Oʻzbekiston Respublikasi Prezidentining 2011-yil 23-avgustdagi PQ-1602-sonli “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi adliya vazirining 2011-yil 2-martdagi 53-mh-sonli buyrugʻi (roʻyxat raqami 2202, 2011-yil 2-mart) (Oʻzbekiston Respublikasi qonun hujjatlari toʻplami, 2011-y., 9-son, 92-modda) bilan tasdiqlangan Oʻzbekiston Respublikasi Adliya vazirligining sud ekspertiza muassasalarida sud ekspertizasini oʻtkazish tartibi toʻgʻrisidagi yoʻriqnomaga ilovaga muvofiq oʻzgartirish va qoʻshimchalar kiritilsin.

2. Mazkur buyruq davlat roʻyxatidan oʻtkazilsin va Idoraviy normativ-huquqiy hujjatlarni davlat roʻyxatidan oʻtkazish boshqarmasi Idoraviy normativ-huquqiy hujjatlarning davlat reyestriga tegishli yozuv kiritsin.

3. Yuridik taʼlim va sud-ekspertiza faoliyatini muvofiqlashtirish boshqarmasi hamda Huquqiy targʻibot va axborot boshqarmasi ushbu idoraviy normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertizasi markazi bir hafta muddatda Oʻzbekiston Respublikasi Adliya vazirligi huzuridagi X. Sulaymonova nomidagi Respublika sud ekspertizasi markaziga sud ekspertizasini oʻtkazish uchun taqdim qilingan tekshirish obyektlari, ish materiallari va boshqa maʼlumotlarni shifrlash qoidalarini ishlab chiqib, Oʻzbekiston Respublikasi Adliya vazirligi bilan kelishgan holda tasdiqlasin.

5. Mazkur buyruq rasmiy eʼlon qilingan kundan eʼtiboran kuchga kiradi.

6. Mazkur buyruqning ijrosini nazorat qilish vazir oʻrinbosari A. Tashkulov zimmasiga yuklansin.

1. Muqaddima quyidagi tahrirda bayon etilsin:

“Mazkur Yoʻriqnoma Oʻzbekiston Respublikasining “Sud ekspertizasi toʻgʻrisida”gi Qonuni va Vazirlar Mahkamasining 2011-yil 5-yanvardagi 5-son qarori bilan tasdiqlangan Davlat sud-ekspertiza muassasasi yoki boshqa korxona, muassasa, tashkilot tomonidan sud ekspertizasini oʻtkazish tartibi toʻgʻrisidagi namunaviy nizomga muvofiq Oʻzbekiston Respublikasi Adliya vazirligining sud ekspertiza muassasalarida (bundan buyon matnda ekspertiza muassasasi deb yuritiladi) sud ekspertizasini oʻtkazish tartibini belgilaydi.”.

2. 2-bandning ikkinchi xatboshisi “hujjatlarning texnikaviy-kriminalistik ekspertizasi,” degan soʻzlardan keyin “sud-siyosatshunoslik-lingvistik ekspertizasi, sud-filologik ekspertizasi,” degan soʻzlar bilan toʻldirilsin.

3. 8-band “sud ekspertizasi oʻtkazish tartibini” degan soʻzlardan keyin “yoki shifrlash qoidalarini” degan soʻzlar bilan toʻldirilsin.

4. 10-bandning toʻqqizinchi xatboshisidagi “toʻliqligi va sifati” degan soʻzlar “toʻliqligi, sifati va shifrlash qoidalariga rioya etilishi” degan soʻzlar bilan almashtirilsin.

5. Quyidagi mazmundagi 17¹-bandi bilan toʻldirilsin:

“17¹. Sud ekspertlarining mustaqilligini va sud-ekspert tekshirishlarining xolisligini taʼminlash, shu jumladan korrupsiyaviy omillar kelib chiqishini hamda sud ekspertlarining manfaatdor shaxslar bilan oʻzaro aloqalar oʻrnatishini oldini olish maqsadida ayrim turdagi (imkoniyati mavjud boʻlgan) sud ekspertizalari boʻyicha tekshirish obyektlari, ish materiallari va boshqa taalluqli maʼlumotlar sud ekspertiga taqdim qilinishidan oldin ekspertiza muassasasi tomonidan tasdiqlangan shifrlash qoidalariga asosan shifrlanadi.”.

6. 18-band quyidagi mazmundagi xatboshi bilan toʻldirilsin:

“Shifrlash bilan bogʻliq boʻlgan sud ekspertiza turlari boʻyicha tekshirish obyektlari va hujjatlari shifrlash qoidalariga asosan topshiriladi.”.

7. 26-bandda:

quyidagi mazmundagi ikkinchi xatboshi bilan toʻldirilsin:

“Sud eksperti shifrlash bilan bogʻliq boʻlgan sud ekspertizasini oʻtkazishga shifrlash qoidalariga asosan shifrlash oʻtkazilgandan soʻng ekspertiza muassasasi rahbarining yozma topshiriqnomasi va shifrlangan ekspertiza materiallarini olgan vaqtdan boshlab kirishadi.”;

ikkinchi xatboshi uchinchi xatboshi deb hisoblansin.

8. 39-bandda:

quyidagi mazmundagi beshinchi xatboshi bilan toʻldirilsin:

“shifrlash bilan bogʻliq boʻlgan sud ekspertiza turlari boʻyicha ular shifrlash qoidalariga muvofiq oʻtkazilganligi koʻrsatiladi;”;

beshinchi — oʻn toʻrtinchi xatboshilar tegishincha oltinchi — oʻn beshinchi xatboshilar deb hisoblansin.

9. 2-ilovaning 2-bandidagi “xoʻjalik sudi yoki” degan soʻzlar “iqtisodiy yoki maʼmuriy sud yoxud” degan soʻzlar bilan almashtirilsin.