Vazirlar Mahkamasi qaror qiladi:

Vazirlar Mahkamasining “O‘zbekiston Respublikasida chakana savdo qoidalarini hamda O‘zbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash to‘g‘risida” 2003-yil 13-fevraldagi 75-son qaroriga (O‘zbekiston Respublikasi QT, 2003-y., 2-son, 15-modda) quyidagi o‘zgartirishlar kiritilsin:

a) O‘zbekiston Respublikasida chakana savdo qoidalari (qarorga 1-ilova) 60-bandining o‘ninchi xatboshi quyidagi tahrirda bayon qilinsin:

“maktabgacha bolalar muassasalari, diniy muassasalardan, o‘quv yurtlaridan 300 metr kam masofada joylashgan ko‘chma va turg‘un savdo obyektlarida, shuningdek bevosita davolash-profilaktika va sport-sog‘lomlashtirish muassasalari hududida, o‘quv yurtlari va ishlab chiqarish korxonalari oshxonalarida — ko‘rsatib o‘tilgan o‘quv yurtlari va korxonalar faoliyat ko‘rsatayotgan vaqtda”;

b) O‘zbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarida (qarorga 2-ilova):

15-band quyidagi tahrirda bayon qilinsin:

“15. Umumiy ovqatlanish subyekti taomlar, mahsulotlar, ichimliklarning assortiment ro‘yxatini sanitariya va texnologiya talablariga to‘liq rioya qilishni hisobga olgan holda mustaqil ravishda ishlab chiqadi, taomlar retsepturalarini tuzadi va tasdiqlaydi, ular tegishli tuman (shahar) davlat sanitariya nazorati xizmatlari bilan kelishib olinadi. Kalkulatsiya kartochkasi mahsulot narxini belgilash uchun asos hisoblanmaydi, u faqat savdo obyektlari egalari tomonidan ichki foydalanish uchun xizmat qiladi. Kalkulatsiya kartochkasini yuritish shart emas. Mahsulot narxi unga bo‘lgan talab va taklifdan kelib chiqqan holda belgilanadi”;

17-band o‘z kuchini yo‘qotgan deb hisoblansin;

18—27-bandlar 17—26-bandlar hisoblansin.