O‘zbekiston Respublikasining “Texnik jihatdan tartibga solish to‘g‘risida”gi Qonuni va Vazirlar Mahkamasining 2024-yil 1-iyuldagi 370-son “O‘zbekiston Respublikasi Vazirlar Mahkamasi huzuridagi O‘zbekiston texnik jihatdan tartibga solish agentligi va uning tizimidagi tashkilotlari faoliyatini samarali yo‘lga qo‘yish choralari to‘g‘risida”gi qaroriga muvofiq buyuraman:

1. Sifat bo‘yicha ekspert-auditorlarni attestatsiyadan o‘tkazish tartibi to‘g‘risidagi nizom ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur Nizom sifat bo‘yicha ekspert-auditorlarni hamda sifat bo‘yicha ekspert-auditorlikka nomzodlarni (bundan buyon matnda nomzod deb yuritiladi) attestatsiyadan o‘tkazish tartibini belgilaydi.

1. Mazkur Nizomda quyidagi asosiy tushunchalar qo‘llaniladi:

akkreditatsiya — muvofiqlikni baholash organlarining muayyan faoliyat sohasida muvofiqlikni baholashga doir ishlarni bajarishga vakolatliligini akkreditatsiya organi tomonidan rasman tasdiqlash;

attestatsiya — nomzodlarning nazariy bilim va kasbiy tayyorgarlik darajasini baholash jarayoni;

sifat bo‘yicha ekspert-auditor — mazkur Nizomda belgilangan tartibda attestatsiyadan o‘tkazilgan, muvofiqlikni baholash sohasidagi ishlarni olib borish uchun tegishli malakaga ega bo‘lgan mutaxassis;

davriy baholash — akkreditatsiya qilingan subyekt faoliyatining akkreditatsiya davrida belgilangan talablarga muvofiqligini akkreditatsiya siklida qayta baholash tartib-taomili;

2. Sifat bo‘yicha ekspert-auditorlarni attestatsiyasi (bundan buyon matnda attestatsiya deb yuritiladi) ularning professional malakasi va kasbiga munosibligi darajasini xolisona baholash, zimmasiga yuklangan vazifalar, funksiyalarni bajarish yuzasidan mas’uliyatini, sifatni baholash faoliyatining samaradorligini oshirish hamda sifat bo‘yicha ekspert-auditorlik faoliyati bilan shug‘ullanish huquqini berish maqsadida amalga oshiriladi.

3. Oliy ma’lumotli, muvofiqlik sertifikati va sifatni baholash sohasida uch yildan kam bo‘lmagan ish stajiga ega bo‘lgan, sifatni baholash sohasida malaka oshirgan, shuningdek sertifikatlashtirishdan o‘tgan sohasi bo‘yicha jami 4-marta akkreditatsiya va davriy baholashlarda ishtirok etgan mutaxassislar sifat bo‘yicha ekspert-auditorlikka attestatsiyadan o‘tkaziladi.

4. Sifat bo‘yicha ekspert-auditorlar har uch yilda bir marotaba attestatsiyadan o‘tkaziladi.

5. Attestatsiya haqqoniylik, davriylik, oshkoralik va xolislik prinsiplariga qat’iy rioya qilingan holda o‘tkaziladi.

6. Attestatsiya mazkur Nizomda nazarda tutilgan tartibda tuziladigan Sifat bo‘yicha ekspert-auditorlarni attestatsiyadan o‘tkazish komissiyasi (bundan buyon matnda attestatsiya komissiya deb yuritiladi) tomonidan amalga oshiriladi.

7. Attestatsiya komissiyasi O‘zbekiston Respublikasi Vazirlar Mahkamasi huzuridagi O‘zbekiston texnik jihatdan tartibga solish agentligi (bundan buyon matnda Agentlik deb yuritiladi) direktorining buyrug‘iga asosan Agentlik, Texnik jihatdan tartibga solish sohasida nazorat inspeksiyasi, “O‘zbekiston standartlar instituti” davlat muassasasi, “O‘zbekiston ilmiy-sinov va sifat nazorati markazi” davlat muassasasi, “O‘zbekiston milliy metrologiya instituti” davlat muassasasi va “O‘zbekiston akkreditatsiya markazi” davlat muassasasi mutaxassislari orasidan kamida to‘qqiz a’zodan iborat tarkibda tuziladi.

8. Agentlik direktori attestatsiya komissiyasining raisi hisoblanadi.

9. Agentlikning Muvofiqlikni baholash bo‘yicha texnik siyosatni amalga oshirish boshqarmasi attestatsiya komissiyasining ishini tashkil qiluvchi ishchi organi hisoblanadi.

10. Ishchi organ quyidagi vazifalarni amalga oshiradi:

attestatsiyadan o‘tish uchun ariza topshirgan nomzodlarning hujjatlarini qabul qiladi va ko‘rib chiqadi;

attestatsiyadan o‘tish uchun ariza topshirgan nomzodlarni attestatsiya o‘tkazish joyi va kuni haqida xabardor qiladi;

suhbat o‘tkazish uchun nomzodlarga beriladigan taxminiy savollarni tuzadi va attestatsiya komissiyasiga kiritadi;

Sifat bo‘yicha ekspertlar-auditorlar davlat reyestrini yuritadi;

attestatsiya komissiyasining faoliyatini tashkil etish bilan bog‘liq boshqa masalalarni ko‘rib chiqadi.

11. Attestatsiya komissiyasining yig‘ilishi har uch oyda bir marotaba o‘tkaziladi, attestatsiyadan o‘tish uchun arizalar kelib tushmagan hollar bundan mustasno.

12. Attestatsiya komissiyasining yig‘ilishi attestatsiya komissiyasi a’zolarining kamida uchdan ikki qismi qatnashgan taqdirda vakolatli hisoblanadi.

13. Attestatsiya natijalari attestatsiya komissiyasining qarori bilan qabul qilinadi. Attestatsiya komissiyasining qarori bayonnoma shaklida rasmiylashtiriladi va attestatsiya komissiyasi a’zolari tomonidan imzolanadi.

14. Nomzod attestatsiyadan o‘tish uchun attestatsiyadan o‘tish haqidagi ariza bilan Agentlikka murojaat qiladi.

Arizaga quyidagi hujjatlar ilova qilinadi:

nomzodning mazkur Nizomning 1-ilovasiga muvofiq shakl bo‘yicha anketasi;

akkreditatsiya va davriy baholashlarda ishtirok etganligini tasdiqlovchi buyruq nusxalari;

ish joyidan tavsifnoma;

xodimni sertifikatlashtirilganligi to‘g‘risidagi muvofiqlik sertifikati nusxasi.

Mazkur bandda nazarda tutilmagan hujjatlar talab qilinishiga yo‘l qo‘yilmaydi.

15. Sifat bo‘yicha ekspert-auditor Sifat bo‘yicha ekspert-auditorning attestatsiyadan o‘tganligi haqida guvohnomaning (bundan buyon matnda guvohnoma deb yuritiladi) amal qilish muddati tugashidan ikki oy oldin attestatsiyadan o‘tish haqidagi ariza bilan murojaat qiladi.

16. Hujjatlar kelib tushgan kunidan boshlab ikki kun muddatda attestatsiya komissiyasining ishchi organi tomonidan ko‘rib chiqiladi. Taqdim etilgan hujjatlarda kamchiliklar aniqlangan taqdirda ishchi organ tomonidan nomzodga attestatsiyadan o‘tishga qo‘yishni rad etish asoslari ko‘rsatilgan javob xati yuboriladi.

17. Attestatsiyadan o‘tishga qo‘yishni rad etish uchun asos bo‘lgan kamchiliklar bir oy muddatda bartaraf etilgan taqdirda hujjatlar takroran ko‘rib chiqish uchun taqdim qilinishi mumkin.

18. Quyidagilar attestatsiyadan o‘tishga qo‘yishning rad etilishi uchun asos hisoblanadi:

zarur darajada rasmiylashtirilmagan hujjatlarni taqdim etish yoki mazkur Nizomning 14-bandida nazarda tutilgan hujjatlar taqdim etmaslik;

taqdim etilgan hujjatlarda ishonchsiz yoki noto‘g‘ri ma’lumotlar mavjudligi aniqlanganda.

Attestatsiyadan o‘tishga qo‘yishni boshqa asoslar bilan rad etishga yo‘l qo‘yilmaydi.

19. Attestatsiyaning o‘tkazilish joyi va vaqti to‘g‘risida nomzod attestatsiya o‘tkaziladigan sanadan kamida o‘n kun oldin xabardor qilinadi.

20. Attestatsiyadan o‘tish uchun hujjatlar taqdim etgan hamda attestatsiyaga uzrsiz sababga ko‘ra kelmagan nomzodlar attestatsiya komissiyasining navbatdagi majlisida attestatsiyadan o‘tkaziladi, bu haqda nomzod xabardor qilinadi.

Attestatsiyaga uzrsiz sabab bilan takroran kelmagan nomzod attestatsiyadan o‘tmagan deb hisoblanadi va unga guvohnoma berish rad etiladi.

21. Attestatsiya suhbat shaklida o‘tkaziladi.

Nomzod bilan uning kasb faoliyatiga bog‘liq bo‘lgan qonunchilik sohasi, shu jumladan muvofiqlikni baholash sohasida ish yuritish asoslari bo‘yicha suhbat o‘tkaziladi.

Suhbat jarayonida berilgan savollar va nomzodning javoblari (ip o‘tkazib belgilangan tartibda tikilgan va muhr bilan tasdiqlangan) maxsus jurnalda qayd etiladi.

22. Attestatsiya komissiyasi nomzodning bilimlari va ish tajribasini hisobga olib:

nomzodni attestatsiyadan o‘tgan deb e’tirof etish va unga attestatsiyadan o‘tganlik to‘g‘risidagi guvohnomani berish haqida;

nomzodni attestatsiyadan o‘tmagan deb e’tirof etish va unga attestatsiyadan o‘tganlik to‘g‘risidagi guvohnomani berishni rad etish haqida qaror qabul qiladi.

23. Attestatsiya komissiyasining qarorlari attestatsiya komissiyasining majlisda hozir bo‘lgan a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolgan taqdirda raisning ovozi hal qiluvchi ovoz hisoblanadi. Ovoz berish nomzodning ishtirokisiz o‘tkaziladi.

24. Attestatsiya natijalari ovoz berish jarayoni tamom bo‘lgandan keyin darhol e’lon qilinadi.

25. Attestatsiya komissiyasi qaroridan norozi bo‘lgan nomzodlar attestatsiya natijalari e’lon qilingan kundan boshlab o‘n kun ichida Agentlik direktorining buyrug‘iga muvofiq tuziladigan apellyatsiya komissiyasiga ariza (shikoyat) bilan murojaat qilishlari mumkin.

26. Apellyatsiya komissiyasi attestatsiya komissiyasi tarkibiga kirmagan Agentlik, “O‘zbekiston standartlar instituti” davlat muassasasi, “O‘zbekiston ilmiy-sinov va sifat nazorati markazi” davlat muassasasi, “O‘zbekiston standartlar instituti” davlat muassasasi muvofiqlikni baholash organlarining mutaxassislaridan besh kishidan iborat tarkibda tuziladi.

27. Nomzodning arizasi (shikoyati) ro‘yxatga olingan kundan boshlab yetti kunlik muddatda ko‘rib chiqiladi. Arizani (shikoyatni) ko‘rib chiqish jarayonida nomzod ishtirok etishi mumkin. Nomzodning arizani (shikoyatni) ko‘rib chiqish jarayonida ishtirok etmasligi uni ko‘rib chiqmaslikka asos bo‘lmaydi.

Apellyatsiya komissiyasi attestatsiya komissiyasi qarorini o‘zgarishsiz qoldirish yoki uni bekor qilib, nomzod arizasini (shikoyatini) qanoatlantirish haqida qaror chiqaradi.

Apellyatsiya komissiyasi qarori nusxasi nomzodga va attestatsiya komissiyasiga apellyatsiya komissiyasi qarori chiqqan kundan e’tiboran ikki kun muddatda taqdim etiladi.

28. Sifat bo‘yicha ekspert-auditorlikka attestatsiyadan o‘tgan xodimga ikki kun muddatda ushbu Nizomga 2-ilovasiga muvofiq shaklda guvohnoma beriladi va Sifat bo‘yicha ekspertlar-auditorlar davlat reyestriga kiritiladi.

Guvohnomaning amal qilish muddati — uch yil.

Guvohnoma blankalari qat’iy hisobot beriladigan hujjatlar hisoblanadi, himoyalanganlik darajasiga, hisobga olish seriyasiga va tartib raqamiga ega bo‘ladi.

29. Attestatsiyadan o‘tganlik to‘g‘risidagi guvohnomani qayta rasmiylashtirish sifat bo‘yicha ekspert-auditorining familiyasi, ismi yoki otasining ismi o‘zgargan taqdirda, uning arizasi asosida ishchi organ tomonidan amalga oshiriladi.

Guvohnoma qayta rasmiylashtirilgunga qadar sifat bo‘yicha ekspert-auditor o‘z faoliyatini ilgari berilgan guvohnoma asosida amalga oshiradi.

30. Qayta rasmiylashtirilgan guvohnomada oldingi guvohnomada ko‘rsatilgan amal qilish muddati qayd etilgan bo‘lishi kerak. Oldin berilgan guvohnoma bekor qilinadi.

31. Guvohnoma yo‘qolgan yoki yaroqsiz holga kelgan taqdirda sifat bo‘yicha ekspert-auditorining arizasiga ko‘ra uning dublikati berilishi mumkin.

32. Dublikatni berishda sifat bo‘yicha ekspert-auditorga Agentlik tomonidan “Dublikat” belgisi qo‘yilgan attestatsiyadan o‘tganlik to‘g‘risidagi yangi guvohnoma beriladi, ushbu guvohnomada oldingi guvohnomada ko‘rsatilgan amal qilish muddati qayd etilgan bo‘lishi kerak.

33. Attestatsiyadan o‘tganlik to‘g‘risidagi guvohnoma qayta rasmiylashtirilishi va dublikati berilishi uchun attestatsiyadan o‘tish talab qilinmaydi.

34. Attestatsiya komissiyasi qarori yuzasidan qonunchilik hujjatlarida belgilangan tartibda sudga shikoyat qilinishi mumkin.

35. Ushbu Nizom talablarining buzilishida aybdor bo‘lgan shaxslar qonunchilik hujjatlariga muvofiq javob beradilar.