Intellektual mulk obyektlarini xalqaro norma va standartlarga muvofiq huquqiy himoya qilish tizimini yanada takomillashtirish, unga xos boʻlmagan va umrini oʻtab boʻlgan vazifalarni bekor qilish, shuningdek Oʻzbekiston Respublikasining Intellektual mulk agentligi faoliyatiga zamonaviy interfaol davlat xizmatlarini joriy etish maqsadida:

1. Quyidagilar Oʻzbekiston Respublikasining Intellektual mulk agentligining asosiy vazifalari va faoliyati yoʻnalishlari etib belgilansin:

intellektual mulk sohasida yagona davlat siyosatini amalga oshirishni taʼminlash, ixtirolar, foydali modellar, sanoat namunalari, tovar belgilari hamda boshqa intellektual mulk obyektlarini huquqiy himoya qilish;

ixtirolar, sanoat namunalari, foydali modellar, tovar belgilari va boshqa intellektual mulk obyektlarini ekspertizadan oʻtkazish, roʻyxatga olish va hisobga qoʻyishni tashkillashtirish;

Davlat patent fondi va intellektual mulkning rasmiy roʻyxatga olinganligi toʻgʻrisida maʼlumotlar bazasini shakllantirish va olib borish, iqtisodiyotning real sektorining xoʻjalik yurituvchi subyektlari, ilmiy tashkilotlar, olim va mutaxassislarning maʼlumotlardan samarali foydalanishi uchun ularning saqlanishi va foydalanish qulayligini taʼminlash;

intellektual mulk sohasiga zamonaviy axborot texnologiyalarini joriy etish, tadbirkorlik subyektlari va aholiga “bir darcha” tamoyili asosida interfaol davlat xizmatlarini koʻrsatish;

milliy intellektual mulk obyektlarini chet elda huquqiy himoya qilishni taʼminlash boʻyicha korxonalar va tashkilotlarga konsultativ va amaliy koʻmak berish, shuningdek intellektual mulk sohasida xalqaro hamkorlikni kengaytirish;

intellektual mulk sohasida mutaxassislarni qayta tayyorlash va malakasini oshirish.

2. Oʻzbekiston Respublikasi Intellektual mulk agentligining ijro etuvchi apparati boshqaruv xodimlarining cheklangan soni 61 kishidan iborat yangilangan tuzilmasi 1-ilovaga* muvofiq tasdiqlansin.

3. Oʻzbekiston Respublikasi Vazirlar Mahkamasi ikki hafta muddatda Oʻzbekiston Respublikasining Intellektual mulk agentligining yangi Nizomini tasdiqlasin, unda, mazkur qarorda belgilangan uning asosiy vazifalari va faoliyati yoʻnalishlariga muvofiq Agentlikning funksiyalari tubdan oʻzgartirilishi nazarda tutilsin, shuningdek xalqaro huquqiy meʼyorlarga toʻgʻri kelmaydigan, oʻz umrini oʻtab boʻlgan va unga xos boʻlmagan funksiyalar tugatilsin, shu jumladan:

ilm-fan, adabiyot va sanʼat asarlariga boʻlgan avtorlik huquqining davlat roʻyxatidan oʻtkazilishini, bunda Butunjahon intellektual mulk tashkilotining Bern konvensiyasiga muvofiq tegishli asarning yaratilgani fakti boʻyicha avtorlik huquqining yuzaga kelishini belgilash;

Oʻzbekiston Respublikasi Adliya vazirligining vakolatlarini takrorlamaslik uchun mulkiy huquqlarni koʻpchilik asosida boshqarayotgan tashkilotlarni davlat roʻyxatidan oʻtkazish;

intellektual mulk obyektlaridan foydalanishga litsenziya shartnomalarini roʻyxatga olishning amaldagi mexanizmini takrorlamaslik uchun Oʻzbekiston Respublikasi hududida intellektual mulk obyektlaridan foydalanayotgan yuridik va jismoniy shaxslarning hisobini yuritish.

4. Oʻzbekiston Respublikasining Intellektual mulk agentligi Iqtisodiyot vazirligi, Axborot va kommunikatsiya texnologiyalarini rivojlantirish vazirligi, Adliya vazirligi, boshqa manfaatdor vazirlik va tashkilotlar bilan birgalikda bir oy muddatda mamlakatimizda intellektual mulkni himoya qilish tizimini yanada takomillashtirish, uni xalqaro standartlar va talablarga moslashtirish boʻyicha takliflarni ishlab chiqsin va Vazirlar Mahkamasiga kiritsin.

5. Oʻzbekiston Respublikasining Intellektual mulk agentligi Axborot va kommunikatsiya texnologiyalarini rivojlantirish vazirligi bilan birgalikda 2016-2017-yillarda “Intellektual mulk” axborot tizimi yaratilishini taʼminlasin, bunda quyidagilar nazarda tutilsin:

patentlarga elektron buyurtmalar berish hamda patent fondining maʼlumotlar bazasini barcha uchun foydalanishi mumkin boʻlgan koʻrinishda shakllantirish;

“bir darcha” tamoyili asosida intellektual mulk sohasidagi davlat interaktiv xizmatlarini joriy etish.

6.Oʻzbekiston Respublikasining Intellektual mulk agentligi xodimlarini attestatsiyadan oʻtkazish boʻyicha Komissiya 2-ilovaga* muvofiq tarkibda tashkil etilsin.

Komissiya (A.N. Aripov) bir oy muddatda Oʻzbekiston Respublikasining Intellektual mulk agentligi xodimlarini belgilangan tartibda attestatsiyadan oʻtkazishni hamda uni yuqori malakali tashabbuskor, intellektual mulk sohasi masalalari boʻyicha zarur bilim va amaliy tajribaga ega kadrlar bilan butlanishini taʼminlasin.

7.Oʻzbekiston Respublikasi Prezidentining “Oʻzbekiston Respublikasining Intellektual mulk agentligini tashkil etish toʻgʻrisida” 2011-yil 24-maydagi PQ-1536-sonli qarorining 2-bandi va 3-bandi birinchi xatboshisi, shuningdek 1 va 2-ilovasi oʻz kuchini yoʻqotgan deb hisoblansin.

Intellektual mulk agentligi Adliya vazirligi boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

8. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari A. Aripov zimmasiga yuklansin.