O‘zbekiston Respublikasi Prezidentining “O‘zbekiston Respublikasida pasport tizimini takomillashtirish to‘g‘risida” 1999-yil 26-fevraldagi PF-2240-son Farmoniga muvofiq Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, viloyatlar hokimliklari huzuridagi xorijiy fuqarolarga va fuqaroligi bo‘lmagan shaxslarga yashash uchun ruxsatnomalar berish hamda ularni doimiy ro‘yxatdan o‘tkazish bilan bog‘liq masalalarni ko‘rib chiqish bo‘yicha maxsus komissiyalar to‘g‘risidagi Namunaviy nizom 1-ilovaga muvofiq tasdiqlansin.

2. Qoraqalpog‘iston Respublikasi Vazirlar Kengashi raisi, viloyatlar hokimlari o‘z komissiyalari ishini Namunaviy nizom talablariga qat’iy muvofiq ravishda tashkil etsinlar.

3. O‘zbekiston Respublikasi Ichki ishlar vazirligi (Z. Almatov) xorijiy fuqarolarga va fuqaroligi bo‘lmagan shaxslarga yashash uchun ruxsatnomalar berish bo‘yicha masalalarga doir materiallarning sifatli va o‘z vaqtida rasmiylashtirilishi hamda ko‘rib chiqilishi ustidan nazoratni ta’minlasin.

4. O‘zbekiston Respublikasi Vazirlar Mahkamasining “Xorijiy fuqarolarning va fuqaroligi bo‘lmagan shaxslarning O‘zbekiston Respublikasiga kelishlari, ketishlari, bu yerda bo‘lishlari va tranzit o‘tishlari tartibi to‘g‘risida” 1996-yil 21-noyabrdagi 408-son qaroriga 2-ilovaga muvofiq o‘zgartirish va qo‘shimchalar kiritilsin.

5. Adliya vazirligi va Moliya vazirligi Ichki ishlar vazirligi, Tashqi ishlar vazirligi, Toshkent shahar hokimligi hamda boshqa manfaatdor idoralar bilan birgalikda bir hafta muddatda Vazirlar Mahkamasining 1993-yil 19-avgustdagi 423-son va 1994-yil 3-noyabrdagi 533-son qarorlariga o‘zgartirish va qo‘shimchalar bo‘yicha takliflar kiritsinlar,

6. Mazkur qarorning bajarilishini nazorat qilish O‘zbekiston Respublikasining Bosh vaziri O‘. Sultonov zimmasiga yuklansin.

1. Qoraqalpog‘iston Respublikasi Vazirlar Kengashi, viloyatlar hokimliklari huzuridagi xorijiy fuqarolarga hamda fuqaroligi bo‘lmagan shaxslarga yashash uchun ruxsatnomalar berish, shuningdek, ularni doimiy ro‘yxatdan o‘tkazish bilan bog‘liq masalalarni ko‘rib chiqish bo‘yicha maxsus komissiyalar (bundan keyin Komissiya deb ataladi) to‘g‘risidagi ushbu Namunaviy nizom O‘zbekiston Respublikasi Prezidentining “O‘zbekiston Respublikasida pasport tizimini takomillashtirish to‘g‘risida” 1999-yil 26-fevraldagi PF-2240-son Farmoniga va boshqa qonun hujjatlariga muvofiq ishlab chiqilgan.

2. Komissiya tarkibiga quyidagilar kiradi:

Qoraqalpog‘iston Respublikasi Vazirlar Kengashining raisi, Viloyatlar hokimlari — komissiya rahbarlari;

Qoraqalpog‘iston Respublikasi Ichki ishlar vaziri, Viloyatlar ichki ishlar boshqarmalari boshliqlari — komissiya rahbarlarining o‘rinbosarlari;

Davlat xavfsizlik xizmati, adliya, ijtimoiy ta’minot boshqarmalari, hududiy kommunal-foydalanish birlashmalari boshliqlari — komissiya a’zolari;

Ichki ishlar vazirligi hududiy bo‘linmalarining xorijga chiqish-kelish va fuqarolik boshqarmasi (bo‘limi) boshlig‘i — komissiya kotibi.

Komissiya tarkibiga, shuningdek, respublika “Mahalla” xayriya jamg‘armasi bo‘linmalarining rahbarlari ham kirishlari mumkin.

3. Komissiyaning vakolatlari:

taqdim etilgan materiallarni ko‘rib chiqish hamda xorijiy fuqarolarga va fuqaroligi bo‘lmagan shaxslarga yashash uchun ruxsatnomalar berish yoki berishni rad etish, shuningdek, ularni ro‘yxatdan o‘tkazish yoki o‘tkazishni rad etish to‘g‘risida qaror qabul qilish;

vakolatli davlat organlaridan yashash uchun ruxsatnoma berish va doimiy ro‘yxatdan o‘tkazish yoxud ularni rad etish to‘g‘risidagi masalani hal qilish uchun zarur bo‘lgan qo‘shimcha hujjatlarni taqdim etishni so‘rash. Vakolatli davlat organlari uch kun muddatda barcha zarur materiallarni taqdim etishga majburdirlar;

ichki ishlar organlarining tegishli xizmatlari tomonidan qabul qilingan yashash uchun ruxsatnomalar berish va doimiy ro‘yxatdan o‘tkazish to‘g‘risidagi qarorlarning o‘z vaqtida bajarilishini nazorat qilish;

Davlat organlarini xorijiy fuqarolar va fuqaroligi bo‘lmagan shaxslarning O‘zbekiston Respublikasi hududida yashashi uchun ruxsatnomalar berish hamda doimiy ro‘yxatdan o‘tkazish masalalari bo‘yicha yilning har choragida kamida bir marta tekshirish va eshitish.

Doimiy yashash uchun qoldirish va yashash uchun ruxsatnoma berish to‘g‘risidagi masalani hal etishda maxsus komissiyalar kelgan fuqarolarni uy-joy, ish va ijtimoiy kafolatlar bilan ta’minlash imkoniyatlarini hisobga oladilar.

4. Yashash uchun ruxsatnoma olish va doimiy ro‘yxatdan o‘tkazish uchun ariza beruvchi tuman (shahar) ichki ishlar bo‘linmasiga quyidagi hujjatlarni topshiradi:

belgilangan namunadagi ariza-anketadan ikki nusxa;

uyida ariza beruvchi yashamoqchi bo‘layotgan qarindoshlar yoki tanishlarning turar joy maydoni berishi to‘g‘risidagi notarial tasdiqlangan arizalari;

agar jarayon oilalarning qaytadan qo‘shilishi bilan bog‘liq bo‘lsa, nikoh to‘g‘risidagi hujjatlar hamda bolalarning tug‘ilganlik to‘g‘risidagi guvohnomalari (nusxalari olinib, asli qaytariladi).

belgilangan miqdorda davlat boji to‘langanligi to‘g‘risidagi kvitansiyalar;

qora-oq rangli tasvirdagi 35 x 45 mm hajmli ikkita fotosurat.

5. Tuman (shahar) ichki ishlar bo‘limi (boshqarmasi) hujjatlar paketini uch kun muddatda rasmiylashtiradi va o‘zining yuqori bo‘linmasiga jo‘natadi.

6. Qoraqalpog‘iston Respublikasi Ichki ishlar vazirligi, Viloyatlar ichki ishlar boshqarmalari hujjatlar paketini olgach, ikki kun muddatda tegishli vakolatli davlat organlariga so‘rovnomalar jo‘natadi, mazkur organlar ariza boruvchining ishonchliligi darajasi to‘g‘risidagi o‘z fikrini o‘n kun muddatda ma’lum qilishi kerak.

7. Qoraqalpog‘iston Respublikasi Ichki ishlar vazirligi, Viloyatlar ichki ishlar boshqarmalari vakolatli davlat organlaridan javob olgandan keyin hujjatlarning to‘liq paketini ko‘rib chiqish uchun ikki kun muddatda Komissiyaga taqdim etadi.

8. Komissiya taqdim etilgan hujjatlarni bir hafta muddatda ko‘rib chiqadi hamda 1 va 2-ilovalarga muvofiq belgilangan shakl bo‘yicha tegishli xulosa chiqaradi.

Xulosa ijobiy bo‘lganda rasmiylashtirilgan hujjatlar paketi uzil-kesil qaror qabul qilish uchun O‘zbekiston Respublikasi Ichki ishlar vazirligiga jo‘natiladi.

Xulosa salbiy bo‘lganda hujjatlar tuman (shahar) ichki ishlar bo‘limi (boshqarmasi)ga qaytariladi. U uch kun muddatda ushbu qarorni arizachiga yetkazishi va belgilangan tartibga muvofiq, ushbu faktdan kelib chiquvchi chora-tadbirlar ko‘rishi kerak.

9. O‘zbekiston Respublikasi Ichki ishlar vazirligi masalani arizachi kelib chiqqan mamlakatlarning diplomatik vakolatxonalari yoki konsullik muassasalari bilan kelishib olish zarurati bo‘lganda, bir hafta muddatda O‘zbekiston Respublikasi Tashqi ishlar vazirligiga so‘rovnoma jo‘natadi.

10. O‘zbekiston Respublikasi Ichki ishlar vazirligi taqdim etilgan barcha materiallar asosida yashash uchun ruxsatnoma berish yoki berishni rad qilish to‘g‘risida uzil-kesil qaror qabul qiladi va bir hafta muddatda hujjatlar paketini qaror bilan birga Qoraqalpog‘iston Respublikasi Ichki ishlar vazirligiga, Viloyatlar ichki ishlar boshqarmalariga va Toshkent shahar ichki ishlar bosh boshqarmasiga, keyinchalik Komissiyani xabardor qilish va tegishli tuman (shahar) ichki ishlar bo‘limi (boshqarmasiga) berish uchun jo‘natadi,

11. Qaror ijobiy bo‘lganda tuman (shahar) ichki ishlar bo‘limi (boshqarmasi) uch kun muddatda arizachiga yashash uchun ruxsatnoma beradi, uni doimiy ro‘yxatdan o‘tkazishni rasmiylashtiradi, qaror salbiy bo‘lganda — ushbu qarorni arizachiga yetkazadi va belgilangan tartibga muvofiq, mazkur faktdan kelib chiquvchi chora-tadbirlar ko‘radi.

I. 1-ilova — “Xorijiy fuqarolar va fuqaroligi bo‘lmagan shaxslarning O‘zbekiston Respublikasiga kelishlari va O‘zbekiston Respublikasidan ketishlari tartibi”da:

1. 1-band “xorijiy fuqarolar” so‘zlaridan keyin “shu jumladan, MDH qatnashchilari bo‘lgan davlatlar fuqarolari” so‘zlari bilan to‘ldirilsin.

2. 10-bandning birinchi xatboshidagi, 10-bandning birinchi xatboshiga izohdagi, 11-bandning birinchi xatboshidagi, 12-bandning birinchi xatboshidagi, 13-bandning birinchi va ikkinchi xatboshilaridagi “chet el pasportini”, “chet el pasporti” so‘zlari tegishli ravishda “milliy pasportni”, “milliy pasport” so‘zlari bilan almashtirilsin.

3. 15-bandning birinchi xatboshidagi “va fuqaroligi bo‘lmagan shaxslar” so‘zlari chiqarib tashlansin.

4. 16-bandning to‘rtinchi va beshinchi xatboshilaridagi “va fuqaroligi bo‘lmagan shaxslar” so‘zlari chiqarib tashlansin.

5. 19-bandning “e” kichik bandidagi “va fuqaroligi bo‘lmagan shaxslarning” so‘zlari chiqarib tashlansin.

II. 2-ilova — “Xorijiy fuqarolar va fuqaroligi bo‘lmagan shaxslarning O‘zbekiston Respublikasida bo‘lishlari qoidalari”da:

1. 1-band “xorijiy fuqarolar” so‘zlaridan keyin “shu jumladan, MDH qatnashchilari bo‘lgan davlatlar fuqarolari” so‘zlari bilan to‘ldirilsin,

2. 2-bandning “a” kichik bandi quyidagi tahrirda bayon qilinsin:

“O‘zbekiston Respublikasida bo‘luvchi xorijiy fuqarolarni kelish vizasining amal qilish muddatiga vaqtincha ro‘yxatdan o‘tkazish”.

3. 4-bandda:

birinchi xatboshidagi “Mazkur qoidalarida belgilangan tartibda ro‘yxatdan o‘tkazilgan” so‘zlari chiqarib tashlansin;

birinchi xatboshiga izohdagi va ikkinchi xatboshidagi “chet el pasportlari” va “Chet el pasportini” so‘zlari tegishli ravishda “milliy pasportlar” va “Milliy pasportini” so‘zlari bilan almashtirilsin.

4. 5-banddagi “o‘z vaqtida ro‘yxatdan o‘tishlari” so‘zlari “o‘z vaqtida ro‘yxatdan o‘tkazilishini ta’minlash” so‘zlari bilan almashtirilsin.

5. 7-banddagi “o‘z vaqtida ro‘yxatdan o‘tkazish” so‘zlari “o‘z vaqtida ro‘yxatdan o‘tkazilishini ta’minlash” so‘zlari bilan almashtirilsin.

6. 9-banddagi “O‘zbekiston Respublikasining huquqni muhofaza qiluvchi boshqa organlari” so‘zlari “joylardagi hokimiyat organlari va O‘zbekiston Respublikasining huquqni muhofaza qilish organlari” so‘zlari bilan almashtirilsin.

7. 10-banddagi “ro‘yxatdan o‘tkazish” so‘zlari “vaqtincha ro‘yxatdan o‘tkazish” so‘zlari bilan almashtirilsin.

8. II bo‘limning nomi va 11-band quyidagi tahrirda bayon qilinsin:

“II. O‘zbekiston Respublikasida vaqtincha bo‘luvchi xorijiy fuqarolarni ro‘yxatdan o‘tkazish

11. O‘zbekiston Respublikasida vaqtincha bo‘luvchi fuqarolar O‘zbekiston Respublikasi hududida milliy pasportlar bo‘yicha vaqtincha ro‘yxatdan o‘tish asosida yashaydilar. Milliy pasportlar belgilangan joyga kelingandan so‘ng uch sutka mobaynida vaqtincha ro‘yxatdan o‘tkazish uchun taqdim etiladi, bayram va dam olish kunlari bundan mustasno”.

9. 12-bandda:

birinchi xatboshidagi “ro‘yxatdan o‘tkazishdan” so‘zlari “vaqtincha ro‘yxatdan o‘tkazishdan” so‘zlari bilan almashtirilsin;

“b” kichik bandidan “chet el” so‘zlari chiqarib tashlansin;

“v” kichik bandidagi “18 yoshga” so‘zlari “16 yoshga” so‘zlari bilan almashtirilsin;

“g” kichik bandi quyidagi tahrirda bayon qilinsin:

“g) O‘zbekiston Respublikasiga bayram va dam olish kunlari yoki odatdagi kunlarda uch sutkagacha muddat bilan kelgan va shu kunlar mobaynida respublikadan jo‘nab ketuvchi fuqarolar”.

10. 13-band quyidagi tahrirda bayon qilinsin:

“13. Xorijiy fuqarolarni vaqtincha ro‘yxatdan o‘tkazish O‘zbekiston Respublikasi ichki ishlar organlari tomonidan amalga oshiriladi.

Mehmonxonalar, davolash muassasalari, sanatoriylar, dam olish uylarining mas’ul shaxslari tomonidan kelib joylashgan shaxslarning hisobi yuritiladi.

Ichki ishlar organi hududiy bo‘ysunishiga qarab haftasiga ikki marta Manzil-ma’lumotnoma byurosiga ketish va kelish varaqalarini yuborishga majbur. Mulkchilik shakllaridan qat’i nazar, mehmonxonalar, davolash muassasalari, sanatoriylar, dam olish uylarining mas’ul shaxslari o‘zlari joylashgan joydagi Manzil-ma’lumotnoma byurosiga hisobga olish uchun ro‘yxatdan o‘tkaziladigan, kelib joylashgan shaxslarning anketa-arizalarini bir sutka mobaynida yuborishga majbur.

Xorijiy fuqarolar O‘zbekiston Respublikasi Tashqi ishlar vazirligi tomonidan akkreditatsiya qilinadi”.

11. 14-bandda:

birinchi xatiboshidagi “ro‘yxatga olinadi” so‘zlari “akkreditatsiya qilinadi” so‘zlari bilan almashtirilsin;

“a” kichik bandi “konsullik mansabdor shaxslari” so‘zlaridan so‘ng “harbiy attashelar” so‘zlari bilan to‘ldirilsin;

“b” kichik bandidagi “O‘zbekiston Respublikasida akkreditatsiya qilingan” so‘zlari chiqarib tashlansin;

“g” kichik band chiqarib tashlansin;

oxirgi xatboshi quyidagi tahrirda bayon qilinsin:

“O‘zbekiston Respublikasi Tashqi ishlar vazirligi, uning vakolatxonalari ko‘rsatib o‘tilgan shaxslarga akkreditatsiya kartochkalari beradilar va akkreditatsiya qilinganligi to‘g‘risida bevosita ularning milliy pasportlariga yozib qo‘yadilar”.

12. 15-bandda:

birinchi xatboshidagi birinchi gap quyidagi tahrirda bayon qilinsin: “Mazkur (Qoidalarning 12, 14, 16-bandlarida ko‘rsatib o‘tilmagan xorijiy fuqarolar O‘zbekiston Respublikasi Ichki ishlar organlarida ro‘yxatdan o‘tkazilishi kerak”. Ikkinchi gapdagi “chet el pasportlari” so‘zlari “milliy pasportlar” so‘zlari bilan almashtirilsin.

birinchi va ikkinchi xatboshilaridagi “ro‘yxatdan o‘tkazish” so‘zlari “vaqtincha ro‘yxatdan o‘tkazish” so‘zlari bilan almashtirilsin.

13. 16-bandda:

birinchi xatboshi quyidagi tahrirda bayon qilinsin:

“Mehmonxonalarda quyidagilar hisobga olinadi:”;

“a” kichik bandining ikkinchi xatboshi quyidagi tahrirda bayon qilinsin:

“Xorijiy fuqarolar davolanishga yoki dam olishga bevosita davolash muassasalariga, sanatoriylarga yoki dam olish uylariga kelgan hollarda ularning hisobi, mulkchilik shakllaridan qat’i nazar, davolash muassasalari, sanatoriylar va dam olish uylarining mas’ul shaxslari tomonidan olib boriladi”.

14. 17-banddagi “ro‘yxatdan o‘tkaziladi” so‘zlari “hisobga olinadi va vaqtincha ro‘yxatdan o‘tkazishga tenglashtiriladi” so‘zlari bilan almashtirilsin.

15. 18-band quyidagi tahrirda bayon qilinsin:

“18. Agar fuqarolar O‘zbekiston Respublikasiga kelgan, ya’ni nazorat-o‘tkazish punkti tomonidan qo‘yilgan sanadan uch kun o‘tgandan keyin (bayram va dam olish kunlari bundan mustasno) ichki ishlar organlarida vaqtincha ro‘yxatdan o‘tmasdan respublika hududida bo‘lganlarida hujjatlarni rasmiylashtirish va mehmonxonalarga joylashtirish taqiqlanadi”.

16. 21-band chiqarib tashlansin.

17. 24-bandda:

birinchi xatboshidagi “ro‘yxatdan o‘tkazilmagan”, “ro‘yxatdan o‘tkazilishi kerak” so‘zlari tegishli ravishda “akkreditatsiya qilinmagan”, “hisobga olinishi kerak” so‘zlari bilan almashtirilsin;

ikkinchi xatboshi quyidagi tahrirda bayon qilinsin:

“Milliy pasport yoki akkreditatsiya kartochkasi asosida mehmonxonada yashayotgan O‘zbekiston Respublikasida belgilangan tartibda akkreditatsiya qilingan diplomatik korpus a’zolari pasportlarga va akkreditatsiya kartochkalariga biron-bir belgi qo‘yilmasdan mehmonxonalarning hisobga olish daftarlarida va kartochkalarida hisobga olinishi kerak”.

18. 25-banddagi “fuqarolarning chet el pasportlarini ro‘yxatdan o‘tkazish to‘g‘risidagi” so‘zlari “fuqarolarni hisobga olish yuzasidan” so‘zlari bilan almashtirilsin.

19. 26-banddagi “chet el pasportlari ro‘yxatga olinganligining amalda bo‘lishini” so‘zlari “akkreditatsiyasi yoki ularni vaqtincha ro‘yxatdan o‘tkazish muddatini” so‘zlari bilan almashtirilsin.

20. 29-band quyidagi tahrirda bayon qilinsin:

“29. Xorijiy fuqarolarga O‘zbekiston Respublikasida doimiy yashash uchun ruxsatnoma qonun hujjatlarida belgilangan tartibda ularning bergan ariza-anketalari asosida O‘zbekiston Respublikasi Ichki ishlar vazirligi tomonidan beriladi”.

21. 31-banddagi “ro‘yxatga olinadilar” so‘zlari “ro‘yxatdan o‘tkaziladilar (vaqtincha ro‘yxatdan o‘tkaziladilar)” so‘zlari bilan almashtirilsin.

22. 32-bandning ikkinchi xatboshi quyidagi tahrirda bayon qilinsin:

“Xorijiy fuqarolar mo‘ljallangan joyga kelganlaridan so‘ng ichki ishlar organlarida vaqtincha ro‘yxatdan o‘tishlari yoki mehmonxonalarda hisobga turishlari kerak”.

III. 3-ilova — “Xorijiy fuqarolarning va fuqaroligi bo‘lmagan shaxslarning O‘zbekiston Respublikasi hududi orqali tranzit o‘tishlari qoidalari”da:

1-bandga ikkinchi izoh matni chiqarib tashlansin;

10-banddagi “ro‘yxatdan o‘tishga” so‘zlari “mehmonxonada hisobga turishga yoki vaqtincha ro‘yxatdan o‘tishga” so‘zlari bilan almashtirilsin.