Vazirlar Mahkamasi qayd etadiki, O‘zbekiston Respublikasi Prezidentining “Sog‘liqni saqlash tizimini isloh qilish davlat dasturi to‘g‘risida” 1998-yil 10-noyabrdagi PF-2107-son Farmoniga muvofiq respublikada zamonaviy, yuksak jahon talablariga javob beradigan tashhis qo‘yish va davolash tibbiyot asbob-uskunalari bilan jihozlangan, yuqori malakali vrachlar va o‘rta tibbiyot xodimlari bilan ta’minlangan shoshilinch tibbiy yordamning yaxlit tizimi yaratilgan va samarali faoliyat ko‘rsatmoqda.

Aholiga shoshilinch tibbiy xizmat ko‘rsatishni tashkil etishni yanada takomillashtirish va uning sifatini oshirish, shoshilinch tibbiy yordam tizimini rivojlantirishni rag‘batlantirish maqsadida Vazirlar Mahkamasi qaror qiladi:

1. Aholiga shoshilinch tibbiy yordam xizmatini, ayniqsa respublika mintaqalarida yanada rivojlantirish, tizimda ishlayotgan kadrlarni rag‘batlantirishni kuchaytirish, zamonaviy, yuqori texnologiyali tashhis qo‘yish va davolash asbob-uskunalaridan malakali foydalanishni va ularga servis xizmati ko‘rsatishni ta’minlash sog‘liqni saqlash tizimini isloh qilish hozirgi bosqichining ustuvor vazifasi hisoblansin.

Aholiga shoshilinch tibbiy yordam ko‘rsatish tizimini rivojlantirishni amaliy qo‘llab-quvvatlash uchun Respublika shoshilinch tibbiy yordam markazi huzurida budjetdan tashqari Shoshilinch tibbiy yordam xizmatini qo‘llab-quvvatlash va rivojlantirish jamg‘armasi tashkil etilsin.

Quyidagilar:

davlat budjeti mablag‘lari, shu jumladan budjet mablag‘laridan samarali foydalanish hisobiga tejalgan mablag‘lar;

yuridik va jismoniy shaxslarning, O‘zbekiston Respublikasi rezidentlari va norezidentlarining homiylik mablag‘lari, xalqaro tashkilotlarning grantlari;

qonunchilikda taqiqlanmagan boshqa mablag‘lar Jamg‘armani shakllantirish manbalari etib belgilansin.

2. Shoshilinch tibbiy yordam xizmatini qo‘llab-quvvatlash va rivojlantirish jamg‘armasi to‘g‘risidagi nizom 1-ilovaga muvofiq tasdiqlansin.

3. Shoshilinch tibbiy yordam xizmatini qo‘llab-quvvatlash va rivojlantirish jamg‘armasining Homiylik kengashi 2-ilovaga* muvofiq tarkibda tuzilsin.

Homiylik kengashiga quyidagi vazifalar yuklansin:

shoshilinch tibbiy yordam xizmatining moddiy-texnika bazasini mustahkamlash, uni zamonaviy tashhis qo‘yish va davolash asbob-uskunalari bilan jihozlash bo‘yicha vazifalarni amalga oshirishga butun choralar bilan ko‘maklashish;

shoshilinch tibbiy yordam xizmati xodimlarining malakasini oshirishga, xizmatning tibbiyot muhandis-texnik va yordamchi xodimlari mehnatini moddiy rag‘batlantirishni kuchaytirishga ko‘maklashish;

shoshilinch tibbiy yordamni rivojlantirish bo‘yicha vazifalarni hal etish uchun manfaatdor davlat va jamoat tuzilmalarini, xalqaro tashkilotlarning, mamlakatimizdagi va xorijiy investorlarning keng jalb etilishini ta’minlash;

shoshilinch tibbiy yordam xizmatini qo‘llab-quvvatlash va rivojlantirish jamg‘armasi mablag‘laridan maqsadli va samarali foydalanilishi ustidan nazoratni amalga oshirish.

4. 2004-yil 1-yanvardan boshlab shoshilinch va tez tibbiy yordam xizmati xodimlarining, shu jumladan muhandis-texnik xodimlarining lavozim maoshlari Mehnatga haq to‘lash yagona tarif setkasi bo‘yicha tarif razryadini oshirish hisobiga 15 foizga oshirilsin.

Belgilab qo‘yilsinki, amaldagi qonunchilikda nazarda tutilgan ikki yoki undan ko‘p asoslar bo‘yicha maoshlarni oshirish huquqiga ega bo‘lgan bo‘linmalar va lavozimlar uchun maoshlarni oshirish miqdori 30 foizdan oshmasligi kerak.

5. O‘zbekiston Respublikasi Sog‘liqni saqlash vazirligi 2004-yil 1-yanvargacha:

Shoshilinch tibbiy yordam respublika markazi huzurida yuqori malakali muhandis-mutaxassislardan noyob, yuqori texnologiyali tashhis qo‘yish va davolash asbob-uskunalariga servis xizmati ko‘rsatish va ularni ta’mirlash bo‘yicha 20 kishidan iborat ko‘chma xizmat tashkil etsin;

servis xizmati ko‘rsatish muhandis-texnik xodimlarini o‘qitish va ularning malakasini oshirish, shu jumladan yuqori texnologiyali tashhis qo‘yish va davolash asbob-uskunalarini ishlab chiqaruvchi va yetkazib beruvchi xorijiy firmalarda bevosita tajriba orttirishi bo‘yicha tadbirlarni ishlab chiqsin va amalga oshirsin;

Shoshilinch tibbiy yordam respublika markazidagi, viloyatlar va tumanlar filiallaridagi hamda servis xizmati ko‘rsatilishi va ta’mirlanishi kerak bo‘lgan tibbiy asbob-uskunalar va texnikalar ro‘yxatini tasdiqlasin.

6. O‘zbekiston Respublikasi Sog‘liqni saqlash vazirligi Moliya vazirligi hamda Mehnat va aholini ijtimoiy muhofaza qilish vazirligi bilan birgalikda bir oy muddatda:

yuqori texnologiyali tashhis qo‘yish va tibbiyot asbob-uskunalariga servis xizmati ko‘rsatish uchun mas’ul bo‘lgan muhandis-texnik xodimlar lavozimlari ro‘yxatini;

shoshilinch tibbiy yordam xizmati xodimlari uchun ular ishining tezkorlik va tig‘izlik xarakterini hisobga oluvchi shtat normativlarini ishlab chiqsin va tasdiqlasin.

7. O‘zbekiston Respublikasi Sog‘liqni saqlash vazirligi Oliy va o‘rta maxsus ta’lim vazirligi bilan birgalikda 2004-2005 o‘quv yilidan boshlab:

tibbiyot oliy o‘quv yurtlarining davolash fakultetlari talabalarining, tibbiyot kollejlari va o‘rta tibbiyot xodimlari malakasini oshirish bo‘yicha o‘quv yurtlari o‘quvchilarining o‘quv dasturiga shoshilinch tibbiy yordam masalalarini majburiy ravishda chuqur o‘rganishni kiritsin;

“Shoshilinch tibbiy yordam” ixtisosi bo‘yicha magistratura ochishni nazarda tutsin;

“Shoshilinch tibbiyot vrachi” mutaxassisiga nisbatan malaka tavsifnomalari va talablarini ishlab chiqsin va uni vrachlik ixtisoslari klassifikatoriga kiritsin;

Toshkent vrachlar malakasini oshirish instituti huzurida shoshilinch tibbiy yordam kafedrasini tashkil etsin.

8. O‘zbekiston Respublikasi Moliya vazirligi:

Shoshilinch tibbiy yordam respublika markaziga Vazirlar Mahkamasining zaxira jamg‘armasidan 2003-yilda 50.0 mln so‘m va 2004-yilda 150,0 mln so‘m ajratsin, bu mablag‘larni budjetdan tashqari Shoshilinch tibbiy yordam xizmatini qo‘llab-quvvatlash va rivojlantirish jamg‘armasiga maqsadli o‘tkazsin;

O‘zbekiston Respublikasi Sog‘liqni saqlash vazirligi bilan birgalikda har yili O‘zbekiston Respublikasi respublika budjeti loyihasini tuzishda shoshilinch tibbiy yordam xizmati uchun asbob-uskunalar, anjomlar, tibbiyot buyumlari, ehtiyot qismlar va sarflanadigan materiallar xarid qilish xarajatlarining alohida satrda ajratib ko‘rsatilishini nazarda tutsin.

9. Qoraqalpog‘iston Respublikasi Vazirlar Kengashi, viloyatlar, hokimliklari O‘zbekiston Respublikasi Sog‘liqni saqlash vazirligi bilan birgalikda bir oy muddatda shoshilinch tibbiy yordam xizmatining viloyatlar, shaharlar va tumanlardagi bo‘linmalarini qo‘llab-quvvatlash yuzasidan, ularni zamonaviy, yuqori texnologiyali tibbiyot asbob-uskunalari bilan jihozlash, mamlakatimizdagi va chet ellardagi yetakchi klinikalar hamda tibbiyot asbob-uskunalari ishlab chiqaruvchilar bazasida tibbiy va muhandis-texnik xodimlarni tayyorlash, qayta tayyorlash va ularning malakasini oshirishga doir tadbirlarni ishlab chiqsinlar va amalga oshirsinlar.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.A. Azizxo‘jayev zimmasiga yuklansin.

1. Budjetdan tashqari Shoshilinch tibbiy yordam xizmatini qo‘llab-quvvatlash va rivojlantirish jamg‘armasi (keyingi o‘rinlarda Jamg‘arma deb ataladi) Shoshilinch tibbiy yordam respublika markazi huzurida, shoshilinch tibbiy yordam xizmatining moddiy-texnika bazasini mustahkamlash, tibbiy, muhandis-texnik va yordamchi xodimlarni moddiy qo‘llab-quvvatlash va ular mehnatini rag‘batlantirish, shoshilinch tibbiy yordam sohasida islohotlarni amalga oshirishga ko‘maklashish maqsadida tashkil etilgan.

2. Quyidagilar:

davlat budjeti mablag‘lari, shu jumladan budjet mablag‘laridan samarali foydalanish hisobiga tejalgan mablag‘lar;

yuridik va jismoniy shaxslarning, O‘zbekiston Respublikasi rezidentlari va norezidentlarining homiylik mablag‘lari, xalqaro tashkilotlarning grantlari;

qonunchilik bilan taqiqlanmagan boshqa mablag‘lar Jamg‘armani shakllantirish manbalari hisoblanadi.

3. Budjetdan tashqari Shoshilinch tibbiy yordam xizmatini qo‘llab-quvvatlash va rivojlantirish jamg‘armasi mablag‘larini boshqarishni shaxsiy tarkibi O‘zbekiston Respublikasi Vazirlar Mahkamasi tomonidan tasdiqlanadigan Homiylik kengashi amalga oshiradi.

4. Jamg‘arma mablag‘laridan:

Shoshilinch tibbiy yordam respublika markazi (keyingi o‘rinlarda Markaz deb ataladi) bo‘linmalarining, uning viloyatlardagi filiallarining, markaziy tuman shifoxonalari va markaziy shahar shifoxonalari huzuridagi bo‘limlarining moddiy-texnika bazasini mustahkamlashda, ularni zamonaviy tashhis qo‘yish va davolash asbob-uskunalari bilan jihozlashda;

yuqori texnologiyali tashhis qo‘yish va tibbiyot asbob-uskunalariga servis xizmati ko‘rsatish va ularni ta’mirlash ko‘chma xizmatini tashkil etishda;

mamlakatimizdagi va chet ellardagi yetakchi tibbiyot markazlarida hamda yuqori texnologiyali tashhis qo‘yish va davolash asbob-uskunalarini ishlab chiqaruvchi korxonalarda o‘qitishni moliyaviy qo‘llab-quvvatlash yo‘li bilan tibbiyot xodimlari va muhandis-texnik xodimlar malakasini oshirishda;

shoshilinch tibbiy yordam xizmatining tibbiy, muhandis-texnik va yordamchi xodimlarini moddiy qo‘llab-quvvatlashda va ular mehnatini rag‘batlantirishda;

shoshilinch tibbiy yordamni tashkil etish va ko‘rsatishning ustuvor vazifalari bo‘yicha ilmiy tadqiqotlar o‘tkazishni rag‘batlantirishda;

kadrlar potensialini, aholiga shoshilinch tibbiy yordam xizmatida ishlaydigan iqtidorli yoshlarni qo‘llab-quvvatlashni kuchaytirishda;

shoshilinch tibbiy yordam xizmati faoliyatini yaxshilashga yo‘naltirilgan, Homiylik kengashi bilan kelishilgan boshqa tadbirlarda foydalaniladi.

5. Jamg‘armaning joriy yilda foydalanilmagan mablag‘lari budjetga olib qo‘yilmaydi va ulardan keyingi yilda foydalaniladi.

6. Fond mablag‘laridan foydalanish daromadlar va xarajatlarning har yilgi smetasini tuzish orqali amalga oshiriladi, ushbu smeta Shoshilinch tibbiy yordam respublika markazi direktorining taqdimnomasiga ko‘ra Homiylik kengashi tomonidan tasdiqlanadi.

Markaz direktori qonunchilikda nazarda tutilgan tartibda Jamg‘arma faoliyatining tezkor tahlilini va buxgalteriya hisobini, shuningdek hisobot ma’lumotlari va balans hisob-kitoblarining ishonchliligini ta’minlaydi.

7. Homiylik kengashini O‘zbekiston Respublikasi Vazirlar Mahkamasi tomonidan lavozimga tasdiqlanadigan rais boshqaradi.

Jamg‘armaning Homiylik kengashi:

Jamg‘armaga yuklangan vazifalarni amalga oshirishga butun choralar bilan ko‘maklashadi;

shoshilinch tibbiy yordamni rivojlantirish bo‘yicha vazifalarni hal etish uchun manfaatdor davlat va jamoat tuzilmalarini, xalqaro tashkilotlarni, mamlakatimizdagi va xorijiy investorlarni keng jalb etishni ta’minlaydi;

Jamg‘arma faoliyati, uning qonunchilikka va ushbu Nizomga muvofiqligi ustidan nazoratni amalga oshiradi;

Jamg‘arma daromadlari va xarajatlarining har yilgi smetasini tasdiqlaydi;

Jamg‘arma mablag‘laridan maqsadli va samarali foydalanilishini nazorat qiladi;

o‘z majlislarida Shoshilinch tibbiy yordam respublika markazi direktorining Jamg‘arma ishlarining ahvoli va uning mablag‘lari harakati to‘g‘risidagi hisobotlarini muntazam ravishda eshitib boradi;

Jamg‘arma mablag‘laridan foydalanishning yillik moliyaviy hisobotini ko‘rib chiqadi va tasdiqlaydi;

Jamg‘arma faoliyati bilan bog‘liq bo‘lgan boshqa masalalarni qonunchilikka muvofiq hal qiladi.

Jamg‘armaning Homiylik kengashi Shoshilinch tibbiy yordam respublika markazi direktorining Jamg‘armaning maqsadi va vazifalariga, amaldagi qonunchilikka zid bo‘lgan qarorlarini bajarishni to‘xtatib turish yoki bekor qilish huquqiga ega.

8. Jamg‘armaning Homiylik kengashi majlislari muntazam ravishda, biroq har chorakda kamida bir marta o‘tkaziladi.

Majlis agar unda Jamg‘arma Homiylik kengashi a’zolarining kamida 2/3 qismi qatnashgan taqdirda vakolatli hisoblanadi.

Jamg‘arma mablag‘laridan foydalanish bo‘yicha qaror Jamg‘arma Homiylik kengashi a’zolarining oddiy ko‘pchilik ovozi bilan qabul qilinadi.

Homiylik kengashi majlisi protokoli Homiylik kengashi raisi tomonidan imzolanadi.

9. Jamg‘arma mablag‘larining jamg‘arilishi va tasdiqlangan smeta doirasida sarflanishi masalalari bo‘yicha tezkor, joriy boshqaruv Shoshilinch tibbiy yordam respublika markazi direktori tomonidan amalga oshiriladi.

Markaz direktori Jamg‘arma mablag‘laridan xarajatlarning tasdiqlangan smetasiga qat’iy muvofiq ravishda maqsadli va samarali foydalanilishi uchun shaxsan javob beradi.

10. Shoshilinch tibbiy yordam respublika markazi direktori quyidagilarga majbur:

Jamg‘arma Homiylik kengashining ko‘rib chiqishi uchun materiallarni tayyorlashni ta’minlash;

Homiylik kengashi qarorlarini Shoshilinch tibbiy yordam respublika markaziga, uning filiallari va bo‘limlariga yetkazish;

Homiylik kengashi qarorlarini o‘z vaqtida bajarish, Jamg‘armaning ajratilgan mablag‘laridan foydalanishni nazorat qilish va monitoringini amalga oshirish;

Homiylik kengashi majlislarida ko‘rib chiqish uchun Jamg‘arma daromadlari va xarajatlari smetalari loyihalarini tayyorlash;

Homiylik kengashi majlislarida Jamg‘arma ishlarining ahvoli va mablag‘larining harakati to‘g‘risida hisobot berish;

Homiylik kengashiga, O‘zbekiston Respublikasi Sog‘liqni saqlash vazirligiga Jamg‘arma mablag‘laridan foydalanish bo‘yicha yillik va choraklik moliya hisobotlarini taqdim etish.

11. Shoshilinch tibbiy yordam respublika markazi direktori quyidagi huquqlarga ega:

Homiylik kengashida ko‘rib chiqish uchun Jamg‘arma mablag‘larini sarflash yo‘nalishlari bo‘yicha takliflarni shakllantirish va kiritish;

Homiylik kengashi qarorlari asosida shoshilinch tibbiy yordam xizmatining tibbiy, muhandis-texnik va yordamchi xodimlari ish haqini Jamg‘armada to‘plangan mablag‘lar hisobiga 100 foizgacha ko‘paytirish.

12. Jamg‘arma mablag‘laridan foydalanish to‘g‘risidagi hisobot har chorakda Jamg‘armaning Homiylik kengashida ko‘rib chiqiladi va Homiylik kengashi raisi tomonidan O‘zbekiston Respublikasi Moliya vazirligiga taqdim etiladi.