O‘zbekiston Respublikasining “O‘zbekiston Respublikasining Markaziy banki to‘g‘risida”gi va 2015-yil 20-avgustdagi O‘RQ-391-son “O‘zbekiston Respublikasining ayrim qonun hujjatlariga xususiy mulkni, tadbirkorlik subyektlarini ishonchli himoya qilishni yanada kuchaytirishga, ularni jadal rivojlantirish yo‘lidagi to‘siqlarni bartaraf etishga qaratilgan o‘zgartish va qo‘shimchalar kiritish to‘g‘risida”gi qonunlariga muvofiq O‘zbekiston Respublikasi Markaziy banki Boshqaruvi qaror qiladi:

1. O‘zbekiston Respublikasi Markaziy banki Boshqaruvining 2009-yil 16-martdagi 7/2-son qarori (ro‘yxat raqami 1948, 2009-yil 27-aprel) (O‘zbekiston Respublikasi qonun hujjatlari to‘plami, 2009-y., 18-son, 229-modda) bilan tasdiqlangan O‘zbekiston Respublikasi banklarida ochiladigan bank hisobvaraqlari to‘g‘risidagi yo‘riqnomaga ilovaga muvofiq o‘zgartirish va qo‘shimchalar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. Muqaddima quyidagi tahrirda bayon etilsin:

“Ushbu Yo‘riqnoma O‘zbekiston Respublikasining Fuqarolik kodeksi, “O‘zbekiston Respublikasining Markaziy banki to‘g‘risida”gi, “Banklar va bank faoliyati to‘g‘risida”gi, “Valyutani tartibga solish to‘g‘risida”gi va “Elektron hujjat aylanishi to‘g‘risida”gi qonunlariga, O‘zbekiston Respublikasi Vazirlar Mahkamasining 2003-yil 20-avgustdagi 357-sonli “Tadbirkorlik faoliyatini tashkil etish uchun ro‘yxatdan o‘tkazish tartibotlari tizimini tubdan takomillashtirish to‘g‘risida”gi qaroriga muvofiq, banklar tomonidan milliy va chet el valyutasida bank hisobvaraqlarini ochish, ularni qayta rasmiylashtirish hamda yopish tartibini belgilaydi.”.

2. 5-band va 28-bandning “g” kichik bandi o‘z kuchini yo‘qotgan deb topilsin.

3. 8-bandning uchinchi hatboshisidan “, qonun hujjatlarida nazarda tutilgan hollar bundan mustasno” degan so‘zlar chiqarib tashlansin.

4. 13-band quyidagi mazmundagi “d” kichik band bilan to‘ldirilsin:

“d) davlat soliq xizmati organlarida hisobga qo‘yilganligini tasdiqlovchi hujjat (ma’lumotnoma).”.

5. 18-bandning uchinchi xatboshisidagi “(ro‘yxat raqami 2205, 2011-yil 4-mart) (O‘zbekiston Respublikasi qonun hujjatlari to‘plami, 2011-y., 9-son, 97-modda)” degan so‘zlar “(ro‘yxat raqami 2711, 2015-yil 26-avgust)” degan so‘zlar bilan almashtirilsin.

6. 35-banddagi “imzolanib, muhr qo‘yiladi” degan so‘zlar “imzolanadi va muhrlanadi (muhr mavjud bo‘lgan taqdirda)” degan so‘zlar bilan almashtirilsin.

7. 36-band quyidagi mazmundagi xatboshi bilan to‘ldirilsin:

“Mazkur band talablari bank mijozida muhr mavjud bo‘lgan taqdirdagina qo‘llaniladi.”.

8. 3-ilovada:

nomi “*” belgisi bilan to‘ldirilsin;

‎‎old tomoni quyidagi mazmundagi izoh bilan to‘ldirilsin:

“*Ushbu varaqchaning muhr iziga tegishli o‘rinlari bank mijozida muhr mavjud bo‘lgan taqdirdagina to‘ldiriladi.”.