Obyektlarni xususiylashtirish va davlat tasarrufidan chiqarish masalalarini tezlikda hal etishda tender savdolari o‘tkazuvchi Davlat Komissiyasining rolini oshirish, xususiylashtirish jarayonlariga xorijiy sarmoya jalb qilinishini faollashtirish maqsadida Vazirlar Mahkamasi qaror qiladi:

1. Davlat mulkini xorijiy investorlarga sotish bo‘yicha tender savdolari o‘tkazuvchi Davlat komissiyasi to‘g‘risidagi yangi tahrirdagi Nizom tasdiqlansin.

2. Birlamchi tender hujjatlarini bevosita ishlab chiquvchi hamda potensial xorijiy investorlarning investitsiya takliflarini ekspert baholovchi idoralararo ishchi guruhlarga rahbarlik qilish va ular faoliyati uchun javobgarlik Vazirlar Mahkamasi komplekslari rahbarlari zimmasiga yuklansin.

3. Vazirlar Mahkamasining 1998-yil 17-dekabrdagi 525-son qaroriga 1-ilova o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.

1.1. Mazkur Nizom Vazirlar Mahkamasining “Davlat mulkini xususiylashtirishda xorijiy sarmoyalarni jalb qilishni rag‘batlantirish chora-tadbirlari to‘g‘risida” 1998-yil 18-noyabrdagi 477-son, “1999-2000-yillarda xususiylashtirishni chuqurlashtirish va davlat mulkini sotishdan davlat budjetiga mablag‘lar tushishini ko‘paytirish chora-tadbirlari to‘g‘risida” 1998-yil 17-dekabrdagi 525-son, “O‘zbekiston Respublikasi Vazirlar Mahkamasining 1998-yil 18-noyabrdagi 477-son va 1998-yil 17-dekabrdagi 525-son qarorlarini bajarish yuzasidan javobgarlikni kuchaytirish chora-tadbirlari to‘g‘risida” 1999-yil 20-maydagi 258-son qarorlariga muvofiq ishlab chiqilgan.

1.2. Nizom O‘zbekiston Respublikasi Vazirlar Mahkamasi tomonidan belgilab beriladigan davlat korxonalari (mulk)ni, shuningdek, davlatga tegishli aksiyalar paketlarini xorijiy investorlarga sotish bo‘yicha tender savdolari o‘tkazuvchi Davlat komissiyasining (keyingi o‘rinlarda Komissiya deb ataladi) vazifalari, huquqlari va majburiyatlarini belgilab beradi.

1.3. Komissiyaning o‘z vakolatlari doirasida qabul qilgan qarorlari davlat boshqaruv organlari hamda davlat hokimiyati va boshqaruvining mahalliy organlari, mulkchilik shakllaridan qat’i nazar, xo‘jalik yurituvchi subyektlar va ularning birlashmalari (xo‘jalik uyushmalari), mansabdor shaxslar tomonidan bajarilishi majburiydir.

1.4. Savdolar Komissiya tomonidan O‘zbekiston Respublikasi qonun hujjatlarida belgilangan tartibda o‘tkaziladi.

2.1. Quyidagilar Komissiyaning asosiy vazifalari hisoblanadi:

vakolatli davlat organlari, xususiylashtiriladigan korxonalar, yuridik shaxslar birlashmalari, hokimiyat va boshqaruv mahalliy organlari, shuningdek, jalb qilingan xorijiy ekspert kompaniyalar va vositachilarning sotishdan oldingi tayyorgarlik va tender obyektlarini xorijiy investorlarga sotish masalalari bo‘yicha birgalikdagi faoliyatini tashkil etish;

sotishdan oldingi tayyorgarlik va xususiylashtirish obyektlarini sotish uchun xorijiy texnik, moliyaviy va boshqa maslahatchilar hamda ekspertlarni jalb qilish shartlarini belgilash;

xorijiy talabgorlarning korxonalar va aksiyalarning davlat paketlarini sotib olish to‘g‘risidagi eng foydali takliflarini ekspertiza qilish va tanlab olish;

oshkoralik, baholashning xolisligi va talablarning yagonaligi asosida tender qatnashchilari uchun teng raqobat shart-sharoitlari yaratish.

3.1. Komissiya quyidagi huquqlarga ega:

o‘z ishlari tartibini mustaqil ishlab chiqish va tasdiqlash;

tender qatnashchilarini malakali tanlash va tender takliflarini baholash maqsadida aksiyalarni xorijiy investorlarga sotish bo‘yicha xalqaro tendyerlar o‘tkazish uchun idoralararo ishchi guruhlar tashkil etish;

tender hujjatlarini va tender obyektlarining sotilish bahosini, tender obyektlarini sotishga jalb qilinadigan xorijiy ekspert kompaniyalar va vositachilarni tanlash shartlari va mezonlarini tasdiqlash;

xususiylashtiriladigan obyektga (aksiyalar paketiga) talab konyunkturasiga ko‘ra hamda tegishli investitsiya majburiyatlari bo‘lgan aniq strategik investorlar mavjud bo‘lgan taqdirda O‘zbekiston Respublikasi Vazirlar Mahkamasi tomonidan belgilanadigan tartibga muvofiq tender obyektlarining boshlang‘ich narxini o‘zgartirish;

obyektlar va aksiyalarni ham erkin muomaladagi valyutada, ham milliy valyutada haq to‘lashning aralash shakllarida va xorijiy investor tomonidan erkin muomaladagi valyutada aniq investitsiya majburiyatlari qabul qilinishi sharti bilan zamonaviy texnologiya asbob-uskunalari yetkazib berish hisobiga sotish to‘g‘risida qaror qabul qilish;

tenderga tayyorgarlik ko‘rish va uni o‘tkazish uchun xorijiy texnik, moliyaviy, yuridik ekspertlar va vositachilarni, ular faoliyatiga institutsional o‘zgartirishlarni amalga oshirishga Jahon banki qarzi mablag‘laridan, shuningdek, davlat mulkini xususiylashtirishdan tushgan umumiy mablag‘lardan haq to‘lagan holda, keyinchalik xarajatlarni tender bo‘yicha obyektlar (aksiyalar)ni sotishdan olingan tushumdan qoplagan holda, tanlov asosida taklif etish;

davlat boshqaruv organlari, davlat hokimiyati va boshqaruvi mahalliy organlari, yuridik shaxslar birlashmalari va xususiylashtiriladigan korxonalardan Komissiyaga yuklangan vazifalarni ta’minlash uchun zarur axborotlarni olish;

obyektlarni xususiylashtirish bilan bog‘liq masalalarni hal etishdagi sansalorlik, to‘rachilik, muddatlarni cho‘zish hollari hamda korxonalar va aksiyalarni xorijiy investorlarga sotishni jadallashtirish bo‘yicha mustaqil qaror qabul qilish.

3.2. Komissiya:

O‘zbekiston Respublikasi Hukumatining tender obyektlarini sotishni tashkil etish bo‘yicha qarorlarini bajarishga;

Komissiya majlislarida qabul qilingan qarorlarning o‘z vaqtida bajarilishi ustidan nazoratni amalga oshirishga;

tender savdolarini o‘tkazish natijalari bo‘yicha Komissiya qarorlari bajarilishi ustidan monitoringni amalga oshirishga majburdir.

4.1. Tender savdolarini, shu jumladan, investitsiya savdolarini tashkil etish va ularni o‘tkazish O‘zbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari to‘g‘risida” 1997-yil 18-avgustdagi 404-son qaroriga 3-ilovada belgilangan tartibda amalga oshiriladi.

4.2. Komissiya majlislari uning a’zolarining kamida to‘rtdan uch qismi qatnashgan holda zaruratga qarab vaqti-vaqti bilan o‘tkazib turiladi.

Komissiya qarorlari majlisda qatnashayotgan Komissiya a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolgan hollarda Komissiya raisining ovozi hal qiluvchi ovoz hisoblanadi.

Komissiya qarorlari majlisda qatnashgan Komissiya a’zolari tomonidan imzolanadigan va Komissiya raisi yoki uning o‘rinbosari tomonidan tasdiqlanadigan bayonnoma bilan rasmiylashtiriladi. Bayonnoma imzolanayotganda Komissiya a’zolari o‘zlarining alohida fikrlarini bildirishga haqlidirlar.

4.3. Tender obyektlarini uning g‘oliblariga berish Komissiyaning tegishli qaroriga ko‘ra O‘zbekiston Respublikasi Davlat mulki qo‘mitasi tomonidan amalga oshiriladi.

4.4. Tender takliflarini ko‘rib chiqish va baholash to‘g‘risidagi axborot baholash tartibotiga rasmiy ravishda aloqasi bo‘lmagan shaxslarga bildirilmaydi.

Komissiya a’zolari ko‘rsatib o‘tilgan axborotni oshkor qilganliklari uchun qonun hujjatlarida belgilangan tartibda javob beradilar.

4.5. Komissiyaning tendyerlarni tashkil etish va ularni o‘tkazish, shuningdek, xorijiy ekspert kompaniyalarni va vositachilarni tender asosida tanlash xarajatlari hamda ularga to‘lanadigan pul mukofotlari:

institutsional o‘zgartirishlarni amalga oshirish uchun Jahon banki qarzi bo‘yicha;

davlat mulki obyektlarini davlat tasarrufidan chiqarish va xususiylashtirishdan;

tender obyektini sotishdan tushadigan mablag‘lar hisobidan to‘lanadi.

4.6. Tenderga tayyorgarlik ko‘rishga xorijiy ekspert kompaniyalar va vositachilar tender asosida taklif qilingan hollarda Komissiya Yakka tartibda xususiylashtirish byurosi bilan tuziladigan shartnomani ko‘rib chiqadi, uning asosiy mazmuni quyidagilar hisoblanadi:

texnik topshiriq;

mukofot miqdori;

tomonlarning majburiyatlari va shartnomaning amal qilishini to‘xtatish shartlari.

Shartnoma Komissiya raisi yoki uning o‘rinbosari tomonidan ma’qullangandan so‘ng kuchga kiradi.

5.1. Idoralararo ishchi guruhlar (keyingi o‘rinlarda ishchi guruhlar deb ataladi) korxonalarning qaysi tarmoqqa qarashliligiga qarab Moliya vazirligi, Adliya vazirligi, Iqtisodiyot vazirligi, Davlat mulki qo‘mitasi, Tashqi iqtisodiy aloqalar, investitsiyalar va savdo vazirligi, Vazirlar Mahkamasining mas’ul xodimlari hamda tegishli tarmoqlar va korxonalar vakillaridan iborat tarkibda tuziladi.

Ishchi guruhlarga Bosh vazir o‘rinbosarlari — Vazirlar Mahkamasining tegishli tarmoqlar komplekslari rahbarlari boshchilik qiladilar. Ishchi guruhlar a’zolarining shaxsiy tarkibi Komissiya raisi yoki uning o‘rinbosari tomonidan tasdiqlanadi. Ishchi guruhlarning ish rejasi Bosh vazir o‘rinbosari — ishchi guruh raisi tomonidan tasdiqlanadi.

5.2. Ishchi guruhning asosiy funksiyalari quyidagilar hisoblanadi:

Vazirlar Mahkamasining 1998-yil 17-noyabrdagi 477-son qaroriga 1, 2 va 3-ilovalarga muvofiq obyektlar texnik-iqtisodiy ko‘rsatgichlari, ularni rivojlantirish istiqbollari to‘g‘risidagi barcha birlamchi axborotlarni Komissiya ishchi organiga taqdim etish uchun tayyorlash;

tendyerlarni tashkil etishga jalb qilinadigan vositachilar uchun texnik topshiriqlarni tuzishda qatnashish;

xususiylashtirish obyektlarini, aksiyalar paketlarini sotuvga qo‘yish shartlari, ularni sotish qiymati, investitsiya takliflarini baholash tartibi, g‘olibni tanlash mezonlari, to‘lovlar tartibi va shartlari bo‘yicha Komissiya ishchi organiga takliflar kiritish;

potensial xorijiy investorlarni xususiylashtiriladigan korxonalar bilan tanishtirishni tashkil etish;

ekspert baholashni amalga oshirish va xorijiy investorlardan tushayotgan investitsiya takliflari bo‘yicha xulosalar tayyorlash.

5.3. Ishchi guruh raisi tasarrufidagi tarmoqlarning sotiladigan obyektlari bo‘yicha xorijiy investorlarning takliflari ko‘rib chiqilayotganda Tender komissiyasi majlislarida, shuningdek, xususiylashtirishni o‘tkazish uchun jalb qilinayotgan xorijiy texnik, moliyaviy va boshqa maslahatchilar hamda ekspertlarni tanlashda qatnashishi shart.

5.4. Ishchi guruh majlisi uning a’zolarining to‘rtdan uch qismi qatnashganda haqiqiy deb hisoblanadi.

Ishchi guruh majlislari qarorlari majlisda qatnashgan ishchi guruhining barcha a’zolari tomonidan imzolanadigan bayonnoma bilan rasmiylashtiriladi va rais tomonidan tasdiqlanadi.

Qarorlar majlisda qatnashayotgan komissiya a’zolarining oddiy ko‘pchilik ovozi bilan qabul qilinadi. Ovozlar teng bo‘lib qolgan taqdirda raisning ovozi hal qiluvchi ovoz hisoblanadi.

6.1. O‘zbekiston Respublikasi Davlat mulki qo‘mitasi Komissiyaning tender savdolarini tayyorlash va o‘tkazishni amalda tashkil qilishni amalga oshiruvchi (tushayotgan takliflarni ekspert baholash, tender hujjatlarini va Komissiya hujjatlarini rasmiylashtirish, reklama ishlari, Komissiyada ish yuritish) ishchi organi hisoblanadi.

6.2. Komissiyaning ishchi organi quyidagi huquqlarga ega:

a) Komissiyaga:

yirik xorijiy texnik, moliyaviy, yuridik ekspertlarni va vositachilarni taklif qilish hamda tender savdolarini tayyorlash va o‘tkazish jarayonida ularning qatnashish shartlari bo‘yicha;

tender savdolarini tayyorlash va o‘tkazishning moliyaviy va texnik shartlari, investitsiya takliflarini baholash tartibi, g‘olibni tanlash mezonlari, to‘lovlar tartibi va shartlari bo‘yicha takliflar kiritish;

b) davlat boshqaruvi organlari, davlat hokimiyati va boshqaruvi mahalliy organlari, yuridik shaxslar birlashmalari va xususiylashtiriladigan korxonalardan unga yuklangan vazifalarni ta’minlash uchun zarur bo‘lgan axborotlarni olish;

v) idoralararo ishchi guruhlar ishlari to‘g‘risidagi hisobotlarni so‘rab olish;

g) Komissiya bilan kelishgan holda tender savdolarini o‘tkazish va ularning yakunlari to‘g‘risida ommaviy axborot vositalarida o‘z nomidan e’lonlar chiqarish.

6.3. Komissiyaning ishchi organi quyidagilarga majbur:

Komissiya tomonidan qabul qilingan qarorlarni o‘z vaqtida va to‘liq bajarish;

har bir xususiylashtirish obyekti to‘g‘risidagi axborotlarni to‘plash, tartibga solish va ishlashni amalga oshirish;

potensial investorlarga obyektlar haqidagi umumiy majburiy axborotlar va ularning so‘rovlari bo‘yicha qo‘shimcha axborot o‘z vaqtida jo‘natilishini ta’minlash;

bevosita yoxud sotish bo‘yicha boshqa agentlar bilan birgalikda texnik topshiriq, kontrakt loyihalarini va Komissiya tasdig‘iga kiritiladigan boshqa tender hujjatlarini ishlab chiqish va rasmiylashtirish;

idoralararo guruhlarning loyihalarni ishlab chiqish va sotiladigan obyektlar bo‘yicha tushayotgan takliflarni ekspert baholash yuzasidan ishlarini muvofiqlashtirish;

tendyerlarni o‘tkazish bo‘yicha reklama-ma’rifiy ishlarni tashkil etish;

Komissiya majlislarini chaqirishning barcha tashkiliy masalalarini hal qilish;

Komissiyada aniq va to‘liq ish yuritish, Komissiya xat-xabarlarini hisobga olish va turkumlash, Komissiya va idoralararo guruhlar barcha majlislarining bayonnomalarini o‘z vaqtida va to‘liq rasmiylashtirish.

Davlat mulki qo‘mitasi aksiyalar paketlari va korxonalarni xorijiy investorlarga sotish bo‘yicha tasdiqlangan chora-tadbirlarning so‘zsiz bajarilishi, xususiylashtirishdan valyuta resurslarining qo‘shimcha to‘ldirilishi, shuningdek, Vazirlar Mahkamasining 1999-yil 20-maydagi 258-son qarori talablariga muvofiq davlat tasarrufidan chiqarishdan tushumlarni taqsimlash yuzasidan talablarga qat’iy rioya qilinishi uchun to‘liq javob beradi.