Oʻzbekiston Respublikasi Prezidentining “2016 — 2020-yillarda qishloq xoʻjaligini yanada isloh qilish va rivojlantirish chora-tadbirlari toʻgʻrisida” 2015-yil 29-dekabrdagi PQ-2460-son qaroriga muvofiq, shuningdek qishloq xoʻjaligi mahsulotlari yetishtiruvchilar bilan tayyorlov, xizmat koʻrsatish tashkilotlari oʻrtasida tuzilgan shartnomalarning soʻzsiz bajarilishi yuzasidan nazoratni yanada kuchaytirish maqsadida Vazirlar Mahkamasi qaror qiladi:

1. Vazirlar Mahkamasining 2003-yil 4-sentabrdagi 383-son qarori (Oʻzbekiston Respublikasi QT, 2003-y., 9-son, 81-modda) bilan tasdiqlangan Qishloq xoʻjaligi mahsulotlari yetishtiruvchilar bilan tayyorlov, xizmat koʻrsatish tashkilotlari oʻrtasida shartnomalar tuzish, ularni roʻyxatdan oʻtkazish, bajarish, shuningdek ularning bajarilishi monitoringini olib borish tartibi toʻgʻrisidagi nizomga ilovaga muvofiq qoʻshimcha va oʻzgartirishlar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. 28-bandga quyidagi mazmundagi beshinchi xatboshi qoʻshilsin:

“davlat ehtiyojlari uchun qishloq xoʻjaligi mahsulotlari yetishtirish uchun yetkazib berilayotgan moddiy-texnika resurslari va ajratilayotgan bank kreditlaridan maqsadli foydalanish”;

beshinchi va oltinchi xatboshilar tegishli ravishda oltinchi va yettinchi xatboshilar deb hisoblansin.

2. 67-banddagi “25” raqami “30” raqami bilan almashtirilsin.

3. 68-banddagi “25” raqami “30” raqami bilan almashtirilsin.

4. 69-banddagi “15” raqami “20” raqami bilan almashtirilsin.

5. Quyidagi mazmundagi 76¹-band qoʻshilsin:

“76¹. Xoʻjalik tomonidan davlat ehtiyojlari uchun qishloq xoʻjaligi mahsulotlari yetishtirish uchun yetkazib berilgan moddiy-texnika resurslaridan maqsadli foydalanilmagan taqdirda, xoʻjalik xizmat koʻrsatish tashkilotiga maqsadli foydalanilmagan moddiy-texnika va kredit resurslari qiymatining 25 foizi miqdorida jarima toʻlaydi.

Xoʻjalik tomonidan, jarimadan tashqari:

xizmat koʻrsatish tashkilotiga davlat ehtiyojlari uchun qishloq xoʻjaligi mahsulotlari yetishtirish uchun yetkazib berilgan maqsadli foydalanilmagan moddiy-texnika resurslarining sotib olingan narxi bilan moddiy-texnika resurslari sotib olingan kundagi birja kotirovkalarining oʻrtacha narxi oʻrtasidagi ijobiy farq;

davlat ehtiyojlari uchun gʻalla va paxta xom ashyosi yetishtirishni moliyalashtirishga ajratilgan maqsadli foydalanilmagan kredit mablagʻlari uchun Oʻzbekiston Respublikasi Markaziy bankining qayta moliyalash stavkasidan kam boʻlmagan miqdorda foizlar toʻlanadi”.

6. Quyidagi mazmundagi 80¹-band qoʻshilsin:

“80¹. Xoʻjalik tomonidan davlat ehtiyojlari uchun qishloq xoʻjaligi mahsulotlari xarid qilish boʻyicha tuzilgan kontraktatsiya shartnomalarini buzganlik uchun javobgarlik xavfi sugʻurta qilinishi mumkin”.