Xorijiy fuqarolar, shu jumladan MDH qatnashchilari boʻlgan davlatlar fuqarolari, fuqaroligi boʻlmagan shaxslar tomonidan uy-joy sotib olinishi, shuningdek fuqarolarning doimiy yashash uchun Toshkent shahriga kelishi jarayonlarini tartibga solish maqsadida Vazirlar Mahkamasi qaror qiladi:

1. Belgilab qoʻyilsinki:

uy-joyni oluvchi tomon xorijiy fuqarolar, shu jumladan MDH qatnashchilari boʻlgan davlatlar fuqarolari yoki fuqaroligi boʻlmagan shaxslar hisoblanganda Oʻzbekiston Respublikasi hududida joylashgan uy-joyni sotib olish, ayirboshlash yoki garovga qoʻyish bitishuvlarini notarial tasdiqlash va keyinchalik ularni texnik roʻyxatdan oʻtkazish byurosi organlarida davlat roʻyxatidan oʻtkazish amaldagi qonun hujjatlarida nazarda tutilgan hujjatlar bilan bir qatorda Oʻzbekiston Respublikasi ichki ishlar organlari tomonidan belgilangan tartibda berilgan yashash uchun ruxsatnoma taqdim etilgan taqdirda amalga oshiriladi;

uy-joyning egasi hisoblangan, yashash joyida boʻlmagan xorijiy fuqarolar, shu jumladan MDH qatnashchilari boʻlgan davlatlar fuqarolari va fuqaroligi boʻlmagan shaxslar tomonidan kommunal xizmatlar va uy-joydan foydalanish xarajatlari uchun uzoq vaqt (12 oydan ortiq) haq toʻlanmagan taqdirda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining taqdimnomasiga koʻra kommunal xizmatlar va uy-joydan foydalanish xarajatlariga haq toʻlash yuzasidan qarzlarni undirish masalasini hal qilish uchun uy-joy belgilangan tartibda xatlab qoʻyiladi;

uy-joyni hadya qiluvchining yaqin qarindoshi boʻlmagan hamda Oʻzbekiston Respublikasida yashash uchun ruxsatnomaga ega boʻlmagan xorijiy fuqarolarga, shu jumladan MDH qatnashchilari boʻlgan davlatlar fuqarolariga va fuqaroligi boʻlmagan shaxslarga uy-joyni hadya qilish shartnomalarini davlat roʻyxatidan oʻtkazganlik uchun uy-joyning texnik roʻyxatdan oʻtkazish byurosi organlari tomonidan aniqlangan roʻyxatdan oʻtkazish qiymatining 100 foizi miqdorida yigʻim undiriladi.

2. Belgilansinki:

xorijiy fuqarolarni, shu jumladan MDH qatnashchilari boʻlgan davlatlar fuqarolarini, fuqaroligi boʻlmagan shaxslarni va respublikaning boshqa mintaqalaridan kelayotgan Oʻzbekiston Respublikasi fuqarolarini Toshkent shahrida doimiy roʻyxatdan oʻtkazish Roʻyxatdan oʻtkazish masalalari boʻyicha maxsus komissiyaning asoslangan xulosasi asosida amalga oshiriladi;

Oʻzbekiston Respublikasining boshqa mintaqalari aholisi uy-joy sotib olayotgan tomon hisoblangan taqdirda uy-joyni sotib olish, ayirboshlash, hadya qilish yoki garovga qoʻyish bitishuvlarini notarial tasdiqlash va keyinchalik ularni “Yergeodezkadastr” davlat qoʻmitasi organlarida davlat roʻyxatidan oʻtkazish faqat Maxsus komissiyaning Toshkent shahrida roʻyxatdan oʻtishga ruxsat berish toʻgʻrisidagi qarori taqdim etilgan taqdirda amalga oshiriladi;

hadya qilish shartnomalarini davlat roʻyxatidan oʻtkazganlik uchun yigʻimlar hamda xorijiy fuqarolarni, shu jumladan MDH qatnashchilari boʻlgan davlatlar fuqarolarini, fuqaroligi boʻlmagan shaxslarni, shuningdek boshqa mintaqalardan kelayotgan Oʻzbekiston Respublikasi fuqarolarini doimiy roʻyxatdan oʻtkazganlik uchun toʻlov sifatida tushayotgan mablagʻlar Toshkent shahar hokimligi ixtiyorida qoladi hamda uy-joy-kommunal xoʻjaligini, infratuzilmaning boshqa obyektlarini, kommunikatsiyalarni mustahkamlashga va jamoat tartibini saqlashga sarflanadi.

3. Toshkent shahar hokimligi bir hafta muddatda:

mavjud infratuzilmani va jamoat tartibini saqlashni taʼminlash imkoniyatlarini hisobga olgan holda doimiy yashash uchun kelish jarayonlarini tartibga solish uchun Toshkent shahrida roʻyxatdan oʻtkazish masalalari boʻyicha maxsus komissiya tashkil etsin;

xorijiy fuqarolarni, shu jumladan MDH qatnashchilari boʻlgan davlatlar fuqarolarini va fuqaroligi boʻlmagan shaxslarni Toshkent shahrida doimiy roʻyxatdan oʻtkazganlik uchun toʻlov stavkalarini tasdiqlasin.

4. Mazkur qarorning amal qilishi:

xorijiy fuqarolar — diplomatik korpus xodimlariga;

xorijiy fuqarolar — Oʻzbekiston Respublikasida roʻyxatdan oʻtkazilgan xalqaro tashkilotlar, xorijiy firmalar, kompaniyalar va banklarning doimiy vakolatxonalari xodimlariga;

ilgari Toshkent shahrida yashagan oʻqishni tugatib qaytgan, uzoq muddatli xizmat safarida boʻlgan, shuningdek ozodlikdan mahrum qilish joylaridan ozod qilingan shaxslarga tatbiq etilmaydi.

5. Oʻzbekiston Respublikasi Adliya vazirligi, Ichki ishlar vazirligi va Kommunal xizmat koʻrsatish vazirligi bir hafta muddatda idoraviy meʼyoriy hujjatlarni mazkur qarorga muvofiqlashtirsinlar.

6. Toshkent shahar hokimligi Oʻzbekiston Respublikasi Adliya vazirligi bilan birgalikda bir oy muddatda Toshkent shahri maqomi toʻgʻrisidagi Nizomni ishlab chiqsin va koʻrib chiqish uchun Oʻzbekiston Respublikasi Vazirlar Mahkamasiga kiritsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov va Toshkent shahri hokimi K.N. Toʻlaganov zimmasiga yuklansin.