Oʻzbekiston Respublikasi Prezidentining “2012 — 2016-yillarda qishloq xoʻjaligi ishlab chiqarishini yanada modernizatsiya qilish, texnik va texnologik jihatdan qayta jihozlash dasturi toʻgʻrisida” 2012-yil 21-maydagi PQ-1758-son qarorini bajarish yuzasidan, qishloqda sanoat ishlab chiqarishi va qurilishni yanada jadal rivojlantirish, eng yangi texnologiyalar va zamonaviy texnika bilan jihozlangan meva-sabzavot va chorvachilik mahsulotlarini qayta ishlash boʻyicha ixcham korxonalarni tashkil etish, yetakchi xorijiy kompaniyalar tomonidan ishlab chiqariladigan ilgʻor, yuqori samarali mini-texnologiyalar va asbob-uskunalar bilan tanishish uchun fermer xoʻjaliklari, agrofirmalar, kichik biznes va xususiy tadbirkorlik subyektlariga qulay shart-sharoitlar yaratish, shuningdek ularni sotib olishda ularga koʻmaklashish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Savdo-sanoat palatasi, Oʻzbekiston Fermerlari kengashining hamda Oʻzbekiston Respublikasi Prezidentining 2012-yil 21-maydagi PQ-1758-son qarori bilan tashkil etilgan 2012 — 2016-yillarda qishloq xoʻjaligi ishlab chiqarishini yanada modernizatsiya qilish, texnik va texnologik jihatdan qayta jihozlash dasturi bajarilishini taʼminlash boʻyicha ishlarni muvofiqlashtirish va masalalarni tezkor hal etish Idoralararo komissiyasining (keyingi oʻrinlarda Idoralararo komissiya deb ataladi) 2015-yil 27 — 30-mayda Toshkent shahrida “Oʻzekspomarkaz” Milliy koʻrgazmalar kompaniyasi” aksiyadorlik jamiyatining koʻrgazma maydonlari bazasida:

Respublika agrosanoat kompleksi uchun mini-texnologiyalar va ixcham asbob-uskunalarning “Uzbekistan Agrominitech Expo-2015” (keyingi oʻrinlarda “Uzbekistan Agrominitech Expo-2015” deb ataladi) X Xalqaro ixtisoslashtirilgan koʻrgazma-savdosini;

qishloq xoʻjaligi texnikasi, mashinalari va asbob-uskunalarining “Uzbekistan Agrotechmash Expo-2015” (keyingi oʻrinlarda “Uzbekistan Agrotechmash Expo-2015” deb ataladi) IV Xalqaro ixtisoslashtirilgan koʻrgazmasini birgalikda oʻtkazish toʻgʻrisidagi taklifiga rozilik berilsin.

2. Belgilab qoʻyilsinki, “Oʻzekspomarkaz” Milliy koʻrgazmalar kompaniyasi” aksiyadorlik jamiyatining koʻrgazmalar maydonlari koʻrgazmalar ishtirokchilariga bepul beriladi, koʻrgazma stendlarini qurish va qoʻshimcha koʻrgazma uskunalarini taqdim etish va xizmatlar koʻrsatish esa belgilangan normativlarga muvofiq amalga oshiriladi.

3. Quyidagilar:

koʻrgazmalarni oʻtkazishning mavzuli rejalari 1 va 2-ilovalarga* muvofiq;

koʻrgazmalar doirasida 2015-yil 27 — 30-may davrida Oʻzbekiston Respublikasi Tashqi iqtisodiy aloqalar, investitsiyalar va savdo vazirligi hamda Savdo-sanoat palatasi koʻmagida, fermer xoʻjaliklari, agrofirmalar, kichik biznes va xususiy tadbirkorlik subyektlari uchun mahalliy va xorijiy kompaniyalar vakillari taqdimotlarini tashkil etgan holda, “Oʻzekspomarkaz” Milliy koʻrgazmalar kompaniyasi” aksiyadorlik jamiyati kinolektoriysida har kungi mavzuli seminarlarni oʻtkazishning namunaviy ssenariysi 3-ilovaga* muvofiq;

Qoraqalpogʻiston Respublikasi Vazirlar Kengashi, respublika viloyatlari, shaharlari va tumanlari hokimliklari rahbarlarining, respublikaning barcha mintaqalaridagi fermer xoʻjaliklari, agrofirmalar, kichik biznes va xususiy tadbirkorlik subyektlari vakillarining koʻrgazmalarga kelish jadvali, shuningdek mintaqalardan koʻrgazma ishtirokchilarining Toshkent shahrida boʻlishi boʻyicha birkitilgan masʼul shaxslar roʻyxati 4-ilovaga* muvofiq tasdiqlansin.

4. Oʻzbekiston Respublikasi Prezidentining “Qishloq xoʻjaligi uchun mini-texnologiyalar va ixcham uskunalarning xalqaro ixtisoslashtirilgan koʻrgazma-savdosini oʻtkazishni tashkil qilish chora-tadbirlari toʻgʻrisida” 2006-yil 24-avgustdagi PQ-449-son qarori bilan tashkil etilgan Respublika agrosanoat kompleksi uchun mini-texnologiyalar va ixcham asbob-uskunalarning Xalqaro ixtisoslashtirilgan koʻrgazma-savdosini tashkil etish va oʻtkazish boʻyicha Tashkiliy qoʻmita Idoralararo komissiya, Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Tashqi ishlar vazirligi, Savdo-sanoat palatasi bilan birgalikda qishloq xoʻjaligi mahsulotlarini yetishtirish va qayta ishlash uchun mini-texnologiyalar hamda ixcham asbob-uskunalar, shuningdek qishloq xoʻjaligi texnikasi, mashinalari va asbob-uskunalarining yetakchi jahon va mahalliy ishlab chiqaruvchilarini koʻrgazmalarda qatnashishga jalb etish boʻyicha faol reklama-axborot va tashkiliy ishlarni amalga oshirsin.

5. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi koʻrgazmalar ishtirokchilari oʻrtasida shartnoma asosida tarqatish maqsadida Oʻzbekistonda va xorijda ishlab chiqarilayotgan qishloq xoʻjaligi uchun mini-texnologiyalar va ixcham asbob-uskunalarning mufassal katalogini nashr etsin.

6. Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari Oʻzbekiston Respublikasi Savdo-sanoat palatasi hamda Oʻzbekiston Fermerlari kengashi bilan birgalikda:

fermer xoʻjaliklari, agrofirmalar, kichik biznes va xususiy tadbirkorlik subyektlari tomonidan koʻplab talab qilinadigan mini-texnologiyalar va ixcham asbob-uskunalar turlari boʻyicha takliflarni Oʻzbekiston Respublikasi Tashqi iqtisodiy aloqalar, investitsiyalar va savdo vazirligiga bir hafta muddatda taqdim etsinlar;

fermer xoʻjaliklari, agrofirmalar, kichik biznes va xususiy tadbirkorlik subyektlari vakillarining, shuningdek respublika mintaqalarini ijtimoiy-iqtisodiy rivojlantirish dasturiga kiritilgan loyihalar tashabbuskorlarining qatnashishini taʼminlasinlar va kontraktlarni imzolashida koʻmaklashsinlar.

7. Maʼlumot uchun qabul qilinsinki, Oʻzbekiston Respublikasi Prezidentining “Qishloq xoʻjaligi uchun mini-texnologiyalar va ixcham uskunalarning xalqaro ixtisoslashtirilgan koʻrgazma-savdosini oʻtkazishni tashkil qilish chora-tadbirlari toʻgʻrisida” 2006-yil 24-avgustdagi PQ-449-son qarorining 7-bandida nazarda tutilgan imtiyozlar “Uzbekistan Agrominitech Expo-2015” koʻrgazmasida ishtirok etish doirasida, shuningdek koʻrgazma-savdo davomida tuzilgan kontraktlarni bajarish yuzasidan qishloq xoʻjaligi uchun mini-texnologiyalar va ixcham asbob-uskunalarni chetdan keltiruvchi tashkilotlarga tatbiq etiladi.

8. Oʻzbekiston Respublikasi xoʻjalik yurituvchi subyektlariga “Uzbekistan Agrotechmash Expo-2015” koʻrgazmasida tuzilgan kontraktlar boʻyicha qishloq xoʻjaligi texnikasi, mashinalari va asbob-uskunalarini tender savdolari oʻtkazmasdan sotib olishga istisno tartibida ruxsat etilsin.

9. Idoralararo komissiya Oʻzbekiston Respublikasi Tashqi iqtisodiy aloqalar, investitsiyalar va savdo vazirligi hamda Qishloq va suv xoʻjaligi vazirligi bilan birgalikda “Uzbekistan Agrotechmash Expo-2015” koʻrgazmasi natijalariga koʻra 2015-yil 30-iyungacha boʻlgan muddatda Oʻzbekiston Respublikasi Vazirlar Mahkamasiga ishlab chiqarish va qishloq xoʻjaligiga yetkazib berish uchun jahondagi eng yaxshi ishlab chiqaruvchilardan texnikaning xalqaro talablar va standartlarga javob beradigan zamonaviy va yuqori unumli turlarini tanlab olish yuzasidan takliflar kiritsin.

10. Oʻzbekiston Respublikasi Tashqi ishlar vazirligi Oʻzbekiston Respublikasi Tashqi iqtisodiy aloqalar, investitsiyalar va savdo vazirligi buyurtmanomalariga binoan, koʻrgazmalarning xorijiy ishtirokchilariga kirish vizalarining konsullik yigʻimlari va boshqa yigʻimlar undirilmasdan rasmiylashtirilishini taʼminlasin.

11. Oʻzbekiston Respublikasi Ichki ishlar vazirligi koʻrgazmalar oʻtkaziladigan, shuningdek ularning ishtirokchilari yashaydigan joylarda jamoat tartibi va yongʻin xavfsizligining toʻlov undirilmasdan qoʻriqlanishini taʼminlasin.

12. “Oʻzbekiston havo yoʻllari” milliy aviakompaniyasi:

koʻrgazmalar ishtirokchilarini “Toshkent” aeroportida kutib olish va kuzatib qoʻyishlarni tashkil etish shtabi ishlari muvofiqlashtirilishini, bunda shtabning zarur miqdorda tashkiliy-texnika va aloqa vositalari bilan jihozlanishini, shuningdek “Toshkent” aeroportida ishtirokchilarga transport xizmati koʻrsatilishi nazarda tutilishini;

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi buyurtmanomalariga binoan, koʻrgazmaga yuborilayotgan koʻrgazma yuklarining imtiyozli yuk tariflari boʻyicha tashilishini, belgilangan yuk tariflaridan 30 foizli chegirma berilishini, yuklarning “Toshkent” aeroportida ishlanishi va saqlanishi uchun yigʻimlar toʻlovidan ozod qilinishini;

Oʻzbekiston Respublikasi Tashqi iqtisodiy aloqalar, investitsiyalar va savdo vazirligining buyurtmanomalariga binoan “Uzbekistan Agrominitech Expo-2015” va “Uzbekistan Agrotechmash Expo-2015” koʻrgazmalari ishtirokchilari uchun aviachiptalarning band qilinishi va sotilishini;

koʻrgazmalar ishtirokchilarining “Toshkent” aeroportining SIP zali orqali kutib olinishini va roʻyxatdan oʻtkazish alohida yoʻlagi boʻyicha umumiy zal orqali kuzatib qoʻyilishini hamda tartibotlarning toʻlov undirilmasdan oʻtkazilishini;

aeroport binosi xonalarining “Uzbekistan Agrominitech Expo-2015” va “Uzbekistan Agrotechmash Expo-2015” koʻrgazmalari reklama koʻrsatkichlari bilan jihozlanishini;

tadbir mehmonlariga va ishtirokchilariga xizmat koʻrsatadigan avtotransport vositalarining taksilar va turizm avtobuslari uchun moʻljallangan “Toshkent” aeroporti avtomobillar toʻxtash joyiga Oʻzbekiston Respublikasi Tashqi iqtisodiy aloqalar, investitsiyalar va savdo vazirligi buyurtmanomalariga binoan bepul kiritilishini taʼminlasin.

13. “Oʻzbekiston temir yoʻllari” kompaniyasi:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi tizimiga kiruvchi tashkilotlarning hamda “Uzbekistan Agrominitech Expo-2015” va “Uzbekistan Agrotechmash Expo-2015” koʻrgazmalari ishtirokchilarining buyurtmanomalariga binoan, koʻrgazmaga yuborilayotgan koʻrgazma yuklarining imtiyozli tariflar boʻyicha tashilishini, belgilangan stavkalarning kamida 30 foizi miqdorida chegirma berilishini, belgilangan manzilga yetkazib berishning va temir yoʻlda koʻrgazmaga olib kelinayotgan yuklarni tushirish uchun vagonlarning yigʻimlar undirilmasdan oʻz vaqtida berishning tezkor kuzatib turilishini;

koʻrgazmaga kelayotgan vagonlarning boʻsh turib qolganligi uchun toʻlovlardan ozod qilishni taʼminlasin.

14. Oʻzbekiston milliy teleradiokompaniyasi va Oʻzbekiston Milliy axborot agentligi koʻrgazmalarga tayyorgarlik va koʻrgazmalar ishlarining matbuot hamda elektron ommaviy axborot vositalarida, shu jumladan, internet-nashrlarda keng yoritilishini taʼminlasinlar.

15. Oʻzbekiston matbuot va axborot agentligi Oʻzbekiston Respublikasi Tashqi iqtisodiy aloqalar, investitsiyalar va savdo vazirligining buyurtmanomalariga binoan, “Uzbekistan Agrominitech Expo-2015” va “Uzbekistan Agrotechmash Expo-2015” koʻrgazmalariga keluvchilar uchun shartnoma asosida, imtiyozli shartlarda maʼlumotnoma-axborot bukletlari hamda sumkalar tayyorlanishini taʼminlasin.

16. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.