Oʻzbekiston Respublikasi Bank-moliya akademiyasi faoliyatini takomillashtirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Bank-moliya akademiyasining tuzilmasi 1-ilovaga muvofiq;

Oʻzbekiston Respublikasi Bank-moliya akademiyasining ustavi 2-ilovaga muvofiq tasdiqlansin.

2. Oʻzbekiston banklar uyushmasi, shuningdek uning muassislari tomonidan, ilgari Oʻzbekiston Respublikasi Tashqi iqtisodiy faoliyat milliy banki tomonidan Oʻzbekiston banklar uyushmasi ustav fondiga ulush sifatida kiritilgan, Toshkent shahri, Movarounnahr koʻchasi, 16-uy manzilida joylashgan binoni va inshootlarni (keyingi oʻrinlarda bino deb ataladi) yondosh hududi bilan Oʻzbekiston Respublikasi Bank-moliya akademiyasiga bepul berish toʻgʻrisida qaror qabul qilinganligi maʼlumot uchun qabul qilinsin.

3. Oʻzbekiston banklar uyushmasi va Oʻzbekiston Respublikasi Bank-moliya akademiyasining binoni Oʻzbekiston Respublikasi Bank-moliya akademiyasiga operativ boshqarish huquqi bilan davlat mulki sifatida bepul berish toʻgʻrisidagi taklifiga rozilik berilsin.

4. Oʻzbekiston banklar uyushmasi va Oʻzbekiston Respublikasi Bank-moliya akademiyasi bir oy muddatda ushbu qarorning 2-bandida koʻrsatilgan binoning belgilangan tartibda berilishini-qabul qilinishini taʼminlasinlar.

5. Toshkent shahri hokimligi ilgari Oʻzbekiston banklar uyushmasiga birkitilgan binoga yondosh hududdagi maydoni 0,75 gektar boʻlgan yer uchastkasidan Oʻzbekiston Respublikasi Bank-moliya akademiyasiga doimiy foydalanish huquqini belgilangan tartibda bersin.

6. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi Oʻzbekiston Respublikasi Bank-moliya akademiyasining ushbu qarorning 5-bandida koʻrsatilgan yer uchastkasiga boʻlgan huquqlarini davlat roʻyxatidan oʻtkazishni belgilangan tartibda amalga oshirsin.

7. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirish va qoʻshimchalar kiritilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Oʻzbekiston Respublikasi Bank-moliya akademiyasi (keyingi oʻrinlarda Akademiya deb ataladi) Oʻzbekiston Respublikasi Prezidentining “Oʻzbekiston Respublikasining Bank-moliya akademiyasini tashkil etish toʻgʻrisida” 1996-yil 2-maydagi PF–1460-son Farmoniga muvofiq tashkil etilgan hamda oʻz faoliyatini Oʻzbekiston Respublikasi Vazirlar Mahkamasining “Oʻzbekiston Respublikasi Bank-moliya akademiyasining faoliyatini tashkil etish masalalari toʻgʻrisida” 1996-yil 17-maydagi 180-son, “Oʻzbekiston Respublikasi Bank-moliya akademiyasi magistraturasiga qabul qilish tartibi toʻgʻrisidagi Nizomni tasdiqlash haqida” 2013-yil 16-sentabrdagi 255-son qarorlari va ushbu Ustav asosida amalga oshiradi.

2. Akademiya bank, moliya, soliq tizimlari va iqtisodiyotning real sektori tarmoqlarining boshqaruv kadrlari va mutaxassislarini tayyorlash, qayta tayyorlash va ularning malakasini oshirish, oliy malakali ilmiy va ilmiy-pedagogik kadrlar tayyorlash boʻyicha, shuningdek koʻrsatib oʻtilgan sohalarda ilmiy-tadqiqot faoliyatini amalga oshiruvchi davlat oliy taʼlim muassasasi hisoblanadi.

3. Akademiya oʻz oldida turgan vazifalarni bajarish doirasida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek ushbu Ustavga amal qiladi.

Akademiya oʻz faoliyatida Oʻzbekiston Respublikasi Vazirlar Mahkamasiga hisobot beradi va boʻysunadi.

4. Akademiya oʻz faoliyatini Oʻzbekiston Respublikasi Moliya vazirligi, Iqtisodiyot vazirligi, Markaziy banki, Davlat soliq qoʻmitasi, Oliy va oʻrta maxsus taʼlim vazirligi, Oʻzbekiston banklar uyushmasi, davlat va xoʻjalik boshqaruvi boshqa organlari, mahalliy davlat hokimiyati organlari, oliy taʼlim va ilmiy-tadqiqot muassasalari, shuningdek nodavlat notijorat tashkilotlari bilan oʻzaro hamkorlikda amalga oshiradi.

5. Akademiya yuridik shaxs hisoblanadi, mustaqil balansga, Oʻzbekiston Respublikasi Moliya vazirligining Gʻaznachiligida shaxsiy hisob raqamlariga, milliy va xorijiy valyutalardagi bank hisob raqamlariga, oʻz nomi davlat tilida koʻrsatilgan, Oʻzbekiston Respublikasining Davlat gerbi tasviri tushirilgan muhrga, muhrlarga, shtamp va boshqa atributlarga, shuningdek oʻz faoliyati uchun zarur boʻlgan boshqa rekvizitlarga egadir.

Akademiyaning toʻliq rasmiy nomi:

davlat tilida — “Oʼzbekiston Respublikasi Bank-moliya akademiyasi”;

ingliz tilida — “Banking and Finance Academy of the Republic of Uzbekistan”;

rus tilida — “Bankovsko-finansovaya akademiya Respubliki Uzbekistan”.

Akademiyaning pochta manzili (joylashgan joyi): Toshkent shahri, Movarounnahr koʻchasi, 16-uy.

6. Akademiya faoliyatning quyidagi yoʻnalishlarini amalga oshiradi:

“magistr” darajasi bergan va davlat namunasidagi diplom topshirgan holda magistraturaning ikki yillik oʻquv rejalari boʻyicha oliy taʼlim davlat taʼlim standartlariga muvofiq boshqaruv kadrlarini tayyorlash;

belgilangan namunadagi diplom bergan holda toʻrt oygacha davrga moʻljallangan va kadrlarning buyurtmachilari bilan kelishilgan taʼlim dasturlariga muvofiq bank, moliya va soliq tizimlari, shuningdek iqtisodiyotning real sektori tarmoqlari boshqaruv kadrlari va mutaxassislarini, shu jumladan yuqori lavozimlarga koʻtarish uchun zaxiradagi xodimlarni qayta tayyorlash;

belgilangan namunadagi sertifikat bergan holda bir oygacha boʻlgan davrga moʻljallangan va kadrlarning buyurtmachilari bilan kelishilgan oʻquv rejalari va dasturlari asosida manfaatdor vazirliklar, idoralar va boshqa tashkilotlarning boshqaruv kadrlari va mutaxassislari malakasini oshirish;

qonun hujjatlarida belgilangan tartibda Akademiyaga biriktirilgan mutaxassisliklar boʻyicha, oliy taʼlimdan keyingi ikki darajali tizimga muvofiq ilmiy darajali oliy malakali ilmiy va ilmiy-pedagog kadrlar tayyorlash;

Ustavdagi vazifalarni bajarish doirasida oʻquv, metodik, maʼnaviy-maʼrifiy, ilmiy-tadqiqotning barcha turlari, shuningdek axborot-tahliliy faoliyat;

bank ishi, moliya, soliq ishi va investitsiyalar sohasida boshqaruv kadrlari va mutaxassislarni tayyorlash, qayta tayyorlash va ularning malakasini oshirish sohasida xalqaro va xorijiy moliya institutlari, xalqaro va xorijiy taʼlim, ilmiy-tadqiqot tashkilotlari va dasturlar bilan hamkorlikni amalga oshirish;

tahririyat-noshirlik faoliyati.

Akademiya qonun hujjatlarida taqiqlanmagan faoliyatning boshqa turlarini ham amalga oshiradi.

7. Akademiya magistraturasiga tinglovchilarni qabul qilish Oʻzbekiston Respublikasi Vazirlar Mahkamasi tomonidan tasdiqlanadigan Oʻzbekiston Respublikasi Bank-moliya akademiyasi magistraturasiga qabul qilish tartibi toʻgʻrisidagi Nizomga muvofiq, davlat granti va pulli-kontrakt asosida bank, moliya va soliq tizimlari, shuningdek iqtisodiyotning real sektori tarmoqlarining kamida ikki yil mehnat stajiga ega boʻlgan boshqaruv kadrlari va mutaxassislari jumlasidan amalga oshiriladi.

Boshqaruv kadrlari va mutaxassislarni qayta tayyorlash va ularning malakasini oshirish Akademiya taʼminoti uchun ajratiladigan Oʻzbekiston Respublikasi respublika budjeti mablagʻlari hisobiga hamda vazirliklar, idoralar va boshqa tashkilotlar bilan tuzilgan toʻgʻridan-toʻgʻri kontraktlar asosida amalga oshiriladi.

8. Bank, moliya, soliq tizimi hamda iqtisodiyotning real sektori tarmoqlari uchun boshqaruv kadrlari va mutaxassislarni tayyorlash, qayta tayyorlash va ularning malakasini oshirishning samarali tizimini tashkil etish, oliy malakali ilmiy va ilmiy-pedagog kadrlar tayyorlash, shuningdek koʻrsatilgan sohalarda ilmiy tadqiqotlar oʻtkazish Akademiyaning asosiy maqsadlari hisoblanadi.

9. Quyidagilar Akademiyaning asosiy vazifalari hisoblanadi:

zamonaviy menejment, moliyaviy-iqtisodiy jarayonlarni strategik rejalashtirish va prognozlashtirish metodlarini egallagan, bank ishi, moliya, soliq ishi va investitsiyalar sohasida xoʻjalik yuritishning bozor sharoitlarida boshqaruv qarorlari qabul qilish nazariyasi va amaliyotiga asoslangan tegishli bilimlar va amaliy koʻnikmalarga ega boʻlgan boshqaruv kadrlari va mutaxassislarni tayyorlash, qayta tayyorlash va ularning malakasini oshirish;

tinglovchilarda davlatning iqtisodiy siyosati va uning amalga oshirilishini taʼminlash, xalqaro moliya bozorlari institutlari rivojlanishining zamonaviy tendensiyalari, davlat va korporativ moliyalarni boshqarish, xalqaro va milliy bank, soliq, investitsiya, sugʻurta va pensiya ishi va monetar fiskal va valyuta siyosati, strategik menejment va marketing, korporativ boshqaruv sohalarida tinglovchilarda mustahkam bilimlarni shakllantirish, shuningdek ularning tanlangan mutaxassislik boʻyicha boshqaruv koʻnikmalarini egallashi;

professor-oʻqituvchi kadrlar, ilmiy xodimlar va tinglovchilarning tahliliy va kreativ salohiyatini mustahkamlash, muhim ilmiy va ilmiy-innovatsion yoʻnalishlar boʻyicha ularning ilmiy-amaliy faoliyatni yuritishga boʻlgan ehtiyojlari va manfaatlarini rivojlantirish va ragʻbatlantirish, davlat hamda xalqaro ilmiy va ilmiy-tadqiqot dasturlariga muvofiq ilmiy ishlarni izchil rivojlantirish, ularning natijalarini amaliyotga joriy etish;

ilmiy tadqiqotlarning bank ishi, moliya, soliq ishi va investitsiyalar sohalarida dolzarb fundanmental, amaliy va innovatsion loyihalarga yoʻnaltirilganligini taʼminlash, ular natijalarining iqtisodiyot fani va amaliyotiga chuqur integratsiya qilinishini amalga oshirish;

bank ishi, moliya, soliq ishi va investitsiyalar sohalarida islohotlarning natijalarini, Oʻzbekiston bank-moliya tizimining xalqaro moliya bozorida egallayotgan mustahkam oʻrni va nufuzi toʻgʻrisida qiziqqan auditoriyani xabardor qilish, vazirliklar, idoralar va tashkilotlarda, aholining keng qatlamlari oʻrtasida targʻib qilish boʻyicha tushuntirish ishlarini oʻtkazishda faol ishtirok etish.

10. Akademiya oʻziga yuklangan vazifalarni bajarish maqsadida quyidagi funksiyalarni amalga oshiradi:

ilgʻor xalqaro taʼlim standartlari va talablarini, shuningdek ularni oʻqitishning zamonaviy shakllari va usullarini, amaliyotda muvaffaqiyatli sinab koʻrilgan pedagogik, axborot-kommunikatsiya va innovatsiya texnologiyalaridan foydalanishni hisobga olgan holda zamonaviy taʼlim va tadqiqot shakllari va usullarini qoʻllash vositasida oʻquv, oʻquv-metodik, maʼnaviy-maʼrifiy va ilmiy-tadqiqot jarayonlarini tashkil etadi;

taʼlim va tadqiqotlar ixtisosligi boʻyicha oʻquv jarayonini zarur oʻquv, ilmiy va qoʻshimcha adabiyotlar, mahalliy va xorijiy davriy nashrlar, oʻqitishning zamonaviy vositalari, kompyuter va oʻquv-prezentatsiya texnikasi bilan taʼminlaydi;

oʻquv va ilmiy-metodik ishlar, maslahatlashuvlar va mahorat darslari oʻtkazish uchun xorijiy mamlakatlardan yuqori malakali olimlar va mutaxassislarni kontrakt asosida jalb etadi;

oʻquv rejalariga va ilmiy tadqiqotlarning dasturlariga muvofiq bank, moliya va soliq tizimi tashkilotlarida, iqtisodiyot real sektori tarmoqlari tuzilmasida, oliy taʼlim va ilmiy-tadqiqot muassasalarida, shu jumladan Oʻzbekiston Respublikasi Oliy va oʻrta maxsus taʼlim vazirligi bilan kelishuv boʻyicha Akademiya rektori tomonidan tasdiqlangan tartibga muvofiq xorijiy mamlakatlarda amaliyot va stajirovkadan oʻtishi uchun ilmiy xodimlar va tinglovchilarni tashkil qiladi va yuboradi;

respublikaning yetakchi taʼlim va ilmiy muassasalari negizida, bank, moliya va soliq tizimlari tashkilotlarida, iqtisodiyotning real sektori tarmoqlari tuzilmasida, shu jumladan xorijiy mamlakatlarda professor-oʻqituvchilar tarkibini, ilmiy kadrlar, boshqa xodimlarni qayta tayyorlashni hamda ularning malakasini oshirishni tashkil qiladi;

real amaliyot, bajarilgan magistrlik va doktorlik dissertatsiyalarining asosiy mazmuni va xulosalarini amaliyotda qoʻllash bilan oʻzaro bogʻliq holda nazariy va ilmiy-metodik tayyorlashni integratsiyalashni amalga oshiradi;

zamonaviy shakllarni, metodlarni va axborot-kommunikatsiya texnologiyalarini qoʻllagan holda tinglovchilarning mustaqil taʼlim olishini tashkil etadi, magistrlik va doktorlik dissertatsiyalari yoki oʻrganilayotgan predmet mavzulari boʻyicha ilmiy tadqiqotlar oʻtkazish uchun zarur oʻquv, ilmiy-tadqiqot va axborot resurslarini tashkil qiladi;

davlat taʼlim standartlari talablari bajarilishini hisobga olgan holda manfaatdor vazirliklar, idoralar va boshqa tashkilotlar bilan oʻzaro aloqalarni yoʻlga qoʻyadi, taʼlimni rivojlantirish, kadrlar tayyorlashning oʻquv rejalari va dasturlari mazmunini takomillashtirish, ilmiy-tadqiqot ishlarini bajarish, tinglovchilarning amaliyot va stajirovkani oʻtashini tashkil etish, shuningdek magistrlik dissertatsiyalarini tayyorlash masalalari boʻyicha ularning takliflari va tavsiyalarini oʻrganadi;

bank ishi, moliya, soliq ishi va investitsiyalar sohasida boshqaruvning dolzarb muammolari boʻyicha kompleks ilmiy va ilmiy-innovatsiya tadqiqotlarini oʻtkazadi;

bank, moliya, soliq tizimlarida va iqtisodiyotning real sektoridagi investitsiyalar sohasida innovatsiya va axborot-kommunikatsiya texnologiyalaridan samarali foydalanish boʻyicha ilgʻor xalqaro tajribani oʻrganadi hamda takliflar ishlab chiqadi;

boshqaruv kadrlari va mutaxassislarni maʼnaviy-axloqiy tarbiyalashning samarali metodlarini ishlab chiqadi, tinglovchilarda huquqiy, siyosiy madaniyat va oʻz huquqlarini bilishni rivojlantiradi, vatanparvarlik, ijtimoiy-maʼnaviy va axloqiy sifatlarni, yuklangan vazifalar va majburiyatlarni bajarish yuzasidan masʼuliyat hissini, mamlakat taqdiri, uning mustaqilligini mustahkamlash uchun daxldorlik va masʼuliyatni shakllantiradi va rivojlantiradi;

magistratura bitiruvchilari mehnat faoliyati va kasbiy oʻsishining doimiy monitoringini amalga oshiradi, bank, moliya, soliq tizimlari va investitsiyalar sohasi boshqaruv kadrlarini tayyorlash, tanlash, tarbiyalash va ishga joylashtirish samaradorligini oshirish boʻyicha takliflar tayyorlaydi.

11. Akademiya faoliyatini boshqarish qonun hujjatlariga va ushbu Ustavga muvofiq amalga oshiriladi.

12. Akademiya faoliyatining asosiy masalalarini koʻrib chiqish uchun rektor (Kengash raisi) boshqaradigan Akademiya kengashi (keyingi oʻrinlarda Kengash deb ataladi) tashkil etiladi. Kengash tarkibi rektor tomonidan tasdiqlanadi.

Kengash oʻz faoliyatini Akademiya rektori tomonidan tasdiqlanadigan Nizomga muvofiq amalga oshiradi.

Kengash tarkibiga prorektorlar, dekanlar, ilmiy kotib, kafedralar mudirlari, alohida tarkibiy boʻlinmalar tarkiblari, yetakchi professor-oʻqituvchi kadrlar va ilmiy xodimlar, mahalliy taʼlim va ilmiy-tadqiqot muassasalarining, shuningdek yetakchi moliya va bank tashkilotlarining vakillari kiradi.

Kengashning vakolatlariga quyidagilar kiradi:

oʻquv, metodik, ilmiy-tadqiqot, axborot-tahliliy va tahririyat-noshirlik ishlarining muhim masalalarini, boshqaruv kadrlari va mutaxassislarni tayyorlash va qayta tayyorlash, shuningdek Akademiya boʻlinmalari faoliyati muhim masalalarini hal etish;

Akademiyani boshqarish tuzilmasini takomillashtirish, uning faoliyatini rivojlantirishning kompleks dasturlarini qabul qilish, yuqori malakali boshqaruv kadrlari va mutaxassislar, ilmiy va ilmiy-pedagog kadrlar tayyorlashning yangi mutaxassisliklarini ochish bilan bogʻliq boʻlgan masalalarni koʻrib chiqish va tegishli qarorlar qabul qilish;

boshqaruv kadrlari va mutaxassislarni tayyorlash, qayta tayyorlash va ularning malakasini oshirish boʻyicha oʻquv rejalari va dasturlarini belgilangan tartibda koʻrib chiqish va tasdiqlash;

Akademiyaning fakultetlari, kafedralari, oʻquv, metodik, ilmiy-tadqiqot, axborot-tahliliy va boshqa boʻlinmalarini tashkil etish va tugatish toʻgʻrisida qarorlar qabul qilish;

tarkibiy boʻlinmalar rahbarlarining hisobotlarini eshitish;

“Oʻzbekiston Respublikasi Bank-moliya akademiyasining faxriy doktori” darajasi berish toʻgʻrisida qaror qabul qilish.

13. Rektor, prorektorlar va dekanlar Akademiyaning rahbarlar tarkibi lavozimlariga kiradi.

14. Akademiya faoliyatiga umumiy rahbarlikni Akademiya rektori amalga oshiradi. Akademiya rektori boʻlmagan vaqtda uning vazifalarini Oʻquv va maʼnaviy-maʼrifiy ishlar boʻyicha birinchi prorektor vaqtincha bajaradi.

15. Akademiya rektori:

barcha davlat organlarida va boshqa tashkilotlarda Akademiya nomidan vakillik qiladi;

Kengashning tuzilmasi va nizomini, tarkibiy boʻlinmalarning, shuningdek Akademiyaning ustavidagi vazifalarning bajarilishini taʼminlash uchun tashkil etiladigan boshqa organlarning nizomlari va ish rejalarini tasdiqlaydi;

fakultetlar dekanlarini, oʻquv, metodik, ilmiy-tadqiqot, axborot-tahliliy boʻlinmalar va Akademiyaning boshqa tarkibiy boʻlinmalari rahbarlarini lavozimga tayinlaydi.

Akademiyaning tashkiliy va moliyaviy faoliyati masalalarini hal qiladi;

Akademiyaning mol-mulki va mablagʻlarini boshqarish va tasarruf etish boʻyicha belgilangan tartibda qarorlar qabul qiladi, moliyaviy, toʻlov, hisob-kitob hujjatlari va boshqa hujjatlarni imzolaydi;

Akademiyaning barcha xodimlari va tinglovchilari uchun bajarilishi majburiy boʻlgan buyruqlar va farmoyishlar chiqaradi;

Akademiya xodimlari bilan mehnat shartnomalarini tuzadi va toʻxtatadi;

qonun hujjatlariga muvofiq Akademiya xodimlarini moddiy ragʻbatlantiradi, shu jumladan har oylik ustamalar va mukofotlarni taqsimlaydi;

Akademiyaning shtat jadvallarini va taʼminoti xarajatlari smetasini tasdiqlaydi;

Akademiyaning professor-oʻqituvchi kadrlarining oʻquv yuklamasini, shuningdek oʻquv va ilmiy faoliyatining normativ-metodik hujjatlarini tasdiqlaydi;

qayta tayyorlash va malaka oshirish kurslarida oʻqish uchun toʻlov miqdorlarini, shuningdek Akademiya tomonidan koʻrsatiladigan ishlar va xizmatlarga narxlar hamda tariflarni tasdiqlaydi;

oʻzining ayrim vakolatlarini Akademiya prorektorlari oʻrtasida taqsimlaydi.

Akademiya rektori qonun hujjatlariga, shuningdek ushbu Ustavga muvofiq boshqa vakolatlarni ham amalga oshirishi mumkin.

16. Akademiya rektori xodimlarning cheklangan belgilangan soni va mehnatga haq toʻlash fondi miqdori doirasida Akademiya tuzilmasiga oʻzgartirishlar kiritish huquqiga ega.

17. Akademiyada Homiylik kengashi tashkil etiladi, uning tarkibi Oʻzbekiston Respublikasi Vazirlar Mahkamasi tomonidan tasdiqlanadi. Homiylik kengashi toʻgʻrisidagi Nizomni Homiylik kengashining oʻzi tasdiqlaydi.

18. Akademiyada taʼlim jarayoni mamlakatni modernizatsiyalash va iqtisodiyotni erkinlashtirishning ustuvor vazifalarini, ilgʻor xalqaro taʼlim standartlari va talablarini hisobga olgan holda zamonaviy pedagogika texnologiyalari va axborot-kommunikatsiya texnologiyalaridan faol foydalanish negizida, magistratura mutaxassisliklari boʻyicha davlat taʼlim standartlariga hamda malaka talablariga muvofiq ishlab chiqilgan oʻquv rejalari va dasturlari asosida tashkil etiladi.

Magistratura mutaxassisliklari boʻyicha malaka talablari Akademiya tomonidan, respublika iqtisodiyotining bank-moliya sektori uchun boshqaruv kadrlari tayyorlashning maqsadli xususiyatini hisobga olgan holda ishlab chiqiladi hamda Oʻzbekiston Respublikasi Oliy va oʻrta maxsus taʼlim vazirligi tomonidan tasdiqlanadi.

19. Davlat taʼlim standartlariga muvofiq va buyurtmachilarning ehtiyojlari hisobga olingan holda ishlab chiqilgan magistratura oʻquv rejalari Oʻzbekiston Respublikasi Oliy va oʻrta maxsus taʼlim vazirligi, shuningdek boshqa manfaatdor vazirliklar, idoralar va boshqa tashkilotlar bilan kelishgan holda Akademiya rektori tomonidan tasdiqlanadi.

20. Boshqaruv kadrlari va mutaxassislarni qayta tayyorlash va ularning malakasini oshirish boʻyicha taʼlim jarayoni davlat taʼlim talablariga va qonun hujjatlariga muvofiq belgilangan tartibda amalga oshiriladi.

21. Akademiya davlat taʼlim standartlariga, shuningdek buyurtmachilar talablariga muvofiq oʻquv rejalari va dasturlar talablaridan kelib chiqib magistraturaning tegishli mutaxassisliklari boʻyicha boshqaruv kadrlarini mustaqil tayyorlaydi.

Magistratura mutaxassisliklari, boshqaruv kadrlari va mutaxassislarni qayta tayyorlash va ularning malakasini oshirish kurslari boʻyicha oʻquv rejalari fanlarining oʻquv dasturlari Akademiya rektori tomonidan tasdiqlanadi.

22. Magistraturada boshqaruv kadrlarini tayyorlash, shuningdek qayta tayyorlash va malaka oshirish kurslarida boshqaruv kadrlari va mutaxassislarni qayta tayyorlash va ularning malakasini oshirish ishlab chiqarishdan ajralgan holda amalga oshiriladi.

23. Akademiyada magistratura mutaxassisliklari boʻyicha taʼlim dasturlarini oʻzlashtirish davlat yakuniy attestatsiyasi hamda Oʻzbekiston Respublikasi Oliy va oʻrta maxsus taʼlim vazirligi tomonidan tasdiqlangan Nizomga muvofiq bitiruvchilar tomonidan magistrlik dissertatsiyalari himoya qilinishi bilan tugallanadi.

24. Akademiya magistraturasi mutaxassisliklari boʻyicha taʼlim dasturlarini davlat tomonidan akkreditatsiya qilish Oʻzbekiston Respublikasi Vazirlar Mahkamasiga belgilagan tartibda amalga oshiriladi.

25. Ilmiy-tadqiqot va innovatsion ishlar davlat ilmiy dasturlari doirasida tanlov asosida ajratiladigan grantlar, Akademiyaning ilmiy grantlari, xoʻjalik yurituvchi subyektlar bilan shartnomalar, xalqaro va xorijiy tashkilotlarning grantlari va ular bilan tuzilgan shartnomalar asosida amalga oshiriladi.

Ilmiy-tadqiqot ishlarini bajarishdan olingan mablagʻlardan qonun hujjatlarida belgilangan tartibda foydalaniladi.

26. Akademiyada oliy malakali ilmiy va ilmiy-pedagogik kadrlarni tayyorlash qonun hujjatlarida belgilangan oliy taʼlimdan keyingi ikki darajali tizimga muvofiq amalga oshiriladi.

27. Akademiya magistraturasiga, qayta tayyorlash va malaka oshirish kurslariga qabul qilish tartibi Oʻzbekiston Respublikasi Vazirlar Mahkamasi tomonidan belgilanadi.

28. Tinglovchilar oʻquv rejasida nazarda tutilgan topshiriqlarni belgilangan muddatlarda bajarishga, Akademiyaning Ustaviga va ichki tartib-qoidalariga rioya qilishga majbur.

29. Oʻqish davrida oʻquv va ilmiy-tadqiqot faoliyatida yuqori koʻrsatkichlarga ega boʻlgan tinglovchilar Oʻzbekiston Respublikasi respublika budjeti mablagʻlari, Akademiyaning budjetdan tashqari mablagʻlari, shuningdek xalqaro va xorijiy tashkilotlar grantlari hisobiga xorijiy mamlakatlarning yetakchi taʼlim va ilmiy-tadqiqot, bank va moliya muassasalariga stajirovkaga yuboriladi.

30. Akademiyaning magistraturasi, qayta tayyorlash va malaka oshirish kurslari tinglovchilariga ularning oʻqish davrida ularning lavozimi va asosiy ish joyi boʻyicha oʻrtacha ish haqi saqlanadi. Boshqa joylardan kelgan tinglovchilarga asosiy ish joyi boʻyicha oʻqish joyiga kelishgacha va undan ketishgacha yoʻlkira (bir yilda koʻpi bilan bir marta) toʻlanadi.

31. Magistratura tinglovchilari Oʻzbekiston Respublikasi Oliy va oʻrta maxsus taʼlim vazirligi tomonidan tasdiqlangan Nizomga muvofiq akademik taʼtil olish huquqiga egadirlar.

32. Akademiyaning ichki tartib-qoidalarini buzganligi uchun tinglovchilarga hayfsan va Akademiyadan chetlatish shaklida belgilangan tartibda jazo choralari qoʻllanishi mumkin.

33. Akademiyada professor-oʻqituvchilar tarkibi, boshqaruv, ilmiy, oʻquv-yordamchi, xizmat koʻrsatuvchi va texnik xodimlar lavozimlari nazarda tutiladi.

34. Professor-oʻqituvchilar tarkibiga kafedra mudiri, professorlar, dotsentlar, katta oʻqituvchi, oʻqituvchi (assistent), oʻqituvchi-stajyor lavozimi kiradi.

35. Professor-oʻqituvchi kadrlarni Akademiyaga ishga qabul qilish Oʻzbekiston Respublikasi Vazirlar Mahkamasi tomonidan tasdiqlangan Nizomga muvofiq tanlov asosida amalga oshiriladi.

Oliy taʼlim va ilmiy-tadqiqot muassasalari, vazirliklar, idoralar va respublika boshqa tashkilotlarining yetakchi mutaxassislari oʻrindoshlik boʻyicha yoki qonun hujjatlarida belgilangan tartibda soatbay ish haqi toʻlash shartlarida oʻqituvchilik va ilmiy-tadqiqot ishlariga jalb etilishi mumkin.

Xorijiy mamlakatlarning olimlari va mutaxassislari Akademiyaga oʻquv va ilmiy-metodik ishlarni olib borish uchun shartnoma asosida, Akademiyaning budjetdan tashqari mablagʻlari hisobiga haq toʻlagan holda jalb etilishi mumkin.

36. Professor-oʻqituvchi kadrlar quyidagi huquqlarga ega:

Akademiyaning ilmiy, oʻquv, ijodiy va ishlab chiqarish faoliyati bilan bogʻliq muhim masalalari muhokamasida qatnashish;

Akademiyaning oʻquv zallari, auditoriyalari, kabinetlari, shuningdek axborot va resurs markazlari xizmatlaridan foydalanish;

tinglovchilarning oʻziga xos individual xususiyatlariga javob beradigan va oʻquv jarayonining yuqori sifatini taʼminlaydigan oʻqitish metodlari va vositalarini tanlash.

37. Professor-oʻqituvchi kadrlar quyidagilarga majbur:

oʻquv jarayonining yuqori samarali boʻlishini taʼminlash;

tinglovchilarda tashabbuskorlikni, ijodiy qobiliyatni, ilmiy izlanishga intilishni rivojlantirish;

tinglovchilarda yuksak maʼnaviyat va madaniyatni, Vatanga muhabbatni, vatanparvarlik va fuqarolik nuqtai nazarini shakllantirish;

jumladan taʼlim mazmunining yuqori saviyada boʻlishini taʼminlash maqsadida ilmiy tadqiqotlarni olib borish, ilmiy faoliyat bilan shugʻullanish;

Akademiyaning ustavi va ichki tartib-qoidalariga rioya qilish.

38. Boshqaruv, ilmiy, oʻquv-yordamchi, xizmat koʻrsatuvchi va texnik xodimlarning huquq va majburiyatlari Akademiyaning ichki tartib-qoidalarida va lavozim yoʻriqnomalarida belgilanadi.

39. Akademiya bank, moliya va soliq tizimlari tashkilotlarida, shuningdek xorijiy mamlakatlarning oliy taʼlim va ilmiy muassasalarida professor-oʻqituvchi kadrlar, ilmiy va boshqa xodimlar hamda tinglovchilarning stajirovkasini belgilangan tartibda tashkil etadi.

40. Akademiya professor-oʻqituvchilar, kadrlar, ilmiy va boshqa xodimlar hamda tinglovchilarning oʻquv-metodik va ularning xalqaro grantlarda, loyihalarda va ayirboshlash dasturlarida, xalqaro ilmiy-metodik konferensiyalarda ishtirok etishini moddiy va tashkiliy jihatdan qoʻllab-quvvatlaydi.

41. Professor-oʻqituvchi kadrlar, xodimlar va tinglovchilarning xorijiy stajirovkasi, ularning turli xalqaro taʼlim va tadqiqot dasturlarida ishtirok etishi xalqaro shartnomalar, xalqaro va xorijiy tashkilotlarning grantlari, Akademiyaning xorijiy sheriklar bilan shartnomalari asosida amalga oshiriladi.

42. Quyidagilar Akademiya faoliyatini moliyalashtirish manbalari hisoblanadi:

Akademiyaning joriy taʼminotiga, unga yuklangan vazifalar va funksiyalarni bajarish boʻyicha tadbirlarni amalga oshirishga, shuningdek Akademiyaning moddiy-texnika bazasini mustahkamlashga ajratiladigan Oʻzbekiston Respublikasi respublika budjeti mablagʻlari;

Innovatsion rivojlanish vazirligi tomonidan davlat ilmiy dasturlari doirasida oʻtkaziladigan grant tanlovlari natijalari boʻyicha ajratiladigan mablagʻlar;

magistratura tinglovchilarini pulli-kontrakt asosida tayyorlashdan, boshqaruv kadrlari va mutaxassislar malakasini shartnomalar asosida qayta tayyorlash va ularning malakasini oshirishdan tushadigan mablagʻlar;

Oʻzbekiston Respublikasi Davlat soliq qoʻmitasi soliq organlarini rivojlantirish jamgʻarmasi mablagʻlari;

vazirliklar, idoralar va boshqa tashkilotlar bilan tuzilgan toʻgʻridan-toʻgʻri kontraktlar asosida bajarilgan oʻquv, metodik va ilmiy-tadqiqot loyihalarini, axborot-tahliliy va tahririyat-noshirlik ishlarini, taʼlim xizmatlarini va xizmatlarning boshqa turlarini bajarishdan tushumlar;

mahalliy va xorijiy tashkilotlarning, loyihalar va dasturlarning xayriya ehsonlari;

qonun hujjatlarida taqiqlanmagan boshqa manbalar.

43. Akademiya quyidagi huquqlarga ega:

bank, moliya, soliq tizimi va iqtisodiyotning real sektoridagi dolzarb masalalar boʻyicha davriy ilmiy jurnal (shu jumladan elektron formatda) chiqarish;

Akademiyaga ajratilgan mablagʻlar yoki oʻzining fondlari hisobiga zarur asbob-uskunalar va boshqa moddiy resurslarni xarid qilish, ijaraga olish;

Akademiyaga tegishli boʻlgan mol-mulkka, xoʻjalik yoki boshqa faoliyat natijasida olingan intellektual mulk obyektlariga, daromadlarga, shuningdek qonun hujjatlarida nazarda tutilgan boshqa asoslarda sotib olingan mol-mulkka belgilangan tartibda egalik qilish, ulardan foydalanish va ularni tasarruf etish;

Akademiya tomonidan koʻrsatiladigan ishlarga, xizmatlarga tariflar, narxlar va baholarni qonun hujjatlariga muvofiq mustaqil ravishda belgilash.

44. Magistratura tinglovchilarini pulli-kontrakt asosida oʻqitishning qiymati, miqdori va toʻlash tartibi Oʻzbekiston Respublikasi Moliya vazirligi bilan kelishgan holda Akademiya rektori tomonidan tasdiqlanadi.

45. Akademiyaning budjetdan tashqari mablagʻlarini shakllantirish va sarflash qonun hujjatlariga muvofiq amalga oshiriladi.

46. Rahbar va professor-oʻqituvchi kadrlarning lavozim maoshlari oliy taʼlim muassasalari tegishli xodimlarining bazaviy lavozim maoshlari miqdorlarida belgilanadi.

Boshqa xodimlarga lavozim maoshlari davlat boshqaruvi organlari xodimlari uchun qonun hujjatlarida nazarda tutilgan mehnatga haq toʻlash razryadlariga muvofiq belgilanadi.

47. Akademiyada, budjet muassasalari va tashkilotlari xodimlarini moddiy ragʻbatlantirish maxsus jamgʻarmasi bilan bir qatorda, budjet va budjetdan tashqari mablagʻlar hisobiga Boshqaruv, professor-oʻqituvchilar, ilmiy, oʻquv-yordamchi, texnik va xizmat koʻrsatuvchi xodimlarni ular mehnatiga haq toʻlash fondining 50 foizigacha miqdorida moddiy ragʻbatlantirish uchun maxsus jamgʻarma (keyingi oʻrinlarda Maxsus jamgʻarma deb ataladi) tashkil etiladi.

Maxsus jamgʻarma mablagʻlari shtatdagi boshqaruv, professor-oʻqituvchilar, oʻquv-yordamchi, texnik va xizmat koʻrsatuvchi xodimlarga oʻquv, oʻquv-metodik, maʼnaviy-maʼrifiy, ilmiy-tadqiqot va tashkiliy xoʻjalik faoliyati darajasini oshirishda, uning xalqaro nufuzini mustahkamlashda erishgan yuqori muvaffaqiyatlari uchun tarif stavkasining 100 foizigacha miqdorida har oylik ustamalar belgilashga yoʻnaltiriladi.

Maxsus jamgʻarma mablagʻlarini shakllantirish va ulardan foydalanish tartibi, shuningdek Akademiya xodimlariga har oylik ustamalar belgilash mezonlari Akademiya Kengashi tomonidan tasdiqlanadigan nizomda belgilanadi.

Maxsus jamgʻarma mablagʻlari budjet muassasalari va xodimlarini moddiy ragʻbatlantirish maxsus jamgʻarmasini hisoblashda Akademiyaning mehnatga haq toʻlash jamgʻarmasiga kiritiladi.

48. Akademiya oʻz faoliyati natijalarining buxgalteriya hisobini belgilangan tartibda amalga oshiradi, moliya va statistika hisobotlarini yuritadi.

49. Akademiyani qayta tashkil etish yoki tugatish qonun hujjatlariga muvofiq amalga oshiriladi.

1. Vazirlar Mahkamasining “Oʻzbekiston Respublikasi Bank-moliya akademiyasining faoliyatini tashkil etish masalalari toʻgʻrisida” 1996-yil 17-maydagi 180-son qarorida:

a) qarorning 1-bandi va 1, 1a, 1b va 2-ilovalar oʻz kuchini yoʻqotgan deb hisoblansin;

b) 2 va 3-bandlar quyidagi tahrirda bayon qilinsin:

“2. Belgilab qoʻyilsinki, Oʻzbekiston Respublikasi Bank-moliya akademiyasi (keyingi oʻrinlarda Akademiya deb ataladi):

bank, moliya, soliq tizimlari va iqtisodiyotning real sektori tarmoqlarining boshqaruv kadrlarini tayyorlash, qayta tayyorlash va ularning malakasini oshirish, oliy malakali ilmiy va ilmiy-pedagog kadrlar tayyorlash boʻyicha, shuningdek koʻrsatib oʻtilgan sohalarda ilmiy-tadqiqot faoliyatini amalga oshiruvchi davlat oliy taʼlim muassasasi hisoblanadi;

“Magistr” darajasi bergan va davlat namunasidagi diplom berilgan holda magistraturaning ikki yillik oʻquv rejalari boʻyicha oliy taʼlim davlat taʼlim standartlariga muvofiq boshqaruv kadrlarini tayyorlashni maqsadli amalga oshiradi;

oʻz faoliyatida Oʻzbekiston Respublikasi Vazirlar Mahkamasiga boʻysunadi.

3. Belgilansinki, Akademiyada:

bank, moliya va soliq tizimlari, shuningdek iqtisodiyotning real sektori tarmoqlari boshqaruv kadrlari va mutaxassislarini qayta tayyorlash belgilangan namunadagi guvohnoma berilgan holda toʻrt oygacha boʻlgan davrga moʻljallangan taʼlim dasturlariga muvofiq amalga oshiriladi;

manfaatdor vazirliklar, idoralar va boshqa tashkilotlarning boshqaruv kadrlari va mutaxassislari malakasini oshirish belgilangan namunadagi sertifikat berilgan holda bir oygacha boʻlgan davrga moʻljallangan oʻquv rejalari va dasturlar asosida amalga oshiriladi;

qonun hujjatlarida belgilangan tartibda Akademiyaga biriktirilgan mutaxassisliklar boʻyicha oliy malakali ilmiy va ilmiy-pedagog kadrlar tayyorlanadi”;

v) 5-band oʻz kuchini yoʻqotgan deb hisoblansin;

g) 7-band quyidagi tahrirda bayon qilinsin:

“7. Quyidagilarga:

Akademiyaning rahbarlik qiluvchi va professor-oʻqituvchilar tarkibiga — oliy taʼlim muassasalari tegishli xodimlarining bazaviy lavozim maoshlari miqdorida;

akademiyaning qolgan xodimlariga — davlat boshqaruvi organlari xodimlari uchun qonun hujjatlarida nazarda tutilgan mehnatga haq toʻlash razryadlariga muvofiq lavozim maoshlari belgilansin”;

d) 8-bandda:

birinchi xatboshi quyidagi tahrirda bayon qilinsin:

“Akademiyada budjet mablagʻlari va budjetdan tashqari mablagʻlar hisobiga mehnatga haq toʻlash fondining 50 foizigacha miqdorda Boshqaruv xodimlarini, professor-oʻqituvchilarni, ilmiy, oʻquv-yordamchi, texnik va xizmat koʻrsatuvchi xodimlarni moddiy ragʻbatlantirish maxsus jamgʻarmasi (keyingi oʻrinlarda moddiy ragʻbatlantirish maxsus jamgʻarmasi deb ataladi) tashkil etilishi nazarda tutilsin”;

toʻrtinchi xatboshidagi “yuqori malakali professor-oʻqituvchilarga, ilmiy-tadqiqotchi va maʼmuriyat xodimlariga” soʻzlari “boshqaruv xodimlariga, professor-oʻqituvchilarga, ilmiy, oʻquv-yordamchi, texnik va xizmat koʻrsatuvchi xodimlarga” soʻzlari bilan almashtirilsin;

e) 9 va 10-bandlar quyidagi tahrirda bayon qilinsin:

“9. Belgilab qoʻyilsinki:

Akademiyaning magistraturasi, qayta tayyorlash va malaka oshirish kurslari tinglovchilari uchun ularning oʻqish davrida asosiy ish joyi boʻyicha lavozimi va oʻrtacha ish haqi saqlab qolinadi. Boshqa joylardan kelgan tinglovchilarga asosiy ish joyi boʻyicha oʻqish joyigacha va undan qaytib kelish joyigacha bir martalik yoʻl haqi (bir yilda bir martadan koʻp emas) toʻlanadi;

oʻqish va ilmiy-tadqiqot faoliyatida yuqori koʻrsatkichlarga ega boʻlgan tinglovchilar oʻqish davrida Oʻzbekiston Respublikasi respublika budjeti mablagʻlari va Akademiyaning budjetdan tashqari mablagʻlari hamda xalqaro va xorijiy tashkilotlar grantlari hisobiga xorijiy mamlakatlarning yetakchi taʼlim va ilmiy-tadqiqot, bank va moliya tashkilotlariga stajirovkaga yuboriladi.

10. Quyidagilar Akademiya faoliyatini moliyalashtirish manbalari etib belgilansin:

Akademiyaning joriy taʼminoti, unga yuklangan vazifalar va funksiyalarni bajarishga doir tadbirlarni amalga oshirish, shuningdek Akademiyaning moddiy-texnika bazasini mustahkamlash uchun ajratiladigan Oʻzbekiston Respublikasi respublika budjeti mablagʻlari;

davlat ilmiy-texnik dasturlari doirasida Fan va texnologiyalar agentligi tomonidan oʻtkaziladigan grant tanlovlari natijalari boʻyicha ajratiladigan mablagʻlar;

pulli-kontrakt asosida magistratura tinglovchilarini tayyorlashdan, shartnomalar asosida boshqaruv kadrlarini va mutaxassislarni qayta tayyorlash va ularning malakasini oshirishdan tushadigan mablagʻlar;

Oʻzbekiston Respublikasi Davlat soliq qoʻmitasining Soliq organlarini rivojlantirish jamgʻarmasidan ajratmalar;

vazirliklar, idoralar va boshqa tashkilotlar bilan tuzilgan shartnomalar asosida oʻquv, metodik va ilmiy-tadqiqot loyihalarini, axborot-tahlil va tahririyat-noshirlik ishlarini bajarishdan, taʼlim va xizmatlarning boshqa turlarini bajarishdan tushumlar;

mahalliy va xorijiy tashkilotlarning, loyihalar va dasturlarning xayriya ehsonlari;

qonun hujjatlarida taqiqlanmagan boshqa manbalar”.