Radioaktiv chiqindilar o‘z vaqtida chiqarib tashlanishi va ko‘milishini ta’minlash, shuningdek radiologik tusdagi favqulodda vaziyatlar oqibatlarini tezlikda tugatish maqsadida Vazirlar Mahkamasi qaror qiladi:

1. O‘zbekiston Respublikasi Hukumatining 1-ilovaga muvofiq ayrim qarorlariga o‘zgartirish va qo‘shimchalar kiritilsin.

2. O‘zbekiston Respublikasi Sanoat xavfsizligi davlat qo‘mitasi respublika hududi bo‘yicha avtomobil transportida radioaktiv moddalar va radioaktiv chiqindilar tashilayotganligi, shuningdek radioaktiv chiqindilar ko‘milayotganligi to‘g‘risidagi axborot 2-ilovaga muvofiq sxemaga binoan Vazirlar Mahkamasiga taqdim etilishini ta’minlasin.

3. Vazirliklar va idoralar, Qoraqalpog‘iston Respublikasi Vazirlar Kengashi, viloyatlar, tumanlar va shaharlar hokimliklari bir oy muddatda o‘zlari tomonidan qabul qilingan normativ-huquqiy hujjatlarni ushbu qarorga muvofiqlashtirsinlar.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zakirov va O‘zbekiston Respublikasi ichki ishlar vaziri A.A. Axmedbayev zimmasiga yuklansin.

1. Vazirlar Mahkamasining 2011-yil 16-fevraldagi 35-son qarori (O‘zbekiston Respublikasi QT, 2011-y., 2-son, 9-modda) bilan tasdiqlangan O‘zbekiston Respublikasida xavfli yuklarni avtomobil transportida tashish qoidalarida:

a) 2-bandda:

quyidagi mazmundagi o‘n yettinchi — yigirmanchi xatboshilar qo‘shilsin:

“radioaktiv chiqindilar — keyinchalik foydalanishga mo‘ljallanmagan, tarkibida solishtirma aktivligi 74 kBk/kg dan ortiq darajali radionuklidlar mavjud bo‘lgan va Xavfli yuklar tasnifi bo‘yicha 7-darajaga tegishli bo‘lgan har qanday agregat holatidagi modda;

past aktivlikdagi radioaktiv chiqindilar — solishtirma aktivligi 10³ kBk/kg dan kam bo‘lgan va gamma-nurlanish dozasi quvvati yuzada 0,1 m masofada 0,001 m Gr/ch dan 0,3 mGr/ch gacha bo‘lgan chiqindilar;

o‘rtacha aktivlikdagi radioaktiv chiqindilar — solishtirma aktivligi 10¹ kBk/kg dan 10⁷ kBk/kg gacha bo‘lgan va gamma-nurlanish dozasi quvvati yuzada 0,1 m masofada 0,3 mGr/ch dan 10 mGr/ch gacha bo‘lgan chiqindilar;

yuqori aktivlikdagi radioaktiv chiqindilar — solishtirma aktivligi 10¹ kBk/kg dan ortiq bo‘lgan va gamma — nurlanish dozasi quvvati yuzada 0,1 m masofada 10 mGr/ch dan ortiq bo‘lgan chiqindilar”;

o‘n yettinchi — yigirma sakkizinchi xatboshilar tegishli ravishda yigirma birinchi — o‘ttiz ikkinchi xatboshilar deb hisoblansin;

b) 50-bandning birinchi xatboshida “alohida xavfli yuklarni” so‘zlaridan keyin past va o‘rtacha aktivlikdagi radioaktiv chiqindilar bundan mustasno” so‘zlari qo‘shilsin;

v) 51-bandning uchinchi xatboshi quyidagi tahrirda bayon qilinsin:

“Alohida xavfli yuklarni, past va o‘rtacha aktivlikdagi radioaktiv chiqindilar bundan mustasno, faqat ichki ishlar organlarining qurolli soqchilari hamrohligida (yuridik shaxslarning qurolli soqchilari hamrohligida) va xavfli yuklar Yo‘l harakati xavfsizligi hududiy boshqarmalari (Qoraqalpog‘iston Respublikasi Ichki ishlar vazirligining YHXB, Toshkent shahar Ishchi ishlar bosh boshqarmasi va viloyatlar ishchi ishlar boshqarmalari)ning avtomotransport vositalari hamrohligida tashishga yo‘l qo‘yiladi”;

g) 54-bandning birinchi xatboshida “Xavfli yuklarni tashishda” so‘zlaridan keyin “past va o‘rtacha aktivlikdagi radioaktiv chiqindilar bundan mustasno” so‘zlari qo‘shilsin;

d) 57-bandning ikkinchi xatboshida “xavfli yuklarni tashishga” so‘zlaridan keyin “past va o‘rtacha aktivlikdagi radioaktiv chiqindilar bundan mustasno” so‘zlari qo‘shilsin;

e) 89-bandning birinchi xatboshida “Xavfli yuklarni tashishda” so‘zlaridan keyin “past va o‘rtacha aktivlikdagi radioaktiv chiqindilar bundan mustasno” so‘zlari qo‘shilsin.