Sanoat va eksport salohiyatini yanada kengaytirish, mavjud resurslardan to‘liqroq va samarali foydalanish hamda muhandislik-kommunikatsiya va ishlab chiqarish infratuzilmasini jadal qurish, xizmatlar va servis sohasini rivojlantirish, aholining bandligi va daromadlarini oshirish asosida Toshkent shahrining Mirzo Ulug‘bek tumanini kompleks rivojlantirishni ta’minlash maqsadida Vazirlar Mahkamasi qaror qiladi:

1. 2017 — 2019-yillarda Toshkent shahrining Mirzo Ulug‘bek tumanini kompleks rivojlantirish dasturi (keyingi o‘rinlarda Dastur deb ataladi) tasdiqlansin. Dastur quyidagilarni o‘z ichiga oladi:

oziq-ovqat va nooziq-ovqat iste’mol tovarlari, shuningdek zamonaviy qurilish materiallari ishlab chiqarish bo‘yicha ishlab chiqarish quvvatlarini yangidan qurish, modernizatsiya qilish, texnik va texnologik jihatdan yangilash bo‘yicha investitsiya loyihalarining manzilli ro‘yxati 1-ilovaga* muvofiq;

importning o‘rnini bosadigan raqobatbardoshli mahsulotlar ishlab chiqarishni tashkil etishni nazarda tutuvchi ishlab chiqarishni mahalliylashtirish loyihalari ro‘yxati 2-ilovaga* muvofiq;

xizmatlar sohasini va servis infratuzilmasini rivojlantirish bo‘yicha investitsiya loyihalari ro‘yxati 3-ilovaga* muvofiq;

me’moriy qiyofani o‘zgartirish, muhandislik-kommunikatsiya va ishlab chiqarish infratuzilmasini jadal qurish dasturining asosiy parametrlari 4-ilovaga* muvofiq;

ijtimoiy infratuzilmani yanada takomillashtirish bo‘yicha investitsiya loyihalari ro‘yxati 5-ilovaga* muvofiq.

2. Toshkent shahri hokimligi investitsiya loyihalari o‘z vaqtida va sifatli amalga oshirilishini, ishlab chiqarishning mo‘ljallangan hajmlari o‘zlashtirilishini va yangi ish o‘rinlari tashkil etilishini nazarda tutgan holda Dastur parametrlari so‘zsiz bajarilishini ta’minlasin.

4. Vazirliklar, idoralar, Toshkent shahri va Mirzo Ulug‘bek tumani hokimliklari loyihalarning tashabbuskorlari va Dastur doirasida jalb etilgan boshqa tashkilotlar bilan birgalikda bir oy muddatda Dasturga kiritilgan investitsiya loyihalari amalga oshirilishining tarmoq jadvallari tasdiqlanishini, ularda loyiha hujjatlarini ishlab chiqish va ekspertizadan o‘tkazishning, qurilish-montaj ishlarini bajarishning, zamonaviy texnologik asbob-uskunalar bilan butlash va quvvatlarni foydalanishga topshirishning aniq muddatlarini nazarda tutsinlar.

5. O‘zbekiston Respublikasi Iqtisodiyot vazirligi Moliya vazirligi, O‘zbekiston Respublikasi Investitsiyalar bo‘yicha davlat qo‘mitasi bilan birgalikda har yili O‘zbekiston Respublikasining Investitsiya dasturini shakllantirishda ushbu qarorga muvofiq amalga oshirish nazarda tutilgan investitsiya loyihalarini moliyalashtirish hajmlari va manbalarini aniqlashtirgan holda unga belgilangan tartibda kiritsin.

6. O‘zbekiston Respublikasi Moliya vazirligi O‘zbekiston Respublikasi Davlat budjeti parametrlarini shakllantirishda asoslangan hisob-kitoblar bo‘yicha Dasturni bajarish uchun zarur mablag‘larni nazarda tutsin.

7. Toshkent shahrida yer uchastkalari berish amaliyotini o‘rganish bo‘yicha komissiya shaharsozlik normalari va qoidalariga muvofiq 2017-yil 1-fevralgacha bo‘lgan muddatda Toshkent shahri va Mirzo Ulug‘bek tumani hokimliklari, O‘zbekiston Respublikasi “Davarxitektqurilish” qo‘mitasi, “Yergeodezkadastr” davlat qo‘mitasi bilan birgalikda Dasturga kiritilgan investitsiya loyihalari amalga oshirilishi uchun yer uchastkalari belgilangan tartibda ajratilishini ta’minlasin.

8. Tijorat banklariga Dasturga kiritilgan investitsiya loyihalarini moliyalashtirish, respublikada ishlab chiqarilmaydigan asbob-uskunalar va ularga butlovchi buyumlarni xarid qilish uchun belgilangan tartibda kreditlar, shu jumladan xorijiy valyutadagi kreditlar ajratish tavsiya etilsin.

9. Toshkent shahri hokimligi har chorakda:

xalq deputatlari Toshkent shahar Kengashining majlislarida Dasturda nazarda tutilgan tadbirlar o‘z vaqtida va sifatli bajarilishi bo‘yicha faoliyatning natijadorligini ko‘rib chiqsin;

O‘zbekiston Respublikasi Vazirlar Mahkamasiga Dasturning bajarilishi to‘g‘risidagi axborot taqdim etsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari U.U.Rozuqulov zimmasiga yuklansin.