miqdorlarini inobatga olib, 2026-yil 1-yanvardan 2030-yil 31-dekabrga qadar har yili O‘zbekiston Respublikasi Oliy sudi va O‘zbekiston Respublikasi Iqtisodiyot va moliya vazirligi tomonidan kelishilgan miqdorlarda belgilanadi. Belgilangan miqdorlardan ortiqcha tushgan mablag‘lar kelgusi yil dastur xarajatlarini moliyalashtirishda inobatga olinadi;

vaqtincha bo‘sh turgan mablag‘larni tijorat banklarining depozitlariga joylashtirishdan tushadigan daromadlar;

qonunchilik hujjatlarida taqiqlanmagan boshqa daromadlar hisobiga shakllantiriladi.

3. Jamg‘arma mablag‘lari:

sudlar, O‘zbekiston Respublikasi Sudyalar oliy kengashi va Departament (keyingi o‘rinlarda — sud organlari) binolari va xonalarini qurish, ta’mirlash va jihozlash, sudyalar va sud organlari xodimlarining xizmat safari xarajatlari, sud organlarining kommunal-foydalanish va boshqa joriy xarajatlarining O‘zbekiston Respublikasi Davlat budjeti mablag‘lari hisobidan qoplanmagan qismiga;

sud organlarini zarur anjomlar, kompyuterlar va boshqa zamonaviy tashkiliy-texnika vositalari bilan ta’minlashga;

sud organlarining texnika vositalariga xizmat ko‘rsatish va ularni ta’mirlashga;

sudlar, Sudyalar oliy kengashi sudyalari va apparatlari xodimlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari xodimlariga lavozim okladining bir baravari miqdorida (alohida sharoitlarini inobatga olinmagan holda) yilda beshta bayramlarga mukofot puli to‘lashga, sud organlari xodimlarini ijtimoiy muhofaza qilishga (uy-joy qurish va (yoki) sotib olish, sanatoriya-kurort va tibbiy xizmat ko‘rsatish);

O‘zbekiston Respublikasi Konstitutsiyaviy sudi, O‘zbekiston Respublikasi sudlari sudyalari va sud organlari xodimlari tomonidan belgilangan tartibda uy-joy sotib olishga dastlabki badalni to‘lashga;

sud organlari xodimlarini tegishli adabiyotlar va matbaa nashrlari bilan ta’minlashga;

sudyalarni formali kiyim-boshlar bilan ta’minlash xarajatlarini moliyalashtirishga;

sud organlari xodimlarining malakasini oshirishga, ularni o‘qitishga va stajirovka o‘tashiga, shu jumladan ularning xorijiy davlatlarga tashriflarini tashkillashtirishga, xorijiy davlatlarda o‘tkaziladigan konferensiya, seminar va boshqa tadbirlarda ishtirok etishiga;

sud organlari faoliyati bilan bog‘liq masalalar bo‘yicha O‘zbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etishga;

Jamg‘arma zaxirasini yaratishga;

Oliy sud va O‘zbekiston Respublikasi Oliy sudi huzuridagi Sudlar faoliyatini ta’minlash departamentining yuqori malakali, tashabbuskor, xizmat majburiyatlarini halol va samarali bajarayotgan sudyalari va xodimlariga oylik mehnatga haq to‘lash fondining 100 foizigacha miqdorda ustama (pul ta’minoti) to‘lashga;

sudlar, Sudyalar oliy kengashi sudyalari va apparatlari xodimlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari texnik va xizmat ko‘rsatuvchi xodimlariga lavozim maoshlariga 40 foizgacha har oylik ustama (pul ta’minoti) to‘lashga;

Sudyalar oliy kengashi, Oliy sud, quyi sudlar sudyalari va ularning apparati xodimlari, Oliy sud huzuridagi Sudlar faoliyatini ta’minlash departamenti va uning hududiy bo‘limlari xodimlariga lavozim okladining bir baravari miqdorida (alohida mehnat sharoitlari inobatga olinmagan holda) yilda bir marta moddiy yordam to‘lashga;

O‘zbekiston Respublikasi Prezidenti va Vazirlar Mahkamasi hujjatlari bilan belgilangan ustama va boshqa to‘lovlarni to‘lashga;

sud organlari faoliyatini yaxshilashga qaratilgan boshqa tadbirlarga va maqsadlarga qonunchilikda o‘rnatilgan tartibda yo‘naltiriladi.

4. Jamg‘armaning joriy yilda foydalanilmagan mablag‘lari O‘zbekiston Respublikasi Davlat budjetiga olib qo‘yilmaydi va ulardan keyingi yilda foydalaniladi.

5. Jamg‘arma mablag‘laridan foydalanish har yili mablag‘lar va buyurtmanomalar tushishi prognozi asosida shakllantiriladigan sud organlarini rivojlantirish dasturlarini moliyalashtirish orqali amalga oshiriladi.

Sud organlarini rivojlantirish dasturida sud organlari binolari va xonalarini qurish, rekonstruksiya qilish, ta’mirlash, jihozlash muddatlari va hajmlari; ularni jihozlar, transport vositalari, kompyuterlar va boshqa zamonaviy tashkiliy-texnika vositalari bilan ta’minlash, shuningdek ularni rivojlantirish bo‘yicha boshqa tadbirlar nazarda tutiladi.

Sud organlarini rivojlantirish dasturi, ularni mablag‘ bilan ta’minlash hajmlari hamda Jamg‘armaning zaxiraga qo‘yiladigan har yilgi qismi miqdori Jamg‘armaning Kuzatuv kengashi (keyingi o‘rinlarda — Kuzatuv kengashi) tomonidan tasdiqlanadi.

6. Jamg‘arma faoliyatini boshqarish va uning mablag‘larini taqsimlash O‘zbekiston Respublikasi Oliy sudi raisi boshqaradigan Kuzatuv kengashi tomonidan amalga oshiriladi.

Kuzatuv kengashi tarkibiga lavozimiga ko‘ra O‘zbekiston Respublikasi Sudyalar oliy kengashi raisi va Departament direktori kiradi.

Kuzatuv kengashi har chorakda kamida bir marta majlis o‘tkazadi. Zarur hollarda Kuzatuv kengashining navbatdan tashqari majlislari chaqirilishi mumkin.

Kuzatuv kengashi majlisi unda Kuzatuv kengashi a’zolarining kamida to‘rtdan uch qismi ishtirok etgan taqdirda vakolatli hisoblanadi.

Jamg‘arma mablag‘laridan foydalanish bo‘yicha qaror Kuzatuv kengashi a’zolarining oddiy ko‘pchilik ovozi bilan qabul qilinadi va Kuzatuv kengashi raisi tomonidan imzolanadi.

7. Jamg‘arma mablag‘lari to‘planishi va sarflanishini tezkor boshqarish Departament tomonidan amalga oshiriladi.

8. Departament quyidagilarga majbur:

buyurtmanomalarni yig‘ish va Kuzatuv kengashi tomonidan ko‘rib chiqish uchun materiallarni tayyorlash;

Kuzatuv kengashi qarorlarini sud organlariga yetkazish;

Kuzatuv kengashi qarorlarini o‘z vaqtida ijro etish;

Jamg‘armaning ajratilgan mablag‘laridan foydalanilishini nazorat qilish va uning monitoringini amalga oshirish;

Kuzatuv kengashiga va O‘zbekiston Respublikasi Moliya vazirligiga Jamg‘arma mablag‘laridan foydalanilishi bo‘yicha hisobot taqdim etish.

9. Departament quyidagi huquqlarga ega:

zarur hollarda mablag‘lar ajratishga tushgan buyurtmanomalar bo‘yicha qo‘shimcha ma’lumotlar olish;

Jamg‘armaning ajratilgan mablag‘laridan maqsadli foydalanilishini tekshirish;

mablag‘lardan belgilangan maqsadda foydalanilmagan taqdirda moliyalashtirishni to‘xtatib turish, keyinchalik ushbu masalani Kuzatuv kengashga ko‘rib chiqish uchun kiritish.

10. Jamg‘armadan mablag‘lar ajratish yuzasidan buyurtmanomalar Departamentga O‘zbekiston Respublikasi Sudyalar oliy kengashi, Oliy sudi va Departamentning hududiy bo‘limlari tomonidan tushadi.

Departament tushgan buyurtmanomalarni umumlashtiradi va ularni ko‘rib chiqish uchun Kuzatuv kengashiga kiritadi.

Kuzatuv kengashining qarorlari bo‘yicha Departament Jamg‘armadan mablag‘larni qabul qilingan qarorga muvofiq foydalanish uchun o‘tkazadi.

O‘zbekiston Respublikasi Sudyalar oliy kengashi, Oliy sudi va Departamentning hududiy bo‘limlari Departamentga Jamg‘armaning ajratilgan mablag‘laridan foydalanilishi to‘g‘risida belgilangan tartibda hisobot taqdim etadi.

11. Jamg‘arma mablag‘laridan foydalanish to‘g‘risidagi hisobot har chorakda Kuzatuv kengashi tomonidan ko‘rib chiqiladi va O‘zbekiston Respublikasi Oliy sudi raisi tomonidan O‘zbekiston Respublikasi Prezidenti Administratsiyasiga taqdim etiladi.

12. O‘zbekiston Respublikasi Moliya vazirligi Jamg‘arma mablag‘laridan maqsadli foydalanilishini nazorat qiladi.

13. Jamg‘arma mablag‘larini to‘plash va ulardan foydalanish tartibi Kuzatuv kengashi tomonidan tasdiqlanadi.

1. O‘zbekiston Respublikasi Prezidentining “O‘zbekiston Respublikasi Adliya vazirligi huzuridagi Sud departamentining sud qarorlarini ijro etish, moddiy-texnika jihatidan va moliyaviy ta’minlash tizimini yanada takomillashtirish chora-tadbirlari to‘g‘risida” 2007-yil 1-noyabrdagi PQ-722-sonli qarorining 8-bandi hamda uning 7-ilovasi.

2. O‘zbekiston Respublikasi Prezidentining “O‘zbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy ta’minlash departamenti faoliyatini yanada takomillashtirish chora-tadbirlari to‘g‘risida” 2012-yil 29-dekabrdagi PQ-1900-sonli qarori 7-ilovasining 4-bandi.

3. O‘zbekiston Respublikasi Prezidentining “O‘zbekiston Respublikasining 2014-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida” 2013-yil 25-dekabrdagi PQ-2099-sonli qarori 36-ilovasining 22-bandi.

4. Vazirlar Mahkamasining “Sudlar va adliya organlarini rivojlantirish jamg‘armasini tashkil etish to‘g‘risida” 2003-yil 18-martdagi 147-son qarori (O‘zbekiston Respublikasi QT, 2003-y., 3-son, 26-modda).

5. Vazirlar Mahkamasining “Vazirliklar va idoralarning budjetdan tashqari jamg‘armalariga mablag‘lar ajratish va ulardan foydalanishni tartibga solish chora-tadbirlari to‘g‘risida” 2003-yil 19-noyabrdagi 520-son qarori 2-ilovasining 13-bandi (O‘zbekiston Respublikasi QT, 2003-y., 11-son, 123-modda).

7. Vazirlar Mahkamasining “Sudlar va adliya organlarini rivojlantirish jamg‘armasi to‘g‘risidagi nizomga qo‘shimcha kiritish haqida (O‘zbekiston Respublikasi Prezidentining “Sud qonunchiligini demokratlashtirish va liberallashtirish hamda sud tizimi mustaqilligini ta’minlash bo‘yicha tadqiqot markazini tashkil etish to‘g‘risida” 2008-yil 23-iyundagi PQ-896-son qarori)” 2008-yil 11-oktabrdagi 224-son qarori (O‘zbekiston Respublikasi QT, 2008-y., 10-son, 54-modda).

8. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘zbekiston Respublikasi Prezidentining ayrim qarorlariga o‘zgartirishlar kiritish to‘g‘risida” 2009-yil 27-fevraldagi PQ-1062-son qarori)” 2009-yil 11-martdagi 63-son qarori 1-ilovasining 13-bandi (O‘zbekiston Respublikasi QT, 2009-y., 3-son, 20-modda).

9. Vazirlar Mahkamasining “O‘zbekiston Respublikasi Advokatlar palatasining moddiy-texnika bazasini mustahkamlashga doir qo‘shimcha chora-tadbirlar to‘g‘risida” 2009-yil 9-dekabrdagi 308-son qarorining 3-bandi.

10. Vazirlar Mahkamasining “O‘zbekiston Respublikasi qonun hujjatlari ma’lumotlari milliy bazasidan keng foydalanishni ta’minlash chora-tadbirlari to‘g‘risida” 2009-yil 31-dekabrdagi 340-son qarorining 2-bandi (O‘zbekiston Respublikasi QT, 2009-y., 12-son, 83-modda).

11. Vazirlar Mahkamasining “Vazirliklar, davlat qo‘mitalari va idoralarning budjetdan tashqari jamg‘armalariga mablag‘lar ajratishni tartibga solish chora-tadbirlari to‘g‘risida” 2010-yil 2-apreldagi 62-son qarori 2-ilovasining 11-bandi (O‘zbekiston Respublikasi QT, 2010-y., 4-son, 14-modda).

12. Vazirlar Mahkamasining “O‘zbekiston Respublikasi Prezidentining “O‘zbekiston Respublikasida notariat institutini yanada takomillashtirish choralari to‘g‘risida” 2010-yil 5-maydagi PF-4216-son Farmonini amalga oshirish chora-tadbirlari haqida” 2010-yil 2-iyundagi 104-son qarori 3-ilovasining 4-bandi (O‘zbekiston Respublikasi QT, 2010-y., 6-son, 25-modda).

13. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasining 2010-yil 17-sentabrdagi “Baholash faoliyati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi O‘RQ-257-sonli Qonuni)” 2010-yil 9-noyabrdagi 248-son qarori ilovasining 6-bandi (O‘zbekiston Respublikasi QT, 2010-y., 11-son, 58-modda).

14. Vazirlar Mahkamasining “Notarius tomonidan o‘z kasb majburiyatlari buzilishi oqibatida yetkazilgan zararni qoplash tartibi to‘g‘risidagi nizomni tasdiqlash haqida” 2010-yil 28-dekabrdagi 318-son qarorining 2-bandi hamda uning 2-ilovasi (O‘zbekiston Respublikasi QT, 2010-y., 12-son, 73-modda).

15. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasining “Rieltorlik faoliyati to‘g‘risida” 2010-yil 22-dekabrdagi O‘RQ-269-sonli Qonuni)” 2012-yil 27-fevraldagi 52-son qarori ilovasining 3-bandi (O‘zbekiston Respublikasi QT, 2012-y., 2-son, 13-modda).

16. Vazirlar Mahkamasining “O‘zbekiston Respublikasi Hukumatining notariat faoliyatini tashkil etishga doir ayrim qarorlariga o‘zgartirishlar kiritish to‘g‘risida” 2012-yil 10-apreldagi 105-son qarori ilovasining 1-bandi (O‘zbekiston Respublikasi QT, 2012-y., 4-son, 24-modda).

17. Vazirlar Mahkamasining “Sud ijrochilari tomonidan soliq qarzdorligini undirish tartibga solinishi munosabati bilan O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida” 2012-yil 11-oktabrdagi 290-son qarori 1-bandining ikkinchi xatboshisi (O‘zbekiston Respublikasi QT, 2012-y., 10-son, 74-modda).

18. Vazirlar Mahkamasining “Sudyalarga, prokuratura organlari hamda O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimlariga imtiyozli shartlarda uy-joy sotib olishga uzoq muddatli ipoteka kreditlari berish tartibi to‘g‘risidagi nizomni hamda Sudyalarga, prokuratura organlari hamda O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimlariga uy-joylarni ijaraga olganlik (ijaraga turganlik) uchun har oylik pul kompensatsiyasi to‘lash tartibi to‘g‘risidagi nizomni tasdiqlash haqida” 2012-yil 31-oktabrdagi 312-son qarorining 2-bandi (O‘zbekiston Respublikasi QT, 2012-y., 10-son, 78-modda).

20. Vazirlar Mahkamasining “O‘zbekiston Respublikasi Prezidentining “Fuqarolik jamiyati institutlarini rivojlantirishga ko‘maklashish borasidagi qo‘shimcha chora-tadbirlar to‘g‘risida” 2013-yil 12-dekabrdagi PQ-2085-son qarorini amalga oshirish chora-tadbirlari haqida” 2014-yil 10-martdagi 57-son qarori 5-ilovasining 3-bandi (O‘zbekiston Respublikasi QT, 2014-y., 3-son, 25-modda).

21. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Tadbirkorlik subyektlariga davlat xizmatlarini ko‘rsatish mexanizmlarini takomillashtirishga doir qo‘shimcha chora-tadbirlar to‘g‘risida” 2017-yil 1-fevraldagi PQ-2750-son qarori)” 2017-yil 1-maydagi 252-son qarori 1-ilovasining 5-bandi.