Mahalliy korxonalarda ishlab chiqarilayotgan mahsulotning raqobatbardoshligini yanada oshirish, uni ishlab chiqarish hamda ichki va tashqi bozorlarda sotish hajmlarini ko‘paytirish, shu asosda sanoat tarmoqlarini barqaror rivojlantirishni va eksport salohiyatini o‘stirishni ta’minlash, shuningdek energiya samaradorligi va energiyani tejash standartlarini iqtisodiyotga yanada samarali joriy etish maqsadida Vazirlar Mahkamasi qaror qiladi:

1. Uyushmalar, aksiyadorlik kompaniyalari va yirik sanoat korxonalari tomonidan O‘zbekiston Respublikasi Iqtisodiyot vazirligi va Moliya vazirligi bilan birgalikda ishlab chiqilgan, birinchi navbatda:

energiya resurslari iste’molini qisqartirish va ishlab chiqarishda energiya samaradorligini oshirish;

texnologik jarayonlarni hamda material-xomashyo resurslarini sarflash normalarini, foydalanish va noishlab chiqarish xarajatlarini axborot-kommunikatsiya texnologiyalarini joriy etish yo‘li bilan ratsionalizatsiya qilish;

mehnat unumdorligini oshirish, boshqaruv hamda sanoat-ishlab chiqarish xodimlari sonini maqbullashtirish va boshqa omillar hisobiga 2015-yilda ishlab chiqarish xarajatlarini qisqartirish va mahsulot tannarxini o‘rtacha 10 foizga pasaytirish bo‘yicha takliflari ilovaga* muvofiq ma’qullansin.

2. Vazirlar Mahkamasi komplekslari, respublika vazirliklari, idoralari, uyushmalari, aksiyadorlik kompaniyalari rahbarlari:

ularning tarkibiga kiruvchi sanoat korxonalari uchun, tarmoq bo‘yicha ishlab chiqarish xarajatlarini qisqartirish va mahsulot tannarxini pasaytirishning ushbu qaror bilan ma’qullangan yig‘ma parametrlaridan kelib chiqqan holda, mahsulot tannarxini pasaytirishning maqsadli parametrlarini o‘n kun muddatda tasdiqlasinlar;

korxonalarda ishlab chiqarish xarajatlarini qisqartirish va mahsulot tannarxini pasaytirish bo‘yicha ko‘rilayotgan chora-tadbirlarning amalga oshirilishi yuzasidan har chorakda monitoring o‘rnatsinlar;

amalga oshirilgan monitoring yakunlariga ko‘ra, zarurat bo‘lganda, ishlab chiqarish xarajatlarini qisqartirish va mahsulot tannarxini pasaytirish parametrlariga erishishning to‘liqligi va samaradorligidan kelib chiqqan holda, korxonalar rahbarlarini moddiy rag‘batlantirish yoki ularning shaxsiy mas’uliyatini oshirish chora-tadbirlarini qo‘llasinlar.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari “O‘zdavenergonazorat”, “O‘zneftgazinspeksiya” davlat inspeksiyalari hamda boshqa manfaatdor vazirliklar va idoralar bilan birgalikda ikki oy muddatda Yoqilg‘i energetika resurslarini tejash bo‘yicha komissiyaga ko‘chalarni yoritish qurilmalaridagi barcha qizdirish lampalarini energiyani tejaydigan lampalarga o‘tkazish jadvalini, ularni moliyalashtirish manbalarini ko‘rsatgan holda, tasdiqlash uchun kiritsinlar.

4. “O‘zdavenergonazorat”, “O‘zneftgazinspeksiya” davlat inspeksiyalari:

2015-yil 1-fevralgacha bo‘lgan muddatda qonun hujjatlariga har yili jami 2,0 ming tonnadan ortiq shartli yoqilg‘i hajmida energiya resurslari ishlatadigan iste’molchilar bo‘yicha majburiy energetika tekshiruvi o‘tkazilishini nazarda tutadigan o‘zgartirishlar kiritish yuzasidan taklif kiritsinlar;

“O‘zstandart” agentligi bilan birgalikda respublikada sotilayotgan barcha maishiy elektr priborlarini, yangidan qurilayotgan binolar va inshootlarni, energiya iste’moli va energiya samaradorligi borasidagi ilg‘or xorijiy tajriba asosida, energiya iste’moli ko‘rsatkichlari bo‘yicha energetika jihatdan majburiy markirovkalash va sertifikatlash tizimini respublikada bosqichma-bosqich joriy etishga doir takliflarni bir oy muddatda ishlab chiqsinlar va Vazirlar Mahkamasiga kiritsinlar.

5. Belgilab qo‘yilsinki, Vazirlar Mahkamasining 2010-yil 21-iyuldagi 154-son qarori bilan tasdiqlangan Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturini shakllantirish tartibi to‘g‘risidagi Nizomning tasdiqlangan normativ-texnik hujjatlar doirasida texnologik jarayonlarni ratsionalizatsiya qilish hamda material-xomashyo va energiya resurslarini sarflash normalarini maqbullashtirish chora-tadbirlarini amalga oshirish hisobiga mahsulot tannarxini pasaytirish, sotib olinayotgan xomashyo, materiallar va butlovchi buyumlar qiymatini pasaytirish, foydalanish xarajatlarini va qo‘shimcha xarajatlarni qisqartirish, xodimlarning yillik sonini maqbullashtirish chora-tadbirlarini amalga oshirish hisobiga mahsulot tannarxini pasaytirish natijasida mahalliylashtirish darajasini pasaytirishga doir qismi 2015-yilda buzilish deb hisoblanmaydi.

6. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.